1-2. ?Ol perens oli mas gat wanem tingting taem pikinini i askem kwestin long saed blong bilif blong yumi?

 PLANTE man bambae oli agri se i wan bigfala wok blong lukaot long wan pikinini. (Dut. 6:​6, 7) Sipos yu yu wan papa o mama we i gat wan smol pikinini, mifala i talem tangkiu from gudfala wok we yu mekem blong givhan long hem blong i gat strong bilif. Taem pikinini blong yu i stap gruap, bambae hem i stat blong askem ol impoten kwestin long saed blong ol samting we yumi bilif long hem long Baebol, mo long ol fasin we Baebol i tokbaot.

² Long stat, maet bambae yu wari long ol kwestin we pikinini blong yu i askem. Maet bambae yu ting se pikinini blong yu i no gat naf bilif. Be blong talem stret, taem pikinini i stap gruap, hem i nidim blong askem ol kwestin blong mekem bilif blong hem wan i kam strong. (1 Kor. 13:11) Taswe yu no nid blong wari. Taem pikinini i askem ol kwestin, hemia i wan janis blong yu halpem hem blong i yusum gud tingting blong hem, mo mekem bilif blong hem i kam strong.

3. ?Bambae yumi tokbaot wanem long stadi ya?

³ Long stadi ya, bambae yumi tokbaot olsem wanem ol perens oli save halpem pikinini blong olgeta blong (1) i gat strong bilif, (2) tinghae long ol gudfala fasin we Baebol i tokbaot, mo (3) difendem bilif blong hem. Mo tu, bambae yumi tokbaot from wanem i gud we pikinini i askem kwestin, mo sam samting we famle i save mekem, we i givim janis long ol perens blong oli tokbaot ol samting we yumi bilif long hem.

 HALPEM PIKININI BLONG YU BLONG I GAT STRONG BILIF

4. ?Wanem ol kwestin we maet pikinini i save askem, mo from wanem?

⁴ Ol Kristin perens oli luksave se from we olgeta oli gat bilif, hemia i no min se pikinini blong olgeta tu i gat bilif. Yu yu no bon wetem bilif. Mo hemia i sem mak long saed blong pikinini blong yu. Maet bambae pikinini blong yu i stat blong askem ol kwestin olsem: ‘?Olsem wanem nao mi save se i gat wan God? ?Mi save bilif long ol samting we Baebol i talem?’ Baebol i talem long yumi blong “yusum gud tingting” mo “traem olgeta samting fastaem.” (Rom 12:1; 1 Tes. 5:21) Taswe, ?olsem wanem yu save halpem pikinini blong yu blong i gat strong bilif?

5. ?Olsem wanem blong halpem pikinini blong i bilif long Baebol? (Rom 12:2)

⁵ Halpem pikinini blong i pruvum hem wan se hemia trutok. (Ridim Rom 12:2.) Taem pikinini i askem ol kwestin, tekem janis ya blong soem olsem wanem blong faenem ol ansa long ol tul blong mekem risej, olsem long Watch Tower Publications Index mo Buk Blong Mekem Risej. Yu go long topik ya “Baebol,” mo yu luk aninit long toktok ya “Kamaot Long God,” blong faenem ol pruf we i soemaot se Baebol i no wan gudfala buk we ol man nomo oli raetem. Be hem i “tok blong God.” (1 Tes. 2:13) Eksampol, hem i save mekem risej long saed blong olfala taon ya Nineve, we i taon blong ol man Asiria. Bifo, sam skola oli talem se i neva gat taon ya Nineve. Be samwe long ol yia 1850, ol man blong digim graon oli faenem taon blong Nineve, mo hemia i pruvum se samting we Baebol i talem i tru. (Sef. 2:​13-15) Sipos pikinini blong yu i wantem save moa olsem wanem taon ya blong Nineve we i lus i mekem profet tok blong Baebol i kamtru, hem i save luk haf ya “?Yu Yu Save?” long Wajtaoa blong Novemba 2021. Leftemap tingting blong pikinini blong i skelem ol samting we ol buk blong yumi oli talem, wetem wanem we ol narafala buk we yumi save trastem oli talem. Hemia bambae i halpem hem blong i bilif strong moa long samting we Baebol i talem.

6. ?Olsem wanem blong halpem pikinini blong i yusum gud tingting blong hem? Talem wan eksampol. (Mo tu, yu luk pija.)

⁶ Halpem pikinini blong i yusum gud tingting blong hem. Ol perens oli gat plante janis blong tokbaot Baebol mo fasin blong bilif long God, long pikinini blong olgeta. Yufala i save tekem janis olsem taem yufala i visitim wan musium, wan naesfala garen blong ol flaoa, o wan musium long branj ofis blong ol Witnes blong Jehova. Eksampol, taem yufala i visitim wan musium, pulum pikinini blong i tingbaot ol samting blong histri, o ol pruf we i save mekem hem i bilif se Baebol i tok tru. ?Pikinini  blong yu i save se nem blong God i stap long wan Ston Blong Moab, we i olfala blong samwe 3,000 yia? Ston ya i stap long Musium ya Louvre long Paris, Franis. Sipos yufala i no save go long ples ya, yufala i save go long intenet o long ol buk blong yumi, blong luk pija blong ol olfala ston, olsem Ston Blong Moab. Mo tu, i gat wan kopi blong Ston Blong Moab long musium ya “Baebol Mo Nem Blong God,” long Wol Hedkwota Blong Ol Witnes Blong Jehova long Warwick, Niu Yok. Long ston ya, oli raetem se King Mesaha blong Moab i rebel agensem Isrel. Hemia i laenap gud wetem ol tok blong Baebol. (2 King 3:​4, 5) Taem pikinini i luk ol pruf we i soemaot se Baebol i tru mo i stret, bambae bilif blong hem i kam strong moa.—Skelem wetem 2 Kronikel 9:6.

7-8. (1) ?Yumi lanem wanem long ol naesfala sep blong ol samting we yumi luk long kriesen? Talem wan eksampol. (Mo tu, yu luk pija.) (2) ?Wanem ol kwestin we yu save askem blong halpem pikinini blong i bilif strong moa se God nao i wokem olgeta samting?

⁷ Halpem pikinini blong i tingbaot ol nambawan samting long kriesen. Taem yufala i stap wokbaot long ol ples aotsaed long taon, o mekem garen, pulum pikinini blong i tingbaot sep blong ol samting long kriesen. ?From wanem? Blong hem i save pruvum se i mas gat wan Man we i wokem ol sep ya mo hem i waes we i waes. Wan long ol sep ya, yumi save luk long ol samting olsem, galaksi, sel ya nautilus, ol lif, mo san flaoa. a Mo sep ya, ol saentis oli traem stadi long hem blong plante yia finis. Nicola Fameli we i wan saentis, i eksplenem se taem yu kaontem namba blong ol samting we oli mekemap sep ya, bambae yu faenemaot se ol namba ya oli no olbaot, be oli folem wan oda. Mo ol namba ya oli singaotem se Fibonaksi (Fibonacci).

⁸ Taem pikinini blong yu i stap lanem plante moa samting long skul long saed blong sayens, bambae hem i luksave se evri sep oli folemgud wan loa. Eksampol, plante tri oli gru folem sem stael nomo. Fastaem i gat wan stik nomo, hemia stamba. Biaen i gat ol narafala stik oli kamaot long hem, we oli mekemap ol branj. Afta i gat ol narafala stik bakegen oli kamaot long ol branj ya, we oli mekemap ol smosmol branj. Mo stael blong ol tri ya blong gru, oli singaot se ol fractal. I gat plante narafala samting tu long kriesen we oli gru folem stael ya. ?Be hu nao i putumap loa blong ol samting ya oli gru folem ol sep mo ol stael ya? Taem pikinini i tekem taem blong tingting gud long kwestin ya, bambae hem i bilif strong moa se God nao i krietem olgeta samting. (Hib. 3:4) Taem hem i stap kam bigwan moa, yu save askem hem se: “Sipos God i krietem yumi, ?yu no ting se hem i givim sam loa tu blong yumi folem blong yumi save stap glad?” Biaen, yu save talem long hem se ol loa ya oli stap long Baebol.

 HALPEM PIKININI BLONG I TINGHAE LONG OL GUDFALA FASIN WE BAEBOL I TOKBAOT

9. ?Wanem i save mekem se pikinini i askem kwestin long saed blong ol gudfala fasin we Baebol i tokbaot?

⁹ Sipos pikinini i askem ol kwestin long saed blong ol gudfala fasin we Baebol i tokbaot, i gud yu traem kasemsave from wanem hem i askem ol kwestin ya. ?Hem i askem from we hem i no agri long samting we Baebol i talem, o hem i no save olsem wanem blong eksplenem bilif blong hem? Nomata wanem risen i pulum hem blong askem ol kwestin ya, yu save halpem hem blong i tinghae long ol gudfala fasin we Baebol i tokbaot, taem yu stadi wetem hem long buk ya !Enjoem Laef Olwe! b

10. ?Yu save mekem wanem blong halpem pikinini blong i tinghae long frensip blong hem wetem Jehova?

¹⁰ Halpem pikinini blong i tinghae long frensip blong hem wetem Jehova. Taem yu stadi wetem pikinini blong yu, yu save yusum ol kwestin mo ol pijatok long buk ya !Enjoem Laef Olwe! blong kasemsave gud long tingting blong hem. (Prov. 20:5) Eksampol, lesen 8 i tokbaot Jehova olsem wan gudfala fren we bambae i rimaenem yumi long ol samting we i save protektem mo givhan long yumi. Afta we yutufala i ridim 1 Jon 5:​3, maet yu save askem hem se: “Naoia we yu save se Jehova i olsem wan gudfala Fren, ?wanem tingting blong yu long ol samting we hem talem long yumi blong mekem?” Nating se hemia i wan isi kwestin nomo, be i save halpem pikinini blong i luk ol loa blong God olsem pruf se God i lavem yumi.—Aes. 48:​17, 18.

11. ?Olsem wanem yu save halpem pikinini blong i tinghae long ol stamba trutok blong Baebol? (Ol Proveb 2:​10, 11)

¹¹ Tokbaot olsem wanem ol stamba trutok blong Baebol oli save givhan long yumi, taem yumi folem. Taem yufala i ridim Baebol o vas blong dei tugeta, tokbaot olsem wanem ol stamba trutok blong Baebol oli bin halpem famle blong yufala. Eksampol, ?pikinini blong yu i luksave se gudfala samting i kamaot taem hem i wok had mo i tok tru? (Hib. 13:18) Mo tu, yu save talem long hem se taem hem i folem ol rul blong Baebol, hemia bambae i protektem hem long saed blong bodi mo filing. (Prov. 14:​29, 30) Taem yu tokbaot ol rul ya wetem pikinini blong yu, bambae hem i tinghae moa long ol advaes blong Baebol.—Ridim Ol Proveb 2:​10, 11.

12. ?Olsem wanem Steve i halpem boe blong hem blong i tinghae long ol stamba trutok blong Baebol?

¹² Steve, we i wan papa long Franis, i eksplenem olsem wanem hem mo waef blong hem i halpem boe blong tufala Ethan, blong i kasemsave se Jehova i putumap ol loa from we hem i lavem yumi. Hem i se: “Mifala i askem ol kwestin olsem, ‘?From wanem yu ting se Jehova i wantem se yumi obei long stamba trutok ya? ?Olsem wanem hemia i soemaot se hem i lavem yumi? ?Wanem bambae i hapen sipos yu no folem?’” Ol storian olsem, oli halpem Ethan blong i bilif strong se samting we Jehova i talem, i stret. Steve i gohed se: “Mak blong mifala i blong halpem Ethan blong i luksave se ol advaes blong Baebol oli gud moa i bitim ol advaes blong man.”

13. ?Olsem wanem blong trenem pikinini blong i folem ol stamba trutok blong Baebol? Talem wan eksampol.

¹³ Trenem pikinini blong i folem ol stamba trutok blong Baebol. Wan rod blong mekem olsem, hemia taem pikinini i gat wan homwok blong mekem. Eksampol, maet tija i givim wan buk blong hem i mas ridim, be buk ya i tokbaot ol man we oli stap mekem ol rabis fasin blong seks, o oli gat fasin blong kros, mo i givim tingting ya se ol fasin ya oli oraet nomo. Long taem olsem, yu save halpem hem blong i tingbaot nogud fasin blong ol man ya, mo skelem wetem samting we Baebol i talem. (Prov. 22:​24, 25; 1 Kor. 15:33;  Fil. 4:8) Hemia bambae i halpem hem blong i talemaot bilif blong hem long tija blong hem mo ol pikinini long klas, taem oli askem hem blong i tokbaot samting we hem i ridim long buk ya.

HALPEM PIKININI BLONG I DIFENDEM BILIF BLONG HEM

14. ?Wanem topik i save mekem wan yangfala Kristin i fraet, mo from wanem?

¹⁴ Samtaem, ol yangfala Kristin oli harem se oli no naf blong talemaot bilif blong olgeta. Eksampol, maet oli fraet blong talemaot long klas, se oli no bilif long evolusen. ?From wanem? Maet from we ol tija oli save talem se i gat pruf se evolusen i tru. Sipos yu yu wan papa o mama, ?olsem wanem yu save halpem pikinini blong i trastem se samting we hem i bilif long hem i tru?

15. ?Wanem i save halpem pikinini blong i trastem moa ol samting we hem i bilif long hem?

¹⁵ Halpem pikinini blong i trastem moa ol samting we hem i bilif long hem. Pikinini blong yu i no mas sem se hem i bilif long wan Krieta. (2 Tim. 1:8) From we plante saentis tu oli luksave se laef i no kamaot olsem nomo. Oli luk ol pruf we i soemaot se i gat wan Man we i wokem olgeta laef samting. Taswe, oli no agri long tijing blong evolusen. Wan samting we i save halpem pikinini blong i gat strong bilif mo i no fraet blong talemaot bilif blong hem, hemia blong hem i go askem long ol narafala Kristin brata mo sista, se wanem i pulum olgeta blong bilif se Jehova nao i wokem olgeta laef samting. c

16. ?Olsem wanem blong halpem pikinini blong i eksplenem from wanem hem i bilif long wan Krieta? (1 Pita 3:15) (Mo tu, yu luk pija.)

¹⁶ Halpem pikinini blong i eksplenem from wanem hem i bilif long wan Krieta. (Ridim 1 Pita 3:15.) Yu save yusum ol atikol long jw.org, long haf ya “Ol Yangfala Oli Askem—?Kriesen o Evolusen?” blong halpem pikinini blong yu. Maet hem i save jusum wan haf we hem i ting se i save halpem ol narafala blong oli kasemsave se i gat wan Krieta. Biaen, yutufala i mekem wan pleplei blong hem i lanem olsem wanem blong eksplenem bilif blong hem. Mo yu talem long hem se taem hem i stap eksplenem bilif blong hem, hem i no mas rao wetem olgeta sipos oli no agri. Halpem hem blong i eksplenem bilif blong hem long fasin we i isi mo i klia, sipos wan fren blong hem i intres blong save moa. Eksampol, sipos wan fren blong hem i talem se: “Mi mi bilif nomo long samting we mi  save luk, be mi neva luk God.” Long taem olsem, hem i save ansa se: “Traem tingbaot se yu stap wokbaot long medel bus we i no gat man nating, mo yu faenem wan wel. ?Yu ting se wel ya i kamaot olsem nomo? !Nogat! I klia se i mas gat wan man we i wokem. !Hemia i sem mak long olgeta laef samting, i mas gat wan man we i wokem olgeta!”

17. ?Olsem wanem blong halpem pikinini blong i tekem janis blong tokbaot trutok long narafala? Talem wan eksampol.

¹⁷ Halpem pikinini blong i tekem janis blong tokbaot trutok blong Baebol long ol narafala. (Rom 10:10) Yu save talem long hem se taem hem i stap eksplenem bilif blong hem long narafala, hemia i olsem we hem i stap traehad blong plei long wan instramen blong miusik. Long stat, bambae hem i lanem nomo blong plei long ol tiun blong miusik we i isi. Be sloslo, bambae hem i save plei gud moa. Long sem fasin, maet long stat hem i save tokbaot wan isi samting nomo long narafala. Eksampol, maet hem i save askem wan fren long skul se: “?Yu save se plante taem ol saentis oli stap kopi ol samting we oli luk long kriesen? Bambae mi soem wan nambawan video long yu.” Afta we hem i soem wan video long haf ya ?I Gat Wan Man We i Wokem Ol Samting Ya?, hem i save talem se: “Sipos ol man oli stap leftemap ol saentis from ol samting we oli kopi long kriesen, ?yu no ting se yumi mas presem moa Man ya we i wokem olgeta samting long kriesen?” Wan smol storian olsem, i save pulum wan yangfala blong i wantem lanem moa.

GOHED BLONG HALPEM PIKININI BLONG I GAT STRONG BILIF

18. ?Olsem wanem ol perens oli save gohed blong halpem ol pikinini blong olgeta blong oli gat strong bilif?

¹⁸ Wol ya i fulap long ol man we oli no bilif long Jehova. (2 Pita 3:3) Taswe ol perens, taem yufala i stadi Baebol wetem ol pikinini blong yufala, halpem olgeta blong oli stadi long ol topik we bambae i halpem olgeta blong respektem Tok blong God, mo ol rul blong hem long saed blong stret fasin. Mo taem yufala i stap tokbaot kriesen, halpem olgeta blong oli tingting dip mo oli bilif strong moa long Jehova. Halpem olgeta blong oli kasemsave long ol profet tok we oli kamtru finis. Mo impoten samting se yufala i prea wetem ol pikinini blong yufala mo yufala i prea from olgeta. Taem yufala i mekem olsem, yufala i save sua se Jehova bambae i blesem yufala from we yufala i traehad blong halpem ol pikinini blong yufala blong oli gat strong bilif.—2 Kron. 15:7.