1. Folem Hibru 12:1, ?wanem i save givhan blong winim resis blong yumi?

 BAEBOL i talem se laef blong ol Kristin i olsem wan resis. Olgeta we oli winim resis ya bambae oli kasem laef we i no save finis. (2 Tim. 4:7, 8) Taswe, yumi mas mekem evri samting we yumi naf blong mekem blong gohed long resis ya, hemia from we en blong resis ya i klosap moa i bitim bifo. Aposol Pol we i bin winim resis blong hem, i tokbaot sam samting we i save givhan long yumi blong winim resis ya. Hem i se: “Yumi mas sakemaot evri samting we i hevi . . . mo yumi ron long resis ya we i stap long fored blong yumi.”—Ridim Hibru 12:1.

2. ?Tok ya “yumi mas sakemaot evri samting we i hevi” i minim wanem?

² Taem Pol i talem se, “yumi mas sakemaot evri samting we i hevi,” ?hemia i min se ol Kristin oli no mas karem eni hevi samting? Nogat. Pol i wantem talem se yumi mas sakemaot ol samting we yumi no nid blong karem, we oli save mekem se yumi kam taet mo slodaon. Blong winim resis blong yumi, yumi mas kwik blong luksave ol hevi samting we yumi no nid blong karem mo sakemaot olgeta. Be long semtaem, yumi mas lukaot se yumi no sakemaot ol samting we yumi sud karem, sipos no bambae yumi no moa gohed long resis ya. (2 Tim. 2:5) ?Wanem sam samting we yumi mas karem?

3. (1) Folem Galesia 6:5, ?wanem sam samting we yumi mas karem? (2) ?Bambae yumi tokbaot wanem long stadi ya mo from wanem?

³ Ridim Galesia 6:5. Pol i talemaot samting we yumi mas karem, taem hem i raetem se: “Olgeta man wanwan oli gat prapa basket blong olgeta blong karem.” Long ples ya, Pol i stap tokbaot ol wok we yumi wanwan i mas mekem long fored blong Jehova. Long stadi ya, bambae yumi tokbaot ol hevi samting we i stap insaed long “prapa basket” blong yumi mo  olsem wanem blong karem olgeta. Mo tu, bambae yumi tokbaot sam hevi samting we yumi no nid blong karem mo lanem olsem wanem blong sakemaot. Taem yumi sakemaot ol samting we yumi no nidim, hemia bambae i givhan long yumi blong winim resis blong yumi.

4. ?From wanem i no had blong holemtaet promes we yumi mekem long Jehova? (Mo tu, yu luk pija.)

⁴ Promes we yumi mekem blong givim laef blong yumi long Jehova. Taem yumi givim laef blong yumi long Jehova, yumi promes blong wosipim hem mo mekem wil blong hem. Hemia wan promes we yumi mas holemtaet. I tru, i wan bigfala responsabiliti, be i no had tumas blong yumi mekem, from we Jehova i wokem yumi blong mekem wil blong hem. (Rev. 4:11) Jehova i putum filing ya we yumi wantem save hem mo wosipim hem. Mo tu, hem i wokem yumi long pija blong hem, from samting ya, yumi naf blong kam klosap long hem mo yumi glad nomo blong mekem wil blong hem. (Sam 40:8) Taem yumi mekem wil blong God mo yumi folem eksampol blong  Pikinini blong hem, bambae yumi “harem gud long laef.”—Mat. 11:28-30.

5. ?Wanem i save givhan long yu blong holemtaet promes we yu mekem? (1 Jon 5:3)

⁵ ?Olsem wanem blong karem hevi samting ya? I gat tu samting we i save givhan. Faswan, gohed blong mekem lav we yu gat long Jehova i kam strong moa. Yu save mekem olsem, taem yu tingting dip long ol gudfala samting we yu bin kasem mo tingbaot ol blesing we oli stap long fored blong yu. Taem lav blong yu long Jehova i kam strong moa, bambae i isi blong yu obei long hem. (Ridim 1 Jon 5:3.) Nambatu, folem fasin blong Jisas. Hem i naf blong mekem wil blong Jehova from we hem i prea blong askem help, mo i fokas long ol blesing we bambae i kasem. (Hib. 5:7; 12:2) Olsem Jisas, yumi save prea blong Jehova i givim paoa long yumi mo gohed blong tingbaot hop ya blong laef olwe. Taem yu lavem Jehova moa, mo yu folem fasin blong Pikinini blong hem, bambae yu naf blong holemtaet promes we yu mekem long Jehova.

6. ?From wanem yumi mas mekem ol wok we yumi gat insaed long famle? (Mo tu, yu luk pija.)

⁶ Ol wok we yumi gat insaed long famle. Long resis blong yumi, yumi mas lavem Jehova mo Jisas moa i bitim we yumi lavem ol famle. (Mat. 10:37) Hemia i no min se bambae yumi no moa mekem ol responsabiliti we yumi gat long famle, from yumi stap mekem wok blong Jehova. Be defren olgeta, sipos yumi wantem se Jehova mo Jisas i glad long yumi, yumi mas mekem ol wok we yumi gat insaed long famle. (1 Tim. 5:4, 8) Sipos yumi mekem olsem, bambae yumi glad moa. Jehova i save se famle bambae i glad, taem hasban mo waef i soemaot lav mo respek long tufala, oli lavem mo trenem ol pikinini, mo ol pikinini oli obei long tufala.—Efes. 5:33; 6:1, 4.

7. ?Wanem i save givhan long yu blong mekem ol wok we yu gat insaed long famle?

⁷ ?Olsem wanem blong karem hevi samting ya? Nomata wanem wok we yumi gat long famle, i gud yumi trastem ol waes advaes blong Baebol. Yumi no sud folem prapa tingting blong yumi, kalja blong yumi, o samting we ol man blong stadi oli talem. (Prov. 24:3, 4) Yusumgud ol buk blong yumi we oli eksplenem olsem wanem yumi save folem ol advaes blong Baebol. Eksampol, long haf ya ol atikol seri, long seksen ya “Advaes Long Famle,” i gat sam infomesen we i tokbaot ol defren jalens we ol kapol, perens mo ol yangfala oli stap fesem tede. b Yu mas gat strong tingting blong folem ol samting we Baebol i talem, nating se ol narafala memba blong famle oli no folem. Taem yu mekem olsem, hemia bambae i givhan long famle mo bambae yufala i save enjoem ol blesing blong Jehova.—1 Pita 3:1, 2.

8. ?Olsem wanem ol desisen blong yumi oli save afektem yumi?

⁸ Akseptem frut we i kamaot from ol desisen we yumi mekem. Jehova i givim wan presen long yumi hemia se yumi fri blong jus, mo hem i wantem se yumi glad taem yumi mekem ol gudfala desisen. Be sipos yumi mekem ol rong desisen, hem i no blokem ol trabol we bambae oli kasem yumi. (Gal. 6:7, 8) Taswe, yumi mas rere blong fesem eni trabol we i save kamaot from ol nogud samting we yumi mekem o talem. Maet samting we yumi mekem i stikim tingting blong yumi. Be sipos  yumi luksave se yumi wan yumi mas tekem aksen, bambae yumi talemaot sin blong yumi, stretem samting we yumi mekem, mo no moa mekem bakegen. Taem yumi mekem olsem, hemia i save givhan long yumi blong gohed long resis blong laef.

9. ?Yu save mekem wanem sipos yu harem nogud from nogud desisen we yu bin mekem? (Mo tu, yu luk pija.)

⁹ ?Olsem wanem blong karem hevi samting ya? Sipos yu bin mekem wan rong desisen, ?yu save mekem wanem? Tingbaot se yu no save jenisim samting we i hapen, so i no nid blong westem taem mo paoa blong yu blong pruvum long yu wan se yu stret mo blemem narafala from mastik blong yu. Be i gud yu luksave mastik blong yu mo traehad blong mekem bes blong yu long wanem we yu save mekem naoia. Sipos yu harem nogud from wan samting we yu bin mekem, i gud yu prea long Jehova, yu talemaot ol mastik blong yu, mo yu askem hem blong fogivim yu. (Sam 25:11; 51:3, 4) Talem sore long olgeta we yu mekem oli harem nogud, mo sipos yu luk se i nidim, askem help blong ol elda. (Jem. 5:14, 15) Lanem samting from mastik blong yu mo traehad blong no mekem bakegen. Sipos yu mekem olsem, yu save sua se Jehova bambae i sore long yu mo i givhan long yu.—Sam 103:8-13.

10. ?Olsem wanem filing ya se yu sud mekem moa i save kam olsem wan hevi samting? (Galesia 6:4)

¹⁰ Filing ya se yumi sud mekem moa. Taem yumi stap komperem yumi wetem ol narafala, yumi save gat filing ya se yumi sud mekem moa. (Ridim Galesia 6:4.) Sipos oltaem yumi stap mekem olsem, bambae yumi stat blong jalus mo wantem winim narafala. (Gal. 5:26) Mo taem yumi wantem kompit wetem ol narafala long ol samting we yumi no naf blong mekem, hemia i save spolem yumi. Baebol i talem se: “Taem man i stap wet long wan samting be i slo blong kamtru, hat blong hem i soa from.” Taswe, i sua se bambae yumi harem nogud moa sipos yumi putum ol mak we yumi neva save kasem. (Prov. 13:12) Hemia bambae i mekem yumi kam taet, nao yumi stat blong ron slo long resis blong laef.—Prov. 24:10.

11. ?Wanem i save givhan long yumi blong yumi nogat tingting ya se yumi sud mekem moa?

¹¹ ?Olsem wanem blong sakemaot hevi samting ya? Jehova i neva ekspektem yumi blong givim samting we yumi no naf blong givim, taswe yu no mas gat tingting ya se yu sud mekem moa. (2 Kor. 8:12) Mo tu, Jehova i no komperem ol samting we yu mekem wetem samting we narafala i mekem. (Mat. 25:20-23) Be hem i tinghae long samting we yu mekem long fulhat blong yu, yu holemstrong long hem, mo yu gohed blong stanap strong. Sipos yu gat tingting daon, bambae yu luksave se yu no moa naf blong mekem sam samting from maet yia blong yu, helt blong yu, o situesen i jenis. Olsem Basilae, yu mas rere blong talem no taem yu luksave se yu no moa naf blong mekem wan wok. (2 Saml. 19:35, 36) Olsem Moses, akseptem help mo givimaot wok long ol narafala taem yu luk se i stret. (Eks. 18:21, 22) Taem yu gat tingting daon, bambae yu no traem mekem samting we yu no naf blong mekem, nao yu kam taet blong ron long resis blong laef.

12. ?Yu yu responsibol long ol nogud desisen we ol narafala oli mekem? Yu eksplenem.

¹² Blemem yu wan from nogud desisen blong narafala. Yumi no save mekem desisen long bihaf blong ol narafala o blokem ol rabis frut we i save kamaot from ol nogud desisen we oli mekem. Eksampol, maet wan yangfala i  mekem desisen blong stop blong mekem wok blong Jehova. Desisen ya i save mekem ol perens blong hem oli harem nogud bitim mak. Ol perens we oli blemem olgeta from nogud desisen we pikinini i tekem, i olsem we oli karem wan hevi samting. Be Jehova i no ekspektem olgeta blong karem hevi samting ya.—Rom 14:12.

13. ?Perens i save mekem wanem sipos wan pikinini i mekem wan nogud desisen?

¹³ ?Olsem wanem blong sakemaot hevi samting ya? Tingbaot se Jehova i mekem se yumi evriwan i fri blong jus, taswe wanwan long yumi i save jusum samting we yumi wantem mekem. Hemia i minim tu jus we yumi mekem blong wosipim hem. Ol perens, Jehova i save se yufala i no stretgud olgeta, hem i jes wantem se yufala i mekem bes blong yufala. Jus we wan pikinini i mekem i responsabiliti blong hem, i no blong yu. (Prov. 20:11) Nating se i olsem, maet yu stap wari yet se yu sud mekemgud wok blong yu olsem wan perens. Sipos yu harem olsem, i gud yu talemaot filing blong yu long Jehova mo yu askem hem blong i fogivim yu. Hem i save se yu no save gobak long taem bifo mo jenisim samting we i hapen. Mo tu, hem i no ekspektem yu blong blokem trabol we i save kamaot from nogud desisen we pikinini blong yu i mekem. Tingbaot se sipos pikinini blong yu i traehad blong kambak long Jehova, Hem i glad blong welkamem bak hem.—Luk 15:18-20.

14. ?From wanem yumi sud sakemaot filing ya blong gat fol?

¹⁴ Oltaem yu harem se yu gat fol. I stret nomo blong yumi harem se yumi gat fol taem yumi mekem sin. Be Jehova i no wantem se yumi gohed blong gat filing olsem. Hemia wan hevi samting we yumi mas sakemaot. Sipos yumi talemaot ol sin blong yumi, yumi tanem tingting, mo yumi traehad blong no mekem sin ya bakegen, yumi save trastem se Jehova bambae i fogivim yumi. (Wok 3:19) Afta we yumi mekem ol samting ya, Jehova i no wantem se yumi gohed blong harem se yumi gat fol. Hem i save se bambae yumi spolem  yumi, sipos yumi gohed blong harem nogud. (Sam 31:10) Mo tu, maet yumi save lego resis ya blong kasem laef.—2 Kor. 2:7.

15. ?Wanem i save givhan long yu blong winim filing ya blong gat fol? (1 Jon 3:19, 20) (Mo tu, yu luk pija.)

¹⁵ ?Olsem wanem blong sakemaot hevi samting ya? Sipos yu gohed blong harem se yu gat fol, tingbaot se Jehova i ‘stap fogivim ol man we hem i no giaman.’ (Sam 130:4) Taem hem i fogivim olgeta we oli rili tanem tingting blong olgeta, hem i promes se: “Bambae mi no moa tingbaot sin blong olgeta.” (Jer. 31:34) Hemia i min se Jehova bambae i no moa tingbaot ol sin we hem i fogivim finis. Taswe, yu no mas ting se ol nogud frut we yu stap kasem, i minim se hem i no fogivim yu. Mo yu no mas blemem yu wan sipos yu lusum sam wok long kongregesen from ol mastik blong yu. Jehova i no stap tingbaot ol sin blong yu, so yu mas mekem sem mak.—Ridim 1 Jon 3:19, 20.

16. ?Olsem ol man blong resis, yumi mas tingbaot wanem?

¹⁶ Taem yumi stap ron long resis ya blong kasem laef, yumi “mas resis long fasin we [yumi] save kasem praes.” (1 Kor. 9:24) Yumi save mekem olsem, taem yumi kasemsave se ol hevi samting we yumi mas karem i defren long ol hevi samting we yumi mas sakemaot. Long stadi ya, yumi bin tokbaot sam nomo long ol samting we yumi mas karem mo ol samting we yumi mas sakemaot. Be i gat plante moa we yumi save tokbaot. Jisas i talem se yufala i mas lukaot se “fasin blong kakae bitim mak, dring bitim mak, mo wari from ol samting blong laef, oli no mekem tingting blong yufala i kam slak olgeta.” (Luk 21:34) Ol vas ya mo sam narafala vas oli save givhan long yu blong luksave ol jenis we yu mas mekem, taem yu stap ron long resis blong laef.

17. ?From wanem yumi sua se bambae yumi winim resis blong laef?

¹⁷ Yumi save se bambae yumi winim resis blong laef, from Jehova i stap givim paoa we yumi nidim. (Aes. 40:29-31) !From samting ya yumi no mas slodaon! Olsem aposol Pol, yumi mas ron strong blong kasem praes we i stap long fored blong yumi. (Fil. 3:13, 14) Ol narafala oli no save resis long bihaf blong yu, be wetem help blong Jehova yu save winim resis ya. Jehova i save halpem yu blong karem ol hevi samting mo sakemaot ol samting we yu no nid blong karem. (Sam 68:19) !Jehova i stap long saed blong yu, taswe yu naf blong stanap strong mo winim resis ya!