1. ?Smoltaem bifo we Jisas i ded, hem i talem wanem long kriminol we i hang klosap long hem? (Luk 23:39-43)

 JISAS wetem tufala kriminol we i hang long saed blong hem oli safa bigwan bifo we oli ded. (Luk 23:32, 33) Tufala kriminol ya i stap tok nogud long Jisas, so i klia se tufala i no disaepol blong hem. (Mat. 27:44; Mak 15:32) Be wan, tingting blong hem i jenis, mo i talem se: “Jisas, taem yu go long Kingdom blong yu, yu tingbaot mi.” Nao Jisas i ansa se: “Tru mi talem long yu tede, bambae yu stap wetem mi long Paradaes.” (Ridim Luk 23:39-43.) I no gat pruf we i soemaot se kriminol ya i akseptem mesej blong “Kingdom blong heven” we Jisas i stap tokbaot taem i prij. Mo Jisas i neva talem se man ya bambae i go long Kingdom blong heven. (Mat. 4:17) Be hem i stap tokbaot Paradaes ya long wol we bambae i kamtru long fiuja. ?From wanem yumi talem olsem?

2. ?Wanem i soemaot se kriminol ya we i tanem tingting blong hem i wan man Jiu?

² I luk olsem se kriminol ya we i tanem tingting blong hem i wan man Jiu. Mo kriminol ya i talem long narafala man ya se: “?Olsem wanem? ?Yu yu no fraet long God? Yu yu kasem sem panis olsem man ya.” (Luk 23:40) Ol man Jiu oli wosipim wan God nomo, be ol man blong ol narafala nesen oli bilif long plante narafala god. (Eks. 20:2, 3; 1 Kor. 8:5, 6) Sipos tufala kriminol ya oli blong narafala nesen, maet bambae man ya i askem se, “?Yu yu no fraet long ol god?” Mo tu, God i no sanem Jisas i kam long ol man blong narafala nesen, be hem i sanem hem i kam long “ol laen blong Isrel nomo. Olgeta ya oli olsem ol sipsip we oli lus.” (Mat. 15:24) God i bin talemaot long ol man Isrel se bambae hem i mekem ol dedman oli laef bakegen. Mo maet kriminol ya i save long samting ya, mo ol tok blong hem oli soemaot se hem i sua se Jehova bambae i mekem Jisas i laef  bakegen blong i rul long Kingdom blong God. Mo i luk olsem se man ya tu i hop se God bambae i mekem hem i laef bakegen.

3. ?Yu ting se kriminol ya i tingbaot wanem taem Jisas i tokbaot Paradaes? Yu eksplenem. (Jenesis 2:15)

³ From we kriminol ya i wan man Jiu, i sua se hem i save long saed blong Adam mo Iv mo Paradaes ya we Jehova i wokem blong tufala. Taswe i sua se kriminol ya i bilif se Paradaes ya we Jisas i tokbaot i wan naesfala garen long wol ya.—Ridim Jenesis 2:15.

4. ?Ol tok we Jisas i talem long kriminol ya, oli mas pulum yumi blong tingbaot wanem?

⁴ Ol tok we Jisas i talem long kriminol ya i mas pulum yumi blong tingbaot laef long Paradaes. Blong talem stret, rul blong Solomon we i gat pis, i save tijim yumi plante samting long saed blong Paradaes. Baebol i se Jisas i hae moa long Solomon. Taswe yumi sua se Jisas bambae i wok gud wetem olgeta we oli rul wetem hem blong mekem wol ya i kam wan naesfala Paradaes. (Mat. 12:42) Ol “narafala sipsip” tu oli mas intres blong save samting we oli mas mekem blong oli save laef olwe long Paradaes ya.—Jon 10:16.

5. ?Yu ting se laef long Paradaes bambae i olsem wanem?

⁵ ?Yu stap tingbaot se laef long Paradaes bambae i olsem wanem? Maet yu stap tingbaot se hem i wan naesfala ples olsem garen blong Iden. (Jen. 2:7-9) Maet yu stap tingbaot profet tok we Maeka i talem se ol man blong God bambae oli sidaon “aninit long figtri mo rop blong grep blong olgeta.” (Maeka 4:3, 4) Mo tu, maet yu stap tingbaot sam vas blong Baebol we oli talem se bambae i gat plante kakae. (Sam 72:16; Aes. 65:21, 22) So maet yu stap pijarem se yu stap long wan naesfala garen, yu sidaon long wan tebol we i fulap long ol naesfala kakae. Yu stap tingbaot se yu pulum fres win we i fulap long ol naesfala smel blong ol plant mo flaoa. Mo yu harem noes blong ol famle mo ol fren, inkludum olgeta we oli laef bakegen, oli stap laf mo oli glad blong joen wanples. Olgeta samting ya oli no wan drim, yumi sua se bambae oli hapen long wol. Mo tu, long Paradaes bambae yumi glad blong mekem ol defren wok.

6. ?Bambae yumi mekem wanem long Paradaes? (Yu luk pija.)

⁶ Jehova i wokem yumi long wan fasin we yumi save glad long ol wok blong yumi. (Pri. 2:24) Long Wan Taosen Yia Rul Blong Kraes bambae yumi bisi gud. Olgeta we oli laef tru long bigfala trabol, wetem plante milian man we oli laef bakegen bambae oli nidim klos, kakae, mo wan ples blong stap long hem. Be blong oli kasem ol samting ya, bambae yumi mekem plante wok we bambae yumi haremgud long hem. Olsem we Jehova i talem long Adam mo Iv blong mekem garen ya i  kam bigwan moa, yumi tu yumi gat privilej ya blong mekem wol i kam wan Paradaes. Traem tingbaot, bambae yumi glad tumas blong tijim plante milian man we oli laef bakegen mo we oli gat smol save nomo long saed blong Jehova mo stamba tingting blong hem, mo blong halpem ol gudfala man we oli ded bifo long taem blong Jisas, blong oli save ol samting we i hapen afta we oli ded.

7. ?Yumi sua long wanem, mo from wanem?

⁷ Yumi sua se long Paradaes bambae yumi laef long pis, yumi gat evri samting we yumi nidim mo yumi oganaes gud. ?From wanem? From Jehova i soemaot long yumi finis se laef aninit long rul blong Boe blong hem bambae i olsem. Yumi save luk samting ya long ol stori we i tokbaot rul blong King Solomon.

8. Afta we King Deved i raetem Ol Sam 37:10, 11, 29, ?olsem wanem oli bin kamtru? (Yu luk “Kwestin” we i stap long magasin ya.)

⁸ God i pulum King Deved blong talemaot se laef bambae i olsem wanem taem wan gudfala king we i waes i rul long fiuja. (Ridim Ol Sam 37:10, 11, 29.) Plante taem yumi ridim Ol Sam 37:11 long ol narafala blong tokbaot Paradaes ya long fiuja. Hemia i stret nomo, from we Jisas i talem ol tok ya bakegen long Bigfala Toktok Blong Hem Antap Long Hil, blong soemaot se samting ya bambae i kamtru long fiuja. (Mat. 5:5) Be ol tok blong Deved oli soemaot tu se laef bambae i nambawan taem King Solomon i rul. Taem Solomon i rul long Isrel, ol man blong God oli gat pis mo oli haremgud long graon ya we i “fulap long melek mo hani.” God i bin talem se: “Sipos yufala i gohed blong folem ol loa blong mi . . . , bambae mi putum pis long kantri blong yufala, mo bambae yufala i save slip we yufala i no fraet long wan samting.” (Lev. 20:24; 26:3, 6) Ol promes ya oli kamtru taem Solomon i rul. (1 Kron. 22:9; 29:26-28) Mo Jehova i promes se ol rabis man bambae “oli lus.” (Sam 37:10) Yes, ol tok ya long Ol Sam 37:10, 11, 29 i bin kamtru bifo, mo bambae i kamtru tu long fiuja.

9. ?Kwin blong Seba i talem wanem long saed blong rul blong King Solomon?

⁹ Nius blong pis mo gudfala laef we ol man Isrel oli gat aninit long rul blong Solomon  i kasem kwin blong Seba. Nao hem i travel longwe blong kam long Jerusalem blong luk samting ya. (1 King 10:1) Mo afta we hem i visitim olgeta ples long kingdom blong Solomon, hem i talem se: “Samting we mi mi harem i smol nomo. . . . !Ol man blong yu oli glad tumas! !Mo ol man blong wok blong yu we oli stap stanap oltaem long fored blong yu mo oli stap lesin long ol waestok blong yu, oli glad tumas!” (1 King 10:6-8) Be laef aninit long rul blong Solomon, i jes wan pija nomo blong ol samting we Jehova bambae i mekem long ol man we oli laef aninit long rul blong boe blong Hem, hemia Jisas.

10. ?Wanem i mekem se Jisas i hae moa long Solomon?

¹⁰ Jisas i hae moa long Solomon long plante defren rod. Solomon i wan sinman we i mekem plante mastik nao ol man blong God oli fesem plante problem from. Be Jisas i beswan rula we i neva mekem mastik samtaem. (Luk 1:32; Hib. 4:14, 15) Nating se Setan i traem hem plante taem be hem i holemstrong long God. Kraes i pruvum se bambae hem i neva mekem sin, o eni samting we i spolem ol man aninit long rul blong hem. I tru nomo se hem i beswan King we yumi save gat.

11. ?Hu bambae i givhan long Jisas blong rul?

¹¹ Jisas wetem ol 144,000 man we bambae oli rul wetem hem, bambae oli lukaotgud long ol man mo mekem stamba tingting blong Jehova long wol i kamtru. (Rev. 14:1-3) Olgeta ya oli fesem plante trabol mo oli safa taem oli bin stap long wol, taswe bambae oli gat sore long ol man taem oli rul. ?Be ol 144,000 man ya bambae oli mekem wanem wok?

12. ?Jehova bambae i givim wanem wok long ol 144,000 man?

¹² Jisas wetem ol man ya we bambae oli rul wetem hem, bambae oli mekem moa wok i bitim Solomon. King Solomon i bin lukaot gud long plante milian man long wan kantri nomo. Be olgeta we bambae oli rul long Kingdom blong God, bambae oli givhan blong lukaot gud long plante bilian man we oli laef long olgeta ples blong wol. !Hemia i wan nambawan privilej we Jehova i givim long ol 144,000 man ya!

13. ?Wanem spesel wok we ol 144,000 man bambae oli mekem?

¹³ Ol 144,000 man ya bambae oli king mo oli pris olsem Jisas. (Rev. 5:10) Aninit long Loa Blong Moses, ol pris oli gat impoten wok ya blong givhan long ol man blong oli gat gudfala helt mo oli fren gud wetem Jehova. Loa ya i “olsem sado nomo blong ol gudfala samting we bambae i kam,” taswe i stret nomo blong talem se ol 144,000 man ya bambae oli givhan long ol man blong oli gat gudfala helt mo oli fren gud wetem Jehova. (Hib. 10:1) Yumi no save stret olsem wanem ol king mo ol pris ya bambae oli toktok wetem ol man long wol we oli stap aninit long Kingdom. Be nomata wanem arenjmen we Jehova i mekem, yumi sua gud se long Paradaes, olgeta man long wol bambae oli kasem ol instraksen we oli nidim blong folem.—Rev. 21:3, 4.

14. ?Olsem wanem “smol grup blong ol sipsip” mo “ol narafala sipsip” oli olsem wan grup nomo?

¹⁴ Jisas i singaot olgeta we bambae oli rul wetem hem se oli “smol grup blong ol sipsip.” (Luk 12:32) Mo tu, hem i tokbaot wan narafala grup we hem i singaot olgeta se “ol narafala sipsip.” Tufala grup ya bambae i kam olsem wan grup nomo. (Jon 10:16) Tufala grup ya i wok finis tugeta, mo bambae tufala i gohed blong wok olsem kasem we wol i kam wan Paradaes. Be olgeta long “smol grup  blong ol sipsip” bambae oli stap long heven, mo “ol narafala sipsip” bambae oli harem gud blong laef olwe long wol. Be i gat sam samting we “ol narafala sipsip” oli mas mekem naoia blong oli save laef long Paradaes.

15. (1) ?Olsem wanem “ol narafala sipsip” oli wok wetem ol brata blong Kraes? (2) ?Olsem wanem yu save folem eksampol blong brata ya long stoa? (Yu luk pija.)

¹⁵ Kriminol ya we i tanem tingting blong hem, i ded bifo we hem i gat janis blong soemaot se hem i glad long ol samting we kraes i mekem blong hem. Be yumi “ol narafala sipsip,” yumi gat plante janis naoia blong soemaot filing we yumi gat long Jisas. Eksampol, yumi soemaot se yumi lavem hem taem yumi mekem i gud long ol brata blong Kraes. Jisas i se bambae hem i jajem ol sipsip folem samting we oli mekem long ol brata blong hem. (Mat. 25:31-40) Yumi sapotem ol brata blong Kraes, taem yumi wok strong blong halpem olgeta long wok blong prij mo wok blong mekem disaepol. (Mat. 28:18-20) From samting ya, yumi wantem yusum gud ol tul blong mekem Baebol stadi we oli givim long yumi, olsem buk ya !Enjoem Laef Olwe! Sipos yu no mekem wan Baebol stadi yet wetem wan man, i gud yu traem putum mak ya blong mekem bes blong yu blong statem wan Baebol stadi wetem eni man we yu mitim.

16. ?Yumi mas mekem wanem naoia blong yumi save laef aninit long Kingdom blong God?

¹⁶ Yumi no nid blong wet kasem we yumi laef long Paradaes blong yumi wokem ol fasin we Jehova i wantem. Be stat naoia, yumi save wok had blong soemaot long ol toktok mo ol aksen blong yumi se yumi no giaman, mo yumi kontrolem fasin blong yumi. Mo yumi mas holemstrong long Jehova, long hasban mo waef blong yumi, mo long ol brata mo sista. Sipos yumi obei long Jehova naoia long rabis wol ya, bambae i moa isi blong obei long hem long Paradaes. Mo tu, yumi mas traehad blong gat gudhan mo wokem ol gudfala fasin we i soemaot se yumi rere blong laef long Paradaes. Yu luk haf ya “?Yu Yu Rere Blong Tekem Wol Ya?” we i stap long Wajtaoa ya.

17. ?I stret we yumi gohed blong harem nogud from wan sin we yumi mekem bifo? Yu eksplenem.

¹⁷ Mo tu, yumi mas traehad blong yumi no moa gohed blong harem nogud from ol sin we  yumi bin mekem bifo. I tru, bambae yumi no tingbaot ransom sakrefaes olsem wan eskius blong yumi save “gohed nomo blong mekem sin.” (Hib. 10:26-31) Be yumi sua se sipos yumi rili tanem tingting blong yumi from sin, mo yumi askem Jehova mo ol elda blong oli halpem yumi, mo yumi jenisim fasin blong yumi, bambae hem i fogivim yumi fulwan. (Aes. 55:7; Wok 3:19) Tingbaot ol tok we Jisas i talem long ol Farisi i se: “Mi mi no kam blong singaot ol stret man, be mi mi kam blong singaot ol man blong mekem sin.” (Mat. 9:13) Yes, ransom sakrefaes i naf blong kavremap olgeta sin blong yumi.

18. ?Bambae yu wantem tokbaot wanem wetem kriminol ya we i hang klosap long Jisas?

¹⁸ Traem tingbaot se yu stap long Paradaes, mo yu stap storian wetem kriminol ya we i bin toktok wetem Jisas. I sua se yutufala tugeta bambae i talem se yutufala i glad tumas long sakrefaes blong Jisas. Ating bambae yu askem long hem blong i tokbaot ol samting we i hapen long ol laswan aoa blong laef blong Jisas blong wol, mo se hem i harem olsem wanem taem Jisas i talem se bambae i tingbaot hem. Mo maet hem tu bambae i askem long yu se yu harem olsem wanem taem yu laef tru long las haf blong sistem blong wol ya blong Setan. !Bambae i wan nambawan privilej blong stadi Baebol wetem wan man olsem!—Efes. 4:22-24.

19. ?From wanem laef long Paradaes bambae i no boring? (Yu luk pija long fran pej.)

¹⁹ Laef long Paradaes bambae i neva boring. Oltaem bambae i gat man blong yumi storian wetem, mo yumi gat plante gudfala wok blong mekem. Beswan samting se evri dei bambae yumi save moa Papa blong yumi long heven mo yumi haremgud long ol samting we hem i givim. Oltaem bambae yumi gat plante moa samting blong lanem long saed blong hem mo ol kriesen blong hem. Yumi wantem talem bigfala tangkiu long Jehova mo Jisas blong mekem promes ya se yumi save laef olwe long wan Paradaes.