1. ?Olsem wanem tingting we i foldaon i save afektem yumi?

EVRI dei yumi fesem ol problem, mo yumi traem bes blong yumi blong dil wetem olgeta. Ating yu agri se i isi moa blong dil wetem ol problem taem tingting i no foldaon. Taswe yumi mas luk tingting we i foldaon olsem wan stilman we i kam blong stilim glad mo strong tingting blong yumi. Ol Proveb 24:10 mo futnot blong hem i talem se: “Sipos tingting blong yu i foldaon long taem blong trabol, bambae yu no gat naf paoa.” Yes, tingting we i foldaon i save karemaot paoa we yumi nidim blong winim ol problem blong laef.

2. ?Wanem i save mekem se tingting blong yumi i foldaon, mo bambae yumi tokbaot wanem long stadi ya?

² I gat plante samting we oli save mekem tingting blong yumi i foldaon, sam long ol samting ya oli kamaot long yumi, olsem sin we i stap long yumi, ol slak fasin blong yumi, mo sik. Mo samfala oli kamaot aotsaed, olsem yumi no kasem wan asaenmen long wok blong Jehova, o yumi mas prij long wan teritori we i luk olsem se i no karem frut. Long stadi ya, bambae yumi tokbaot sam samting we yumi save mekem, blong winim tingting we i foldaon.

3. ?Wanem i save halpem yumi blong gat stret tingting long sin we yumi bon wetem?

³ I isi nomo blong gat rong tingting long yumi wan from ol slak fasin blong yumi mo taem yumi mekem sin. From samting ya, taem yumi mestem, maet yumi ting se Jehova bambae i neva letem yumi go long niufala wol blong hem. Tingting olsem i save spolem yumi. ?Yumi mas gat wanem tingting long sin we yumi bon wetem? Baebol i soem se evri man i “mekem  sin,” Jisas nomo i stret gud. (Rom 3:23) Be God ya we i Raetem Baebol, i no stap lukaotem mastik o i ekspektem se yumi mekem i stret gud oltaem. Be, hem i wan Papa we i gat lav mo i wantem halpem yumi. Hem i gat longfala tingting tu. Hem i luk se yumi traehad blong winim ol slak fasin blong yumi, mo winim rong tingting we yumi gat long yumi wan, mo hem i rere blong halpem yumi.—Rom 7:18, 19.

4-5. Folem 1 Jon 3:19, 20, ?wanem i givhan long tu sista blong winim tingting we i foldaon?

⁴ Tingbaot eksampol blong Debora mo Maria. * Taem Debora i pikinini, plante taem oli daonem hem. Oli neva talem gudfala toktok long hem. Taswe hem i gat nogud tingting long saed blong hem wan. Taem hem i mekem ol smol mastik nomo, hem i harem se hem i nogud olgeta. Maria tu i gat sem problem. Ol famle blong hem oli stap daonem hem. From samting ya, hem i gat filing ya se hem i gud blong nating nomo. !Afta we hem i kam long trutok, hem i filim se i no stret blong hem i karem nem blong God!

⁵ Be yet, tufala sista ya i no stop blong mekem wok blong Jehova. ?From wanem? Wan samting se tufala i sakem ol baden blong tufala long Jehova, taem tufala i prea strong long hem. (Sam 55:22) Tufala i akseptem tingting ya se Papa blong yumi long heven we i gat lav, hem i savegud ol ekspiriens we yumi bin gotru long hem mo ol nogud tingting we oli afektem yumi. Be tu, hem i luk gudfala samting we i stap long hat blong yumi, hemia ol gudfala fasin we maet yumi no luk.—Ridim 1 Jon 3:19, 20.

6. ?Wanem riaksen blong wan man we i foldaon bakegen long wan slak fasin blong hem?

⁶ Wan man we i stap traehad blong winim wan slak fasin blong hem, maet i foldaon bakegen nao i gat nogud tingting long hem wan. I tru se i nomol blong filim gilti taem yumi mekem sin. (2 Kor. 7:10) Be, yumi no mas bitim mak mo jajem yumi wan se: ‘Mi mi nogud olgeta. Bae Jehova i neva fogivim mi.’ Ol tingting olsem oli no stanap long trutok, mo i save stopem yumi blong mekem wok blong Jehova. Tingbaot samting we yumi ridim long Ol Proveb 24:10—sipos tingting blong yumi i foldaon, bambae yumi no gat paoa. Be i gud yumi “stretem ol samting ya” wetem Jehova tru long prea, mo askem hem blong i fogivim yumi. (Aes. 1:18) Sipos yu rili tanem tingting blong yu, bambae hem i fogivim yu. Mo tu, yu go toktok long ol elda. Bambae oli gat longfala tingting blong halpem yu blong kamgud bakegen long spirit.—Jem. 5:14, 15.

7. ?From wanem tingting i no mas foldaon sipos i had blong mekem samting we i stret?

 ⁷ Jean-Luc, wan elda long Franis, i talem long olgeta we oli stap traehad blong winim wan slak fasin blong olgeta, se: “Wan stret man long ae blong Jehova, hem i no wan man we i neva mestem samtaem, be hem i wan man we i sore from ol mastik blong hem, mo oltaem i tanem tingting blong hem.” (Rom 7:21-25) Taswe yu no mas jajem yu wan sipos yu stap traehad blong winim wan slak fasin. Tingbaot se i no gat wan man we i save mekem hem i kam stret man long fes blong God. Yumi evriwan i nidim kaen fasin blong God we hem i givim tru long ransom.—Efes. 1:7; 1 Jon 4:10.

8. ?Taem tingting blong yumi i foldaon, yumi save lukluk i go long hu?

⁸ !Yumi save lukluk i go long famle blong yumi long spirit, hemia ol brata sista, blong kasem enkarejmen! Oli save lesin long yumi taem yumi nidim blong toktok, mo oli save talem ol gudfala toktok blong mekem yumi haremgud bakegen. (Prov. 12:25; 1 Tes. 5:14) Joy, wan sista long Naejeria we i winim tingting we i foldaon, i talem se: “Sipos ol brata sista oli no stap, bae mi no winim. Ol brata sista blong mi, oli pruf se Jehova i ansa long ol prea blong mi. Mo tru long olgeta, mi lanem blong leftemap tingting blong ol narafala.” Be yumi mas tingbaot se i no oltaem we ol brata sista blong yumi oli save stret taem we yumi nidim enkarejmen. Taswe yumi mas mekem faswan step blong go luk wan Kristin we i gat ekspiriens, mo talemaot nid blong yumi.

9. ?Olsem wanem Sam 41:3 mo 94:19 i enkarejem yumi?

⁹ Lukluk i go long Jehova blong i halpem yumi. Taem yumi gat wan sik, speseli wan sik we i stap longtaem, maet yumi faenem i had blong gat gudfala tingting. Jehova i no mekem merikel long yumi naoia, be hem i kamfotem yumi mo i save givim paoa we yumi nidim blong stanap strong. (Ridim Sam 41:3; 94:19.) Eksampol, hem i save pulum ol narafala Kristin blong oli kam givhan long yumi blong klinim haos o go soping. Hem i save pulum ol brata blong oli kam prea wetem yumi. O hem i save mekem yumi tingbaot ol tok long Baebol we oli kamfotem yumi, olsem nambawan hop ya blong laef we i stret gud long niufala wol, we i no gat sik mo safa long hem.—Rom 15:4.

10. ?From wanem tingting blong Isang i no foldaon i stap, afta long aksiden?

¹⁰ Isang we i stap long Naejeria, i gat wan aksiden we i mekem se hem i paralaes. Dokta i talem long hem se bambae hem i no moa save wokbaot. Isang i talem se: “Hat blong mi i brok mo tingting blong mi i foldaon.” ?Be tingting blong hem i foldaon i stap olsem? !Nogat! ?Wanem i halpem hem? Hem i eksplenem se: “Mi mo waef blong mi i neva stop blong prea long Jehova mo blong stadi long Tok blong hem. Mo mitufala i tingting strong long ol blesing blong mitufala, wetem hop ya tu blong laef long niufala wol blong God.”

11. ?Olsem wanem Cindy i kasem glad nating se hem i sik bigwan?

¹¹ Cindy, we i stap long Meksiko, i kasem wan sik we i save ded from. ?Olsem wanem hem i dil wetem problem ya? Taem hem i stap kasem tritmen, hem i putum mak ya se bambae hem i prij evri dei. Hem i raetem se: “Taem mi mekem olsem, mi save tingbaot moa ol narafala i bitim we mi tingbaot tritmen blong mi, soa, o filing ya we mi harem nogud tumas. Plan blong mi i olsem: Taem mi storian wetem ol dokta o ol nes, bae mi askem se famle blong olgeta i olsem wanem. Biaen bae mi askem se from wanem oli jusum blong mekem wan wok we i had olsem. Afta long hemia, i moa isi blong luk se weswan topik i save  tajem hat blong olgeta. Plante oli talem se i no oltaem we wan sikman i askem long olgeta se, ‘?Olsem wanem, yu oraet?’ Mo plante oli talem tangkiu from we mi kea long olgeta. Samfala oli givim kontak infomesen blong olgeta tu. !Taswe long hadtaem ya, Jehova i givim bigfala glad long mi, we mi tu mi sapraes from!”—Prov. 15:15.

12-13. ?Olsem wanem samfala we oli sik oli save joen long wok blong prij, mo wanem frut i kamaot from?

¹² Olgeta we oli sik o bodi blong olgeta i no strong, maet tingting blong olgeta i foldaon from we oli no save prij plante. Be yet, plante oli naf blong givim wan gudfala witnes. !Long Yunaeted Stet, sista ya Laurel i ledaon blong 37 yia, insaed long wan masin we i halpem hem blong pulum win! Long ol yia ya, hem i gat kansa, i gotru long ol bigfala operesen, mo oltaem i kasem sik blong skin. Be ol bigfala trabol ya oli no stopem hem blong toktok. Hem i prij long ol nes mo ol narafala we oli stap givhan long hem. ?Wanem frut i kamaot? !Hem i halpem moa long 17 man blong oli kasem stret save blong Baebol! *

¹³ Richard, wan elda long Franis, i talem wan gudfala samting we olgeta we oli stap nomo long haos o long wan hospital blong ol olfala, oli save mekem. Hem i talem se: “I gud oli gat wan smol disple blong ol buk. Disple ya i save pulum man blong askem kwestin nao oli save statem storian. Hemia i save enkarejem ol gudfala brata sista blong yumi we oli no moa save prij long ol haos wanwan.” Olgeta we oli stap nomo long haos, oli save joen tu long wok blong prij tru long leta mo telefon.

14. ?Wanem nambawan eksampol we Deved i soem?

¹⁴ Maet yia blong yumi, helt, o sam narafala samting, i mekem se yumi no save kasem wan asaenmen o privilej long kongregesen o long seket. Long saed ya, yumi save lanem sam samting long eksampol blong King Deved. Deved i wantem tumas blong bildim tempol blong God. Be taem hem i harem se i no hem we bambae i bildim, hem i sapotem fulwan man ya we God i givim wok ya long hem. Mo tu, Deved i givim bigfala kontribusen blong sapotem projek ya. !Hemia wan nambawan eksampol!—2 Saml. 7:12, 13; 1 Kron. 29:1, 3-5.

15. ?Olsem wanem Hugues i winim tingting we i foldaon?

¹⁵ Brata Hugues long Franis i gat ol problem blong helt, from samting ya hem i no moa wan elda, mo hem i no naf tu blong mekem ol smosmol wok nomo raon long haos. Hem i raetem se: “Fastaem, mi harem se mi gud blong nating nomo, mo tingting blong mi i foldaon bigwan. Be biaen, mi luksave se mi mas akseptem  situesen blong mi, nao mi faenem glad long wok we mi naf blong mekem blong Jehova. Mi gat strong tingting blong no givap. Olsem Gideon mo ol tri handred man blong hem we oli taed tumas, !bambae mi gohed blong faet!”—Jaj. 8:4.

16. ?Yumi save lanem wanem long eksampol blong ol enjel?

¹⁶ Ol gudfala enjel oli soem wan nambawan eksampol. Taem King Ehab i rul, Jehova i askem long ol enjel blong oli talemaot sam rod blong trikim rabis king ya. Sam enjel oli talemaot tingting blong olgeta. Be God i jusum wan enjel mo i talem se tingting blong hem bambae i wok gud. (1Ki 22:19-22) ?Tingting blong ol narafala enjel i foldaon, o oli talem se: ‘!Mi westem taem nomo!’? I no gat wan pruf we i soem se oli tingting olsem. Ol enjel oli rili gat tingting daon mo oli wantem se olgeta ona i go long Jehova nomo.—Jaj. 13:16-18; Rev. 19:10.

17. ?Yumi save mekem wanem sipos yumi harem nogud from we yumi no kasem wan asaenmen?

¹⁷ Tingbaot oltaem se privilej blong yumi, hemia blong karem nem blong God mo talemaot Kingdom blong hem. Maet yumi save kasem o lusum ol asaenmen blong yumi, be ol wok ya oli no mekem yumi spesel long ae blong God. Tingting daon nao i mekem se Jehova mo ol brata sista oli lavem yumi moa. Taswe yu plis long Jehova blong i halpem yu blong gat tingting daon, mo blong luksave se yu no naf blong mekem evri samting. Tingbaot ol gudfala eksampol blong tingting daon we i stap long Tok blong Hem. Mo rere blong mekem eni samting blong givhan long ol brata sista blong yu.—Sam 138:6; 1 Pita 5:5.

18-19. ?Olsem wanem blong stap glad long wok blong prij, nating se teritori i no karem frut?

¹⁸ ?Samtaem tingting blong yu i foldaon from we i luk olsem se teritori blong yu i no karem frut, o i had blong faenem man long haos? Long taem olsem, ?yumi save mekem wanem blong holemtaet glad o mekem i kam bigwan moa? Sam gudfala tingting i stap long bokis ya “ Sam Rod Blong Faenem Glad Long Minista Wok Blong Yu.” I impoten tu blong gat stret tingting long wok blong prij. ?Hemia i minim wanem?

¹⁹ Tingbaot oltaem wok ya blong talemaot nem mo Kingdom blong God. Jisas i talemaot klia se smol man nomo bambae oli folem rod blong laef. (Mat. 7:13, 14) Taem yumi stap long wok blong prij, yumi gat ona ya blong  wok wetem Jehova, Jisas, mo ol enjel. (Mat. 28:19, 20; 1 Kor. 3:9; Rev. 14:6, 7) Jehova i stap pulum ol man oli kam long hem. (Jon 6:44) Taswe sipos wan man i no intres long mesej blong yumi naoia, maet nekis taem bambae hem i lesin.

20. ?Olsem wanem Jeremaea 20:8, 9 i tijim yumi blong winim tingting we i foldaon?

²⁰ Yumi save lanem plante samting long profet Jeremaea. Hem i kasem asaenmen long wan teritori we i had. Ol man oli talem ol rabis tok long hem mo oli jikim hem “fuldei.” (Ridim Jeremaea 20:8, 9.) Tingting blong hem i foldaon bigwan kasem mak ya we hem i harem se i naf ya nao. Be hem i no givap. ?From wanem? !“Tok blong Jehova” i olsem wan faea insaed long Jeremaea, mo hem i no save holem i stap! Hemia i tru tu long yumi taem yumi fulumap tingting mo hat blong yumi wetem Tok blong God. Hemia wan risen from wanem yumi mas stadi Baebol evri dei mo tingting dip long hem. Long rod ya, glad blong yumi bambae i kam bigwan moa, mo minista wok blong yumi bambae i karem moa frut.—Jer. 15:16.

21. ?Olsem wanem yumi save winim tingting we i foldaon?

²¹ Debora we yumi tokbaot hem finis, i talem se: “Tingting we i foldaon i wan bigfala tul we Setan i yusum.” Be ol tul blong Setan oli no naf blong winim Jehova God. So taem tingting blong yu i foldaon from eni risen, askem strong long Jehova blong i halpem yu. Hem bambae i halpem yu blong dil wetem sin we i stap long yu mo ol slak fasin blong yu. Bambae hem i sapotem yu taem yu sik. Bambae hem i halpem yu blong gat stret tingting long saed blong ol asaenmen. Mo bambae hem i halpem yu blong gat wan positif tingting long minista wok blong yu. Antap moa, yu mas talemaot ol wari blong yu long Papa blong yu long heven. Wetem help blong hem, yu save winim tingting we i foldaon.