1-2. ?Wanem ol samting we i save mekem yumi krae?

 I SUA se yumi evriwan i krae samtaem. Maet yumi krae from wan samting we i mekem yumi glad tumas. Maet yu krae from i gat wan impoten o spesel samting i hapen long yu. Eksampol, taem bebi blong yu i bon, o yu tingtingbak long wan gudfala memori, o taem yu mitim bakegen wan besfren blong yu we yu no luk hem blong plante yia.

² Be plante taem, yumi krae from we yumi harem nogud mo safa. Eksampol, maet yumi krae from we wan we yumi trastem hem, i spolem yumi, o yumi safa long wan sik we i stap longtaem, o taem wan gudfala fren o famle blong yumi i ded. Long ol taem olsem, maet yumi gat sem filing olsem profet Jeremaea taem ol man Babilon oli winim Jerusalem. Hem i talem se: “Wota blong ae blong mifala i ron olsem reva . . . Ae blong mi i krae olwe nomo, i no stop nating.”—Krae. 3:​48, 49.

3. ?Jehova i harem olsem wanem taem hem i luk we ol man blong hem oli stap safa? (Aesea 63:9)

³ Jehova i save gud hamas taem yumi krae from yumi harem nogud. Baebol i talem se hem i save gud ol samting we ol man blong hem oli stap fesem we i mekem oli harem nogud, mo hem i harem yumi taem yumi krae i go long hem blong i halpem yumi. (Sam 34:15) Be Jehova i mekem sam moa samting i bitim we hem i jes harem nomo we yumi krae i go long hem. Jehova i olsem wan gudfala papa we i harem nogud taem i luk we pikinini blong hem i stap krae, mo hem i wantem tumas blong halpem hem.—Ridim Aesea 63:9.

4. ?Wanem sam eksampol long Baebol we bambae yumi tokbaot? ?Mo bambae yumi lanem wanem long saed blong Jehova tru long ol eksampol ya?

 ⁴ Long Baebol, Jehova i talemaot olsem wanem hem i givhan long ol man blong hem, taem oli krae i go long hem. Bambae yumi luk samting ya, taem yumi tokbaot eksampol blong Hana, Deved, mo King Hesekia. Bambae yumi faenemaot ?from wanem oli krae? ?Olsem wanem Jehova i givhan long olgeta taem oli krae from help? Mo tu, bambae yumi luk olsem wanem eksampol blong olgeta i save mekem yumi harem gud taem yumi krae from yumi harem nogud, narafala i spolem yumi, o taem yumi harem se yumi no gat hop.

KRAE FROM YU HAREM NOGUD

5. ?Problem we Hana i fesem i mekem hem i harem olsem wanem?

⁵ Hana i fesem plante problem, nao hem i krae from we hem i harem nogud tumas. Wan long ol samting we i mekem hem i harem nogud, hemia se Penina we i narafala woman blong hasban blong hem, i no laekem hem nating. Antap long hemia, Hana i no save gat pikinini, be Penina i gat plante pikinini. (1 Saml. 1:​1, 2) Oltaem Penina i stap jikim Hana from we hem i no save gat pikinini. ?Sipos yu, bambae yu harem olsem wanem? Hana i harem nogud tumas, taswe “hem i krae mo i no wantem kakae,” mo hem i “harem nogud tumas” long hat blong hem.—1 Saml. 1:​6, 7, 10.

6. ?Hana i mekem wanem blong hem i save harem gud?

⁶ ?Wanem i mekem Hana i harem gud? Wan samting we i givhan long hem, hemia se hem i go wosipim Jehova long tabenakel. Long ples ya, maet hem i stap klosap long doa blong kam insaed long yad blong tabenakel, “hem i prea long Jehova mo i krae we i krae.” Hem i askem strong long Jehova se: “!Mi mi woman blong wok blong yu nomo! . . . Yu luk trabol blong mi, yu tingbaot mi.” (1 Saml. 1:10b, 11) Hana i prea mo i talemaot olgeta filing blong hem long Jehova. !I sua se Jehova i luk, taem Hana i krae i go long hem!

7. ?Hana i harem olsem wanem afta we hem i prea long Jehova?

⁷ ?Hana i harem olsem wanem afta we hem i prea long Jehova, mo Hae Pris Ilae i talem se Jehova bambae i harem prea blong hem? Baebol i talem se: “Hem i go aotsaed, i kakae, mo i no moa harem nogud.” (1 Saml. 1:​17, 18) Nating se ol problem we Hana i fesem oli stap yet, be hem i harem gud. Hem i putum olgeta problem ya long han blong Jehova. Jehova i luk we hem i harem nogud, i harem krae blong hem, mo biaen i blesem hem taem i letem hem i gat pikinini.—1 Saml. 1:​19, 20; 2:21.

8-9. Folem Hibru 10:​24, 25, ?from wanem yumi mas traehad blong stap oltaem long ol miting? (Mo tu, yu luk pija.)

⁸ Ol lesen blong yumi. ?Yu yu stap fesem wan samting we i mekem yu harem nogud nao yu krae? Maet yu harem nogud from wan memba blong famle o wan fren i ded. Long taem  olsem, i stret nomo we yu wantem stap yu wan. Be tingbaot eksampol blong Hana. Hem i go long Tabenakel mo Jehova i mekem hem i harem gud. Long sem fasin, Jehova bambae i mekem yu harem gud mo i leftemap tingting blong yu taem yu go long ol miting, nating se yu no wantem mekem olsem. (Ridim Hibru 10:​24, 25.) Taem yu go long ol miting, mo yu lesin long ol tok blong Baebol we i leftemap tingting blong yu, Jehova i save mekem se yu gat ol gudfala tingting mo yu no moa tingbaot ol nogud samting we i hapen. Mo hemia i save halpem yu blong kontrolem ol filing blong yu nating se samting we i mekem yu harem nogud, i stap yet.

⁹ Taem yumi go long ol miting, mo yumi joen wetem ol brata mo sista we oli tingbaot yumi mo oli lavem yumi, hemia i save mekem yumi harem gud. (1 Tes. 5:​11, 14) Tingbaot ekspiriens blong wan spesel paenia we waef blong hem i ded. Hem i talem se: “Samtaem, mi wantem stap mi wan nomo from we mi no save stop blong krae. Be ol miting blong yumi oli leftemap tingting blong mi bigwan. Ol gudfala toktok blong ol brata mo sista i mekem mi harem gud. Nating se bifo long miting mi wari, be oltaem mi harem gud moa afta long ol miting.” Taem yumi go long ol miting, Jehova i save yusum ol brata mo sista blong halpem yumi.

10. ?Olsem wanem yumi save folem eksampol blong Hana taem yumi harem nogud long filing blong yumi?

¹⁰ Hana i harem gud tu, taem hem i prea i talemaot ol filing blong hem long Jehova. Yu tu yu save ‘lego ol wari blong yu long Jehova,’ mo trastem se bambae hem i lesin long yu. (1 Pita 5:7) Wan sista we ol stilman oli kilim hasban blong hem i ded, i talem se: “Mi harem olsem se hat blong mi i brobrok long ol smosmol pis, mo bambae i neva kam gud bakegen. Be taem mi prea long Papa blong mi long heven, Jehova, we i lavem mi, mi harem gud. Samtaem, mi no save faenem ol stret tok blong talem, be hem i kasemsave long mi. Taem mi harem nogud bitim mak mo mi wari, mi prea blong hem i givim pis long mi. Nao mi haremsave se mi gat pis long hat mo tingting blong mi, mo mi save gohed.” Taem yu talemaot ol wari blong yu long Jehova, hem tu i harem nogud, mo i kasemsave long ol filing blong yu. Nating se ol samting we oli mekem yu wari oli stap yet, be Jehova i save mekem hat blong yu i kam kwaet, mo i halpem yu blong gat pis. (Sam 94:19; Fil. 4:​6, 7) Mo bambae hem i blesem yu from we yu stanap strong.—Hib. 11:6.

KRAE FROM NARAFALA I SPOLEM YU

11. ?Ol trabol we Deved i fesem oli mekem hem i harem olsem wanem?

¹¹ Long laef blong Deved, hem i fesem plante trabol we i mekem hem i krae. I gat plante man we oli no laekem hem nating, mo sam long ol man ya hemia olgeta we hem i trastem olgeta. (1 Saml. 19:​10, 11; 2 Saml. 15:​10-14, 30) Wan taem, hem i raetem se: “Mi mi stap pulum nogud win blong mi mo mi kam taed. Mi stap krae fulnaet, we wota blong ae blong mi i mekem bed blong mi i wetwet gud. Longfala jea blong mi i fulap gud long wota from we mi stap krae.” ?From wanem Deved i harem nogud olsem? Hem i eksplenem se hemia “from we ol man oli stap mekem nogud long mi.” (Sam 6:​6, 7) Nogud fasin we ol man ya oli mekem long Deved, i mekem hem i harem nogud tumas nao i krae we i krae.

12. ?Ol tok we i stap long Ol Sam 56:​8, oli soemaot se Deved i sua gud long wanem?

¹² Nating se Deved i fesem ol trabol ya, be hem i sua se Jehova i lavem hem. Hem i raetem se: “Jehova bambae i harem saon blong krae blong mi.” (Sam 6:8) Wan narafala taem, Deved i raetem wan naesfala poem we yumi faenem long Ol Sam 56:8. (Ridim.) Ol tok ya  oli soemaot klia se Jehova i lavem yumi tumas mo i kasemsave long ol filing blong yumi. Deved i harem olsem se Jehova i fulumap ol wota blong ae blong hem long wan botel o i makemdaon olgeta long wan buk. Deved i sua gud se Jehova i luk mo i tingbaot olsem wanem hem i harem nogud. Mo tu, Deved i sua fulwan se Papa blong hem long heven we i lavem hem, i luk ol trabol we hem i stap fesem, mo i luk tu olsem wanem hem i harem nogud.

13. ?Yumi mas tingbaot wanem taem ol narafala oli mekem yumi harem nogud? (Mo tu, yu luk pija.)

¹³ Ol lesen blong yumi. ?Yu yu stap harem nogud from wan we yu trastem hem i spolem yu, o i lego yu? Maet hat blong yu i brok from yu wetem boefren mo gelfren blong yu i stop blong fren, o hasban o waef blong yu i lego yu, o wan we yu lavem hem i no moa wosipim Jehova. Wan brata we waef blong hem i stap mekem adaltri mo i lego hem, i talem se: “Mi mi sek nogud mo mi no save bilivim. Mi harem nogud, mi harem se mi nating nomo, mo mi kros.” Sipos yu stap gotru long wan samting olsem, i gud yu save se Jehova bambae i neva lego yu. Brata ya i talem se: “Naoia mi luksave se ol gudfala fren we yumi gat oli save lego yumi, be Jehova i Bigfala Ston blong yumi. Nomata wanem samting i hapen, oltaem hem i stap. Mo bambae hem i neva lego ol man blong hem we oli holemstrong long hem.” (Sam 37:28) Mo tu, i gud yu tingbaot oltaem se Jehova i lavem yu moa i bitim eni narafala man. Wan gudfala fren we yu lavem hem, i save spolem yu. Be Jehova, oltaem bambae hem i kea long yu. (Rom 8:​38, 39) Impoten samting blong tingbaot, hemia se nomata se ol man oli mekem yu harem nogud olsem wanem, be Papa blong yu long heven i lavem yu.

14. ?Ol tok we i stap long Ol Sam 34:​18, oli mekem yumi sua long wanem?

¹⁴ Taem ol narafala oli spolem yumi, ol tok we i stap long Ol Sam 34:18 (Ridim.) i save mekem yumi harem gud. Wan buk i eksplenem se olgeta we “tingting blong olgeta i foldaon,” maet i save minim “olgeta we oli no gat wan gudfala samting blong wet from.” ?Be Jehova i mekem wanem blong givhan long ol man we oli gat filing olsem? Jehova i olsem wan papa we i holem han blong pikinini blong hem, mo i mekem hem i harem gud. Hem i mekem olsem taem hem “i stap klosap long” yumi, i sore long yumi, mo i rere blong halpem yumi. Taem hat blong yumi i brok mo yumi harem se yumi nating nomo, Jehova i wantem tumas blong mekem yumi harem gud. Mo hem i promes blong givim plante gudfala samting long yumi we yumi stap wet from, mo hemia i save halpem yumi blong  stanap strong long ol traem we yumi stap fesem naoia.—Aes. 65:17.

KRAE FROM YU HAREM SE YU NO GAT HOP

15. ?From wanem Hesekia i krae?

¹⁵ Taem King Hesekia blong Juda i gat 39 yia, hem i kasem wan strong sik. Ale, profet Aesea i kam talemaot mesej blong Jehova long hem se bambae hem i ded from sik ya. (2 King 20:1) I luk olsem se Hesekia i no moa gat hop. Nius ya i mekem hem i harem nogud tumas mo i krae we i krae. Nao hem i prea strong long Jehova blong i halpem hem.—2 King 20:​2, 3.

16. ?Jehova i mekem wanem taem hem i harem we Hesekia i krae i go long hem?

¹⁶ Jehova i harem prea blong Hesekia mo i luk we hem i stap krae, nao hem i sore long hem mo i talem se: “Mi mi harem prea blong yu finis. Mo mi luk wota blong ae blong yu. Naoia mi mi mekem yu yu kam gud bakegen.” Jehova i yusum Aesea blong talem se bambae hem i letem Hesekia i laef longtaem moa, mo bambae hem i tekemaot ol man Jerusalem long han blong ol man Asiria.—2 King 20:​4-6.

17. ?Olsem wanem Jehova i givhan long yumi, taem yumi kasem wan bigfala sik? (Ol Sam 41:3) (Mo tu, yu luk pija.)

¹⁷ Ol lesen blong yumi. ?Yu yu gat wan bigfala sik we i mekem yu harem se yu no gat hop? I gud yu prea mo yu krae i go long Jehova. Baebol i talem se, “Papa we i gat sore, mo hem i God ya we i mekem olgeta samting blong leftemap tingting blong man,” bambae i mekem yumi harem gud nating se yumi stap fesem ol trabol. (2 Kor. 1:​3, 4) Tede, Jehova i no save tekemaot olgeta trabol blong yumi, be yumi save lukluk i go long hem blong i halpem yumi. (Ridim Ol Sam 41:3.) Jehova i save yusum tabu spirit blong givim paoa, waes, mo pis, blong yumi save gotru long ol hadtaem ya. (Prov. 18:14; Fil. 4:13) Mo tu, yumi save harem gud long ol nambawan promes ya blong Baebol we i talem se, i no longtaem Jehova bambae i tekemaot olgeta sik.—Aes. 33:24.

18. ?Wanem vas we yu luk se i leftemap tingting blong yu, taem yu fesem wan samting we i rili traem yu? (Yu luk bokis ya “ Ol Gudfala Toktok We i Mekem Yumi No Moa Krae.”)

¹⁸ Ol tok we Jehova i talem long Hesekia, i mekem hem i harem gud. Yumi tu, Tok blong Jehova i save mekem yumi harem gud, taem yumi fesem ol problem we i mekem yumi harem nogud. (Rom 15:4) Taem wan sista long Wes Afrika i kasem kansa, plante taem hem i krae. Hem i talem se: “Wan vas we i rili leftemap tingting blong hem, hemia Aesea 26:3. Nating se yumi no save winim fulwan ol problem we yumi fesem, be vas ya i promes se Jehova i save mekem tingting blong yumi i kwaet, mo i halpem yumi blong stanap strong long ol traem ya.” ?I gat wan vas we i mekem yu yu harem gud taem yu fesem wan samting we i rili  traem yu, o i mekem yu harem se yu no gat hop?

19. ?Wanem promes we yumi stap wet from?

¹⁹ Naoia we yumi stap laef long en blong ol las dei, i sua se ol samting we oli stap mekem yumi krae, bambae oli kam antap moa. Be olsem we yumi luk long eksampol blong Hana, Deved, mo King Hesekia, Jehova i luk yumi taem yumi krae mo hem i harem nogud tumas from. Yes, Jehova i tingbaot ol wota blong ae blong yumi. Taswe, taem yumi stap fesem ol trabol we i mekem yumi harem nogud, i gud yumi prea mo yumi krae i go long Jehova. Mo tu, yumi no mas stap yumi wan, we yumi no joen wetem ol brata mo sista long kongregesen. Mo yumi mas gohed blong letem ol gudfala tok blong Baebol i mekem yumi harem gud. Yumi save sua se sipos yumi gohed blong holemstrong kasem en, Jehova bambae i blesem yumi. Mo hemia i minim tu se bambae yumi kasem nambawan promes ya we i no longtaem, Jehova bambae i mekem se yumi no moa krae from yumi harem nogud, narafala i spolem yumi, o yumi harem se yumi no gat hop. (Rev. 21:4) Be bambae yumi krae from we yumi glad tumas.