?Yu bin ridimgud ol Wajtaoa blong yia ya? Traem luk sipos yu save ansarem ol kwestin ya:

?Yumi mas tritim ol tabu Kristin olsem wanem?

Yumi luksave strong bilif blong olgeta, be yumi no mas leftemap olgeta bitim mak. Yumi blokem fasin ya blong “leftemap” olgeta. (Jud 16, fut.) Yumi no mas askem kwestin long saed blong hop blong olgeta.—w20.01, pej 28.

?Wanem i pruvum se Jehova i stap luk yu?

Baebol i soem se hem i luk yu bifo we yu bon. Mo hem i lesin long evri prea blong yu. Hem i save evri samting we i stap long hat mo tingting blong yu, mo ol aksen blong yu oli save mekem hem i glad. (1 Kron. 28:9; Prov. 27:11) Hem i pulum yu yu kam long hem.—w20.02, pej 12.

?Wanem sam eksampol we i soem wetaem i stret mo i no stret blong toktok?

Yumi glad blong tokbaot Jehova. Yumi no fraet blong toktok taem yumi luk narafala i mestem rod. Ol elda oli mas givim ol gudfala advaes taem i nidim. Yumi no tokbaot olsem wanem oli mekem wok blong yumi long ol kantri we i gat tabu. Yumi no talemaot ol praevet infomesen.—w20.03, pej 20-21.

?Olsem wanem ol lokis long Joel japta 2 oli defren long hemia blong Revelesen japta 9?

Joel 2:20-29 i talem se God i ronemaot ol lokis mo i promes blong givimbak olgeta samting we oli spolem. Nao biaen, God bambae i givim spirit blong hem. Ol samting ya i kamtru taem Babilon i kam long Isrel mo i spolemgud. Revelesen 9:1-11 i yusum pijatok blong ol lokis blong tokbaot ol tabu Kristin tede we oli no fraet blong talemaot jajmen blong God agensem rabis wol ya mo mekem ol sapota blong hem oli harem nogud.—w20.04, pej 3-6.

?Hu i king blong not tede?

Rasia mo ol kantri we oli joen wetem hem. Oli traem spolem ol man blong God, oli putum tabu long wok blong prij mo oli no laekem nating ol Witnes. King blong not i traem winim king blong saot.—w20.05, pej 12.

Ol naen fasin we Galesia 5:22, 23 i tokbaot, ?olgeta nomo oli ol “frut blong tabu spirit”?

No. Tabu spirit i halpem yumi blong gat ol narafala fasin tu, olsem stret fasin. (Efes. 5:8, 9)—w20.06, pej 17.

?Wanem wan denja blong postem pija blong yu wan long intenet?

Maet samting we yu postem i save givim tingting se yu stap soem yu nomo, mo yu no gat tingting daon.—w20.07, pej 6-7.

?Ol Kristin oli save lanem wanem long wan man we i gat gudhan blong fising?

Oli wok long ples mo taem we ol fis i stap. Oli langud blong yusum stret tul. Mo oli no fraet blong wok long rabis weta. Yumi tu yumi save mekem sem mak long wok blong prij.—w20.09, pej 5.

?Olsem wanem blong halpem studen blong i lavem God moa?

Enkarejem olgeta blong ridim Baebol evri dei mo tingting dip long hem. Mo yumi save tijim olgeta blong prea.—w20.11, pej 4.

?Hu ya “olgeta man we oli joen long Kraes [we] bambae oli laef bakegen”?—1 Kor. 15:22.

Aposol Pol i no stap tokbaot evri man we bambae oli laef bakegen. Be hem i stap tokbaot ol tabu Kristin, olgeta we “God i mekem [oli] tabu, blong [oli] save mekem wok olsem ol disaepol blong Kraes Jisas.” (1 Kor. 1:2; 15:18)—w20.12, pej 5-6.

?Ol tabu man bambae oli mekem wanem afta we oli ‘jenis wantaem nomo, olsem we yu satem ae, hemia long taem we saon blong laswan trampet i kamaot’?—1 Kor. 15:51-53.

Bambae oli joen wetem Kraes blong rulum ol man wetem wan aean stik. (Rev. 2:26, 27)—w20.12, pej 12-13.