Taem Jehova i givim oda ya long ol man blong “fulumap wol, mo mekem ol samting long wol ya oli stap aninit long han blong” olgeta, hemia i soemaot se hem i wantem blong oli mekem fulwol ya i kam wan paradaes. (Jen. 1:28) Olgeta we bambae oli laef olwe, oli mas obei long sem oda ya. Long stat, wol bambae i no wan paradaes from we garen blong Iden i no moa stap. Stret afta long Amagedon, bambae yumi gat plante wok blong mekem blong klinim fulwol ya. !Mo hemia bambae i wan bigfala wok!

Hemia i mekem yumi tingbaot wok we ol man Isrel oli bin mekem taem oli aot long Babilon mo gobak long ples blong olgeta. I no bin gat wan man nating i laef long ples blong olgeta blong 70 yia. Be Aesea i talemaot se Jehova bambae i halpem olgeta blong mekem ples blong olgeta i kam naes bakegen. Profet tok ya i talem se: “Bambae hem i mekem draeples long Saeon i kam olsem Iden, mo bigfala draeples long hem i kam olsem garen blong Jehova.” (Aes. 51:3) Jehova i halpem ol man Isrel blong oli mekem ples blong olgeta i kam naes bakegen. Long sem  fasin, Jehova bambae i halpem ol man we bambae oli tekem wol ya, blong oli mekem i kam wan naesfala paradaes. Mo i gat sam samting we yu save mekem naoia blong soemaot se yu tu yu wantem tekpat long wok ya.

Wan rod blong mekem olsem, hemia taem yu traehad blong mekem haos mo yad blong yu i luk naes mo i stap klin. Yu save mekem samting ya nomata se ol neba blong yu oli no gat fasin ya blong stap klin. Mo tu, yu save givhan blong klinim mo mentenem Haos Kingdom mo Haos Asembli. Sipos yu naf, yu save aplae tu blong wok olsem volontia blong givhan long wok blong disasta rilif. Sipos yu mekem olsem, bambae yu soemaot se yu wantem halpem ol brata mo sista sipos i gat nid. Askem yu wan se: ‘?Mi save lanem blong gat gudhan long sam samting, blong mi save yusum sipos Jehova i letem mi mi laef olwe long wol ya?’

Stret afta we Jisas i mekem gel blong Jaeras i laef bakegen, hem i talem blong oli givim sam kakae long hem blong i kakae. (Mak 5:42, 43) Maet i no hadwok blong lukaot long wan gel we i gat 12 yia. Be traem tingbaot bigfala wok we bambae yumi mekem taem Jisas i mekem promes ya blong hem i kamtru, se “olgeta man we oli stap long ol memoriol tomb bambae oli harem voes blong hem, nao oli kamaot.” (Jon 5:28, 29) Nating se Baebol i no talem plante samting, be yumi save pijarem se taem ol man oli laef bakegen, bambae oli nidim help blong kasem kakae, ples blong slip, mo ol klos. Yu save soemaot naoia se yu rere blong givhan. Be i gat sam samting we yu mas mekem.

Taem kongregesen i talemaot se eria elda bambae i visitim kongregesen blong yu, ?yu yu invaetem hem blong i kam kakae wetem yu? Taem wan brata o sista i no moa wok long Betel mo i muv i kam long kongregesen blong yu, o taem wan brata i no moa mekem wok blong eria elda, ?yu yu givhan long olgeta blong faenem wan ples blong oli laef long hem? Sipos i gat wan asembli long eria blong yu, ?yu save volontia blong givhan blong wok bifo mo afta long asembli, o blong welkamem ol deleget?

Ol tok we i stap long Ol Wok 24:15, oli mekem yumi tingbaot se bambae i gat plante bilian man oli laef bakegen. Mo plante long olgeta, hemia ol man we bifo oli no gat janis blong save Jehova. Be naoia bambae oli gat janis blong save Jehova afta we oli laef bakegen. a Ol gudfala man blong God bambae oli givhan blong tijim olgeta. (Aes. 11:9) Wan sista we nem blong hem Charlotte, we i bin stap prij long Yurop, Saot Amerika, mo Afrika, i luk fowod long taem ya. Hem i talem wetem glad se: “Mi luk fowod blong tijim ol man we bambae oli laef bakegen. Taem mi ridim wan stori we i tokbaot laef blong wan man bifo, plante taem mi tingting se: ‘Sipos hem i bin save Jehova, laef blong hem bambae i gud moa.’ Mi mi luk fowod blong tokbaot Jehova long ol man we oli laef bakegen mo talem long olgeta se laef blong olgeta bambae i gud moa sipos oli mekem wok blong hem.”

Ol gudfala man blong Jehova tu we oli bin laef bifo long taem blong Jisas, bambae oli lanem plante samting taem oli laef bakegen. Mo traem tingbaot bigfala ona mo glad we bambae yumi kasem taem bambae yumi eksplenem long Daniel ol profet tok we oli kamtru, we hem nao i bin raetemdaon be i no kasemsave long olgeta. (Dan. 12:8) O blong halpem Rut mo Naomi blong lanem se Mesaea i kamaot long laen blong tufala. !Bambae yumi glad tumas blong tijim ol man raon long fulwol, we yumi no nid blong wari, mo harem nogud from ol trabol we yumi stap fesem long rabis wol tede!

?Yu save mekem wanem naoia blong yu save rere blong tijim ol man we bambae oli laef bakegen? Wan rod hemia blong yu kam gud long fasin blong tij, mo yu prij oltaem. (Mat. 24:14) Nating sipos yu no save prij plante olsem we yu wantem from we yu olfala o from sam narafala risen, be yu save soemaot se yu wantem tumas blong tijim ol man we bambae oli laef bakegen, taem yu mekem bes blong yu long wok blong prij naoia.

Yes, i impoten blong tingbaot ol kwestin olsem: ?Yu yu rili luk fowod blong tekem wol ya? ?Yu yu luk fowod blong givhan blong mekem wol ya i kam wan paradaes, blong givhan long ol man we bambae oli laef bakegen, mo tijim olgeta? !Yu save soemaot se yu rere blong laef olwe long wol ya, taem yu givhan blong mekem ol wok we bambae yu mekem tu long fiuja taem yu tekem wol ya!