Nogat. Samting we Deved i raetem i stret nomo mo i tru.

Traem luk samting we hem i raetem long vas ya mo ol narafala vas: “Evri dei taem mi stap mekem ol samting we mi promes blong mekem bambae mi singim ol sing blong presem nem blong yu olwe.” “O Jehova God blong mi, mi mi presem yu long fulhat blong mi, mo bambae mi leftemap nem blong yu olwe.” “Bambae mi presem nem blong yu gogo i no save finis.”—Sam 61:8; 86:12; 145:1, 2.

Deved i no gat tingting ya se bambae hem i neva ded. Hem i save we Jehova talemaot se ol man bambae oli mas ded from we oli gat sin, mo hem i save se hem tu i wan sinman. (Jen. 3:3, 17-19; Sam 51:4, 5) Hem i save se ol man we God i glad long olgeta, olsem Ebraham, Aesak, mo Jekob, olgeta tu oli ded. Mo Deved i save se hem tu bambae i mas ded. (Sam 37:25; 39:4) Be ol tok blong hem long Ol Sam 61:8 i soem se naoia we hem i laef yet, hem i wantem tumas mo i gat strong tingting blong presem God olwe.—2 Saml. 7:12.

Samtaem Deved i raetem ol samting blong tokbaot prapa laef blong hem, olsem we yumi save luk long ol tok we i stap long stat blong Ol Sam 18, 51, mo 52. Long Ol Sam 23, Deved i tokbaot Jehova olsem wan man blong lukaot long sipsip we i stap lidim ol man blong hem, i mekem oli harem gud, mo i protektem olgeta. Deved i wok olsem man blong lukaot long sipsip. Mo hem i wantem mekem wok blong God long ‘olgeta dei we hem i laef.’—Sam 23:6.

I gud blong tingbaot tu se Jehova nao i putum long tingting blong Deved blong i raetemdaon ol samting ya. Hem i raetem plante samting inkludum ol profet tok we bambae oli kamtru plante yia biaen. Eksampol, long Ol Sam 110, Deved i tokbaot taem ya we Masta blong hem bambae i “sidaon long raetsaed blong [God]” long heven mo i kasem bigfala paoa. ?Hem i kasem paoa blong mekem wanem? Blong spolem ol enemi blong God mo blong “mekem jajmen blong hem agensem ol nesen” long wol. Deved i wan olfala bubu blong Mesaea, we bambae i rul long heven mo bambae i kam “wan pris olwe.” (Sam 110:1-6) Jisas i talem se profet tok ya long Ol Sam 110 i stap tokbaot hem mo bambae i kamtru long fiuja.—Mat. 22:41-45.

Yes, ol tok we Deved i raetem oli tokbaot taem we hem i laef long hem, mo i tokbaot taem ya long fiuja we bambae hem i laef bakegen mo bambae i glad blong presem Jehova olwe. Hemia i mekem yumi luksave se ol tok long Ol Sam 37:10, 11, 29 oli bin kamtru long ol man Isrel bifo taem oli stap long promes lan, be bambae oli kamtru tu long fiuja taem God i mekem ol promes blong hem oli kamtru.—Yu luk paragraf 8 blong haf ya “Bambae Yu Stap Wetem Mi Long Paradaes” we i stap long Wajtaoa ya.

Ol Sam 61:8 mo ol narafala vas olsem oli soemaot se Deved i wantem tumas blong presem Jehova long Isrel gogo kasem we hem i ded. Mo oli soemaot tu samting we Deved bambae i mekem long fiuja taem Jehova i mekem hem i laef bakegen.