Taem Jisas i stap long heven, hem i lanem ol gudfala fasin we i mekem hem i kam wan nambawan man blong wok. Biaen taem hem i kam long wol, hem i soem wan gudfala eksampol long fasin ya blong wok gud wetem narafala. ?Olsem wanem eksampol blong Jisas i save halpem yumi? Sipos yumi tekem taem blong stadi gud long eksampol blong hem, bambae yumi makem se i gat tri stamba trutok we i save halpem yumi blong wok gud mo joengud moa wetem ol brata mo sista blong yumi.

Wan gudfala man blong wok i gat tingting daon mo i tinghae long olgeta we oli wok wetem hem, be hem i no traem blong soem hem. Jisas i lanem fasin ya long Papa blong hem. Nating se Jehova nomo i karem taetel ya Krieta, be hem i wantem se ol narafala oli save tu ol impoten wok we Pikinini blong hem i mekem. Mo yumi luksave samting ya long tok we God i talem se: “I gud yumi mekem man long pija blong yumi.” (Jen. 1:26) Taem Jehova i talem ol tok ya, Jisas i save se Jehova i gat tingting daon.—Sam 18:35.

Taem Jisas i stap long wol, hem tu i soem se hem i gat tingting daon. Taem ol man oli presem hem from samting we hem i mekem, hem i presem God. (Mak 10:17, 18; Jon 7:15, 16) Jisas i wok had blong holemtaet pis wetem ol disaepol blong hem mo hem i tritim olgeta olsem ol fren, be i no ol slef. (Jon 15:15) Antap blong hemia, hem i wasem leg blong olgeta blong tijim olgeta se oli mas gat tingting daon. (Jon 13:5, 12-14) Olsem Jisas, yumi mas tinghae long olgeta we oli wok  wetem yumi, i bitim yumi tinghae long yumi wan. Taem yumi ona long narafala mo yumi no wantem blong oli presem yumi, yumi save mekem plante wok.—Rom 12:10.

Man we i gat tingting daon i luksave tu se “wok i save gohed gud, taem i gat plante man blong givim advaes.” (Prov. 15:22) Nating se yumi gat plante ekspiriens o yumi gat gudhan blong mekem wan samting, be yumi mas tingbaot se i no gat wan man we i save evri samting. Jisas tu i talem se i gat sam samting we hem i no save. (Mat. 24:36) Mo tu, hem i intres long tingting mo save blong ol disaepol blong hem we oli sinman. (Mat. 16:13-16) !Hemia nao from wanem oli glad blong joen wetem hem! Long sem fasin, taem yumi gat tingting daon mo yumi luksave se yumi no save evri samting mo letem ol narafala oli talemaot tingting blong olgeta, hemia i mekem se i gat pis mo “wok i save gohed gud.”

I impoten tumas blong ol elda oli folem fasin blong Jisas blong gat tingting daon taem oli wok tugeta. Oli mas tingbaot se tabu spirit i save pulum eni elda blong i talem wan samting we i save halpem bodi blong elda blong mekem wan gudfala desisen. Sipos long miting blong olgeta, ol elda oli meksua se evriwan oli no fraet blong talemaot ol tingting blong olgeta bambae oli save mekem ol desisen we i givhan long ful kongregesen.

Wan gudfala man blong wok i no mekem i strong long olgeta we oli wok wetem hem. Hem i rere blong lego prapa tingting blong hem mo folem tingting blong narafala. Oltaem Jisas i luk we Papa blong hem i no mekem i strong long narafala. Eksampol, Jehova i sanem Jisas i kam blong sevem ol sinman from panis ya blong ded.—Jon 3:16.

Jisas i folem tingting blong ol narafala taem hem i luk se i stret blong mekem olsem. Eksampol, tingbaot olsem wanem Jisas i halpem wan woman Fonisia, nating se hem i kam blong halpem nomo ol man Isrel. (Mat. 15:22-28) Mo tu, Jisas i no mekem i strong long ol disaepol blong hem. Afta we fren blong hem Pita i giaman se i no save hem, Jisas i rere nomo blong fogivim hem. Mo samtaem biaen hem i givim sam impoten wok blong Pita i mekem. (Luk 22:32; Jon 21:17; Wok 2:14; 8:14-17; 10:44, 45) Eksampol blong Jisas i tijim yumi se yumi mas “soemaot long olgeta man se [yumi] no stap mekem i strong tumas,” taem yumi rere blong folem tingting blong ol narafala.—Fil. 4:5.

Mo tu, fasin ya blong no mekem i strong long narafala, bambae i pulum yumi blong mekem sam  jenis blong mekem se yumi save wok long pis wetem ol defdefren kaen man. From we Jisas i mekem i gud long olgeta man, ol enemi blong hem oli jalus mo oli tok agensem hem se i stap “fren wetem ol man blong tekem takis mo ol man blong mekem sin” we oli lesen long mesej blong hem. (Mat. 11:19) ?Olsem wanem yumi save folem fasin blong Jisas blong wok gud wetem ol narafala? Brata ya Louis, i bin wok wetem plante defren man, taem hem i stap olsem eria elda mo taem i wok long Betel. Hem i talem se: “Mi traem blong tingbaot ol man we mi wok wetem olgeta olsem ol defren kaen saes ston we oli yusum blong bildim wan wol. Taem yu mekem sam smol jenis long fasin blong putum ol ston ya, long en bambae yu luk se yu wokem wan wol we i stret. Mi tu mi traehad blong mekem sam jenis blong wok gud wetem ol narafala, olsem nao mifala i save finisim wok.” !Hemia i wan gudfala fasin!

?Wetaem yumi save soem se yumi no mekem i strong long ol narafala long kongregesen? Yumi save mekem olsem taem yumi joen long wok blong prij, mo yumi wok wetem ol pablisa we oli gat ol defren responsabiliti insaed long famle o yia blong olgeta i defren long yumi. ?Yu yu rere blong traem wan defren rod blong prij we olgeta oli laekem, olsem nao oli save glad moa long wok blong prij?

Wan gudfala man blong wok i “rere blong serem ol samting” long narafala. (1 Tim. 6:18) Taem Jisas i stap wok klosap long Papa blong hem, hem i mas luksave se Jehova i no haedem save blong hem. Taem Jehova “i stap rerem heven,” Jisas i “stap long taem ya” mo hem i lanem samting long Jehova. (Prov. 8:27) Biaen, taem Jisas i stap wetem ol disaepol, hem i serem “evri samting we [hem i bin] harem” long Papa blong hem. (Jon 15:15) Yumi save folem eksampol blong Jehova taem yumi serem save mo ekspiriens blong yumi wetem ol brata mo sista. Wan gudfala man blong wok, bambae i no traem haedem ol gudfala infomesen we ol narafala oli nidim blong save, jes from we hem i wantem kontrolem olgeta. Be bambae hem i glad nomo blong serem ol gudfala samting we hem i lanem long ol narafala.

Yumi save talem ol gudfala toktok blong enkarejem olgeta we oli joen wetem yumi blong wok. Taem wan man i luksave ol traehad we yumi mekem mo i talem ol gudfala toktok long yumi, i sua se hemia i mekem se yumi harem gud. Jisas i tekem taem blong talem long ol man blong hem, ol gudfala samting we hem i luk long olgeta. (Skelem wetem Matiu 25:19-23; Luk 10:17-20.) Hem i talem long olgeta se bambae oli “mekem plante moa wok i bitim” hem. (Jon 14:12) Long naet bifo we hem i ded, hem i talem gudfala tok ya long ol aposol blong hem se: “Yufala ya nao yufala i stap oltaem wetem mi long olgeta trabol blong mi.” (Luk 22:28) Traem tingbaot olsem wanem ol tok ya i tajem hat blong olgeta mo i pulum olgeta blong tekem aksen. Sipos yumi tu, yumi tekem taem blong talem gudfala toktok long olgeta we oli wok wetem yumi, i sua se bambae oli glad mo oli mekem plante moa wok.

Wan brata, nem blong hem Kayode, i talem se: “Wan gudfala man blong wok i no nid blong mekem samting long fasin we i stretgud olgeta. Be hem i mekem ol narafala we oli wok wetem hem oli glad mo i mekem wok blong olgeta i isi.” ?Olsem wanem? ?Yu yu gat fasin olsem? Maet yu save askem long sam Kristin we yu wok wetem olgeta, blong oli talem long yu se yu yu wanem kaen man blong wok. Sipos oli glad blong wok wetem yumi olsem we ol disaepol oli glad blong wok wetem Jisas, yumi save talem sem tok olsem we aposol Pol i talem, i se: “Mifala i joen wetem yufala blong wok, blong mekem yufala i glad.”—2 Kor. 1:24.