1. ?Wan yangfala man i save mekem wanem blong kam bigman long spirit?

 KING Deved i talem long Solomon se: “Yu mas strong mo soemaot se yu yu wan man.” (1 King 2:​1-3) Hemia wan advaes we olgeta Kristin man tede oli sud folem. Blong mekem olsem, oli mas lanem blong obei long ol loa blong God, mo folem ol stamba trutok blong God long laef blong olgeta. (Luk 2:52) ?From wanem i impoten we ol yangfala brata oli kam bigman long spirit?

2-3. ?From wanem i impoten we wan yangfala brata i kam bigman long spirit?

² Wan Kristin man i gat plante wok blong mekem long famle mo long kongregesen. Taswe i sua se ol yangfala brata oli stap tingbaot ol wok we oli save mekem long fiuja. Maet yu wantem kasem mak ya blong mekem wok blong Jehova fultaem, o kam wan man blong givhan mo biaen kam wan elda long kongregesen. Mo tu, maet yu wantem mared mo gat pikinini. (Efes. 6:4; 1 Tim. 3:1) Be blong kasem ol mak ya mo mekem gud olgeta, yu mas kam wan Kristin we i bigman long spirit. b

³ ?Wanem i save halpem yu blong kam bigman long spirit? I gat sam impoten samting we yu mas lanem mo kam gud long olgeta. Taswe, sipos yu rere naoia from ol wok we maet yu save mekem long fiuja, bambae yu save mekem gud olgeta.

4. ?Weples yu save faenem ol gudfala eksampol blong folem? (Mo tu, yu luk pija.)

⁴ Jusum ol gudfala eksampol blong folem. Baebol i fulap long plante gudfala eksampol blong ol man, we ol yang man oli save folem. Ol man ya bifo, oli lavem God mo oli mekem plante defren  wok blong lukaot long ol man blong hem. Insaed long famle mo long kongregesen, yu save faenem ol gudfala eksampol blong ol Kristin we oli bigman long spirit. (Hib. 13:7) Mo tu, yu save folem gudfala eksampol blong Jisas Kraes. (1 Pita 2:21) Taem yu stadi gud long ol eksampol ya, traem makem fasin blong ol man ya we yu yu laekem. (Hib. 12:​1, 2) Biaen, luk olsem wanem yu save folem fasin blong olgeta.

5. ?Olsem wanem yu save lanem blong yusum gud tingting blong yu, mo from wanem i impoten? (Ol Sam 119:9)

⁵ Wokem mo “holemgud . . . fasin blong yusum gud tingting.” (Prov. 3:21) Wan man we i yusum tingting blong hem, i tingting gud fastaem bifo i tekem aksen. Taswe i gud yu wok had blong wokem fasin ya mo holemtaet. ?From wanem? From we plante yang man tede oli mekem desisen folem prapa tingting o filing blong olgeta. (Prov. 7:7; 29:11) Mo tu, ol samting long media oli save gat bigfala paoa long tingting mo aksen blong yu. ?Be olsem wanem yu save lanem blong yusum gud tingting blong yu? Fastaem, yu save lanem ol stamba trutok blong Baebol mo luk olsem wanem oli save mekem i gud long yu. Biaen, yusum ol save ya blong mekem ol desisen we i mekem Jehova i glad. (Ridim Ol Sam 119:9.) Sipos yu wokem impoten fasin ya, bambae yu save kam bigman long spirit. (Prov. 2:​11, 12; Hib. 5:14) Traem luk olsem wanem fasin blong yusum gud tingting bambae i halpem yu long tu situesen: (1) taem yu dil wetem ol sista mo (2) taem yu mekem desisen long saed blong klos mo hea.

6. ?Olsem wanem fasin blong yusum gud tingting i save halpem wan yangfala brata blong soem respek long ol sista?

⁶ Fasin blong tingting gud bambae i halpem yu blong soem respek long ol woman. I nomol mo i stret nomo blong wan yang brata i intres long wan Kristin sista. Be wan yang brata we i yusum gud tingting blong hem, bambae i lukaot gud blong no talem, raetem, o mekem eni samting blong pulum filing blong wan yang sista, sipos hem i no gat tingting blong maredem hem. (1 Tim. 5:​1, 2) Sipos hem i stap frenem wan sista, bambae hem i meksua se oltaem i gat wan narafala i  stap wetem tufala, blong protektem gud nem blong sista ya.—1 Kor. 6:18.

7. ?Olsem wanem fasin blong yusum gud tingting i save halpem wan yang brata, taem i jusum stael blong klos mo hea?

⁷ Wan narafala rod we wan yang man i soem se hem i gat fasin blong tingting gud, hemia taem hem i jusum gud stael blong klos mo hea blong hem. Plante taem, bighaf blong ol man we oli disaenem mo advetaesem ol niufala stael blong klos, oli no respektem Jehova mo oli gat ol rabis fasin. Yumi luksave samting ya tru long ol stael blong klos we oli taet tumas, o oli mekem ol man oli luk olsem ol woman. Taswe, wan yang man we i bigman long spirit, bambae i letem ol stamba trutok blong Baebol mo ol gudfala eksampol long kongregesen oli gat paoa long hem taem i jusum klos we bambae hem i werem. Hem i save askem hem wan se: ‘?Ol stael we mi jusum oli soemaot se mi gat stret tingting mo mi respektem ol narafala? ?Stael blong klos blong mi bambae i mekem ol narafala oli bilivim se mi mi mekem wok blong God?’ (1 Kor. 10:​31-33; Taetas 2:6) Wan yang man we i tingting gud, bambae i mekem se ol brata mo sista oli respektem hem, be antap moa Jehova.

8. ?Olsem wanem wan yang brata i save soemaot se narafala i save trastem hem?

⁸ Soem se narafala i save trastem yu. Wan yang man we i soemaot se narafala i save trastem hem, i mekem gud ol wok blong hem. (Luk 16:10) Traem tingbaot gudfala eksampol blong Jisas. Hem i neva wok olbaot o no mekem gud wok blong hem, be oltaem hem i mekem samting we Jehova i askem, nating se samtaem i no isi. Hem i lavem ol man, speseli ol disaepol blong hem, mo i rere blong givim laef blong hem from olgeta. (Jon 13:1) Olsem Jisas, i gud yu wok had blong mekem eni wok we oli givim long yu. Sipos yu no save olsem wanem blong mekem wan wok, i gud yu gat tingting daon mo askem help blong ol brata we oli bigman long spirit. Taem yu mekem wan wok, i nogud yu mekem hafhaf. (Rom 12:11) Be i gud yu finisim wok ya olsem we i “blong Jehova, be i no blong ol man.” (Kol. 3:23) I tru, yu no stret gud olgeta, taswe i gud yu gat tingting daon mo talemaot ol mastik blong yu.—Prov. 11:2.

9. ?From wanem wan yangfala brata i mas lanem ol samting we oli save halpem hem evri dei?

⁹ Blong kam bigman long spirit, yu mas lanem ol samting we i save halpem yu evri dei. Hemia bambae i halpem yu blong akseptem wan wok long kongregesen, holem wan wok we i save sapotem yu o famle, mo fren gud wetem ol narafala. Hemia sam long ol samting we i save halpem yu evri dei.

10-11. ?Olsem wanem wan yang brata i givhan long hem wan mo long kongregesen taem i lanem blong rid mo raet gud? (Ol Sam 1:​1-3) (Mo tu, yu luk pija.)

¹⁰ Lanem blong rid mo raet gud. Baebol i talem se man we i glad mo i win long laef blong  hem, hem i ridim Tok blong God evri dei mo i tingting dip long hem. (Ridim Ol Sam 1:​1-3.) Taem hem i ridim Baebol evri dei bambae hem i save gud ol tingting blong Jehova, mo hemia bambae i halpem hem blong i tingting gud mo i lanem blong folem ol samting we hem i ridim. (Prov. 1:​3, 4) Kongregesen i nidim ol man olsem. ?From wanem?

¹¹ Ol brata mo sista oli nidim help blong ol man we oli naf blong tij mo givim advaes we i stanap long Baebol. (Taetas 1:9) Sipos yu save rid mo raet gud bambae yu naf blong givim ol tok mo ansa we i leftemap tingting mo i mekem bilif blong ol narafala i kam strong. Mo tu, bambae yu naf blong raetemdaon ol poen we yu faenem long prapa stadi blong yu, mo taem yu lesin long ol tok long ol miting mo ol asembli. Ol poen ya bambae oli save halpem yu blong mekem bilif blong yu i kam strong mo blong yu enkarejem ol narafala.

12. ?Wanem bambae i halpem yu blong kam wan man we i lesin gud mo i toktok kaen?

¹² Lanem blong lesin gud mo toktok kaen. Wan Kristin man i mas lanem blong mekem olsem. Man olsem, hem i lesin gud mo i kasemsave long tingting mo filing blong ol narafala. (Prov. 20:5) Hem i save lanem blong kasemsave long filing blong man tru long voes, fes, mo aksen blong hem. Yu no save lanem samting ya sipos yu no spenem taem wetem ol man. Sipos oltaem yu yusum ol samting olsem imel o teks mesej blong toktok wetem ol man, bambae yu no gat gudfala fasin blong lesin gud mo toktok kaen long ol man fes tu fes. Taswe i gud yu tekem janis blong toktok long ol narafala man.—2 Jon 12.

13. ?Wanem narafala samting we wan yang man i mas lanem? (1 Timoti 5:8) (Mo tu, yu luk pija.)

¹³ Lanem blong sapotem yu wan. Wan Kristin we i bigman long spirit i mas naf blong sapotem hem wan mo famle blong hem. (Ridim 1 Timoti 5:8.) Long sam kantri, ol papa o wan nara memba blong famle i save tijim ol yang brata blong mekem wan wok. Mo long sam ples, wan yang man i save go long wan skul we i tijim hem blong gat gudhan blong mekem wan samting. Nating se i olsem, i gud blong lanem wan samting we i save halpem yu blong faenem wan wok. (Wok 18:​2, 3; 20:34; Efes. 4:28) Ol man bambae oli tinghae long yu sipos yu lanem blong wok had mo finisim gud wan wok. Sipos yu mekem olsem bambae yu naf blong faenem wan wok mo holemtaet. I impoten tumas we wan Kristin man i lanem blong gat ol fasin ya mo lanem ol samting we yumi jes tokbaot, blong rerem hem wan from ol wok we bambae hem i mekem long fiuja. Naoia i gud yumi tokbaot sam long ol wok ya.

14. ?Olsem wanem wan yang brata i save rere naoia blong mekem wok blong Jehova fultaem?

¹⁴ Mekem wok blong Jehova fultaem. Plante brata we oli bigman long spirit oli stat blong mekem wok blong Jehova fultaem, taem oli yangfala nomo. Wok blong paenia i save halpem wan yang brata blong i lanem blong wok gud wetem ol man we oli gat defdefren fasin. Mo tu hem i lanem olsem wanem blong sevem mane mo yusum gud. (Fil. 4:​11-13) Wan gudfala rod blong statem wok blong Jehova fultaem, hemia blong mekem haftaem paenia. Plante oli mekem wok blong haftaem paenia blong sam taem mo hemia i halpem olgeta blong kam ol fultaem paenia. Wok blong paenia i openem doa blong yu save mekem moa long wok blong Jehova, inkludum wok long konstraksen, o kam wan Betelaet.

15-16. ?Wanem fasin we wan yang brata i mas gat, blong i save mekem ol wok long kongregesen?

¹⁵ Kam wan man blong givhan o elda. Evri brata oli sud wok had blong wokem ol fasin we i save halpem olgeta blong kam wan elda. Baebol i talem se man we i traehad blong kasem wok ya, hem i stap “wantem wan gudfala wok.” (1 Tim. 3:1) Bifo we wan brata i kam wan elda, fastaem hem i mas kasem mak ya blong kam wan man blong givhan. Ol man blong givhan, oli halpem ol elda long plante defren rod. Ol elda mo man blong givhan, oli gat tingting daon blong halpem ol brata mo sista mo oli wok strong long wok blong prij. Ol yang brata oli save kasem mak blong kam man blong givhan nating sipos oli yangfala yet. Mo wan man blong givhan we i gat ol gudfala fasin, i save kam wan elda nating sipos hem i gat 20 yia nomo.

¹⁶ ?Wanem ol fasin we yu mas gat blong kam wan man blong givhan mo biaen wan elda? Baebol i givim wan lis blong ol fasin we yu nidim. Be tingbaot se ol fasin ya oli stanap long Baebol mo long lav we yu gat long Jehova, famle blong yu, mo kongregesen. (1 Tim. 3:​1-13; Taetas 1:​6-9; 1 Pita 5:​2, 3) I gud yu traehad blong kasemsave long ol fasin ya, mo prea long Jehova blong i halpem yu blong wokem ol fasin ya. c

17. ?Wan yangfala brata i save mekem wanem blong rerem hem from wok blong hasban mo hed blong famle? (Mo tu, yu luk pija.)

¹⁷ Kam wan hasban mo hed blong famle. Olsem Jisas i talem, sam Kristin we oli bigman long spirit, oli disaed blong stap singel. (Mat. 19:12) Be sipos yu jusum blong mared, bambae yu gat wok ya tu blong kam wan hasban  mo hed blong famle. (1 Kor. 11:3) Jehova i wantem se wan hasban i lavem waef blong hem mo i givim samting we hem i nidim long bodi, filing, mo spirit. (Efes. 5:​28, 29) Ol fasin mo ol samting we yumi tokbaot long stadi ya, olsem fasin blong yusum gud tingting, respektem ol woman, mo soemaot se narafala i save trastem yu, bambae oli halpem yu blong kam wan gudfala hasban. Mo bambae yu rere blong mekem wok blong yu olsem wan hasban mo hed blong famle.

18. ?Olsem wanem wan yangfala brata i save rerem hem blong kam wan papa?

¹⁸ Kam wan papa. Afta we yu mared maet yu save kam wan papa. ?Yu save lanem wanem long fasin blong Jehova we i wan gudfala papa? Yumi save lanem plante samting. (Efes. 6:4) Jehova i talem long Boe blong hem Jisas, se i lavem hem mo i glad long hem. (Mat. 3:17) Sipos yu kam wan papa, i gud we oltaem yu talem long ol pikinini blong yu se yu lavem olgeta. Talem gudfala toktok oltaem long olgeta from ol gudfala samting we oli mekem. Ol papa we oli folem eksampol blong Jehova, oli halpem ol pikinini blong olgeta blong oli kam ol Kristin man mo woman we oli bigman long spirit. Yu save rere naoia blong kam wan gudfala papa, taem yu soemaot lav long famle blong yu, long olgeta long kongregesen, yu lukaot gud long olgeta, mo yu lanem blong talem se yu glad long olgeta mo yu lavem olgeta. (Jon 15:9) Hemia bambae i halpem yu blong mekem gud wok blong yu olsem wan hasban mo wan papa. Be naoia we yu yangfala yet, Jehova i save yusum yu blong mekem wok blong hem, givhan long famle blong yu, mo long kongregesen.

19-20. ?Wanem bambae i halpem ol yangfala brata blong kam bigman long spirit? (Yu luk pija long fran pej.)

¹⁹ Ol yangfala brata, yufala i no save kam bigman long spirit olsem nomo, be yufala i mas traehad. Yufala i mas jusum ol gudfala eksampol blong folem, wokem fasin blong yusum gud tingting, soemaot se narafala i save trastem yu, lanem ol samting we i save halpem yu evri dei, mo rerem yu from fiuja blong yu.

²⁰ Taem yu tingbaot ol samting we yu mas wok had blong mekem, ating bambae yu harem se hemia i had tumas. Be yu save mekem. Tingbaot se Jehova i wantem tumas blong halpem yu. (Aes. 41:​10, 13) Mo ol brata mo sista long kongregesen bambae oli halpem yu tu. Taem yu kasem mak ya blong kam bigman long spirit, bambae yu glad mo laef blong yu bambae i ron gud. !Mifala i lavem yufala ol yangfala brata! I gud Jehova i blesem yufala bigwan, taem yufala i stap traehad naoia blong kam bigman long spirit.—Prov. 22:4.