?Yu bin ridimgud ol Wajtaoa blong yia ya? Traem luk sipos yu save ansarem ol kwestin ya:

?Jehova i soem wanem eksampol long fasin ya blong tritim ol woman?

Hem i tritim ol man mo woman sem mak nomo, mo hem i no mekem i gud moa long man i bitim woman. God i lesin long ol woman, mo i tingbaot ol filing, mo ol problem blong olgeta. Hem i trastem olgeta blong oli mekem wok blong hem.—w24.01 pej 15-16.

?Olsem wanem yumi save folem advaes ya blong Efesas 5:​7, we i se: “Yufala i no mas go joen nating wetem olgeta”?

Aposol Pol i givim woning se yumi no mas joen wetem ol man we bambae oli mekem se i had blong yumi folem ol rul blong Jehova. Hemia i no minim olgeta ya nomo we yumi toktok wetem olgeta fes tu fes, be i minim olgeta ya tu we yumi spenem taem wetem olgeta long sosol media.—w24.03 pej 22-23.

?Yumi mas lukaot gud long wanem kaen giaman stori?

Yumi mas lukaot long ol giaman stori we yumi harem long ol gudfala fren blong yumi, long ol imel we i kam long ol man we yumi no save, mo long ol apostasi we oli giaman se oli intres long trutok.—w24.04 pej 12.

?Yumi save wanem mo yumi no save wanem long saed blong jajmen we Jehova bambae i mekem long King Solomon, long olgeta we oli ded long Sodom mo Gomora, mo long taem we bigfala wota i ron?

Yumi no save stret sipos Jehova i bin mekem desisen finis se ol man ya bambae oli ded blong olwe. Be samting we yumi save, hemia se Jehova i save evri samting mo hem i gat bigfala sore.—w24.05 pej 3-4.

?From we God i “Bigfala Ston,” hemia i mekem yumi sua long wanem? (Dut. 32:4)

Yumi save lukluk i go long Jehova blong i protektem yumi. Hem i stap oltaem mo yumi save trastem se oltaem bambae hem i holem ol promes blong hem. Mo ol fasin blong hem mo stamba tingting blong hem i no save jenis.—w24.06 pej 26-28.

?Wanem i save halpem yu blong stap glad, taem yu muv i go long wan niu kongregesen?

Dipen long Jehova blong i halpem yu, from hem bin halpem ol man blong hem long taem bifo finis. No skelem kongregesen blong yu bifo wetem niuwan. Joen wetem niu kongregesen ya mo traehad blong faenem ol niufala fren.—w24.07 pej 26-28.

?Wanem ol lesen we i stap long ol trifala parabol long Matiu japta 25?

Parabol blong ol sipsip mo nani i soemaot se yumi mas holemstrong mo fasgud long God. Parabol blong ol ten yang gel i soemaot se yumi mas rere mo lukaot gud. Mo parabol blong ol talen mane i soemaot se i impoten we yumi wok had.—w24.09 pej 20-24.

?Rum long doa blong tempol blong Solomon i hae olsem wanem?

Long 2 Kronikel 3:​4, sam olfala hanraet i se hem i “120 kiubit,” hemia i min se hae blong hem i 53 meta. Be sam narafala hanraet oli talem se hem i “20 kiubit” o naen meta, mo mesamen ya i stret from we ol wol blong tempol ya oli no tik tumas.—w24.10 pej 31.

?I minim wanem se wan man blong givhan i mas “gat wan waef nomo”? (1 Tim. 3:12)

Hemia i min se hem i mared long wan woman nomo mo i no mas mekem enikaen doti fasin blong seks. Mo hem i neva mas soemaot se hem i intres long wan narafala woman.—w24.11 pej 19.

?From wanem yumi talem se Jon 6:53 i no stap tokbaot samting we bambae oli mekem long Kakae Blong Masta?

Jon 6:53 i talem se ol man oli mas kakae bodi mo dring blad blong Jisas. Jisas i talem ol tok ya long Galili, long yia 32 K.T., mo hem i stap toktok long ol man Jiu we oli mas bilif long hem. Be wan yia afta, Jisas i stanemap Kakae Blong Masta long Jerusalem. Long ples ya, Jisas i stap toktok long ol man we bambae oli rul wetem hem long heven.—w24.12, pej 10-11.