1. ?From wanem Ebraham i sua fulwan se bambae hem i gat wan boe?

 JEHOVA i promes long fren blong hem Ebraham se bambae hem i blesem olgeta nesen long wol, from pikinini we bambae i kamaot biaen long hem. (Jen. 15:5; 22:18) From we Ebraham i bilif strong long God, hem i sua se promes ya bambae i kamtru. Nating se i olsem, taem Ebraham i gat 100 yia mo waef blong hem i gat 90 yia, tufala i no gat pikinini yet. (Jen. 21:​1-7) Be Baebol i talem se: ‘Ebraham i hop mo i bilif se maet hem i save kam papa blong plante nesen, mo bilif blong hem i stanap long tok ya we oli bin talemaot.’ (Rom 4:18) Mo olsem yu save, hop blong Ebraham i kamtru. Hem i kam papa blong Aesak. ?From wanem Ebraham i sua se Jehova bambae i holem promes blong hem?

2. ?From wanem Ebraham i sua se promes blong Jehova bambae i kamtru?

² Ebraham i save gud Jehova, taswe “hem i bilif fulwan se God bambae i mekem promes blong hem i kamtru.” (Rom 4:21) Jehova i glad long Ebraham mo i talemaot se hem i wan stret man from bilif blong hem. (Jem. 2:23) Rom 4:18 i soemaot se bilif blong Ebraham i joen wetem hop we hem i gat. Naoia bambae yumi tokbaot ol samting we aposol Pol i talem long saed blong hop, we i stap long Rom japta 5.

3. ?Pol i eksplenem wanem long saed blong hop?

³ Pol i eksplenem from wanem yumi sua se “hop ya bambae i no mekem yumi harem nogud.” (Rom 5:5) Mo tu, hem i givhan long yumi blong kasemsave olsem wanem hop blong yumi i save gru. Taem yumi stap tokbaot ol tok blong Pol long Rom 5:​1-5, traem tingbaot olsem wanem hop blong yu long saed blong fiuja i stap kam strong moa taem ol yia oli stap pas. Mo tu, long stadi ya bambae yumi luk olsem wanem yu save mekem  hop blong yu i gru i kam strong moa i bitim naoia. Be fastaem, bambae yumi tokbaot nambawan hop ya we Pol i talem se bambae i no mekem yumi harem nogud.

4. ?Rom 5:​1, 2 i tokbaot wanem?

⁴ Ridim Rom 5:​1, 2. Pol i raetem ol tok ya i go long kongregesen long Rom. Ol brata mo sista long ples ya oli kasemsave long saed blong Jehova mo Jisas, oli gat bilif, mo oli kam ol Kristin. Taswe, Jehova i ‘talemaot se oli stret man from bilif blong olgeta,’ mo i makemaot olgeta long tabu spirit. Yes, oli gat wan nambawan hop mo oli sua se hop ya bambae i kamtru.

5. ?Wanem hop blong ol tabu Kristin?

⁵ Samtaem biaen, Pol i raet i go long ol tabu Kristin long Efesas blong tokbaot hop we God i givim long olgeta. Hop ya hemia blong oli save kasem “ol gudgudfala blesing we hem i holem i stap, blong givim long ol tabu man.” (Efes. 1:18) Mo tu, Pol i talem long ol Kristin long Kolosi, weples bambae oli kasem ol blesing ya. Hem i talem se ‘hop ya God i putumgud finis i stap rere blong yufala long heven.’ (Kol. 1:​4, 5) Yes, hop blong ol tabu Kristin, hemia se bambae oli laef bakegen blong kasem laef we i no save finis long heven, mo bambae oli rul wetem Kraes.—1 Tes. 4:​13-17; Rev. 20:6.

6. ?Wan tabu brata i talem wanem long saed blong hop we hem i gat?

⁶ Ol tabu Kristin oli glad long hop we oli gat. Wan long olgeta, hemia Brata Frederick Franz. Hem i talemaot tingting we hem i gat long saed blong hop ya, i se: “Mifala i sua se hop ya bambae i kamtru mo mifala evriwan ol 144,000 man ya, bambae mifala i kasem samting we God i promes blong givim long mifala. Blesing ya bambae i gud moa i bitim eni narafala blesing we mifala i save tingbaot.” Brata Franz i mekem wok blong Jehova blong plante yia, mo long 1991 hem i talem se: “Mifala i tinghae yet long nambawan hop we mifala i gat. . . . Taem ol yia oli stap pas, mifala i glad moa long hop ya. Mifala i glad nomo blong wet long hop ya nating sipos  mifala i mas wet blong wan milian yia. Mi mi tinghae moa long hop ya i bitim bifo.”

7-8. ?Wanem hop we plante man blong Jehova oli gat? (Rom 8:​20, 21)

⁷ Plante man we oli wosipim Jehova tede oli gat wan defren hop. Ebraham i gat sem hop ya, hemia blong laef olwe long wol ya aninit long rul blong Kingdom blong God. (Hib. 11:​8-10, 13) Pol i tokbaot nambawan hop ya. (Ridim Rom 8:​20, 21.) Taem yu jes stat blong stadi Baebol mo save ol promes blong Baebol long saed blong fiuja, ?yu yu wantem tumas blong luk wanem? ?Yu stap wet long dei ya we bambae ol man oli kam stretgud olgeta mo i no moa gat wan sinman? ?O yu yu wantem tumas blong luk olgeta we yu lavem olgeta, oli laef bakegen long paradaes long wol? From we God i givim hop ya long yumi, yumi gat plante nambawan samting blong wet from.

⁸ Nating se hop blong yumi i blong laef long heven o long wol, be yumi gat wan nambawan hop we i save mekem yumi glad. Mo hop ya i save gru i kam strong moa. Ol nekiswan tok we Pol i raetem, i eksplenem olsem wanem blong mekem hop ya i kam strong. Naoia bambae yumi luk ol tok we Pol i talem long saed blong hop blong yumi. Ol tok blong hem oli save givhan long yumi blong sua fulwan se hop we yumi gat bambae i kamtru.

9-10. ?Eksampol blong Pol i soemaot se ol Kristin oli save fesem wanem? (Rom 5:3) (Mo tu, yu luk pija.)

⁹ Ridim Rom 5:3. Makem se ol trabol oli save mekem hop blong yumi i kam strong. Maet yumi sapraes long samting ya. Be olgeta man we oli folem kraes oli save kasem trabol. Traem luk eksampol blong Pol. Hem i talem long ol Kristin long Tesalonaeka se: “Long taem ya we mifala i stap yet wetem yufala, mifala i talemaot se bambae yumi kasem trabol, mo . . . samting ya i hapen.” (1 Tes. 3:4) Mo hem i raet i go long ol Kristin long Korin se: “Ol brata. Mifala i wantem blong yufala i save se mifala i bin kasem bigfala trabol  . . . Mifala i no moa save se bambae mifala i laef no nogat.”—2 Kor. 1:8; 11:​23-27.

¹⁰ Ol Kristin tede tu oli fesem trabol long plante defren rod. (2 Tim. 3:12) ?Olsem wanem long yu? Taem yu bilif long Jisas mo yu folem hem, ?yu yu kasem sam trabol? Maet ol famle mo ol fren oli jikim yu, o maet oli tritim nogud yu. Maet bos blong yu o ol fren long wok oli mekem i nogud long yu from we yu tok tru. (Hib. 13:18) O maet yu fesem fasin agens long gavman from yu tokbaot hop blong yu long ol narafala. Nomata wanem kaen trabol yumi fesem, be Pol i talem se yumi mas glad. ?From wanem?

11. ?From wanem yumi mas gat strong tingting blong stanap strong long eni traem?

¹¹ Taem yumi fesem wan trabol, yumi mas glad from we gudfala frut i save kamaot from. Rom 5:3 i talem se: “Trabol i givhan long yumi blong yumi stanap strong longtaem.” Olgeta Kristin bambae oli fesem ol trabol, taswe yumi evriwan i mas gat strong tingting blong stanap strong nomata wanem trabol yumi fesem. Olsem nao, bambae yumi naf blong luk ol blesing ya we yumi stap wet from. Yumi no wantem kam olsem ol man ya we Jisas i tokbaot olgeta olsem ol sid we oli foldaon long ples we i gat ston long hem. Olgeta ya, fastaem oli glad blong akseptem tok blong God, be taem oli “kasem hadtaem o sam man oli ronem” olgeta, oli stambol. (Mat. 13:​5, 6, 20, 21) I tru se taem yumi fesem fasin agens o traem, yumi save harem nogud. Be taem yumi stanap strong mo gohed blong wosipim Jehova, yumi save kasem blesing. ?Long wanem rod?

12. ?Taem yumi stanap strong long ol trabol, hemia i mekem i gud long yumi olsem wanem?

¹² Disaepol Jemes i tokbaot gudfala samting we i kamaot taem yumi stanap strong long ol trabol. Hem i raetem se: “Taem yufala i stanap strong oltaem, bambae yufala i trenem gud yufala, nao yufala i save kam stret gud mo yufala i save mekem evri samting mo yufala i no sot long wan samting.” (Jem. 1:​2-4) Jemes i tokbaot fasin blong stanap strong se hem i gat wan wok blong mekem. ?Wanem wok ya? Hem i save halpem yumi blong wokem ol gudfala fasin olsem, longfala tingting, bilif, mo blong trastem moa Jehova. Be taem yumi stanap strong long ol trabol, hemia i mekem i gud long yumi long wan narafala rod tu.

13-14. ?Wanem i hapen taem yumi stanap strong, mo olsem wanem hemia i joen wetem hop blong yumi? (Rom 5:4)

¹³ Ridim Rom 5:4. Pol i talem se taem yumi stanap strong, “God i glad long yumi.” Yes, fasin blong stanap strong i mekem Jehova i glad. Be hemia i no min se Jehova i glad taem yumi fesem ol traem o ol problem. Samting we i mekem hem i glad hemia yu. Fasin blong yu blong stanap strong i mekem Jehova i glad. !Hemia i wan nambawan blesing!—Sam 5:12.

¹⁴ Tingbaot se Ebraham i fesem ol trabol mo taem hem i stanap strong, Jehova i glad long hem. Jehova i luk hem olsem fren blong Hem mo i talemaot se hem i wan stret man. (Jen. 15:6; Rom 4:​13, 22) Hemia sem samting we Jehova i save mekem long yumi. Jehova i glad long yumi, i no from ol wok we yumi mekem o ol privilej we yumi gat. Be hem i glad long yumi taem yumi stanap strong long ol trabol we yumi fesem. Mo nomata hamas yia yumi gat, wanem trabol yumi fesem, o hamas wok we yumi naf blong mekem, be yumi evriwan i save stanap strong. ?Yu yu stap fesem wan trabol naoia, be yu stanap strong, mo yu gohed blong wosipim Jehova? Sipos yes, tingbaot se yu stap mekem Jehova i glad. Taem  yumi luksave se God i glad long yumi, hop we yumi gat long ol promes blong hem bambae i kam strong moa.

15. ?Pol i tokbaot wanem long Rom 5:​4, 5? ?From wanem maet hemia i mekem tingting blong samfala i paspas?

¹⁵ Olsem we Pol i eksplenem, Jehova i glad taem yumi holemstrong long hem mo stanap strong long ol trabol we yumi fesem. Makem ol nekiswan tok we Pol i talem, i se: “Taem God i glad long yumi, [hemia i lidim yumi blong] yumi gat hop, mo hop ya bambae i no mekem yumi harem nogud.” (Rom 5:​4, 5) Maet tok ya i mekem tingting blong samfala i paspas. ?From wanem? From we long Rom 5:​2, Pol i talem se ol Kristin long Rom oli gat wan hop finis. Hemia ‘hop ya se bambae oli kasem glori blong God.’ Taswe, maet sam oli save askem se, ‘?Sipos ol Kristin ya oli gat wan hop finis, from wanem Pol i tokbaot hop bakegen long ol tok blong hem?’

16. ?Olsem wanem hop we wan man i gat, i stat blong gru? (Mo tu, yu luk pija.)

¹⁶ Yumi naf blong kasemsave long ol tok blong Pol, taem yumi tingbaot hop olsem wan samting we i stap gru. Blong givhan long yumi, traem tingbaot faswan taem we yu harem nambawan hop ya blong God we i stap long Baebol. Maet long taem ya, yu tingbaot se promes blong laef olwe long wan paradaes i nambawan, be yu no sua sipos bambae i hapen o nogat. Be taem yu stat blong lanem moa long saed blong Jehova mo ol promes blong Baebol, yu stat blong trastem se hop ya bambae i kamtru.

17. ?Olsem wanem hop we yu gat i gohed blong gru afta we yu givim laef blong yu long Jehova mo baptaes?

¹⁷ Mo tu, afta we yu givim laef blong yu long Jehova mo baptaes, yu gohed blong kasemsave moa long Jehova mo yu lavem hem moa. From samting ya, hop blong yu i gohed blong gru i kam strong moa. (Hib. 5:13–6:1) Maet yu ekspiriensem samting we Rom 5:​2-4 i talem. Yu fesem plante trabol, be yu stanap  strong long olgeta mo Jehova i soemaot se hem i glad long yu. Naoia we yu save se Jehova i lavem yu mo i glad long yu, yu sua se yu save kasem ol samting ya we hem i promes blong givim long yu. Mo tu, hop blong yu i kam strong moa i bitim bifo. I olsem we Jehova i mekem promes ya stret long yu. Mo hemia i save gat paoa long olgeta haf blong laef blong yu, fasin we yu mekem long famle blong yu, ol desisen blong yu, mo olsem wanem yu yusum taem blong yu.

18. ?Jehova i talem wanem blong pruvum se hop blong yu bambae i kamtru?

¹⁸ Aposol Pol i tokbaot wan narafala impoten poen long saed blong hop blong yu, taem God i glad long yu. Hem i mekem yu sua se hop we yu gat bambae i kamtru. ?From wanem yu sua long samting ya? Hemia from tok blong God we Pol i talem long ol Kristin, i se: “Hop ya bambae i no mekem yumi harem nogud, from we tabu spirit ya we God i givim long yumi, i stap soemaot long yumi se hem i lavem yumi tumas.” (Rom 5:5) Yes, yu gat plante risen blong sua se hop ya we God i givim, bambae i kamtru.

19. ?Wanem i mekem yu sua long hop we yu gat?

¹⁹ Tingbaot promes we Jehova i mekem long Ebraham mo olsem wanem Jehova i glad long hem, mo i luk hem olsem fren blong Hem. Samting we Ebraham i stap wet from i kamtru. Baebol i talem se: “From we Ebraham i gat longfala tingting, hem i wet gogo promes ya i kamtru.” (Hib. 6:15; 11:​9, 18; Rom 4:​20-22) Ebraham i no harem nogud. Yu tu, sipos yu gohed blong holemstrong long Jehova, bambae yu save kasem ol samting we yu stap wet from. Yu gat plante risen blong stap glad, from yu save se hop blong yu bambae i kamtru. !Bambae yu no harem nogud! (Rom 12:12) Pol i raetem se: “Mi prea se God ya we i stap givim hop, i givim bigfala glad mo pis long yufala from we yufala i trastem hem, nao bambae tabu spirit i mekem se hop blong yufala i kam strong moa.”—Rom 15:13.