1. ?Wanem i save givhan long yumi blong laekem blong stadi long ol profet tok?

 WAN yangfala brata we nem blong hem Ben, i talem se: “Mi laekem stadi long ol profet tok blong Baebol.” ?Yu yu agri wetem hem? ?O yu harem se i had blong kasemsave long ol profet tok? Maet yu harem se yu no intres blong stadi long olgeta. Be sipos yu kasemsave from wanem Jehova i putum ol profet tok ya long Baebol, bambae yu stat blong laekem olgeta.

2. ?Bambae yumi tokbaot wanem long stadi ya?

² Long stadi ya, bambae yumi tokbaot from wanem yumi mas stadi long ol profet tok, mo wanem i save givhan long yumi blong stadi long olgeta. Biaen bambae yumi tokbaot tu profet tok long buk blong Daniel, mo luk olsem wanem oli save givhan long yumi taem yumi kasemsave long olgeta.

3. ?Yumi mas mekem wanem sipos yumi wantem kasemsave long ol profet tok blong Baebol?

³ Yumi mas askem help sipos yumi wantem kasemsave long ol profet tok blong Baebol. Tingbaot pijatok ya, sipos yu visitim wan ples we yu no savegud, be fren we i stap wetem yu i savegud ples ya. Hem i save ples we yutufala i stap long hem mo ples we ol rod ya oli go long hem. I sua se yu yu glad tumas we fren blong yu i folem yu. Long sem fasin, Jehova i savegud taem we yumi stap long hem mo ol samting we bambae oli hapen long fiuja. Taswe blong kasemsave long ol profet tok blong Baebol, yumi mas gat tingting daon mo askem help blong Jehova.—Dan. 2:28; 2 Pita 1:19, 20.

4. ?From wanem Jehova i letem oli raetem ol profet tok long Baebol? (Jeremaea 29:11) (Mo tu, yu luk pija.)

⁴ Olsem wan gudfala perens, Jehova i wantem se ol pikinini blong hem oli gat wan gudfala fiuja. (Ridim Jeremaea 29:11.)  Be hem i save moa, hem i save talemaot samting we bambae i hapen long fiuja, mo oltaem samting we hem i talem i tru. Hem i jusum sam man blong oli raetemdaon ol profet tok blong yumi save ol impoten samting bifo we oli hapen. (Aes. 46:10) Taswe, ol profet tok blong Baebol oli ol nambawan presen we i kamaot long Papa blong yumi long heven. ?Be wanem i save givhan long yu blong sua se samting we Baebol i talem bambae i kamtru?

5. ?Wan yangfala i save lanem wanem long ekspiriens blong Max?

⁵ Long skul, ol yangfala blong yumi oli stap long medel blong ol narafala we oli no rili respektem Baebol. So samtaem ol toktok mo aksen blong olgeta i save mekem ol yangfala blong yumi oli gat tu tingting long samting we oli bilif long hem. Makem ekspiriens blong wan brata we nem blong hem Max. Hem i se: “Taem mi stap long skul, mi stat blong gat tu tingting long ol tijing we perens blong mi i tijim long saed blong tru relijen mo se Baebol i rili kamaot long God.” ?Ol perens blong hem oli mekem wanem? Max i se: “Tufala i toktok kwaet long mi, nating se tufala i wari.” Perens blong hem i yusum Baebol blong ansa long ol kwestin blong hem mo Max tu i mekem sam samting. Hem i se: “Mi stadi long ol profet tok blong Baebol blong givhan long mi wan. Mo tu, mi tokbaot ol samting we mi lanem wetem ol narafala yangfala.” ?Wanem i kamaot from? Max i talem se: “!Afta long ol samting ya, mi sua fulwan se Baebol i kamaot long God!”

6. ?Yu save mekem wanem sipos yu gat tu tingting, mo from wanem hemia i impoten?

⁶ Sipos yu tu yu stat blong gat tu tingting olsem Max long samting we Baebol i talem, yu no mas harem nogud, be yu mas tekem aksen kwiktaem. Fasin blong gat tu tingting i olsem wan rosta, sipos yu no kwik blong tekemaot, sloslo hem i save spolem ol sas samting we yu gat. Blong sakemaot tu tingting we i olsem “rosta” we i save spolem bilif blong yu, i gud yu askem yu wan se: ‘?Mi mi bilif long samting we Baebol i talem long saed blong fiuja?’ Sipos yu no sua, hemia i min se yu mas stadi long ol profet tok blong Baebol we oli kamtru finis. Bambae yumi luk olsem wanem yu save mekem samting ya.

7. ?Wanem eksampol we Daniel i soem blong stadi long ol profet tok? (Daniel 12:10) (Mo tu, yu luk pija.)

⁷ Daniel i soem wan gudfala eksampol olsem wanem blong stadi long ol profet tok. Hem i gat stret risen blong stadi, hemia from hem i wantem save trutok. Mo tu, Daniel i gat tingting daon, hem i sua se Jehova bambae i givim save long olgeta we oli gohed blong stap klosap long Hem mo obei long Hem. (Dan. 2:27, 28; ridim Daniel 12:10.) Long ples ya, Daniel i soemaot se hem i gat tingting daon taem hem i dipen long Jehova blong i givhan long hem. (Dan. 2:18) Daniel i tekem taem blong stadigud, hem i mekem risej long ol haf blong Baebol we hem i gat long taem blong hem. (Jer. 25:11, 12; Dan. 9:2) ?Olsem wanem yu save folem eksampol blong Daniel?

8. ?From wanem samfala oli no bilif long ol profet tok blong Baebol, be yumi mas mekem wanem?

 ⁸ ?Wanem risen i pulum yu blong stadi long ol profet tok blong Baebol? ?Yu stadi from yu rili wantem save trutok? Sipos yes, Jehova bambae i givhan long yu. (Jon 4:23, 24; 14:16, 17) Be maet samfala oli stadi from wan narafala risen, maet blong faenem sam poen blong soemaot se Baebol i no kamaot long God. Long rod ya, oli save mekem prapa desisen blong olgeta long samting we i stret mo samting we i no stret. Taswe yumi mas gat stret risen blong stadi long ol profet tok. Mo tu, i gat wan narafala impoten fasin we i save givhan long yumi blong kasemsave long ol profet tok.

9. ?Wanem impoten fasin we i save givhan long yumi blong kasemsave long ol profet tok blong Baebol? Yu eksplenem.

⁹ Gat tingting daon. Jehova i promes blong halpem olgeta we oli gat tingting daon. (Jem. 4:6) Taswe yumi mas prea blong hem i givhan long yumi blong kasemsave long ol profet tok blong Baebol. Sipos yumi gat tingting daon, bambae yumi akseptem rod we Jehova i yusum tru long gudfala slef we i waes blong givim kakae long saed blong spirit long stret taem. (Luk 12:42) Jehova i wan God blong oda, taswe i stret nomo we hem i yusum wan rod nomo blong halpem yumi blong kasemsave long ol trutok blong Baebol.—1 Kor. 14:33; Efes. 4:4-6.

10. ?Yu save lanem wanem long ekspiriens blong Esta?

¹⁰ Tekem taem blong stadi gud. Jusum wan profet tok we yu intres long hem mo stat mekem risej long hem. Hemia nao samting we wan sista, nem blong hem Esta i mekem. Hem i intres long ol profet tok we i tokbaot taem we Mesaea bambae i kam. Hem i se: “Taem mi gat 15 yia, mi stat blong mekem risej blong faenemaot ol pruf se oli raetem ol profet tok ya bifo long taem blong Jisas.” Taem hem i ridim ol infomesen long saed blong ol Ded Si Skrol, hemia i gat bigfala paoa long hem. Hem i makem se: “Sam long ol infomesen ya oli raetem bifo long taem blong Kraes, so i sua se ol profet tok ya oli mas kamaot long God.” Esta i talem se: “Samtaem mi mas ridim ol infomesen ya bakegen mo bakegen blong mi kasemsave long olgeta.” Nating se i olsem, hem i glad nomo blong mekem traehad ya. Afta we hem i tekem taem blong stadi gud, hem i talem se: “!Naoia mi luksave se ol samting we Baebol i talem oli tru!”

11. ?Taem yumi pruvum long yumi wan se Baebol i tru, hemia i givhan long yumi olsem wanem?

¹¹ Taem yumi luk olsem wanem sam profet tok blong Baebol oli bin kamtru, hemia i mekem se yumi trastem Jehova mo eni daereksen we i kamaot long hem. Mo tu, ol profet tok blong Baebol oli givhan long yumi blong gat positif tingting long saed blong fiuja, nating se yumi stap fesem ol traem. Naoia bambae yumi tokbaot tu profet tok long buk blong Daniel we i stap kamtru tede. Taem yumi kasemsave long tufala, hemia bambae i givhan long yumi blong mekem ol waes desisen.

12. ?Tufala leg daon we oli wokem long ‘aean we i miks wetem sofsof klei’ i minim wanem? (Daniel 2:41-43)

¹² Ridim Daniel 2:41-43. Daniel i talemaot mining blong drim blong King Nebukadnesa. Long drim ya, king i luk wan bigfala statiu we leg blong hem daon oli wokem long ‘aean we i miks wetem sofsof klei.’ Taem yumi skelem profet tok ya wetem ol narafala profet tok long buk blong Daniel mo Revelesen, yumi faenemaot se tufala leg ya daon i minim Inglan mo Amerika. Tufala i wok tugeta mo tufala nao i bigfala wol paoa long taem blong yumi. Daniel i tokbaot tufala wol paoa ya, se: “Haf blong kingdom ya bambae i strong mo haf i no strong.” ?From wanem bambae haf i no strong? From ol sitisen blong tufala we i minim sofsof klei, bambae oli no ting hevi long kingdom ya nating se i gat paoa olsem aean. b

13. ?Wanem ol impoten save we yumi lanem long profet tok ya?

¹³ Yumi save lanem sam impoten save long saed blong statiu we Daniel i tokbaot, speseli long tufala leg blong hem daon. Faswan, Inglan mo Amerika i mekem sam samting blong soemaot se tufala nao i Wol Paoa. Wan eksampol, hemia taem oli win long Wol Wo I mo Wol Wo II. Nating se i olsem, wol paoa ya i no strong from ol sitisen blong hem oli stap faet agensem olgeta bakegen mo agensem gavman. Sekenwan, Inglan mo Amerika nao bambae i laswan wol paoa blong rul bifo we Kingdom blong God i finisim olgeta gavman blong man. Nating se ol narafala nesen bambae oli traem blong faet agensem wol paoa ya, be bambae oli no save winim. Yumi save samting ya from we “ston” ya we i representem Kingdom blong God bambae i bangem leg blong statiu ya we i minim Inglan mo Amerika.—Dan. 2:34, 35, 44, 45.

14. Taem yumi kasemsave long profet tok blong tufala leg ya daon, ?olsem wanem hemia i givhan long yumi blong mekem ol waes desisen?

¹⁴ ?Yu yu sua se profet tok ya long saed blong tufala leg ya daon i tru? Sipos yes, hemia i sud gat paoa long laef blong yu. Bambae yu no traehad tumas blong kasem plante mane o sas samting long wol ya we i no longtaem bambae i lus. (Luk 12:16-21; 1 Jon 2:15-17) Taem yu kasemsave long profet tok ya, hemia bambae i halpem yu blong luksave from wanem wok blong prij mo tijim ol man i impoten. (Mat. 6:33; 28:18-20) Afta we yu stadi long ol profet tok ya, i gud yu askem yu wan se: ‘?Ol desisen blong mi oli soemaot se mi sua fulwan se i no longtaem Kingdom blong God bambae i finisim olgeta gavman blong man?’

15. ?Hu ya “king blong not” mo “king blong saot” tede? (Daniel 11:40)

¹⁵ Ridim Daniel 11:40. Daniel japta 11 i tokbaot tu king o politik paoa we tufala i stap agensem tufala. Taem yumi komperem profet tok ya wetem ol narafala profet tok long Baebol, yumi luksave se “king blong not” hemia Rasia wetem ol kantri we oli sapotem hem, mo “king blong saot” hemia wol paoa ya Inglan mo Amerika. c

16. ?Wanem sam jalens we ol man blong God oli fesem from we oli laef aninit long rul blong “king blong not”?

¹⁶ Ol man blong God we oli laef aninit long rul blong “king blong not,” oli stap fesem fasin agens we i kamaot long king ya. Hemia nao samting we i hapen long sam Witnes, oli  wipim nogud olgeta mo putum olgeta long kalabus from bilif blong olgeta. Nating se oli jikim ol brata blong yumi, be hemia i mekem se bilif blong olgeta long Jehova mo tok blong hem i kam strong moa. ?From wanem? From we ol brata blong yumi oli save se fasin agens we ol man blong God oli kasem, i stap mekem profet tok long buk blong Daniel i kamtru. d (Dan. 11:41) Taem yumi save samting ya, hemia i mekem hop blong yumi long fiuja i kam strong moa mo yumi gohed blong holemstrong long Jehova.

17. ?Wanem sam jalens we ol man we oli laef aninit long rul blong “king blong saot” oli fesem?

¹⁷ Long taem bifo, “king blong saot” tu i atakem ol man blong Jehova. Eksampol, long ol yia 1900, oli putum plante Witnes long kalabus from we oli no wantem joen long politik. Mo ol skul oli sakemaot plante pikinini we oli Witnes from we oli stap nutrol. Be long ol yia we i jes pas, ol man blong Jehova we oli laef aninit long rul blong king blong saot oli fesem  sam narafala jalens. Eksampol, long taem blong ol kampen blong eleksen, maet wan Kristin i save harem se i wantem sapotem wan politik pati o wan kandidet. I tru se hem i no vot, be maet long tingting mo hat blong hem, hem i stat blong gat tingting ya se wan politik pati i gud moa i bitim narawan. Taswe blong stap nutrol yumi mas lukaot long ol samting we yumi mekem, mo tu long ol tingting mo filing blong yumi.—Jon 15:18, 19; 18:36.

18. ?Faet bitwin tufala king ya i sud mekem wanem long yumi? (Mo tu, yu luk pija.)

¹⁸ Olgeta we oli no bilif long ol profet tok blong Baebol, bambae oli wari tumas taem oli luk we hon blong “king blong saot” i “fas long hon” blong “king blong not.” (Dan. 11:40, fut.) Hemia from we tufala king ya i gat ol bigfala bom we i save distroem evri laef samting long wol ya. Be yumi save se Jehova bambae i no letem samting ya i hapen. (Aes. 45:18) Insted blong yumi wari from samting we “king blong not” mo “king blong saot” bambae i mekem, bilif blong yumi i sud kam strong. Hemia i soemaot se en blong wol ya i klosap.

19. ?Yumi mas save wanem long saed blong ol profet tok blong Baebol?

¹⁹ Yumi no save olsem wanem sam long ol profet tok blong Baebol bambae oli kamtru. Profet Daniel tu i no kasemsave mining blong ol samting we hem i stap raetem. (Dan. 12:8, 9) I tru, maet yumi no kasemsave stret olsem wanem wan profet tok bambae i kamtru, be hemia i no min se bambae i no kamtru. I sua se long stret taem blong hem, Jehova bambae i givhan long yumi blong kasemsave long ol samting we yumi mas save, stret olsem we hem i bin mekem bifo.—Amos 3:7.

20. ?Wanem ol profet tok we bambae oli kamtru i no longtaem? ?Mo yumi mas gohed blong mekem wanem?

²⁰ Bambae oli talemaot se “i gat pis mo seftaem.” (1 Tes. 5:3) Biaen ol gavman blong wol ya bambae oli atakem olgeta giaman skul mo oli spolemgud olgeta. (Rev. 17:16, 17) Mo afta, bambae oli atakem ol man blong God. (Esik. 38:18, 19) Taem ol samting ya oli hapen, faet blong Amagedon bambae i stat. (Rev. 16:14, 16) Yumi sua se i no longtaem bambae ol samting ya oli hapen. Be go kasem taem ya, i gud yumi gohed blong soemaot tangkiu long Papa blong yumi long heven. Hemia taem yumi gohed blong kasemsave long ol profet tok blong Baebol mo yumi givhan long ol narafala blong mekem sem mak.