• “Mi harem olsem se hasban blong mi i stap mekem rabis fasin blong seks wetem narafala woman, bakegen mo bakegen.”

• “Mi harem olsem se hasban blong mi i stap daonem mi, mi no naes, mo mi gud blong nating nomo.”

• “Mi no save talemaot long eni man, mi stap harem nogud mi wan nomo.”

• “Mi harem se Jehova i no kea long mi.”

Ol tok ya i soemaot se waef i harem nogud taem hasban blong hem i stap lukluk ponografi. Mo sipos hasban i stap mekem olsem long fasin haed blong plante manis o plante yia, maet waef i save harem olsem se hem i no moa trastem hasban blong hem. Wan waef i talem se: “Mi harem olsem se mi no save hasban blong mi nating. ‘?Maet i gat sam narafala samting tu we hem i stap haedem?’”

Atikol ya i blong givhan long waef we hasban blong hem i stap lukluk ponografi. a Bambae i tokbaot ol advaes blong Baebol we i save leftemap tingting blong waef mo givhan long hem blong save se Jehova i stap sapotem hem. Mo tu, bambae i halpem hem blong harem gud bakegen mo stap klosap long Jehova. b

I tru se yu no save kontrolem evri samting we hasban blong yu i mekem, be i gat sam samting we yu save mekem blong gat pis long tingting. Hemia sam long olgeta.

Yu no mas blemem yu wan. Maet waef i save gat tingting ya se i fol blong hem we hasban blong hem i stap lukluk ponografi. Alice c i harem olsem se hasban blong hem i no laekem hem from we hem i no naes. Hem i stap tingting se: ‘?From wanem hasban blong mi i no wantem lukluk mi, be i stap lukluk ol narafala woman?’ Sam waef oli blemem olgeta wan taem oli harem nogud mo oli kros, from oli gat tingting ya se olgeta nao oli mekem situesen i kam mowas. Danielle i talem se: “Mi harem nogud mo mi kros oltaem, mi harem olsem se mi nao mi stap spolem mared blong mitufala.”

Sipos yu harem olsem, i gud yu tingbaot se Jehova i no blemem yu from samting we hasban  blong yu i mekem. Jemes 1:14 i talem se: “Ol samting blong traem man i save kam strong long hem taem hem i wantem tumas wan samting.” (Rom 14:12; Fil. 2:12) Jehova i no blemem yu, be hem i tinghae long yu from yu holemstrong long hem.—2 Kron. 16:9.

I gud blong kasemsave tu se taem hasban i stap lukluk ponografi, hemia i no from we waef blong hem i no naes. Ol man we oli gat save long saed ya, oli talem se ponografi i mekem we man i wantem mekem seks bitim mak. Mo i no gat wan woman we i save mekem man olsem i haremgud.

No wari bitim mak. Catherine i se, oltaem hem i tingbaot se hasban blong hem i stap lukluk ponografi. Frances i talem se: “Ful dei mi stap wari bitim mak, taem mi no save se hasban blong mi i stap wea.” Sam narafala waef oli sem taem oli stap wetem ol Kristin brata sista we oli save long problem blong hasban blong olgeta. Sam narafala bakegen, oli harem se oli stap olgeta wan nomo from oli ting se i no gat man i kasemsave long problem blong olgeta.

I nomol nomo blong gat ol filing olsem. Be sipos yu gohed blong gat ol nogud filing ya, hemia bambae i mekem yu wari bitim mak. Taswe, i moa gud yu mekem frensip blong yu wetem Jehova i kam strong moa. Sipos yu mekem olsem, bambae yu naf blong stanap strong.—Sam 62:2; Efes. 6:10.

Yu save ridim mo tingting dip long stori blong ol woman long Baebol, we oli haremgud bakegen taem oli prea long Jehova. I no oltaem we Jehova i tekemaot ol problem blong olgeta, be yet Hem i putum pis long tingting blong olgeta. Eksampol, Hana i “harem nogud tumas” long samting we i hapen long laef blong hem, be “hem i prea longtaem long Jehova.” Nating se hem i no save yet wanem bambae i hapen, be hem i gat pis long tingting.—1 Saml. 1:10, 12, 18; 2 Kor. 1:3, 4.

Askem help long ol elda long kongregesen. Olgeta oli olsem “selta we man i go long hem taem i gat win, mo wan sefples taem i gat strong win mo ren.” (Aes. 32:2, fut.) Maet oli jusum wan sista we yu save trastem blong talemaot ol filing blong yu, mo we i save kamfotem yu.—Prov. 17:17.

Maet yu save givhan long hasban blong yu blong winim fasin ya blong lukluk ponografi. Baebol i talem se, taem yu stap traem blong winim wan problem o faet agensem wan strong  enemi, “tu man i gud moa i bitim wan man nomo.” (Pri. 4:9-12) Ol ripot oli soemaot se taem kapol i wok tugeta, waef i save givhan long hasban blong hem blong winim fasin ya. Mo tu, waef i save lanem blong trastem hasban blong hem bakegen.

Samting ya i save hapen nomo sipos hasban blong yu i rere blong wok had mo i wantem winim fasin ya. ?Olsem wanem? ?Hem i plis long Jehova blong i givim paoa long hem mo i lukaot help blong ol elda? (2 Kor. 4:7; Jem. 5:14, 15) ?Hem i gat wan plan blong no yusum tumas ol divaes mo blokem ol samting we i save pulum hem blong lukluk ponografi? (Prov. 27:12) ?Hem i glad blong yu halpem hem mo i talemaot evri samting long yu? Sipos yes, yu save givhan long hem.

?Yu save givhan olsem wanem? Tingbaot eksampol blong Felicia. Hem i mared long Ethan, we i stat blong lukluk ponografi taem hem i pikinini nomo. Felicia i mekem i isi blong Ethan i toktok long hem taem hem i harem se i wantem lukluk ponografi. Ethan i talem se: “Mi talemaot evri samting long waef blong mi. Long kaen fasin hem i halpem mi blong putum sam limit mo oltaem hem i jekem mi. Mo hem i givhan long mi blong no spenem tumas taem long intenet.” I tru, Felicia i harem nogud from fasin blong Ethan blong lukluk ponografi. Be hem i talem se: “Taem mi kros mo harem nogud, hemia i no save givhan long hem blong winim ol rabis fasin ya. Afta we mitufala i tokbaot ol problem blong hem, hem i rere blong givhan long mi blong haremgud bakegen.”

Taem hasban mo waef i storian gud tugeta, hemia i save givhan long hasban blong blokem fasin ya blong lukluk ponografi. Mo tu, i save halpem waef blong i trastem hasban blong hem bakegen. Taem hasban i rere blong talemaot ol filing blong hem, ples we hem i go long hem, mo samting we hem i mekem, bambae i isi blong waef i trastem hem from hem i no stap haedem eni samting.

?Yu ting se yu save mekem sem mak blong givhan long hasban blong yu? Sipos yes, i gud yutufala i ridim mo tokbaot atikol ya tugeta. Mak blong hem i blong stopem fasin ya blong lukluk ponografi mo mekem se yu trastem hem bakegen. I gud hem i traehad blong kasemsave long filing blong yu, bitim we hem kros taem yu wantem tokbaot problem ya. Mo mak blong yu i blong sapotem hem taem hem i stap traehad blong winim fasin ya, mo yu letem hem i pruvum se yu save trastem hem bakegen. Yutufala tugeta i mas kasemsave from wanem ol man oli lukluk ponografi mo olsem wanem blong winim fasin ya. d

Sipos yutufala i fraet se taem yutufala i storian long problem ya bambae yutufala i kros, maet i gud yutufala i askem wan elda we yutufala  i trastem blong i sidaon wetem yutufala mo lesin. Yu mas save se sipos hasban blong yu i bin lukluk ponografi longtaem finis i kam, maet i tekem longtaem blong yu save trastem hem bakegen. Be yu no mas givap. Lukaotem ol smosmol samting we i soemaot se mared blong yutufala i save kamgud bakegen. Yutufala i save sua se sipos yutufala i gat longfala tingting, sloslo mared blong yutufala i save kam strong bakegen.—Pri. 7:8; 1 Kor. 13:4.

Sipos hasban blong yu i foldaon bakegen long fasin ya, ?hemia i min se hem i no tanem tingting blong hem o bambae i neva winim fasin ya? Nogat. Sipos hem i bin mekem fasin ya longtaem finis, maet hem i mas traehad long ful laef blong hem blong winim fasin ya. Hemia i min se hem i save foldaon bakegen, nating se hem i lego fasin ya plante yia finis. Blong blokem fasin ya, maet hem i mas putum sam rul mo gohed blong folem, iven sipos hem i ting se hem i winim fasin ya. (Prov. 28:14; Mat. 5:29; 1 Kor. 10:12) Hem i mas mekem “paoa we i stap pusum tingting” blong hem i kam niuwan, mo lanem blong ‘no laekem nating ol samting we i nogud,’ olsem ponografi mo ol narafala doti fasin olsem pleplei wetem seks blong hem. (Efes. 4:23; Sam 97:10; Rom 12:9) ?Hem i rere blong traehad olsem? Sipos yes, maet bambae hem i naf blong lego nogud fasin ya. e

?Olsem wanem sipos hasban blong yu i no wantem traehad blong winim problem ya? Maet plante taem yu save harem nogud, yu kros, mo yu harem se hasban blong yu i stap spolem yu. Sipos i olsem, talemaot ol wari blong yu long Jehova, olsem nao bambae yu save gat pis long tingting. (1 Pita 5:7) Gohed blong stadi, prea, mo tingting dip blong kam klosap long Jehova. Taem yu mekem olsem, hem tu bambae i kam klosap long yu. Olsem Aesea 57:15 i talem, Jehova i stap wetem olgeta we “oli harem nogud tumas mo we tingting blong olgeta i foldaon,” mo i halpem olgeta blong oli glad bakegen. Traem bes blong yu blong soemaot ol Kristin fasin. Lukaot help blong ol elda mo holem strong tingting se long fiuja maet hasban blong yu i jenis.—Rom 2:4; 2 Pita 3:9.