Mi bon long 1927 long wan smol taon klosap long Chicago, Illinois, U.S.A. Papa mo Mama blong mi i gat faef pikinini: Jetha, Don, mi, Karl, mo Joy. Mifala evriwan i gat strong tingting blong mekem wok blong Jehova long ful laef blong mifala. Sista blong mi Jetha i bin go long nambatu klas blong Gilead long 1943. Don i go wok long Betel long Brooklyn, Niu Yok, long 1944. Karl i go long Betel long 1947, mo biaen Joy tu i go Betel long 1951. Gudfala eksampol blong olgeta wetem blong perens blong mi, i rili leftemap tingting blong mi.

Perens blong mi i lavem God mo oli laekem blong ridim Baebol. Mo oli tijim mifala tu blong mekem sem mak. Be afta we papa blong mi i faet long Wol Wo I olsem wan soldia blong Yurop, hem i no moa respektem ol jej. Mama i glad tumas se papa i laef, mo taem hem i kambak, mama i talem long hem se: “Karl, i gud yumi go long jej, olsem we yumi bin stap mekem.” Papa i ansa se: “Mi save tekem yu yu go, be bae mi no save go insaed.” Mama i askem se: “?From wanem?” Papa i ansa se: “!Long taem blong wo, ol lida blong sem jej nomo oli stap blesem ol soldia we bambae oli faet agensem olgeta bakegen mo ol tul blong faet blong olgeta! ?Olsem wanem? ?God i stap sapotem tugeta saed?”

Be taem mama i stap yet long jej, tu Witnes blong Jehova i kam long haos blong mifala. Nao tufala i givim tu buk blong stadi long papa, hemia buk ya Light, we i tokbaot buk blong Revelesen. Papa i intres mo i agri blong tekem tufala buk ya. Taem mama i luk tufala buk ya, wantaem nomo hem i stat blong ridim. Wan dei, taem hem i stap ridim nius pepa, hem i luk wan notis we oli invaetem ol man we oli intres blong stadi Baebol long buk ya Light. Mo hem i mekem desisen blong go. Taem hem i go, wan olfala woman i openem doa. Ale mama i soem wan long tufala buk ya mo i askem se: “?Yufala i stap stadi long buk ya long ples ya?” Woman ya i ansa se: “Yes gel blong mi, kam insaed.” Nekis wik mama i tekem mifala ol pikinini i go wetem hem, mo biaen mifala i stap go evri wik.

Long wan miting, brata we i lidim stadi i askem mi blong ridim Ol Sam 144:​15, we i se olgeta we oli wosipim Jehova, oli glad. Mi laekem vas ya wetem tu narafala vas, hemia 1 Timoti 1:11 we i se Jehova i wan “hapi God,” mo Efesas 5:1 we i pulum yumi blong “folem fasin blong God.” Mi luksave se mi mas  mekem wok blong Krieta blong mi mo mi talem tangkiu long hem from. Mi traehad blong mekem tufala samting ya long ful laef blong mi.

Kongregesen we i klosap moa, i stap Chicago, mo mifala i mas travel 32 kilometa blong go longwe. Nating se i olsem, mifala i go oltaem mo mi stat blong kasemsave moa long Baebol. Mi tingbaot se long wan miting, brata we i lidim stadi i askem Jetha blong i ansa. Taem mi lesin long ansa blong hem, mi stap tingting se: ‘Mi save nomo. Mi sud leftemap han blong mi blong ansa.’ Ale mi stat blong rerem mo givim ol ansa long prapa tok blong mi. Samting we i moa impoten, hemia se mi stap kam klosap moa long Jehova olsem ol brata mo sista blong mi, mo mi baptaes long 1941.

Mi tingbaot gud bigfala asembli blong 1942 long Cleveland, Ohio. I gat bitim 50 defren eria long Yunaeted Stet we oli joen long asembli ya tru long telefon. Famle blong mi wetem plante brata sista, mifala i slip long ol tent klosap long ples blong asembli. Long taem ya Wol Wo II i stap gohed, mo ol man oli agensem bigwan ol Witnes blong Jehova. Taem ples i stat blong tudak, mi luk we ol brata oli laenemap ol trak blong olgeta, mo oli agri se samfala bambae oli stap insaed long ol wanwan trak ya blong sekiuriti long naet. Sipos i gat eni saen se bambae i gat trabol, ol brata ya bambae oli bibip long ol trak ya mo oli onem ol laet blong trak blong mekem ol man we oli kam blong atakem mifala oli blaen. Olsem nao, ol narafala oli save resis i go blong givhan. Mi stap tingting se: ‘!Ol man blong Jehova oli rere gud from eni samting!’ Mo from we mi haremsave se mi sef, mi slip gud long naet.

Sam yia biaen, taem mi tingtingbak long asembli ya, mi luksave se mama blong mi i neva wari o fraet. Hem i trastem fulwan Jehova mo oganaesesen blong hem. Bambae mi neva save fogetem gudfala eksampol blong hem.

Sam taem bifo long asembli ya, mama blong mi i kam wan fultaem paenia. Taswe, hem i lesin gud long ol tok we i tokbaot wok blong Jehova fultaem. Taem mifala i stap gobak long haos, hem i talem se: “Mi wantem gohed blong mekem wok blong paenia, be mi no save mekem mo long sem taem lukaot gud long haos blong yumi.” Biaen hem i askem sipos mifala i save givhan long hem. Mifala i agri mo hem i givim wok long mifala wanwan blong klinim wan o tu rum bifo brekfas. Afta we mifala i aot i go long skul, bambae hem i jekem sipos haos i klin gud, mo biaen hem i go prij. Hem i wan bisi woman, be oltaem hem i lukaotgud long mifala. Taem mifala i kambak long haos long lanj mo afta long skul, oltaem hem i stap blong givhan long mifala. Sam taem afta long skul, mifala i folem hem i go prij. Mo hemia i halpem mifala blong kasemsave se wok blong paenia i olsem wanem.

Mi stat blong paenia taem mi gat 16 yia. Nating se papa blong mi i no wan Witnes yet, be hem i intres blong save se wok blong paenia i olsem wanem. Wan naet, mi talem long hem se, nating se mi traehad be mi no faenem wan man we i wantem stadi Baebol. Be hem i stap kwaet nomo, ale mi askem hem se: “?Yu glad sipos mi stadi wetem yu?” Hem i tingting mo biaen i se: “Mi no gat wan gudfala risen blong talem no.” So faswan Baebol studen blong mi, hemia papa blong mi. !Long mi, hemia i rili spesel!

 Mitufala i stadi long buk ya “The Truth Shall Make You Free.” Taem mitufala i stap gohed blong stadi, mi luksave se papa i stap halpem mi blong kam wan gudfala studen mo tija. Eksampol, wan naet afta we mitufala i ridim wan paragraf, hem i talem se: “Mi kasemsave samting we buk ya i stap talem. ?Be olsem wanem yu save se samting we buk ya i talem i tru?” Mi no save olsem wanem blong ansa, so mi talem long hem se: “Mi no save pruvum long yu naoia, be long nekis stadi bambae mi save givim ansa long yu.” Mo hemia nao samting we mi mekem. Mi faenem sam vas we i sapotem poen ya we mitufala i bin tokbaot. Afta long taem ya, mi stat blong rerem gud stadi blong mitufala, mo mi lanem blong mekem risej. Hemia i givhan long mitufala tugeta blong gru long saed blong spirit. Hem i folem ol samting we hem i stap lanem, mo hem i baptaes long 1952.

Mi aot long haos taem mi gat 17 yia. Jetha a i kam wan misinari, mo Don i kam wan Betelaet. Tufala i laekem tumas wok blong tufala, mo hemia i leftemap tingting blong mi bigwan. Taswe, mi fulumap fom blong go long Betel mo Gilead skul, mo mi wet blong luk se Jehova bambae i jusum mi blong mekem wanem wok. ?Wanem i hapen? Oli invaetem mi blong go long Betel long 1946.

Long ol yia we mi stap long Betel, mi mekem plante defren wok mo mi lanem plante niufala samting. Mi stap long Betel 75 yia, mo long ol taem ya mi lanem olsem wanem blong mekem ol buk mo mi lanem tu blong mekem wok blong akaonten. Mo tu, mi lanem olsem wanem blong pem ol samting mo sanem ol samting i go long narafala ples. Antap long hemia, mi enjoem ol nambawan tijing we mi kasem long Betel, tru long moning wosip mo ol tok we i stanap long Baebol.

Mi lanem plante samting tu long smol brata blong mi Karl, we i kam long Betel long 1947. Hem i gat gudhan blong tijim ol narafala long Baebol. Wan taem, mi askem hem blong i halpem mi blong rerem wan tok we oli askem mi blong mekem. Mi eksplenem long Karl se mi faenem plante save, be mi no save olsem wanem blong yusum olgeta. Blong halpem mi, hem i askem wan kwestin nomo se: “Joel, ?wanem nao stamba tok blong yu?” Wantaem nomo mi kasemsave poen blong hem. Mi nidim nomo blong yusum ol save we oli joen wetem stamba tok ya mo lego ol narafala save we mi faenem. Hemia wan lesen we bambae mi neva save fogetem.

Blong yumi gohed blong stap glad long Betel, yumi mas mekem bes blong yumi long wok blong prij, nao bambae yumi gat plante nambawan ekspiriens. Wan we mi tingbaot gud, hemia long wan  aftenun taem san i stat blong godaon, long Bronx we i stap long taon blong Niu Yok. Mi mo wan brata i go visitim wan woman we i bin tekem wan Wajtaoa mo Wekap! Mitufala i talem halo mo mitufala i se: “Long aftenun ya mifala i stap halpem ol man blong oli lanem ol samting we i save leftemap tingting blong olgeta, we i stap long Baebol.” Nao woman ya i se: “Sipos yufala i wantem tokbaot Baebol, kam insaed.” Mifala i tokbaot mo ridim sam vas long saed blong Kingdom blong God mo niufala wol long fiuja. Hem i glad tumas long samting we hem i harem, ale hem i invaetem sam long ol fren blong hem blong oli joenem hem, taem mifala i visitim hem nekis wik bakegen. Naoia hem wetem hasban blong hem oli kam ol man blong Jehova.

Mi wantem tumas blong mared mo 10 yia afta mi mitim wan sista, we biaen i kam waef blong mi. ?Wanem i halpem mi blong faenem wan gudfala waef? Mi prea long Jehova mo mi stap tingting se: ‘?Wanem nao mi wantem mekem afta we mitufala i mared?’

Long bigfala asembli blong 1953, long Yankee Stadium, mi mitim wan sista we nem blong hem Mary Aniol. Hem mo Jetha i bin stap long nambatu klas blong Gilead, mo hem i mekem wok blong misinari wetem sista blong mi long semfala ples. Mary i glad blong tokbaot long mi wok blong hem olsem wan misinari long Karabien mo ol Baebol stadi we hem i stap mekem. Taem mitufala i stat blong save gud mitufala, mitufala i luksave se mitufala i gat ol semfala mak long saed blong spirit. Mitufala i stat blong laeklaekem mitufala moa, mo mitufala i mared long Eprel 1955. Plante taem mi luksave se Mary i wan presen we i kam long Jehova mo hem i soemaot wan gudfala eksampol long mi. Hem i glad nomo blong mekem eni wok. Hem i wok had, i soem se i kea long narafala, mo oltaem hem i putum Kingdom fasples. (Mat. 6:33) Mitufala i mekem wok blong eria elda blong tri yia, mo long 1958, oli invaetem mitufala blong go wok long Betel.

Mi lanem plante samting long Mary. Eksampol, afta we mitufala i mared, mitufala i disaed blong mekem Baebol riding tugeta, we mitufala i ridim 15 vas evri dei. Afta we wan long mitufala i rid, bambae mitufala i tokbaot ol samting we mitufala i laekem long vas ya, mo olsem wanem blong folem. Plante taem Mary bambae i tokbaot ol samting we hem i lanem long Gilead o long wok blong misinari. Ol samting we hem i tokbaot, oli halpem mi blong rerem gud moa ol tok blong mi, mo blong mi kam gud moa long fasin blong leftemap tingting blong ol sista.—Prov. 25:11.

Gudfala waef blong mi Mary i ded long 2013. !Mi wantem tumas blong luk hem long niufala wol! Be go kasem taem ya, mi gat strong tingting blong gohed blong lanem samting, mo trastem Jehova long fulhat blong mi. (Prov. 3:​5, 6) Taem mi tingbaot ol samting we bambae ol man blong Jehova oli mekem long niufala wol, hemia i mekem mi glad mo mi gat pis long tingting. !Mo long taem ya tu, bambae mi lanem plante niufala samting long saed blong Bigfala Tija blong yumi! Yes, mi no naf blong talem tangkiu long hem from evri samting we hem i yusum blong tijim mi, mo from fasin blong hem we i kaen tumas long mi.