Aposol Pol i raet i go long Timoti we i wan elda, i se: “Long fes blong God, mo long fes blong Kraes Jisas, mo ol enjel we hem i jusumaot olgeta, mi mi talem strong long yu se yu mas folem gud ol tok ya blong mi. Bifo we yu mekem wan desisen, i gud yu lukluk gud long evri samting, blong yu no mekem i gud long samfala, be samfala, nogat.”—1 Tim. 5:21.

Fastaem, bambae yumi tokbaot se hu i no stap insaed long grup blong ol enjel ya. I klia se ol enjel ya i no minim ol 144,000. Taem Pol i raet i go long Timoti, ol tabu Kristin we oli bin ded, oli no go long heven yet. Taswe “ol enjel we [God] i jusumaot olgeta,” i no minim ol aposol mo ol narafala tabu Kristin we oli no kam spirit man yet.—1 Kor. 15:​50-54; 1 Tes. 4:​13-17; 1 Jon 3:2.

Mo tu, “ol enjel we [God] i jusumaot olgeta,” i no save minim ol enjel ya we oli rebel long taem we Bigfala Wota i ron, from we olgeta oli sapotem Setan, oli kam ol dimon, mo oli ol enemi blong Jisas. (Jen. 6:2; Luk 8:​30, 31; 2 Pita 2:4) Long fiuja, bambae oli sakem olgeta i go long abys, mo oli stap long ples ya blong 1,000 yia. Mo biaen, bambae God i distroem olgeta wetem Setan.—Jud 6; Rev. 20:​1-3, 10.

Taswe, “ol enjel we [God] i jusumaot olgeta” we Pol i tokbaot, i minim ol enjel ya nomo we oli stap long heven mo oli sapotem ‘God mo Kraes Jisas.’

I gat plante plante taosen enjel we oli holemstrong long God. (Hib. 12:​22, 23) Be yumi no mas ting se God i givim sem wok long olgeta evriwan. (Rev. 14:​17, 18) Eksampol, Jehova i askem wan enjel nomo blong kilim i ded 185,000 soldia blong ol man Asiria. (2 King 19:35) Sam enjel maet oli gat wok ya blong “go tekemaot ol samting long Kingdom blong [Jisas], we oli stap mekem ol man oli stambol wetem ol man we oli stap brekem loa.” (Mat. 13:​39-41) Sam narafala maet oli gat wok blong “tekem ol man we hem i jusumaot olgeta oli kam wanples,” blong oli go long heven. (Mat. 24:31) Mo sam narafala enjel ‘oli lukaot gud long yumi long ol rod we yumi pas long hem.’—Sam 91:11; Mat. 18:10; skelem wetem Matiu 4:11; Luk 22:43.

“Ol enjel we [God] i jusumaot olgeta” we 1 Timoti 5:21 i tokbaot, maet hemia ol enjel we God i yusum olgeta blong oli givhan long ol kongregesen. Long vas ya, Pol i givim waes advaes i go long ol elda, mo i talem se i stret nomo we kongregesen i soem respek long olgeta. Pol i talem se ol elda oli no mas “mekem i gud long samfala, be samfala, nogat,” mo oli no mas mekem desisen we oli no tingting gud fastaem. Mo hem i talem se i impoten we oli folem advaes ya, from we oli stap mekem wok ya “long fes blong God, mo long fes blong Kraes Jisas, mo ol enjel we hem i jusumaot olgeta.” Taswe i klia se God i jusumaot sam enjel blong oli mekem ol wok blong givhan long ol kongregesen, olsem blong protektem ol man blong God, givhan long wok blong prij, mo oli tokbaot long Jehova ol samting we oli luk.—Mat. 18:10; Rev. 14:6.