1. ?From wanem ol man Babilon oli glad long Profet Daniel?

 PROFET Daniel i wan yangfala, taem ol man Babilon oli tekem hem i go kalabus longwe long ples blong hem long Jerusalem. Be nating se hem i wan yangfala, ol haeman blong Babilon oli glad long hem. Hemia from we oli “lukluk bodi nomo,” mo oli luk se i “no gat samting i rong long hem, hem i luk naes,” mo hem i kamaot long wan famle we i impoten. (1 Saml. 16:7) From samting ya, oli trenem hem blong i naf blong wok long pales blong king.—Dan. 1:3, 4, 6.

2. ?From wanem Jehova i lavem Daniel? (Esikel 14:14)

² Jehova i lavem Daniel i no from we fes mo bodi blong hem i naes, o from we hem i wok long pales, be hemia from we hem i jus blong kam wan gudfala man. Daniel i gat samwe 20 yia nomo, taem Jehova i tokbaot hem se i sem mak long Noa mo Job, tufala stret man ya we i holemstrong long Jehova blong plante yia. (Jen. 5:32; 6:9, 10; Job 42:16, 17; ridim Esikel 14:14.) Mo long ful laef blong Daniel, Jehova i lavem hem.—Dan. 10:11, 19.

3. ?Bambae yumi tokbaot wanem long stadi ya?

³ Long stadi ya, bambae yumi tokbaot tu nambawan fasin blong Daniel we oli mekem se hem i sas long ae blong Jehova. Fastaem bambae yumi tokbaot wanwan long tufala fasin ya mo olsem wanem hem i soemaot ol fasin ya. Biaen, bambae yumi luk wanem i halpem Daniel blong soemaot ol fasin ya. Mo afta, bambae yumi tokbaot olsem wanem yumi save folem eksampol blong hem. Nating se stadi ya i go stret long ol yangfala, be yumi evriwan i save lanem samting long eksampol blong Daniel.

4. ?Olsem wanem Daniel i soemaot strong tingting? Talem wan eksampol.

⁴ Maet samtaem olgeta we oli gat strong tingting oli save fraet, be oli no letem fasin ya i stopem olgeta blong mekem samting we i stret. Daniel i wan yangfala we i gat strong tingting. Traem luk tu situesen we hem i soemaot strong tingting. Faswan, hemia samwe tu yia afta we Babilon i distroem Jerusalem. Drim we King Nebukadnesa i luk long saed blong wan bigfala statiu i mekem hem i wari tumas. Hem i givim oda se bambae oli kilim evri waesman wetem Daniel, sipos oli no talemaot drim blong hem wetem mining blong hem. (Dan. 2:3-5) Daniel i mas kwik blong tekem aksen, sipos no plante man bambae oli ded. Hem “i go insaed mo i askem long king blong i givim taem long hem, blong hem i talemaot mining blong drim ya long king.” (Dan. 2:16) Hemia i soemaot se Daniel i gat strong tingting mo i bilif. ?Olsem wanem hem i soemaot samting ya? I no gat wan vas long Baebol we i talem se bifo Daniel i stap talemaot mining blong ol drim. Hem i askem long ol fren blong hem we ol man Babilon oli singaot olgeta se Sedrak, Mesak, mo Abednego “blong oli prea long God blong heven blong i sore long olgeta, i soemaot sikret ya long olgeta.” (Dan. 2:18) Jehova i ansarem ol prea ya. Wetem help blong God, Daniel i naf blong talemaot mining blong drim blong Nebukadnesa. From samting ya Daniel mo ol fren blong hem oli no ded.

5. ?Wanem narafala taem we Daniel i nidim strong tingting?

⁵ Samtaem afta we Daniel i talemaot mining blong drim blong King Nebukadnesa, wan samting i hapen we i mekem se hem i nidim strong tingting. Nebukadnesa i luk wan narafala drim we i mekem hem i wari tumas. Long drim ya hem i luk wan bigfala tri. Daniel i no fraet blong eksplenem mining blong drim ya, i talemaot se king bambae i lusum tingting blong hem mo bambae i no moa king blong sam taem. (Dan. 4:25) King i save gat tingting ya se Daniel i wantem agensem hem, mo king i save kilim hem i ded. Nating se i olsem, Daniel i soemaot strong tingting blong talemaot mining blong drim ya.

6. ?Wanem i halpem Daniel blong gat strong tingting?

 ⁶ ?Wanem i halpem Daniel blong gat strong tingting long ful laef blong hem? Yumi sua se gudfala eksampol blong papa mo mama blong hem i givhan long hem. Tufala i obei long ol tok we Jehova i givim long ol man Isrel blong tijim ol pikinini blong olgeta long ol loa blong Jehova. (Dut. 6:6-9) Daniel i savegud ol Ten Komanmen, wetem ol smosmol samting long saed blong loa, olsem ol samting we ol man Isrel oli save kakae mo oli no save kakae. b (Lev. 11:4-8; Dan. 1:8, 11-13) Mo tu, Daniel i lanem histri blong ol man blong Jehova mo samting we i save hapen taem man i no obei. (Dan. 9:10, 11) Ol ekspiriens we Daniel i gat long ful laef blong hem, oli mekem hem i sua se nomata wanem samting i hapen, Jehova mo ol enjel bambae oli halpem hem.—Dan. 2:19-24; 10:12, 18, 19.

7. ?Wanem narafala samting we i halpem Daniel blong gat strong tingting? (Mo tu, yu luk pija.)

⁷ Daniel i stadi long ol raeting blong ol profet, olsem blong Jeremaea. Long stadi blong hem, Daniel i kasemsave se i no longtaem, ol man Jiu we oli stap kalabus long Babilon bambae oli go fri. (Dan. 9:2) Taem Daniel i luk ol tok blong Jehova oli kamtru, hem i trastem Jehova moa, mo olgeta we oli trastem God fulwan oli gat strong tingting. (Skelem wetem Rom 8:31, 32, 37-39.) Be samting we i impoten moa, Daniel i prea oltaem long Papa blong hem long heven. (Dan. 6:10) Hem i talemaot ol sin blong hem, i serem ol filing blong hem mo i askem help. (Dan. 9:4, 5, 19) Olsem yumi, Daniel i no bon wetem strong tingting, be hem i wokem fasin ya taem i stadi, prea, mo trastem Jehova.

8. ?Olsem wanem yumi save gat strong tingting?

⁸ ?Yumi save mekem wanem blong gat strong tingting? Ol perens oli save talem long yumi blong gat strong tingting, be oli no save pasem strong tingting blong olgeta i kam long yumi, hemia i wan samting we yumi mas lanem. Taem yu stap lanem wan niufala samting, yu wajem ol aksen blong tija blong yu mo yu kopi long eksampol blong hem. Long sem fasin, yumi save lanem blong gat strong tingting, taem yumi luk olsem wanem ol narafala oli soem fasin ya, mo yumi kopi eksampol blong olgeta. Taswe, ?yumi lanem wanem long eksampol blong Daniel? Olsem Daniel, yumi mas savegud Tok blong God. Yumi save kam klosap long Jehova taem yumi toktok long hem oltaem, mo talemaot samting we i stap long hat blong yumi. Mo yumi mas trastem Jehova mo sua oltaem se hem i stap wetem yumi. Nao taem wan samting i traem bilif blong yumi, bambae yumi gat strong tingting.

9. ?Wanem gudfala samting i save kamaot taem yumi gat strong tingting?

⁹ Gudfala samting i save kamaot taem yumi gat strong tingting. Traem tingbaot ekspiriens blong Ben. Hem i go long wan skul long Jemani we evriwan oli bilif long evolusen, mo oli harem se samting we Baebol i tokbaot long saed blong kriesen i no tru. Wan dei, Ben i gat janis ya blong stanap long fored blong klas mo eksplenem from wanem hem i bilif long kriesen. Wetem strong tingting hem i talemaot bilif long hem. ?Wanem i kamaot from? Ben i talem se: “Tija blong mi i lesingud, mo hem i mekem kopi blong ol infomesen we mi yusum, mo i givim long wanwan studen long klas.” ?Wanem tingting blong ol yangfala long klas? Ben i talem se: “Plante long olgeta oli lesin long samting we mi talem, mo oli talem se oli respektem mi.” Ekspiriens blong Ben i soemaot se plante man oli respektem olgeta we  oli gat strong tingting. Mo olgeta we oli gat strong tingting, oli save halpem ol narafala tu we hat blong olgeta i stret blong oli save Jehova. From samting ya, i gud yumi wokem fasin ya blong gat strong tingting.

10. ?Baebol i tokbaot fasin blong stap tru olsem wanem?

¹⁰ Plante taem Baebol i tokbaot “fasin ya blong stap tru” o “fasin ya blong lavem man oltaem,” blong tokbaot lav we God i gat long ol man blong hem. Baebol i yusum sem tok ya blong tokbaot olsem wanem ol man blong God oli lavlavem olgeta. (2 Saml. 9:6,7) Taem ol yia oli pas, yumi stap kamgud moa long fasin ya blong stap tru. Naoia bambae yumi luk olsem wanem samting ya i hapen long Daniel.

11. Taem Daniel i olfala, ?wanem i traem fasin blong hem blong stap tru long Jehova? (Luk pija long fran pej.)

¹¹ I gat plante samting long laef blong Daniel we i traem fasin blong hem blong stap tru long Jehova. Be wan samting we i traem hem moa, i hapen taem hem i gat bitim 90 yia. Long taem ya, Media mo Pesia i winim Babilon mo King Darias i stap rul. Ol haeman blong King Darias oli no laekem Daniel mo oli no respektem God blong hem. Ale oli mekem wan plan blong kilim Daniel i ded. Oli pulum king blong saenem wan loa we i traem Daniel, se bambae hem i stap tru long God o long king. Sipos hem i no wantem kasem panis, hem i mas stap tru long king mo i no mas prea long Jehova blong 30 dei. Be Daniel i jusum blong stap tru long Jehova. From samting ya, oli sakem hem i godaon long hol blong ol laeon. Be Jehova i blesem Daniel from fasin blong hem blong stap tru, taem i protektem hem long ol laeon. (Dan. 6:12-15, 20-22) ?Olsem wanem yumi save stap tru long Jehova olsem Daniel?

12. ?Wanem i givhan long Daniel blong i gohed blong stap tru long Jehova?

¹² Olsem we yumi bin luk, blong stap tru long Jehova, lav we yumi gat long hem i mas strong. Daniel i lavem tumas Papa blong hem long heven, taswe hem i gohed blong stap tru. Hemia from we hem i spenem taem blong tingbaot ol gudfala fasin blong Jehova mo olsem wanem hem i soemaot ol fasin ya. (Dan. 9:4) Mo tu, taem Daniel i tingting dip long ol gudfala samting we Jehova i mekem long hem mo ol man blong hem, hemia i mekem hem i glad.—Dan. 2:20-23; 9:15, 16.

13. (1) ?Wanem i save traem fasin blong ol yangfala blong yumi blong stap tru? Talem wan eksampol. (Mo tu, yu luk pija.) (2) Olsem video i soemaot, ?yu save talem wanem taem oli narafala oli askem sipos ol Witnes blong Jehova oli sapotem ol homoseksuol?

 ¹³ Olsem Daniel, ol yangfala blong yumi tede oli stap long medel blong ol man we oli no respektem Jehova mo ol loa blong hem. Ol man olsem, oli no laekem ol man we oli lavem God mo samfala oli agensem ol yangfala, blong mekem se oli no moa stap tru long Jehova. Tingbaot samting we i hapen long Graeme, wan yangfala we i laef long Ostrelia. Hem i fesem wan jalens taem hem i go long haeskul. Tija blong olgeta i askem long ful klas samting we bambae oli mekem sipos wan fren i talem se hem i wan homoseksuol. Hem i talem se olgeta we oli agri se fasin ya i stret oli mas stap long wansaed blong klas rum, mo olgeta we oli no agri oli stap long narasaed. Graeme i talem se: “Mi nomo wetem wan narafala Witnes i no sapotem fasin ya, be olgeta evriwan long klas oli sapotem fasin ya.” Samting we i hapen biaen i traem fasin blong Graeme blong stap tru long Jehova. Hem i talem se: “Stat long taem ya kasem en blong klas, ol studen oli stap tok nogud mo jikim mitufala, iven tija blong mifala. Mi traem blong eksplenem bilif blong mi long wan fasin we i kwaet mo i kaen, be olgeta oli no wantem lesin long mi.” ?Graeme i harem olsem wanem? Hem i talem se: “Mi no laekem taem ol narafala oli stap tok nogud long mi, be mi glad se mi stap tru long Jehova mo mi difendem bilif blong mi.” c

14. ?Wanem wan rod we i save givhan long yumi blong gohed blong stap tru long Jehova?

¹⁴ Taem yumi lavem Jehova moa olsem Daniel, bambae yumi stap tru long Hem oltaem. Yumi mekem olsem taem yumi stadi long ol fasin blong God, tru long ol samting we Hem i wokem. (Rom 1:20) Mo tu, sipos yu wantem lavem mo respektem Jehova moa, yu save ridim ol atikol o wajem ol video long haf ya “?I Gat Wan Man We i Wokem Samting Ya?” Yu save stadi tu long buklet ya, Was Life Created? mo The Origin of Life—Five Questions Worth Asking. Makem samting we Esta, wan yangfala sista blong Denmak i talem long saed blong ol buklet ya. Hem i se: “Eksplenesen blong ol buklet ya oli rili nambawan. Ol buklet ya oli no talem long yu wanem blong bilivim, be oli soemaot ol pruf mo oli letem yu mekem prapa desisen blong yu.” Ben we yumi tokbaot finis, i talem se: “Ol tul ya oli mekem bilif blong mi i kam strong. Oli pruvum long mi se God nao i wokem olgeta samting.” Afta we yu stadi long ol haf ya, bambae yu agri wetem samting we Baebol i talem, we i se: “Jehova God blong mifala, i stret nomo blong yu kasem glori, ona, mo paoa, from we yu yu mekem olgeta samting.”—Rev. 4:11. d

15. ?Wanem wan narafala rod we i save mekem se frensip blong yumi wetem Jehova i kam strong moa?

¹⁵ Wan narafala rod we i save mekem lav blong yumi long Jehova i kam strong moa, hemia taem yumi stadi long laef blong Pikinini blong hem Jisas. Samira, wan yangfala sista long Jemani i mekem samting ya. Hem i talem se: “Mi save Jehova moa, taem mi stadi long saed blong Jisas.” Taem Samira i smol, hem i faenem i had blong kasemsave se Jehova i gat ol filing, be hem i kasemsave long ol filing blong Jisas nomo. Hem i talem se: “Mi laekem Jisas from we hem i frengud wetem ol narafala mo i lavem ol pikinini.” Taem hem i stadi moa long saed blong Jisas, hemia i mekem se hem i save moa Jehova mo i lavem  hem. ?From wanem? Hem i talem se: “Sloslo mi kasemsave se Jisas i stap folemgud eksampol blong Papa blong hem, from we tufala i sem mak. Mi luksave se Jehova i sanem Jisas i kam long wol, blong mekem se i posibol blong ol man oli kasemsave long Hem.” (Jon 14:9) Sipos yu wantem se frensip blong yu wetem Jehova i kam strong moa, i gud yu spenem moa taem blong savegud Jisas. Sipos yu mekem olsem, bambae yu lavem Jehova moa mo wantem stap tru long hem oltaem.

16. ?From wanem yumi mas stap tru? (Ol Sam 18:25; Maeka 6:8)

¹⁶ Sipos yumi stap tru long ol narafala, bambae yumi gat ol gudfala fren we oli stap tru long yumi. (Rut 1:14-17) Mo tu, olgeta we oli stap tru long Jehova oli save glad mo gat pis long tingting. ?From wanem? Hemia from Jehova i promes se bambae hem i stap tru long olgeta we oli stap tru long hem. (Ridim Ol Sam 18:25; Maeka 6:8.) Traem tingbaot, yumi smol tumas taem yumi skelem yumi wetem God ya we i Wokem olgeta samting, nating se i olsem, hem i promes se bambae hem i lavem yumi oltaem. Taem yumi frengud wetem Jehova, i nogat wan samting olsem man we i agens, trabol, o ded, we i save tekemaot yumi long God. (Dan. 12:13; Luk 20:37, 38; Rom 8:38, 39) !Taswe i rili impoten we yumi folem fasin blong Daniel blong stap tru long Jehova!

17-18. ?Wanem narafala samting we yumi save lanem long Daniel?

¹⁷ Long stadi ya, yumi tokbaot tu nomo long ol gudfala fasin blong Daniel. Be i gat plante moa samting we yumi save lanem long hem. Eksampol, Jehova i mekem se Daniel i save luk ol defdefren vison mo ol drim, mo i mekem se hem i naf blong talemaot ol profet tok. Plante long ol profet tok ya oli bin kamtru finis mo sam narafala oli tokbaot ol samting we bambae oli hapen long fiuja we bambae i afektem olgeta man long wol.

¹⁸ Long nekis stadi, bambae yumi luk tu profet tok we Daniel i raetem. Taem yumi kasemsave long tufala, hemia bambae i halpem yumi evriwan ol yangfala mo ol olfala blong mekem ol gudfala desisen naoia. Ol profet tok ya bambae oli halpem yumi blong gat strong tingting, stap tru long Jehova, mo rerem yumi from ol samting we bambae oli hapen i no longtaem.