1. ?Wanem ya “pis ya blong God,” mo olsem wanem pis ya i mekem i gud long yumi? (Filipae 4:6, 7)

 I GAT wan kaen pis we ol man long wol ya oli no save nating. Hemia “pis ya blong God,” we i mekem tingting blong man i kwaet taem hem i fren gud wetem Papa blong yumi long heven. Taem yumi gat pis ya blong God, yumi harem se yumi sef. (Ridim Filipae 4:6, 7.) Yumi harem gud blong fren wetem ol man we oli lavem hem. Mo yumi harem gud from we yumi fren gud wetem “God blong pis.” (1 Tes. 5:23) Taem yumi save, trastem, mo obei long Papa blong yumi, pis ya blong God i save mekem hat blong yumi we i wari i kam kwaet taem yumi fesem ol trabol we i mekem yumi fraet.

2. ?From wanem yumi sua se i posibol blong yumi gat pis ya blong God?

² ?I rili posibol blong gat pis ya blong God taem yumi fesem wan trabol, olsem wan sik i stap goraon, disasta, wo long kantri, o fasin agens? Ol trabol olsem oli save mekem yumi fraet. Be Jisas i talem long ol man blong hem se: “Yufala i no mas letem hat blong yufala i trabol, mo yufala i no mas fraet.” (Jon 14:27) Yumi glad blong luk we ol brata mo sista oli stap folem advaes ya blong Jisas. Wetem help blong Jehova, oli naf blong gat pis taem oli stap fesem ol strong trabol.

3. ?Olsem wanem wan pandemik i save tekemaot pis we yumi gat?

³ Wan pandemik i save jenisim plante samting long laef blong wan man. Traem luk olsem wanem COVID-19 i afektem plante man. Wan stadi i soemaot se bighaf blong ol man oli no save slip gud long taem blong pandemik ya. Long taem ya, namba blong ol man we oli stap wari bitim mak, oli kasem sik ya dipresen, oli tekem alkol mo drag, ol man we oli kilim woman blong olgeta, mo olgeta we oli traem kilim olgeta wan i ded, i go antap bigwan.  Sipos yu yu laef long wan ples we i gat wan sik i stap goraon, ?olsem wanem yu save kontrolem filing ya blong no wari bitim mak, mo harem gud long pis ya blong God?

4. ?Olsem wanem profet tok we Jisas i tokbaot long saed blong ol las dei i mekem yumi gat pis?

⁴ Jisas i talem se long ol las dei, bambae i gat ol strong sik, o ol sik we oli spred “olbaot long wol.” (Luk 21:11) Taem yumi save samting ya, ?olsem wanem hemia i mekem yumi gat pis? Yumi no sapraes taem i gat ol sik we i goraon. Yumi save se ol samting ya oli mas hapen olsem we Jisas i talem. Taswe, bambae yumi folem advaes we Jisas i givim long ol man we oli laef long taem blong en se: “Yufala i no mas fraet.”—Mat. 24:6.

5. (1) Folem Filipae 4:8, 9, ?yumi save prea from wanem samting taem wan sik i stap goraon? (2) ?Olsem wanem fasin blong lesin long ol odio rikoding blong Baebol i save halpem yu?

⁵ Taem i gat wan sik i stap goraon, yumi save wari bitim mak mo yumi fraet. Hemia nao samting we i hapen long wan sista we nem blong hem Desi. b Afta we angkel blong hem, kasen brata blong hem, mo dokta blong hem oli ded from COVID-19, hem i fraet se hem tu bambae i kasem vaeras ya mo i pasem i go long olfala mama blong hem. Mo from pandemik ya, hem i wari se bambae hem i lusum wok blong hem, nao bambae hem i no naf blong pem ol kakae mo rent blong hem. From we hem i wari tumas, hemia i mekem se hem i no save slip gud long naet. Be Desi i kasembak pis bakegen. ?Hem i mekem wanem? Hem i prea mo i askem stret long Jehova blong i halpem hem blong i no wari tumas mo i gat stret tingting. (Ridim Filipae 4:8, 9.) Hem i lesin taem Jehova i “toktok” long hem tru long ol odio rikoding blong Baebol. Hem i talem se: “Taem mi lesin long voes blong ol man long Baebol riding ya, hemia i mekem mi no wari tumas mo i rimaenem mi se Jehova i kea long mi.”—Sam 94:19.

6. ?Olsem wanem fasin blong stadi yu wan mo go long ol Kristin miting i save halpem yu?

⁶ Taem i gat wan sik i stap goraon, bambae yumi no moa naf blong mekem ol samting olsem we yumi stap mekem bifo, be yumi no mas letem i blokem yumi blong stadi yumi wan o go long ol miting. Ol ekspiriens we i stap long ol buk mo video blong yumi, bambae oli rimaenem yu se ol brata mo sista blong yu oli stap gohed blong mekem wok blong Jehova, nating se oli fesem ol sem trabol olsem. (1 Pita 5:9) Ol miting bambae oli halpem yu blong tingbaot ol gudfala samting long Baebol. Mo bambae i givim janis long yu tu blong leftemap tingting blong ol narafala mo olgeta oli leftemap tingting blong yu. (Rom 1:11, 12) Taem yu tingbaot olsem wanem Jehova i stap sapotem ol man blong hem we oli sik, oli fraet, o oli stap olgeta wan, bilif blong yu bambae i  kam moa strong mo yu sua se bambae hem i sapotem yu tu.

7. ?Yu save lanem wanem long stori blong aposol Jon?

⁷ Traehad blong storian wetem ol brata mo sista. Taem i gat wan sik i stap goraon, maet bambae i had blong yumi joen wetem o brata mo sista. Mo long ol taem olsem, maet yumi gat sem filing olsem aposol Jon we hem i wantem tumas blong luk fren blong hem Gaeas fes tu fes. (3 Jon 13, 14) Nating se i olsem, Jon i save se bambae hem i no save luk Gaeas blong sam taem. Taswe Jon i mekem samting we hem i naf blong mekem. Hem i raetem wan leta i go long Gaeas. Sipos i no posibol oltaem blong yu go visitim ol brata mo sista, i gud yu traem kolem olgeta, mekem video kol, o sanem wan teks mesej long olgeta. Taem yumi storian wetem ol brata mo sista, hemia bambae i mekem yumi harem se yumi no stap yumi wan mo yumi gat pis. I gud yu storian wetem ol elda mo yu folem ol gudfala advaes we oli givim long yu.—Aes. 32:1, 2.

8. ?Olsem wanem wan disasta i save tekemaot pis we yu gat?

⁸ Sipos yu bin safa from wan flad, wan etkwek, o wan faea, maet wari we yu gat long taem ya i save stap longtaem. Sipos yu lusum wan we yu lavem long ded, o yu lusum haos mo ol samting blong yu, maet yu yu harem nogud bitim mak, yu no save wanem blong mekem, o maet yu kam kros. Be, hemia i no min se yu yu laekem ol sas samting o se yu no gat naf bilif. Yu yu bin gotru long wan hadtaem, mo samfala bambae oli kasemsave sipos yu talem o mekem sam samting we i no stret. (Job 1:11) Be nating se i olsem, yu save gat pis yet. ?From wanem yumi talem olsem?

9. ?Jisas i talem wanem we i rerem yumi from ol disasta?

⁹ Tingbaot profet tok we Jisas i talem. Sam man oli ting se bambae oli neva fesem wan disasta, be yumi save se long taem blong yumi, bambae i gat plante moa disasta, mo sam long ol disasta ya i save kasem yumi. Jisas i talem long ol man blong hem se bambae “graon i seksek bigwan” mo bambae i gat ol narafala disasta we oli hapen bifo we en i kam. (Luk 21:11) Mo tu, hem i talem se ‘fasin blong brekem loa bambae i kam antap,’ olsem ol raorao, vaelens, mo wok blong ol teroris. (Mat. 24:12) Jisas i neva talem se ol trabol ya bambae oli kasem ol man nomo we Jehova i lego olgeta. Blong talem stret, plante man we oli holemstrong long Jehova oli kasem ol disasta ya tu. (Aes. 57:1; 2 Kor. 11:25) Maet Jehova bambae i no mekem merikel blong protektem yumi long olgeta disasta, be bambae hem i givim samting we yumi nidim blong yumi no fraet mo yumi gat pis.

10. ?Olsem wanem fasin blong rere naoia from wan disasta i soemaot se yumi gat bilif? (Ol Proveb 22:3)

¹⁰ Sipos yumi rere gud fastaem, bambae i isi blong yumi no wari bitim mak taem wan samting we yumi no tingbaot i hapen. Sipos yumi reregud fastaem, ?hemia i min se yumi no gat strong bilif long Jehova? Nogat. Taem yu rere gud from wan disasta, hemia i soemaot se yumi gat bilif mo yumi trastem se bambae hem i lukaot gud long yumi. Tok blong God i givim advaes long yumi blong rere from ol disasta we oli save hapen. (Ridim Ol Proveb 22:3.) Mo tru long ol magasin blong yumi, ol miting blong kongregesen, mo ol anaonsmen we oli kamaot long stret taem, oganaesesen blong God i stap talem oltaem long yumi blong rere gud from wan disasta we yumi no tingbaot we i save hapen. c ?Olsem wanem? ?Yumi trastem Jehova? Sipos  yes, bambae yumi folem ol advaes blong hem naoia, bifo we wan disasta i hapen.

11. ?Yu yu lanem wanem long eksampol blong Margaret?

¹¹ Traem tingbaot ekspiriens blong wan sista we nem blong hem Margaret. Ol haeman blong gavman oli givim oda blong hem i aot long haos from we i gat wan bus faea long eria blong hem. From we i gat plante man we oli stap traem blong ronwe long semtaem, i gat tumas trak, nao oli no save aot kwiktaem. I gat bigfala blak smok, mo Margaret i no save aot long trak blong hem. Nating se i olsem, hem i stap laef from we hem i rere gud. Hem i gat wan map we hem i save lukluk blong faenem wan narafala rod blong aot long eria ya. Hem i bin folem ol rod ya bifo finis, blong hem i save wanem rod hem i mas tekem taem i gat wan disasta. From we Margaret i rere gud, hemia i sevem laef blong hem.

12. ?From wanem yumi folem ol instraksen we yumi kasem blong stap sef?

¹² Blong protektem yumi wetem ol narafala, maet ol haeman bambae oli askem yumi blong stap kwaet long haos long wan stret taem, aot long ples blong yumi, o folem sam narafala instraksen. Sam man oli no wantem obei long ol instraksen ya from we oli no wantem lego ol samting we oli gat. ?Be ol Kristin oli mekem wanem? Baebol i talem long yumi se: “Yufala i mas putum yufala i stap aninit long evri man we i gat paoa. Yufala i mas putum yufala aninit long king we i gat hae posisen, mo long ol hed gavman blong hem we hem i sanem.” (1 Pita 2:13, 14) Oganaesesen blong God i givim sam instraksen tu blong mekem se yumi save stap sef. Oltaem yumi kasem rimaenda we i talem se yumi mas givim ol stret kontak infomesen we yumi gat naoia long ol elda, olsem nao oli save kasem yumi taem i gat trabol. ?Yu yu mekem samting ya finis? Mo tu, maet yumi kasem daereksen blong stap kwaet long haos o blong aot, olsem wanem blong kasem ol rilif saplae, o olsem wanem mo wetaem blong givhan long ol narafala. Sipos yumi no obei, yumi save putum laef blong yumi mo laef blong ol elda long denja. Yumi mas tingbaot se Jehova i putumap olgeta blong oli lukaot gud long yumi. (Hib. 13:17) Margaret i talem se: “Mi mi bilif strong se from mi folem daereksen blong ol elda mo blong oganaesesen, hemia i sevem laef blong mi.”

13. ?Wanem i halpem plante Kristin blong oli stap glad mo oli gat pis?

¹³ Plante brata mo sista we oli lego haos  blong olgeta from wan disasta o wo, oli mekem bes blong olgeta blong lan long niufala laef blong olgeta mo mekem moa long wok blong Jehova. Ol brata mo sista ya oli olsem ol fas Kristin we nating se ol man oli ronem olgeta oli go wanwan, be oli gohed blong “talemaot gud nius blong tok ya blong God.” (Wok 8:4) Wok blong prij i halpem olgeta blong putum tingting blong olgeta i stap nomo long Kingdom, i bitim we oli tingbaot hadtaem we oli kasem. Mo from samting ya, oli gohed blong stap glad mo oli gat pis.

14. ?Olsem wanem fasin agens i save tekemaot pis we yumi gat?

¹⁴ Fasin agens i save tekemaot plante samting long yumi we i mekem yumi gat pis. Yumi glad taem yumi fri blong joen wanples, prij, mo mekem ol narafala samting we yumi stap mekem oltaem, we yumi no fraet se bambae oli arestem yumi. Sipos yumi no moa mekem ol samting ya, maet bambae yumi wari bitim mak mo yumi fraet, from we yumi no save wanem bambae i hapen afta. I nomol blong gat ol filing ya. Be yumi mas lukaot gud. Jisas i talem se fasin agens i save mekem ol man blong hem oli stambol. (Jon 16:1, 2) ?Taswe olsem wanem yumi save gohed blong gat pis taem yumi fesem fasin agens?

15. ?From wanem yumi no mas fraet taem yumi fesem fasin agens? (Jon 15:20; 16:33)

¹⁵ Baebol i talem se: “Olgeta man we oli wantem soem long laef blong olgeta se oli fasgud long God from we oli joen long Kraes Jisas, bambae ol man oli mekem i nogud long olgeta tu.” (2 Tim. 3:12) Wan brata we nem blong hem Andrei, i faenem i had blong bilivim se ol man blong Jehova bambae oli kasem fasin agens, afta we oli putum tabu long wok blong prij long kantri blong hem. Hem i talem se: ‘I gat plante Witnes long ples ya. ?Olsem wanem nao ol haeman oli save arestem mifala evriwan?’ Tingting ya i mekem hem i wari bitim mak mo hem i no gat pis. Ol narafala brata oli trastem Jehova, mo oli no gat tingting ya se bambae oli no save arestem olgeta. Oli save se bambae oli arestem olgeta yet, be oli no wari bitim mak olsem Andrei. Ale, hem i disaed blong folem eksampol blong olgeta mo hem i trastem Jehova fulwan. Smoltaem afta, hem i gat pis mo hem i kasem glad bakegen nating se i gat plante problem yet. Yumi tu yumi  save fesem sem samting olsem. Be Jisas i talem long yumi se bambae yumi fesem fasin agens mo hem i talem tu se bambae yumi naf blong stanap strong.—Ridim Jon 15:20; 16:33.

16. ?Wanem daereksen we yumi mas obei long hem taem yumi fesem fasin agens?

¹⁶ Taem gavman i putum tabu long wok blong yumi, maet bambae yumi kasem ol instraksen long branj ofis mo long ol elda. Ol instraksen ya oli blong protektem yumi, blong meksua se yumi gohed blong kasem ol kakae long saed blong spirit, mo halpem yumi blong mekem bes blong yumi blong gohed blong prij. I gud yu mekem bes blong yu blong obei long ol daereksen we yu kasem, nating se samtaem yu no kasemsave fulwan long olgeta. (Jem. 3:17) Mo tu, yu neva mas talemaot ol infomesen long saed blong ol brata mo sista, o ol wok long kongregesen long ol man we oli no gat raet blong save.—Pri. 3:7.

17. Olsem ol aposol long faswan handred yia, ?yumi gat strong tingting blong mekem wanem?

¹⁷ Wan men risen from wanem Setan i stap agensem ol man blong God, hemia from we oli “holem wok ya blong givim witnes long saed blong Jisas.” (Rev. 12:17) Yu no mas letem Setan mo rabis wol ya blong hem i mekem yu fraet. Nating se ol man oli agensem yumi, be yumi mas gohed blong prij mo tij, from we hemia bambae i givim glad mo i mekem yumi gat pis. Long faswan handred ya, taem ol haeman blong ol man Jiu oli traem stopem ol aposol blong oli no moa prij, be olgeta oli jusum blong obei long God. Oli gohed blong prij, mo wok ya i mekem oli glad. (Wok 5:27-29, 41, 42) I tru, sipos gavman i putum sam strong rul long wok blong yumi, yumi mas lukaot gud taem yumi mekem wok blong prij. (Mat. 10:16) Sipos yumi mekem bes blong yumi, bambae yumi gat pis from we yumi save se yumi mekem Jehova i glad, mo yumi save se mesej we yumi stap talemaot i blong sevem laef blong ol man.

18. ?Hu nomo i save givim trufala pis long yumi?

¹⁸ Yumi save sua se nating se yumi stap long ol taem we i had, be yet yumi save gat pis. Long ol taem olsem, yumi mas tingbaot se pis we yumi nidim hemia pis ya blong God, mo Jehova nomo i save givim pis ya. Yu mas dipen long hem taem i gat wan sik we i goraon, taem yu fesem disasta, o fasin agens. Stap klosap long oganaesesen blong hem. Mo gohed blong tingbaot nambawan fiuja ya we i stap kam. Taem yu mekem olsem, “God ya blong pis bambae i stap wetem yufala.” (Fil. 4:9) Long nekis stadi bambae yumi luk olsem wanem yumi save halpem ol narafala Kristin taem oli kasem trabol, blong oli save gat pis ya blong God.