1. Taem yumi tingbaot bilif blong Ebraham, ?maet yumi askem wanem kwestin?

 NATING se plante man oli harem stori blong Ebraham, be bighaf blong olgeta oli no save plante samting long saed blong hem. Be yu, yu save plante samting long saed blong Ebraham. Eksampol, yu save se long Baebol, God i singaot Ebraham se hem i “papa blong olgeta we oli gat bilif.” (Rom 4:11) Maet yu stap tingting se: ‘?Mi save wokbaot folem bilif blong Ebraham mo gat sem bilif olsem hem?’ Yes.

2. ?From wanem i impoten blong stadi long eksampol blong Ebraham? (Jemes 2:​22, 23)

² Wan rod blong gat bilif olsem Ebraham, hemia blong stadi long eksampol blong hem. Oltaem Ebraham i obei long Jehova, taem Jehova i askem hem blong muv i go longwe long ples blong hem, i laef long tent blong plante yia, mo blong sakrefaesem boe blong hem Aesak we hem i lavem tumas. Ebraham i mekem olgeta samting ya from we hem i gat strong bilif. Mo from we hem i gat bilif mo i soemaot long ol wok blong hem, God i glad long hem mo hem i kam fren blong God. (Ridim Jemes 2:​22, 23.) Jehova i wantem se yumi evriwan, inkludum yu, yumi mekem hem i glad mo kam fren blong hem. From samting ya, hem i pulum Pol mo Jemes blong tokbaot eksampol blong Ebraham long Baebol. I gud yumi luk eksampol blong hem we i stap long Rom japta 4 mo Jemes japta 2. Tufala japta ya i tokbaot wan impoten samting long saed blong Ebraham.

3. ?Wanem vas we Pol mo Jemes i tokbaot?

 ³ Pol mo Jemes i talem bakegen ol tok we i stap long Jenesis 15:​6, we i se: “[Ebraham] i bilif long Jehova, nao God i luk hem olsem wan stret man.” Wan stret man, hemia wan man we God i glad long hem mo i luk hem se i no gat fol. !I gud tumas se God i save luk wan sinman se hem i no gat fol! I sua se yu wantem we God i luk yu olsem, mo hemia i posibol. Naoia bambae yumi tokbaot from wanem Jehova i luk Ebraham olsem wan stret man, mo samting we yumi mas mekem blong Jehova i luk yumi tu se yumi stret man.

4. ?Wanem i blokem ol man blong oli no kam stret man?

⁴ Long leta we Pol i raetem i go long ol man Rom, hem i talem se evri man oli sinman. (Rom 3:23) ?Be from wanem God i save glad long yumi mo luk yumi olsem ol stret man? Blong givhan long ol Kristin blong faenem ansa blong kwestin ya, Pol i tokbaot eksampol blong Ebraham.

5. ?From wanem Jehova i talemaot se Ebraham i wan stret man? (Rom 4:​2-4)

⁵ Jehova i talemaot se Ebraham i wan stret man taem hem i stap long kantri ya Kenan. ?From wanem Jehova i talemaot se Ebraham i wan stret man? ?Hemia from we Ebraham i obei gud long Loa blong Moses? Nogat. (Rom 4:13) Loa ya, Jehova i givim long nesen blong Isrel bitim 400 yia afta we hem i talemaot se Ebraham i wan stret man. Taswe, ?wanem nao i mekem se God i luk Ebraham olsem wan stret man? Jehova i kaen tumas long Ebraham, mo i talemaot se hem i wan stret man from bilif blong hem.—Ridim Rom 4:​2-4.

6. ?From wanem Jehova i save luk wan sinman se hem i stret man?

⁶ Pol i talem se taem wan man i bilif long God, “bilif blong hem i mekem se God i luk hem olsem wan stret man.” (Rom 4:5) Pol i gohed se: “Deved tu i tokbaot glad blong man we God i luk hem se i wan stret man be i no from wok we hem i mekem. Hem i talem se: ‘Olgeta we God i fogivim ol rabis fasin we oli mekem, mo i kavremap ol sin blong olgeta, oli glad. Mo man we Jehova bambae i no tingbaot sin blong hem, hem i glad.’” (Rom 4:​6-8; Sam 32:​1, 2) God i fogivim o i kavremap sin blong ol man we oli bilif long hem. Hem i fogivim olgeta fulwan mo i no moa tingbaot ol sin blong olgeta. Hem i luk olgeta olsem ol man we oli no gat fol, mo oli stret man from bilif blong olgeta.

7. ?Wanem i mekem se God i luk ol man we oli wosipim hem bifo se oli stret man?

⁷ Nating se Jehova i talemaot se Ebraham, Deved, mo ol narafala we oli wosipim hem oli stret man, be oli sinman yet. Be from bilif blong olgeta, God i luk olgeta se oli no gat fol, speseli taem hem i skelem olgeta wetem ol man we oli no bilif long hem. (Efes. 2:12) Pol i talemaot klia long leta blong hem se yumi mas gat bilif blong yumi save kam fren blong God. Hemia nao samting we Ebraham mo Deved i mekem, mo yumi tu yumi mas mekem sem mak.

8-9. ?Wanem sam rong tingting we ol man oli gat long ol tok blong Pol mo Jemes? ?From wanem?

⁸ Blong plante handred yia, ol lida blong skul oli stap agiu from tingting ya se bilif i joen wetem wok. Samfala oli tijim se blong stap sef, yu mas bilif nomo long Masta Jisas Kraes. Maet yu harem oli talem se: “Yu akseptem Jisas long laef blong yu mo bambae yu sef.” Maet samfala oli talem tok ya blong Pol se: “God i luk hem se i wan stret man be i no  from wok we hem i mekem.” (Rom 4:6) Be sam narafala, oli talem se “yu save stap sef” sipos yu go visitim ol ples we jos i talem se oli holi, mo yu mekem ol gudfala samting. Mo blong pruvum tok ya, maet oli talem tok blong Jemes 2:​24, we i se: “Man i save kam stret man from ol wok we hem i mekem be i no from bilif nomo.”

⁹ From ol defdefren bilif ya, sam Baebol skola oli ting se ol tok blong Pol mo Jemes oli agensem tufala. Sam lida blong skul oli talem se Pol i bilif se blong kam wan stret man, man i mas bilif blong God i save glad long hem. Be Jemes i bilif se blong kam wan stret man, man i mas mekem ol gudfala samting blong God i save glad long hem. Wan profesa we i stadi long saed blong ol jos i talem se: “Jemes i no kasemsave from wanem Pol i makem gud se blong kam wan stret man, man i nidim nomo blong gat bilif. Mo se Jemes i no agri long ol tok we Pol i talem.” Be Jehova i pulum Pol mo Jemes blong raetemdaon ol samting we tufala i mekem. (2 Tim. 3:16) Taswe, yumi mas ridim ol narafala tok blong tufala, blong yumi naf blong kasemsave long ol tok blong tufala.

10. ?Wanem “ol wok” we Pol i tokbaot? (Rom 3:​20, 21, 28) (Mo tu, yu luk pija.)

¹⁰ ?Wanem “ol wok” we Pol i tokbaot long Rom 3 mo 4? Hem i stap tokbaot “ol wok we loa i talem,” we i stap long loa blong Moses, we hem i kasem long Hil ya Sinae. (Ridim Rom 3:​20, 21, 28.) I luk olsem se long taem blong Pol, sam Kristin we oli man Jiu oli faenem i had blong akseptem Loa blong Moses mo mekem ol samting we Loa ya i talem. From samting ya, Pol i tokbaot eksampol blong Ebraham blong pruvum se blong kam wan stret man, i no nid blong folem “ol wok  we loa i talem.” Be oli nidim blong gat bilif. Tok ya i leftemap tingting blong yumi, from i mekem yumi luksave se sipos yumi bilif long God mo Kraes, yumi save mekem God i glad.

11. ?Wanem “ol wok” we Jemes i tokbaot?

¹¹ “Ol wok” we Jemes japta 2 i tokbaot, oli defren long “ol wok we loa i talem” we Pol i tokbaot. Jemes i stap tokbaot ol wok, o ol samting we ol Kristin oli mekem evri dei long laef blong olgeta. Ol wok ya oli soemaot se wan Kristin i bilif long God o nogat. Traem luk tu eksampol we Jemes i tokbaot.

12. ?Jemes i talem wanem blong soemaot se bilif i joen wetem wok? (Mo tu, yu luk pija.)

¹² Long faswan eksampol, Jemes i eksplenem se ol Kristin oli mas mekem i sem mak long evriwan. Hem i tokbaot wan man we i kaen long wan rijman, be i lukluk daon long wan pua man. Jemes i makem gud se man ya i talem se hem gat bilif, be aksen blong hem i soemaot se hem i no gat bilif. (Jem. 2:​1-5, 9) Long seken eksampol, Jemes i tokbaot wan man we i luk ‘wan brata o sista i no gat klos o kakae,’ be i no givim samting blong givhan long hem. Nating sipos man ya i talem se hem i gat bilif, be aksen blong hem i soemaot se hem i no gat bilif. Olsem Jemes i talem, “sipos i no gat wok i go wetem bilif, bilif ya hem wan i ded.”—Jem. 2:​14-17.

13. ?Jemes i tokbaot wanem blong makem gud se bilif i joen wetem aksen? (Jemes 2:​25, 26)

¹³ Jemes i tokbaot Rehab olsem wan gudfala eksampol blong man we i pruvum long ol aksen blong hem se hem i gat bilif. (Ridim Jemes 2:​25, 26.) Rehab i harem nius long saed blong Jehova mo i luksave se Jehova i stap sapotem ol man Isrel. (Jos. 2:​9-11) Mo hem i soemaot tru long aksen blong hem se  hem i gat bilif, taem hem i protektem tufala spae blong Isrel we laef blong tufala i stap long denja. From samting ya, Jehova i talemaot se Rehab i wan stret man, olsem we hem i talem long Ebraham. Eksampol blong Rehab i tijim yumi se i impoten blong soemaot long ol aksen blong yumi se yumi gat bilif.

14. ?From wanem yumi save talem se ol tok blong Pol mo Jemes oli joen gud?

¹⁴ Pol mo Jemes i eksplenem bilif mo ol wok, long tu defren rod. Pol i stap talem long ol Kristin we oli man Jiu se bambae oli neva save mekem Jehova i glad, sipos oli stap mekem nomo ol wok we Loa blong Moses i talem. Be Jemes i makem gud se evri Kristin oli mas soemaot bilif blong olgeta, tru long ol gudfala samting we oli mekem long ol narafala.

15. ?Wanem sam samting we yumi save mekem blong soemaot se yumi gat bilif? (Mo tu, yu luk pija.)

¹⁵ Jehova i no talem se sipos yumi wantem kam stret man, yumi mas mekem evri samting stret olsem we Ebraham i mekem. I gat plante defren samting we yumi save mekem blong soemaot se yumi gat bilif. Yumi save welkamem ol niuwan long kongregesen, halpem ol brata mo sista we oli gat bigfala nid, mo mekem i gud long ol memba blong famle blong yumi. From hemia nao ol samting we Jehova i glad long hem, mo bambae i blesem yumi from. (Rom 15:7; 1 Tim. 5:​4, 8; 1 Jon 3:18) Wan long ol impoten rod blong soemaot se yumi gat bilif, hemia taem yumi wok strong blong talemaot gud nius long ol narafala. (1 Tim. 4:16) Yumi evriwan i save soemaot long ol wok blong yumi, se yumi bilif we ol promes blong Jehova bambae oli kamtru,  mo se ol rod blong hem oli beswan. Mo sipos yumi mekem olsem, yumi save sua fulwan se God bambae i luk yumi olsem ol stret man, mo bambae yumi kam ol fren blong hem.

16. ?Olsem wanem hop i joen wetem bilif blong Ebraham?

¹⁶ Rom japta 4 i tokbaot wan narafala impoten lesen we yumi save lanem long eksampol blong Ebraham, hemia se i impoten blong gat hop. Jehova i promes se tru long Ebraham, bambae hem i blesem “plante nesen.” !Hemia i wan nambawan hop we Ebraham i gat! (Jen. 12:3; 15:5; 17:4; Rom 4:17) Be nating se Ebraham i gat 100 yia mo Sera i gat 90 yia, promes ya i no kamtru yet. Long lukluk blong ol man, i no posibol blong Ebraham mo Sera i gat wan boe. Hemia i save traem bilif blong Ebraham. Be “hem i hop mo i bilif se maet hem i save kam papa blong plante nesen.” (Rom 4:​18, 19) Yes, samting we Ebraham i wet from i kamtru. Hem i kam papa blong Aesak.—Rom 4:​20-22.

17. Blong God i luk yumi olsem ol stret man, ?yumi mas mekem wanem?

¹⁷ Yumi save mekem God i glad mo kam fren blong hem olsem Ebraham. Hemia nao samting we Pol i makem gud taem i raetem se: ‘Tok ya se, “God i luk hem” oli no raetem i go long hem nomo, be oli raetem i kam long yumi tu we God bambae i luk yumi se yumi stret man, from we yumi bilif long hem we hem i mekem Jisas i laef bakegen.’ (Rom 4:​23, 24) Olsem Ebraham, yumi mas gat bilif, mekem ol gudfala wok mo gat hop. Pol i gohed blong tokbaot hop blong yumi long Rom japta 5, we hemia nao samting we bambae yumi tokbaot long nekis stadi.