I SUA se yu glad tumas long ol gudfala presen we God i givim long yu, inkludum fasin ya we yu fri blong jusum olsem wanem blong yusum ol presen ya. Baebol i talem se waen i wan presen we God i givim. Hem i se: “Bred i blong mekem man i laf, mo waen i mekem laef i nambawan.” (Pri. 10:19; Sam 104:15) Be maet yu luk se i gat sam man oli gat problem wetem alkol. Mo tu, raon long wol, ol man oli gat defdefren tingting long fasin blong dring alkol. Taswe, ?wanem i save halpem ol Kristin blong mekem waes desisen long saed blong alkol?

Nomata se yumi laef wea o wanem kalja yumi gruap long hem, be yumi mas letem tingting blong God long saed blong alkol i lidim yumi blong mekem ol desisen. Olsem nao, bambae yumi gat gudfala laef.

Olsem we yumi luk, plante man long wol oli dring plante mo oli dring bitim mak. Samfala maet oli dring from hemia i mekem se oli rilaks. Sam narafala oli dring blong oli no moa wari from ol problem blong olgeta. Mo long sam ples, ol man oli ting se man we i dring bitim mak, hem i wan bigman o i wan strong man.

Be ol Kristin oli gat ol gudfala advaes blong lidim olgeta, we i kam long Krieta blong yumi we i lavem yumi. Eksampol, hem i talemaot long yumi nogud frut we i save kamaot taem man i dring bitim mak. Maet yu bin ridim Ol Proveb 23:​29-35, we i tokbaot man we i drong mo nogud frut we i kamaot from. a Daniel, we i wan Kristin elda long Yurop, i tingbaot bakegen laef blong hem bifo we hem i kam Kristin. Hem i talem se: “Bifo, mi dring alkol bitim mak, mi mekem plante nogud desisen. From samting ya, mi kasem plante trabol mo mi harem nogud yet, taem mi tingbaot ol trabol ya.”

?Olsem wanem ol Kristin oli save yusum fasin ya we oli fri blong jus, blong mekem ol waes desisen long saed blong alkol, mo blokem ol problem we i save kamaot from? Yumi mas letem tingting blong God i lidim tingting mo ol aksen blong yumi.

Naoia bambae yumi luk samting we Baebol i talem long saed blong alkol, mo sam risen from wanem ol man oli stap dring alkol.

Tok blong God i no agensem fasin blong dring sam alkol. Hem i talem se fasin blong dring waen i save mekem man i harem gud. Baebol i se: “Yu kakae mo yu stap harem gud, mo yu dring waen blong mekem hat blong yu i glad.” (Pri. 9:7) Wan taem Jisas i dring waen, taswe ol gudfala man blong Jehova tu oli dring alkol.—Mat. 26:​27-29; Luk 7:34; 1 Tim. 5:23.

Tok blong God i no agensem fasin blong dring sam alkol, be hem i agensem fasin blong drong. Hem i talem klia se: “Yufala i no dring waen gogo yufala i drong.” (Efes. 5:18) Mo hem i talem tu se: “Ol man blong drong . . . bambae oli no kasem Kingdom blong God.” (1 Kor. 6:10) Yes, Jehova i no laekem nating fasin blong dring bitim mak mo drong. Taswe, i nogud yumi folem tingting blong ol man raonabaot long yumi long saed blong alkol, be i gud yumi mekem desisen folem tingting blong God.

Sam man oli ting se oli save dring plante alkol, we oli no drong. Be hemia i denja tumas. Baebol i talem klia se wan man (o wan woman) we i kam “slef blong waen,” hem i save mekem plante mastik mo sin agensem Jehova. (Taetas 2:3; Prov. 20:1) Mo tu, Jisas i givim woning se fasin blong “dring bitim mak” i save blokem wan man blong i no go insaed long niufala wol blong God. (Luk 21:​34-36) Taswe, ?wanem i save halpem wan Kristin blong blokem ol trabol we i save kamaot from alkol?

Taem wan man i mekem desisen long saed blong alkol folem kalja we hem i gruap long hem, hemia i wan denja. Ol Kristin we oli waes, oli mekem Jehova i glad taem oli tingting gud long ol desisen we oli mekem long kakae mo dring. Baebol i rimaenem yumi se: “Sipos yufala i stap kakae o yufala i dring, o yufala i stap mekem narafala samting, yufala i mas mekem olgeta samting blong givim glori long God.” (1 Kor. 10:31) Hemia sam long ol kwestin mo stamba trutok blong Baebol we yumi mas tingbaot:

?Mi mi dring alkol blong mekem ol narafala oli laekem mi? Eksodas 23:2 i talem se: “Yufala i no mas folem bighaf blong ol man.” Long vas ya, Jehova i givim woning long ol man Isrel se oli no mas folem tingting blong ol man we oli no stap mekem hem i glad. Mo advaes ya i stret yet long ol Kristin tede. Sipos yumi letem tingting blong ol narafala i gat paoa long tingting mo ol desisen blong yumi long saed blong alkol, hemia i save pulum yumi blong mekem ol samting we i no stret, mo lusum frensip blong yumi wetem Jehova.—Rom 12:2.

?Mi mi dring alkol blong soemaot se mi mi strong? Long sam kalja, ol man oli ting se i oraet nomo we man i dring alkol oltaem mo i dring bitim mak. (1 Pita 4:3) Be makem samting we 1 Korin 16:13 i talem, i se: “Yufala i mas stap wekap, yufala i mas stanap strong long bilif, yufala i mas stap oltaem olsem ol man we oli no fraet, mo yufala i mas gohed blong kam strong.” ?Olsem wanem? ?Alkol i save mekem wan man i kam strong? Nogat. Alkol i mekem se man i no tingting gud mo i no mekem gudfala desisen. Taswe, taem wan man i dring plante alkol, hemia i no pruvum se hem i wan strong man, be i soemaot se hem i krangke. Aesea 28:7 i tokbaot wan man we i lusum rod from alkol i mekem hem i lelei olbaot, mo i stambol.

Paoa we yumi gat blong mekem ol gudfala desisen i kam long Jehova, be long saed blong yumi, yumi mas stap wekap mo stanap strong long bilif. (Sam 18:32) Wan trufala Kristin i mekem olsem taem hem i blokem ol denja mo i mekem ol gudfala desisen we bambae i no spolem frensip blong hem wetem Jehova. Jisas i soemaot se hem i fren gud wetem Jehova taem hem i stap long wol, mo plante man oli respektem hem from we hem i gat strong tingting mo i no fraet.

 ?Mi mi dring alkol blong mekem se mi no wari from ol problem blong mi? Jehova i pulum man blong raetem ol sam, blong talem se: “Taem mi wari bitim mak, yu [Jehova] mekem mi harem gud, mo yu mekem tingting blong mi i kwaet.” (Sam 94:19) Sipos yu wari from ol trabol we yu fesem, i gud yu dipen long Jehova blong i halpem yu, be i no alkol. Wan nambawan rod we i save halpem yu blong no wari tumas, hemia blong prea oltaem long Jehova. Mo tu, plante man oli luk se taem oli askem advaes long wan fren long kongregesen we i bigman long spirit, hemia i givhan long olgeta. Blong talem stret, taem wan man i dring alkol blong traem winim ol problem blong hem, hemia i save mekem se hem i no moa gat strong tingting blong mekem samting we i stret. (Hos. 4:11) Daniel, we i yumi tokbaot hem finis, i talem se: “Mi mi stap wari mo mi harem se mi gilti. Ale, mi dring alkol blong mekem se mi no wari tumas, be hemia i mekem se mi kasem plante moa problem. Mi no moa gat fren mo ol man oli no moa respektem mi.” ?Biaen, wanem i halpem Daniel? Hem i talem se: “Mi luksave se mi nidim blong dipen long Jehova, be i no alkol. Taem mi mekem olsem, mi naf blong dil wetem ol problem blong mi mo winim olgeta.” I tru se oltaem Jehova i rere blong halpem yumi, nating sipos i luk olsem se i no gat rod blong winim ol problem blong yumi.—Fil. 4:​6, 7; 1 Pita 5:7.

Sipos samtaem yu stap dring alkol, i gud yu askem ol kwestin ya: ‘?Wan memba blong famle o wan gudfala fren i wari long mi taem i luk se mi stap mi dring alkol?’ Sipos yes, hemia i soemaot se yu stat blong dring alkol oltaem, o yu gat wan problem blong alkol we yu no luksave. ‘?Mi mi stap dring alkol moa i bitim bifo?’ Maet hemia wan saen we i soemaot se wan man we i no ting se hem i save kam slef blong alkol, i stat blong laekem alkol moa. ‘?Mi mi harem se i had blong stopem alkol blong sam dei o longtaem moa?’ Sipos yes, maet hemia i soemaot se yu kam slef blong alkol, mo hemia i min se bambae yu nidim sam spesel help blong winim problem ya.

Blong blokem ol denja o problem we i kamaot from alkol, sam Kristin oli disaed blong no dring eni alkol. Sam narafala, maet oli jusum blong no  dring alkol from oli no laekem tes blong hem. Sipos wan fren blong yu i mekem wan desisen olsem, yu save soemaot se yu kaen long hem taem yu respektem desisen blong hem mo yu no jikim hem.

Maet yu luksave se i moa waes blong putum limit long hamas alkol we bambae yu dring. O maet yu putum wan rul blong talem hamas taem bambae yu dring, maet wan taem long wan wik o long taem blong kakae nomo. Samfala oli jusum blong dring sam kaen alkol olsem, waen o bia be i no ol strong dring o ol dring we oli miksim. Taem wan man i putum limit olsem, bambae i moa isi blong hem i folem. Mo hem i no save wari long tingting we ol narafala oli save gat long hem, from we hem i mekem wan desisen finis mo i gat strong tingting blong folem.

Taem yumi mekem desisen long saed blong alkol, yumi mas tingbaot tu tingting blong ol narafala. Rom 14:21 i talem se: “I moa gud yu no kakae mit, mo yu no dring waen, mo yu no mekem eni samting we i save mekem brata blong yu i stambol.” ?Olsem wanem blong folem advaes ya? Soemaot lav long ol brata mo sista. Sipos yu wantem dring alkol mo yu ting se maet wan man bambae i harem nogud from, lav bambae i pulum yu blong no dring alkol. Taem yu mekem olsem, yu soemaot se yu respektem mo yu lavem narafala, mo yu tingbaot filing blong olgeta i bitim blong yu wan.—1 Kor. 10:24.

Ol loa blong gavman tu oli save lidim wan Kristin blong mekem desisen. Maet ol loa ya oli talem stret yia we man i mas gat blong hem i save dring alkol. O maet loa i talem se taem man i dring alkol, hem i no mas draev o yusum sam kaen masin.—Rom 13:​1-5.

Jehova i givim plante nambawan presen long yumi, inkludum fasin ya we yumi fri blong jusum olsem wanem blong yusum ol presen ya. Hemia i min se yumi fri blong jusum wanem we bambae yumi kakae mo dring. Yumi soemaot se yumi glad long presen ya, taem yumi mekem ol desisen we Papa blong yumi long heven i glad long hem.