1. Taem Adam mo Iv i no obei, ?olsem wanem Jehova i leftemap tingting blong ol man?

JEHOVA i stap leftemap tingting blong ol man, i stat long taem ya we Adam mo Iv i agensem hem, nao tufala i kam sinman. Wantaem nomo, hem i talemaot wan profet tok we i givim hop mo strong tingting long ol man we oli kamaot biaen long tufala. Profet tok ya we i stap long Jenesis 3:15, i promes se Setan mo ol rabis wok blong hem bambae oli lus.—1 Jon 3:8; Revelesen 12:9.

2. ?Olsem wanem Jehova i leftemap tingting blong Noa?

² Traem tingbaot olsem wanem Jehova i leftemap tingting blong Noa. Ol man long taem ya oli stap faet mo mekem rabis fasin. Noa mo famle blong hem nomo oli wosipim  Jehova. Tingting blong Noa i save foldaon isi nomo. (Jenesis 6:4, 5, 11; Jud 6) Be Jehova i mekem tingting blong Noa i strong, nao hem i save gohed blong wosipim Jehova mo mekem ol stret fasin. (Jenesis 6:9) Jehova i talem se bambae hem i spolem rabis wol ya, mo i eksplenem samting we Noa i mas mekem, blong hem mo famle i stap sef. (Jenesis 6:13-18) Tru ya, Jehova i leftemap tingting blong Noa.

3. ?Olsem wanem Jehova i leftemap tingting blong Josua? (Yu luk pija long stat blong stadi.)

³ Plante yia biaen, Jehova i leftemap tingting blong Josua we i gat wan bigfala wok blong mekem. Hem i mas lidim ol man blong God oli go long Promes Lan, mo winim ol strong ami blong ol kantri long ples ya. Jehova i save se maet Josua i fraet, taswe hem i talem long Moses se: “Yu toktok gud long Josua, mo yu mekem tingting blong hem i strong, from we hem nao bambae i lidim ol man ya i gokros long Jodan Reva blong holem ol graon ya we bambae yu luk.” (Dutronome 3:28) Afta, Jehova tu i leftemap tingting blong Josua, i se: “Mi mi talem long yu finis. Tingting blong yu i mas strong, mo yu mas stanap strong oltaem. Yu yu no mas fraet, mo tingting blong yu i no mas foldaon, from we mi bambae mi stap wetem yu long weples bambae yu yu go long hem.” (Josua 1:1, 9) ?Yu ting se Josua i harem olsem wanem?

4, 5. (1) ?Olsem wanem Jehova i leftemap tingting blong ol man blong hem bifo? (2) ?Olsem wanem Jehova i leftemap tingting blong Pikinini blong hem?

⁴ Mo tu, Jehova i leftemap tingting blong ol man blong hem olsem wan grup. Traem tingbaot taem ya we ol man Jiu oli stap kalabus long Babilon. Jehova i save se oli nidim ol gudfala toktok blong leftemap tingting blong olgeta, ale, hem i sanem wan profet blong talem long olgeta se: “!Yufala i no fraet! !Mi mi stap wetem yufala! !Mi mi God blong yufala! !Yufala i no seksek! !Mi bambae mi mekem yufala i strong! !Mi bambae mi givhan long yufala! !Mi bambae mi blokemgud yufala, mi sevem yufala!” (Aesea 41:10) Hem i leftemap tingting blong ol fas Kristin tu, mo hem i stap mekem sem mak tede.—Ridim 2 Korin 1:3, 4.

⁵ Jehova i leftemap tingting blong Pikinini blong hem tu. Taem Jisas i baptaes, hem i harem wan voes i kamaot long heven i se: “Hemia Pikinini blong mi. Mi mi lavem hem tumas, mo mi glad long hem.” (Matiu 3:17) !Yu traem tingbaot olsem wanem ol tok ya i mas givim paoa long Jisas taem hem i stap prij long wol!

6. ?Parabol blong talen mane i leftemap tingting blong yumi blong mekem wanem?

⁶ Jisas i folem fasin blong Papa blong hem taem i leftemap tingting blong ol narafala blong oli wok gud. Long parabol blong ol talen mane, masta i talem long ol gudfala slef ya wanwan, se: “!Gudfala wok! !Yu yu wan gudfala slef we yu stap wok gud oltaem! Ol wok we oli smol nomo, be yu yu mekem gud. Taswe bambae mi putumap yu blong yu lukaot long plante moa samting. Mi, masta blong yu, mi glad tumas, yu kam  joen wetem mi.” (Matiu 25:21, 23) !Ol tok ya i leftemap tingting blong yumi blong gohed gud long wok blong Jehova!

7. ?Olsem wanem Jisas i leftemap tingting blong ol aposol, speseli Pita?

⁷ Plante taem ol aposol oli raorao se hu i hae moa long olgeta, be Jisas i gat longfala tingting. Hem i toktok gud long olgeta se oli mas gat tingting daon mo mekem wok blong narafala, be oli no mas wantem se narafala i mekem wok blong olgeta. (Luk 22:24-26) Plante taem Pita i mekem mastik mo Jisas i harem nogud from. (Matiu 16:21-23; 26:31-35, 75) Be Jisas i no sakemaot Pita. Hem i leftemap tingting blong Pita, mo i givim wok long hem blong mekem ol narafala Kristin oli strong.—Jon 21:16.

8. ?Olsem wanem Hesekia i leftemap tingting blong ol jif blong ami mo ol man Juda?

⁸ Bifo we Jisas i kam blong soemaot eksampol, ol man blong Jehova oli save se oli mas leftemap tingting blong ol narafala. Traem tingbaot taem ya we ol ami blong Asiria oli rere blong agensem Jerusalem. Hesekia i singaot ol jif blong ami mo ol man oli kam wanples, blong i toktok gud long olgeta. “Nao tok ya blong hem i leftemap tingting blong olgeta.”—Ridim 2 Kronikel 32:6-8.

9. ?Olsem wanem yumi save folem eksampol blong Job?

⁹ Job tu i soemaot gudfala eksampol long yumi. Nating se hem i nidim narafala blong leftemap tingting blong hem, be hem i soemaot olsem wanem blong leftemap tingting blong narafala. Hem i talem long ol man we oli kam luk hem, se sipos hem i stap leftemap tingting blong narafala man, bambae i talem ol tok we i mekem hem i harem gud mo i strong, i no ol tok we i spolem hem. (Job 16:1-5) Afta, Elihu mo Jehova tu i leftemap tingting blong Job.—Job 33:24, 25; 36:1, 11; 42:7, 10.

10, 11. (1) ?From wanem gel blong Jeftaha i nidim gudfala toktok blong leftemap tingting? (2) ?Yu save leftemap tingting blong hu?

¹⁰ Gel blong Jeftaha tu i nidim ol gudfala toktok blong leftemap tingting blong hem. Papa blong hem, Jaj Jeftaha i stap go blong faet agensem ol man Amon. Nao hem i promes se sipos Jehova i givhan long hem blong i winim faet ya, bambae hem i sanem fas man we i mitim hem taem i kamhom, i go wok long haos tapolen blong Jehova. Isrel i winim faet ya, mo faswan we i kamaot blong mitim Jeftaha, hemia gel blong hem, wan pikinini nomo we hem i gat. Jeftaha i harem nogud bitim mak. Be hem i holem promes blong hem, mo i sanem gel blong hem i go wok long haos tapolen blong ful laef blong hem.—Jajes 11:30-35.

¹¹ Hemia i had long Jeftaha, be ating i  had moa long gel blong hem. Nating se i olsem, hem i rere blong folem promes blong papa blong hem. (Jajes 11:36, 37) Hemia i min se bambae hem i no save mared, mo i no save gat pikinini blong mekem famle laen i gohed. Taswe, gel ya i nidim plante gudfala toktok blong leftemap tingting blong hem. Baebol i talem se: ‘I kam kastom blong ol laen blong Isrel, we evri yia, ol gel oli go stap fo dei long hil, blong oli [“leftemap tingting,” NW] blong dota blong man Gilead ya Jeftaha.’ (Jajes 11:39, 40) Gel blong Jeftaha i mekem yumi tingbaot ol Kristin tede we oli no mared, from we oli wantem mekem moa long wok blong Jehova. ?Olsem wanem? ?Yu save toktok gud long olgeta blong leftemap tingting?—1 Korin 7:32-35.

12, 13. ?Olsem wanem Pita i ‘mekem tingting blong ol brata i strong’?

¹² Long naet bifo we Jisas i ded, hem i talem long aposol Pita se: ‘!Saemon! Setan i askem blong seraotem yufala, olsem we man i seraotem sid long skin blong hem. Be mi mi prea blong bilif blong yu i no foldaon. Mo taem yu kambak, yu mekem tingting blong ol brata i kam strong.’—Luk 22:31, 32.

¹³ Pita i wan long ol brata we oli lidim Kristin kongregesen. (Galesia 2:9) Ol samting we hem i mekem long Pentekos mo afta, oli soemaot se hem i no fraet, mo samting ya i leftemap tingting blong ol brata. Afta we hem i wok plante yia,  hem i raetem leta long ol Kristin, i se: ‘Mi raetem sotfala leta ya i go long yufala blong leftemap tingting blong yufala. Mo blong talemaot se God i kaen long ol man. Yufala i mas holemtaet fasin ya blong hem.’ (1 Pita 5:12) Ol leta blong Pita oli leftemap tingting blong ol Kristin. Mo oli leftemap tingting blong yumi tu, taem yumi stap wet blong luk ol promes blong Jehova oli kamtru.—2 Pita 3:13.

14, 15. ?Olsem wanem ol buk we aposol Jon i raetem oli leftemap tingting?

¹⁴ Aposol Jon tu i wan long ol brata we oli lidim Kristin kongregesen. Long Gospel blong hem, hem i raetem ol gudfala stori blong wok blong Jisas long wol. Gospel ya i leftemap tingting blong ol Kristin bifo, mo i gohed yet blong mekem olsem. Jon nomo i raetemdaon ol tok ya blong Jisas, se lav nao i makemaot ol trufala disaepol.—Ridim Jon 13:34, 35.

¹⁵ Mo tu, Jon i raetem tri leta we i gat ol nambawan trutok long olgeta. Taem tingting blong yumi i foldaon from ol mastik we yumi mekem, yumi harem gud blong ridim ol tok ya se, ransom sakrefaes “i stap mekem yumi klin long olgeta sin.” (1 Jon 1:7) Sipos tingting blong yumi i gohed blong stikim yumi, yumi harem gud long tok ya se, “God i hae moa long hat blong yumi.” (1 Jon 3:20) Mo tu, Jon nomo i raetem se “God hem i lav.” (1 Jon 4:8, 16) Mo long namba tu mo namba tri leta blong hem, hem i talem gudfala toktok long ol Kristin we  oli stap gohed nomo blong “wokbaot long trutok.”—2 Jon 4; 3 Jon 3, 4.

16, 17. ?Olsem wanem aposol Pol i leftemap tingting blong ol Kristin bifo?

¹⁶ Aposol Pol i soemaot nambawan eksampol blong leftemap tingting. Smoltaem afta we Jisas i ded, bighaf blong ol aposol oli stap long Jerusalem, ples we hed kampani i stap. (Ol Wok 8:14; 15:2) Ol Kristin long Judia oli prij long ol man we oli bilif long wan God nomo. Be tabu spirit i lidim Pol i go long ol man Gris, Rom, mo sam narafala ples, we oli wosipim plante god.—Galesia 2:7-9; 1 Timoti 2:7.

¹⁷ Pol i go long Teki, Gris, mo Itali, blong prij long ol man we oli no man Jiu, mo hem i stanemap ol kongregesen tu. Laef blong ol man we oli kam Kristin, i no isi. Ol manples blong olgeta oli mekem i nogud long olgeta, taswe oli nidim ol gudfala toktok blong leftemap tingting. (1 Tesalonaeka 2:14) Samwe long yia 50, Pol i raetem leta long niufala kongregesen long Tesalonaeka, i se: “Long ol prea blong mifala, oltaem mifala i talem tangkiu long God, from we . . . mifala i neva fogetem wok we yufala i mekem wetem bilif mo lav, mo we yufala i stanap strong.” (1 Tesalonaeka 1:2, 3) Mo tu, hem i askem long olgeta blong oli mekem ol narafala Kristin oli strong, i se: “Yufala i mas gohed blong leftemap tingting blong yufala, mo . . . mekem yufala i strong.”—1 Tesalonaeka 5:11.

18. ?Olsem wanem hed kampani i leftemap tingting blong Filip?

¹⁸ Jehova i yusum hed kampani blong leftemap tingting blong ol Kristin bifo, mo olgeta we oli lidim ol kongregesen tu. Taem Filip i prij long ol man Sameria, hed kampani i sanem tu memba blong hem, Pita mo Jon, blong tufala i prea from olgeta we oli jes kam Kristin, blong oli kasem tabu spirit. (Ol Wok 8:5, 14-17) !Samting ya i leftemap tingting blong Filip mo ol niufala brata mo sista!

19. ?Ol fas Kristin oli harem olsem wanem, taem oli ridim leta we hed kampani i sanem?

¹⁹ Biaen, hed kampani i mas mekem wan impoten desisen. ?Olsem wanem? ?Ol Kristin we oli no man Jiu, oli mas sakomsaes folem Loa blong Moses? (Ol Wok 15:1, 2) Hed kampani i prea from tabu spirit mo i tokbaot ol vas blong Baebol, nao i mekem desisen se i no nid blong oli sakomsaes. Nao i raetem leta blong eksplenem, mo sam brata oli karem i go long ol kongregesen. Taem ol Kristin oli ridim leta ya, “oli glad tumas long ol toktok ya we i leftemap tingting.”—Ol Wok 15:27-32.

20. (1) ?Olsem wanem Hed Kampani i leftemap tingting blong yumi evriwan? (2) ?Bambae yumi tokbaot wanem kwestin long nekis stadi?

²⁰ Tede, Hed Kampani i talem ol gudfala toktok blong leftemap tingting blong olgeta we oli wok long Betel, olgeta we oli mekem ol narafala spesel wok, mo yumi evriwan. !Olsem ol brata bifo, yumi glad tumas long ol tok ya we i leftemap tingting! Mo tu, long 2015, Hed Kampani i wokem buklet ya Kambak Long Jehova, blong leftemap tingting blong olgeta we oli lego trutok, mo pulum olgeta oli kambak. ?Be olsem wanem? ?Ol brata we oli lidim kongregesen nomo, oli mekem wok ya blong leftemap tingting? Bambae yumi tokbaot kwestin ya long nekis stadi.