1. Taem yumi tingting dip long promes ya blong laef olwe, ?olsem wanem hemia i gat paoa long yumi?

 JEHOVA i promes se olgeta we oli obei long hem, bambae kasem “laef we i no save finis.” (Rom 6:23) Taem yumi tingting dip long promes ya, lav we yumi gat long Jehova bambae i kam strong moa. Papa blong yumi long heven i lavem yumi tumas we i mekem se yumi no wantem gowe long hem.

2. ?Olsem wanem promes ya blong laef olwe i halpem yumi?

² Promes blong God blong laef olwe i halpem yumi blong stanap strong long ol traem we yumi fesem tede. Nating we ol man oli talem se bambae oli kilim yumi i ded, be yumi neva stop blong mekem wok blong Jehova. ?From wanem? Hemia from we yumi save se sipos yumi ded from yumi holemstrong long Jehova, be bambae hem i mekem yumi laef bakegen, mo bambae yumi neva ded samtaem. (Jon 5:28, 29; 1 Kor. 15:55-58; Hib. 2:15) ?From wanem yumi sua se i posibol blong yumi laef olwe? Bambae yumi luk sam risen.

3. ?From wanem yumi sua se Jehova i naf blong mekem yumi laef olwe? (Ol Sam 102:12, 24, 27)

³ Yumi save se Jehova bambae i naf blong mekem yumi laef olwe, from we hem i stamba blong laef mo hem i laef olwe. (Sam 36:9) Hemia sam vas blong Baebol we oli pruvum se Jehova i stap longtaem finis mo bambae hem i gohed blong stap olwe. Ol Sam 90:2 i talem se Jehova i stap “longtaem finis i kam mo gogo i no save finis.” Ol Sam 102 i tokbaot samting we i klosap sem mak. (Ridim Ol Sam 102:12, 24, 27.) Mo profet Habakuk i tokbaot Jehova se: “Jehova, yu yu stap longtaem finis i kam, yu God blong mi, yu God Ya We i Tabu, yu no save ded.”—Hab. 1:12.

4. ?From wanem yumi no nid blong wari sipos yumi no kasemsave olsem wanem Jehova i stap olwe? Yu eksplenem.

 ⁴ ?Yu yu faenem i had blong kasemsave se Jehova i naf blong stap “oltaem gogo i no save finis”? (Aes. 40:28) Plante man tu oli faenem i had blong kasemsave samting ya. Elihu i tokbaot God se: “Namba blong ol yia blong hem i had blong kasemsave.” (Job 36:26) Be from we yumi no kasemsave long wan samting, hemia i no min se samting ya i no tru. Eksampol, maet yumi no kasemsave fulwan olsem wanem laet i wok, ?be hemia i min se i no gat laet? !Nogat! Long sem fasin, yumi no naf blong kasemsave fulwan olsem wanem Jehova i bin stap longtaem finis mo bambae i gohed blong stap olwe. Be hemia i no min se God i no laef olwe. Trutok long saed blong Krieta i no dipen long samting we yumi kasemsave o we yumi no kasemsave long hem. (Rom 11:33-36) Mo hem i stap longtaem finis bifo we ol narafala samting long yunives oli stap, we hemia i inkludum san mo ol sta. Jehova i mekem yumi sua se hem i “Man We i Mekem wol long paoa blong hem.” Mo hem i bin stap bifo we i “pulum skae i open bigwan.” (Jer. 51:15; Wok 17:24) ?Wanem wan narafala risen we i mekem yumi sua se i posibol blong yumi laef olwe?

5. ?Adam mo Iv i gat wanem hop?

⁵ Olgeta laef samting long wol ya we Jehova i wokem bambae oli ded, be ol man, Jehova i wokem olgeta blong oli neva ded samtaem. Nating se i olsem, Jehova i wonem Adam se: “Tri blong save samting we i gud mo samting we i nogud, yu no mas kakae frut blong hem, from we long dei we yu kakae, bambae yu ded.” (Jen. 2:17) Sipos Adam mo Iv i bin obei long Jehova, bambae tufala i no save ded. I stret nomo blong gat tingting ya se maet Jehova bambae i letem yet blong tufala i kakae frut blong “tri blong laef.” Mo long taem ya, tufala i save sua se bambae tufala i “laef olwe.” b—Jen. 3:22.

6-7. (1) ?Wanem moa i pruvum se Jehova i wokem yumi blong laef olwe? (2) ?Yu yu wantem tumas blong mekem wanem long niufala wol? (Yu luk pija.)

⁶ Sam saentis oli faenem pruf we i soem se bren blong yumi i save kipim plante infomesen blong ol samting we yumi lanem long laef blong yumi naoia. Long 2010 wan atikol long nius pepa ya Scientific American Mind, i talem se namba blong ol infomesen we bren blong yumi i save kipim, i klosap sem mak olsem 3 milian aoa blong ol video we oli rikodem, mo ol video ya bambae i tekem bitim 300 yia  blong wajem. Mo i luk olsem se bren blong yumi i save kipim moa infomesen i bitim hemia. Hemia i soemaot se Jehova i wokem bren blong yumi blong i kipim plante moa infomesen bitim wanem we yumi lanem long ol 70 o 80 yia we yumi laef long hem.—Sam 90:10.

⁷ Mo tu, Jehova i wokem yumi wetem tingting ya se yumi wantem gohed blong stap laef. Baebol i tokbaot ol man se God i “putum laef we i no save finis long hat blong olgeta.” (Pri. 3:11) Hemia wan risen from wanem yumi luk ded olsem wan enemi. (1 Kor. 15:26) Sipos yumi kasem wan bigfala sik, ?bambae yumi jes stap olsem nomo mo yumi wet blong ded? Nogat. Plante taem bambae yumi go luk wan dokta mo maet yumi tekem sam meresin blong tritim sik ya. I sua se bambae yumi mekem eni samting we yumi naf blong mekem blong yumi no ded. Mo taem wan we yumi lavem hem i ded, nating se hem i yangfala o olfala, yumi harem nogud blong longtaem. (Jon 11:32, 33) I klia se Jehova i no save wokem yumi wetem tingting ya blong laef olwe mo blong gohed blong lanem samting, sipos i no plan blong hem blong mekem ol man oli laef olwe. Be i gat plante moa risen blong yumi save bilif se yumi save laef olwe. Naoia, bambae yumi tokbaot ol samting we Jehova i bin mekem bifo mo we i stap mekem naoia, we i pruvum se stamba tingting blong hem i no jenis.

8. ?Olsem wanem Aesea 55:11 i mekem yumi sua long plan we Jehova i gat long saed blong yumi ol man?

⁸ Nating se Adam mo Iv i mekem sin mo ded i kasem olgeta man, be Jehova i no jenisim plan we hem i bin gat fastaem. (Ridim Aesea  55:11.) Plan blong hem i stap yet hemia se ol man we oli holemstrong long hem bambae oli kasem laef olwe. Tingting ya i kamaot klia taem yumi tingbaot ol samting we Jehova i talem mo mekem blong stamba tingting blong hem i save kamtru.

9. ?God i mekem wanem promes? (Daniel 12:2, 13)

⁹ Jehova i promes se bambae hem i mekem ol dedman oli laef bakegen mo i givim janis long olgeta blong oli laef olwe. (Wok 24:15; Taet. 1:1, 2) Gudfala man ya Job i wantem tumas se Jehova i mekem ol dedman oli laef bakegen. (Job 14:14, 15) Profet Daniel i savegud se ol man bambae oli laef bakegen mo bambae oli gat janis blong laef olwe. (Sam 37:29; ridim Daniel 12:2, 13.) Ol man Jiu tu long taem blong Jisas oli savegud se Jehova bambae i givim “laef we i no save finis” long ol man we oli holemstrong long hem. (Luk 10:25; 18:18) Jisas i tokbaot promes ya plante taem, mo Papa blong hem i mekem hem i laef bakegen.—Mat. 19:29; 22:31, 32; Luk 18:30; Jon 11:25.

10. ?Stori blong ol man we oli laef bakegen bifo i pruvum wanem? (Yu luk pija.)

¹⁰ Jehova i stamba blong laef mo hem i gat paoa blong mekem ol man oli laef bakegen. Hem i givim paoa long profet Elaejah blong i mekem boe blong wan wido long Jarefat i laef bakegen. (1 King 17:21-23) Biaen God i halpem profet Elisa blong i mekem boe blong wan woman Sunem i laef bakegen. (2 King 4:18-20, 34-37) Ol stori ya mo ol nara stori bakegen oli pruvum se Jehova i gat paoa blong mekem ol man oli laef bakegen. Taem Jisas i stap long wol, hem i pruvum se Papa blong hem i givim paoa ya tu long hem. (Jon 11:23-25, 43, 44) Naoia Jisas i stap long heven mo God i mekem hem i gat “paoa . . . long olgeta samting long heven mo long wol.” Taswe hem i save mekem promes ya se “olgeta man we oli stap long ol memoriol tomb” bambae oli laef bakegen mo bambae oli gat janis blong laef olwe.—Mat. 28:18; Jon 5:25-29.

11. ?Olsem wanem ransom i mekem se yumi save laef olwe?

¹¹ ?From wanem Jehova i letem boe blong hem blong i ded? Jisas i givim ansa, taem hem i se: “God i lavem tumas ol man long wol, nao hem i givim stret Pikinini blong hem, wan nomo we hem i gat, blong olgeta man we oli soemaot se oli bilif long hem, oli no ded be oli kasem laef we i no save finis.” (Jon 3:16) From we God i givim pikinini blong hem olsem wan ransom blong kavremap ol sin blong yumi, hemia i openem rod blong yumi save kasem laef olwe. (Mat. 20:28) Aposol Pol i eksplenem gud plan ya blong God, hem i se: “Wan man nomo i mekem se ded i kasem olgeta man. Long sem fasin, wan man nomo i mekem se olgeta dedman oli save laef bakegen. Olgeta man we oli joen long Adam oli ded. Long sem fasin, olgeta man we oli joen long Kraes bambae oli laef bakegen.”—1 Kor. 15:21, 22.

12. ?Olsem wanem Kingdom blong God i givhan blong mekem plan blong Jehova i kamtru?

¹² Jisas i tijim ol man blong hem blong oli prea from Kingdom blong God blong i kam mo blong God i mekem wil blong hem i kamtru long wol ya. (Mat. 6:9, 10) Wan haf blong plan blong God, hemia blong ol man oli laef olwe long wol. Be blong samting ya i kamtru, Jehova i putumap boe blong hem olsem King long Kingdom blong Mesaea. God i hivimap 144,000 man long wol ya blong oli wok wetem Jisas mo mekem wil blong God i kamtru.—Rev. 5:9, 10.

13. ?Jehova i stap mekem wanem naoia, mo yu mas mekem wanem?

¹³ Naoia Jehova i stap hivimap “wan bigfala hip blong ol man,” mo hem i stap trenem  olgeta blong oli laef aninit long rul blong Kingdom blong hem. (Rev. 7:9, 10; Jem. 2:8) Nating se plante man long wol tede oli seraot from we oli no laekem narafala mo from ol faet, be olgeta we oli stap insaed long grup blong bigfala hip blong ol man, oli traehad blong sakemaot fasin ya blong no laekem narafala. Hemia i olsem we oli stap hamarem ol naef blong faet blong olgeta i kam aean blong plao. (Maeka 4:3) Oli no joen long ol faet we i kilim plante man oli ded, be oli halpem ol man blong faenem “laef ya we i prapa wan” taem oli tijim olgeta long saed blong tru God mo ol plan blong hem. (1 Tim. 6:19) Maet ol famle blong olgeta oli agensem olgeta o maet oli no gat mane from we oli sapotem Kingdom blong God, be Jehova i meksua se oli gat evri samting we oli nidim. (Mat. 6:25, 30-33; Luk 18:29, 30) Ol save ya oli mekem yumi sua fulwan se Kingdom blong God i stap mo bambae hem i gohed blong mekem plan blong Jehova i kamtru.

14-15. ?Olsem wanem promes ya blong Jehova blong finisim ded blong olwe bambae i kamtru?

¹⁴ Naoia Jisas i stap olsem King long Kingdom blong God long heven mo bambae hem i mekem ol promes blong Jehova oli kamtru. (2 Kor. 1:20) Stat long 1914, Jisas i stap winim ol enemi blong hem. (Sam 110:1, 2) Klosap nao hem mo ol man we oli rul wetem hem, bambae oli distroem olgeta rabis man.—Rev. 6:2.

 ¹⁵ Long Wan Taosen Yia Rul Blong Kraes, Jisas bambae i mekem ol dedman oli laef bakegen mo i halpem ol man we oli obei long God blong oli kam stretgud olgeta. Afta long laswan traem, olgeta we Jehova i jajem olgeta se oli stret man, “bambae oli tekem wol ya i blong olgeta, mo bambae oli stap long hem blong olwe.” (Sam 37:10, 11, 29) Antap long hemia, “bambae hem i finisim laswan enemi, hemia ded.”—1 Kor. 15:26.

16. ?Wanem impoten risen we i mas pulum yumi blong mekem wok blong Jehova?

¹⁶ Olsem we yumi luk long stadi ya, hop we yumi gat blong laef olwe i stanap long Tok blong God. Hop ya i halpem yumi blong stanap strong long ol las dei ya we laef i had. Be i mas gat sam moa samting we i pulum yumi blong mekem Jehova i glad, i bitim filing ya we yumi gat blong wantem stap laef. Impoten risen we i mas pulum yumi blong wantem holemstrong long Jehova mo Jisas, hemia bigfala lav we yumi gat long tufala. (2 Kor. 5:14, 15) Lav ya nao bambae i pulum yumi blong folem eksampol blong tufala mo talemaot hop we yumi gat long ol narafala. (Rom 10:13-15) Taem yumi lanem blong no tingbaot yumi wan mo glad blong givhan long narafala, yumi stap kam ol man we Jehova i wantem tumas blong oli kam ol fren blong hem olwe.—Hib. 13:16.

17. ?Yumi wanwan i gat responsabiliti blong mekem wanem? (Matiu 7:13, 14)

¹⁷ ?Bambae yumi stap long medel blong ol man we oli kasem laef we i no save finis? Jehova i givim janis long yumi. Taswe, naoia yumi mas jus blong stap long rod ya we i go kasem laef. (Ridim Matiu 7:13, 14.) ?Laef bambae i olsem wanem taem yumi laef olwe? Bambae yumi tokbaot ansa blong kwestin ya long nekis stadi.