1. ?Wanem tingting blong sam man long saed blong laef we i no save finis?

 PLANTE man oli lukaot gud long kakae blong olgeta mo oli mekem eksasaes blong oli save stap helti. Nating se i olsem, oli save se bambae oli no save laef olwe. Long tingting blong olgeta, oli ting se bambae oli neva kasem laef we i no save finis. Be long Jon 3:16 mo 5:​24, Jisas i talem se ol man oli save kasem “laef we i no save finis.”

2. ?Jon japta 6 i talem wanem long saed blong laef we i no save finis? (Jon 6:​39, 40)

² Wan dei, Jisas i mekem merikel mo i fidim wan bigfala hip blong ol man long bred mo fis. a Samting we hem i mekem i nambawan, be wanem we hem i talem long nekis dei i gud moa. Bigfala hip blong ol man ya oli folem hem i go long Kapaneam klosap long Galili, mo hem i talem long olgeta se ol man oli save laef bakegen mo harem gud long laef we i no save finis. (Ridim Jon 6:​39, 40.) Nao traem tingbaot ol fren mo famle blong yu we oli ded finis. Ol tok blong Jisas oli soemaot se olgeta man we oli ded bambae oli laef bakegen. Mo hemia i min se yu mo famle blong yu bambae yufala i save harem gud blong laef olwe. Be plante man oli faenem i had blong kasemsave long ol tok blong Jisas long Jon japta 6. Naoia i gud yumi luk samting we hem i talem.

3. ?Jisas i talem wanem long Jon 6:51?

 ³ Taem hip man ya long Kapaneam oli luk we Jisas i mekem merikel blong givim bred long olgeta, oli tingbaot mana we Jehova i bin givim long ol olfala blong olgeta. Mo olgeta oli save we Baebol i tokbaot mana se hem i “bred we i kam long heven.” (Sam 105:40; Jon 6:31) Taswe, Jisas i tokbaot mana blong tijim olgeta long wan impoten samting. I tru se mana i wan merikel we i kam long God. Be olgeta we oli kakae, samtaem biaen oli ded. (Jon 6:49) Be Jisas i tokbaot hem wan se hem i “prapa bred we i kam long heven,” “bred we God i givim,” mo “bred blong laef.” (Jon 6:​32, 33, 35) Mo hem i makem gud olsem wanem mana ya i defren long hem. Hem i talem se: “Mi mi bred blong laef we i aot long heven i kamdaon. Sipos man i kakae bred ya, bambae hem i laef olwe.” (Ridim Jon 6:51.) Taem ol man Jiu oli harem tok ya, oli no kasemsave from wanem Jisas i talem se hem i kamdaon long heven olsem “bred” we i gud moa long mana ya we God i givim long ol olfala blong olgeta. Biaen Jisas i talem long olgeta se: ‘Bred ya, hemia mit blong bodi blong mi, we bambae mi givim long ol man.’ ?Hem i minim wanem? I impoten blong yumi kasemsave long ol tok blong Jisas, blong yumi save samting we yumi mo ol famle blong yumi i mas mekem blong kasem laef olwe. Naoia bambae yumi luk se Jisas i stap minim wanem.

BRED BLONG LAEF MO BODI BLONG HEM

4. ?From wanem samfala oli sek taem oli harem samting we Jisas i talem?

⁴ Sam man oli sek taem oli harem we Jisas i talem se bambae hem i givim ‘mit blong bodi blong hem, blong ol man long wol oli gat laef.’ Maet oli ting se bambae hem i givim prapa bodi blong hem blong oli kakae. (Jon 6:52) Be makem nekis wan samting we Jisas i talem, we i mekem oli sapraes, i se: “Sipos yufala i no kakae mit blong bodi blong Pikinini blong man, mo yufala i no dring blad blong hem, bambae i no gat laef long yufala.”—Jon 6:53.

5. ?From wanem yumi sua se Jisas i no stap minim se ol man bambae oli dring prapa blad blong hem?

⁵ Long taem blong Noa, God i blokem ol man blong oli no kakae blad. (Jen. 9:​3, 4) Samtaem biaen, Jehova i talem Loa ya bakegen long ol man Isrel. Hem i talem se eni man we i kakae blad, bambae oli “kilim hem i ded.” (Lev. 7:​27, fut.) Jisas i obei gud long loa ya. (Mat. 5:​17-19) Taswe i sua se Jisas bambae i neva talem long hip blong ol man Jiu ya blong oli kakae prapa bodi blong hem o dring blad blong hem. Taem Jisas i talem ol tok ya, hem i wantem tijim olgeta long saed blong samting we oli mas mekem blong kasem “laef we i no save finis.”—Jon 6:54.

6. ?Olsem wanem yumi save se ol tok blong Jisas i wan pijatok nomo?

⁶ ?Jisas i stap minim wanem? I klia se tok ya we Jisas i talem i wan pijatok nomo, sem mak olsem ol tok we hem i talem long wan woman Sameria se: “Man we i dring wota we bambae mi givim long hem, bambae hem i neva tosta bakegen. Wota ya we bambae mi givim long hem, i save kam olsem wan springwota we i ron oltaem insaed long hem, blong givim laef we i no save finis.” (Jon 4:​7, 14) b Jisas i no stap talem se woman Sameria ya bambae i kasem laef we i no save finis, sipos hem i dring prapa wota. Long sem fasin, hem i no stap talem se bigfala hip blong ol man ya we hem i toktok long olgeta long Kapaneam, bambae oli kasem laef we i no save finis sipos oli kakae prapa bodi blong hem, mo dring blad blong hem.

 NARAFALA TAEM WE JISAS I YUSUM SEMFALA TOK YA

7. ?Sam man oli gat wanem tingting long ol tok we Jisas i talem long Jon 6:53?

⁷ Sam man oli talem se long Jon 6:​53, Jisas i stap eksplenem samting we bambae ol man oli mekem long Kakae Blong Masta, from we long taem ya hem i talem ol semfala tok ya we i se, bambae oli kakae bodi blong hem mo dring blad blong hem. (Mat. 26:​26-28) Oli talem se evriwan we oli joen long Kakae Blong Masta, oli mas kakae bred mo dring waen we oli pasem i go raon. ?Olsem wanem? ?I stret blong mekem olsem? I impoten we yumi kasemsave ansa blong kwestin ya from we evri yia, plante milian man raon long wol oli joen wetem yumi long spesel taem ya. Naoia bambae yumi tokbaot olsem wanem ol tok we Jisas i talem long Jon 6:​53, oli defren long ol tok we hem i talem long taem blong Kakae Blong Masta.

8. ?Wanem i mekem se ol tok we Jisas i talem long tufala taem ya i defren? (Mo tu, yu luk pija.)

⁸ Naoia bambae yumi luk tu samting we i mekem se ol tok we Jisas i talem long tufala taem ya i defren. Faswan, ?wetaem mo weples Jisas i talem ol tok we i stap long Jon 6:​53-56? Hem i talem ol tok ya long wan bigfala hip blong ol man Jiu we oli go long Galili long yia 32 K.T. Hemia samwe wan yia bifo we hem i stanemap Kakae Blong Masta long Jerusalem. Sekenwan, ?hem i talem ol tok ya long  hu? Hem i talem ol tok ya i go long olgeta we oli wantem nomo we hem i givim kakae long olgeta, i bitim we oli wantem save Jehova o Kingdom blong God. (Jon 6:26) Taem Jisas i talem wan samting we oli faenem i had blong kasemsave, kwiktaem nomo oli no moa bilif long hem. Mo sam disaepol blong hem tu oli stop blong folem hem. (Jon 6:​14, 36, 42, 60, 64, 66) Ol man ya oli defren long ol 11 aposol blong Jisas, we wan yia afta, hemia long yia 33 K.T., oli stap wetem hem taem hem i stanemap Kakae Blong Masta. Olgeta oli stap wetem hem nating se oli no kasemsave fulwan long ol samting we hem i tijim long olgeta. Olgeta oli no olsem ol man ya long Galili, from oli trastem se Jisas i Pikinini blong God we i kam long heven. (Mat. 16:16) Taswe, hem i talem long olgeta se: “Yufala ya nao yufala i stap oltaem wetem mi long olgeta trabol blong mi.” (Luk 22:28) Tufala samting ya we yumi tokbaot, i soemaot se ol tok blong Jisas long Jon 6:​53, i no stap minim ol samting we ol man bambae oli mekem long taem blong Kakae Blong Masta. Mo i gat sam moa samting we i mekem se tufala taem ya i defren.

?OL TOK BLONG JISAS OLI GIVHAN LONG YU OLSEM WANEM?

9. ?Ol tok we Jisas i talem long taem blong Kakae Blong Masta, i go blong hu?

⁹ Long taem blong Kakae Blong Masta, Jisas i givim bred we i no gat is long ol aposol blong hem, mo i talem se hemia bodi blong hem. Biaen hem i pasem wan kap blong waen, mo i talem se hemia i minim blad blong kontrak.” (Mak 14:​22-25; Luk 22:20; 1 Kor. 11:24) Samting we hem i talem long saed blong kontrak ya i impoten tumas. Niufala kontrak ya hem i mekem nomo wetem “haos blong Isrel [long saed blong spirit]” we bambae oli stap “long Kingdom blong God,” be hem i no mekem wetem olgeta man. (Hib. 8:​6, 10; 9:15) Long taem ya ol aposol oli no kasemsave long kontrak ya, be i no longtaem Jehova bambae i makemaot olgeta long tabu spirit, mo tekem olgeta i go long heven blong joen wetem Jisas long niufala kontrak ya.—Jon 14:​2, 3.

10. ?Wanem moa i soemaot se samting we Jisas i talem long taem blong Kakae Blong Masta, i defren long samting we hem i talem long Galili? (Mo tu, yu luk pija.)

¹⁰ Makem se long taem blong Kakae Blong Masta, Jisas i talem ol tok ya i go long wan “smol grup blong ol sipsip.” Ol gudfala aposol blong Jisas we oli stap wetem hem long taem ya, olgeta nao oli ol fas man we oli joen long smol grup ya. (Luk 12:32) Olgeta ya nomo Jisas i askem olgeta blong kakae bred mo dring waen long naet ya. Mo olgeta we bambae oli joen long grup ya afta, olgeta tu oli mas kakae bred mo dring waen long taem blong Kakae Blong Masta. Olgeta ya nomo bambae oli stap wetem Jisas long heven. Samting we Jisas i talem long ol aposol blong hem long taem ya i go long wan smol grup blong ol man nomo. Mo hemia i defren long wanem we hem i talem long bigfala hip blong ol man long Galili, from we long ples ya hem i stap tokbaot wan bigfala grup blong ol man.

11. ?Olsem wanem samting we Jisas i talem long Galili i soemaot se hem i no stap tokbaot wan smol grup blong ol man?

¹¹ Bighaf blong ol man we Jisas i toktok long olgeta long Galili long yia 32 K.T., oli wantem nomo we Jisas i givim bred long olgeta. Be Jisas i traem halpem olgeta blong kasemsave se i gat wan samting we i moa impoten i bitim kakae, we i save givim laef we i no save finis long olgeta. Mo Jisas i talem se olgeta we oli ded oli save laef bakegen long las dei, mo biaen oli save laef olwe. Hem i no stap tokbaot wan smol grup blong ol man olsem we hem i talem  long taem blong Kakae Blong Masta. Be hem i stap tokbaot wan blesing we olgeta man bambae oli kasem. Taswe, hem i talem se: “Sipos man i kakae bred ya, bambae hem i laef olwe. Mo bred ya, hemia mit blong bodi blong mi, we bambae mi givim blong ol man long wol oli gat laef.”—Jon 6:51. c

12. ?Yumi mas mekem wanem blong kasem gudfala samting ya we Jisas i tokbaot?

¹² Jisas i no talem se evri man bambae oli kasem laef we i no save finis. Olgeta ya nomo we oli kakae bred ya, we i min se oli soemaot se oli bilif, bambae oli kasem blesing ya. Plante man tede oli talem se sipos oli “bilif long [Jisas]” mo oli luk hem olsem sevia blong olgeta, bambae oli sef. (Jon 6:​29, King James Version) Nating se i olsem, sam long ol man we oli stap long ol bigfala hip blong ol man ya we bifo oli bilif long Jisas, oli lego hem. ?From wanem?

13. ?Yumi mas mekem wanem blong kam wan trufala disaepol blong Jisas?

¹³ Bighaf blong ol man ya we Jisas i fidim olgeta, oli folem hem nomo from we hem i givim samting we oli wantem. Oli wantem se hem hilim olgeta, givim kakae, o talem samting we oli laekem blong harem. Nating se i olsem, Jisas i soemaot se blong kam ol trufala disaepol blong hem, oli mas mekem sam moa samting. Jisas i kam long wol i no blong givim nomo samting we ol man oli nidim long bodi. Ol man oli mas akseptem tok ya blong Jisas we i se, oli mas “kam long” hem, we i min se oli lesin mo obei long evri samting we hem i tijim.—Jon 5:40; 6:44.

14. ?Yumi mas mekem wanem blong kasem blesing from bodi mo blad blong Jisas?

 ¹⁴ Jisas i makem gud long ol hip man ya se oli mas soemaot se oli bilif. ?Bilif long wanem? Oli mas bilif se hem i sakrefaesem bodi mo blad blong hem blong mekem se oli save kasem laef we i no save finis. I impoten we ol man Jiu oli soemaot bilif ya, mo tede tu yumi mas mekem sem mak. (Jon 6:40) Yes, blong yumi kasem blesing from bodi mo blad blong Jisas, olsem we Jon 6:53 i tokbaot, yumi mas soemaot se yumi bilif long ransom. Mo olgeta man oli save kasem blesing ya.—Efes. 1:7.

15-16. ?Wanem ol impoten samting we yumi lanem long Jon japta 6?

¹⁵ Long Jon japta 6, yumi lanem plante impoten samting mo oli leftemap tingting blong yumi evriwan. Yumi lanem se Jisas i kea bigwan long ol man. Taem hem i stap long Galili, hem i hilim ol sikman, i tokbaot Kingdom, mo hem i meksua se i givim kakae long ol man taem oli nidim. (Luk 9:11; Jon 6:​2, 11, 12) Be samting we i moa impoten, hemia se hem i tijim ol man se hem nao i “bred blong laef.”—Jon 6:​35, 48.

¹⁶ Olgeta we Jisas i tokbaot olgeta olsem ol “narafala sipsip,” oli no kakae bred mo dring waen long taem blong Kakae Blong Masta we oli mekem wan taem evri yia. (Jon 10:16) Nating se i olsem, oli save kasem blesing yet from bodi mo blad blong Jisas Kraes. Hemia from we oli soemaot se oli bilif long ransom sakrefaes blong Jisas, mo gudfala samting we i kamaot from sakrefaes ya. (Jon 6:53) Be olgeta we oli kakae bred mo dring waen, oli soemaot se oli joen long niufala kontrak mo oli gat hop blong rul long Kingdom blong heven. Nomata se yumi stap long grup blong ol tabu Kristin o ol narafala sipsip, be yumi evriwan i save lanem plante impoten lesen long ol tok we i stap long Jon japta 6. Ol tok ya oli soemaot se i impoten blong soemaot se yumi bilif, blong yumi save kasem laef we i no save finis.