1, 2. (1) ?From wanem ol man long taem blong Pol oli intres long fasin fri? (2) ?Pol i talem se hu nao i Stamba blong fasin fri?

OL KRISTIN bifo, oli laef long ol ples we Rom i rul long olgeta. Ol man Rom oli tok flas from ol loa mo ol jaj we oli gat, mo oli talem se oli fri. Nating se i olsem, ol man we oli mekem bighaf blong ol wok, oli slef. I gat wan taem we 30 pesen blong ol man we Rom i rul long olgeta, oli slef. Taswe, long taem ya ol man mo ol Kristin tu, oli intres long fasin fri.

² Long plante leta we aposol Pol i raetem, hem i tokbaot fasin fri. Hem i no mekem olsem blong traem stretem ol trabol we ol man oli fesem, olsem plante narafala long taem ya. Be Pol mo ol narafala Kristin oli wok had blong tijim ol man long gud nius blong Kingdom blong God. Oli givhan long ol man blong oli kasem save se sakrefaes blong Jisas i sas we i sas. Pol i tokbaot Stamba blong fasin fri, i se: “Jehova i Spirit, mo long ples we spirit blong Jehova i stap, man i save fri.”—2 Korin 3:17.

3, 4. (1) ?Pol i tokbaot wanem long ol vas bifo long 2 Korin 3:17? (2) ?Yumi mas mekem wanem blong kasem fasin fri we Jehova i givim?

 ³ Long seken leta we Pol i raetem i go long ol Kristin long Korin, hem i tokbaot taem ya we Moses i toktok long wan enjel blong Jehova antap long Hil ya Sinae. !Taem Moses i kamdaon, fes blong hem i saen we i saen! Ol man Isrel oli fraet tumas, nao Moses i kavremap fes blong hem wetem kaliko. (Eksodas 34:29, 30, 33; 2 Korin 3:7, 13) Pol i talem se: “Taem man i kambak long Jehova, kaliko ya i kamaot.” (2 Korin 3:16) ?Tok ya i minim wanem?

⁴ Long las stadi, yumi lanem se Jehova, we i wokem evri samting, hem nomo i fri olgeta. Taswe i klia se Jehova i Stamba blong fasin fri, mo “long ples we spirit blong Jehova i stap,” i gat fasin fri. Be Pol i talem se sipos yumi wantem kasem fasin fri ya, yumi mas kambak long Jehova. Hemia i min se yumi mas kam klosap long hem mo fren gud wetem hem. Long draeples, ol man Isrel oli no gat tingting olsem Jehova, be oli gat tingting olsem man nomo. I olsem se kaliko i kavemap tingting mo hat blong olgeta. Oli wantem yusum fasin fri ya we oli jes kasem, blong mekem samting we olgeta nomo oli wantem.—Hibrus 3:8-10.

5. (1) ?Spirit blong Jehova i mekem man i fri long wanem? (2) ?Wanem i soemaot se man we i slef o i kalabus i save gat fasin fri ya we Jehova i givim? (3) ?Wanem tufala kwestin we bambae yumi tokbaot?

⁵ Taem Baebol i talem se spirit blong Jehova i mekem man i fri, hem i no stap tokbaot ol slef. Spirit ya i mekem yumi fri long fasin we i bigwan moa i bitim taem wan slef i kam fri. Spirit ya i save mekem yumi kam fri long sin mo ded. Mo tu, yumi no moa slef blong ol giaman kastom mo wosip. (Rom 6:23; 8:2) !Fasin fri ya i nambawan tumas! Ol man we oli slef mo ol man we oli stap long kalabus, olgeta tu oli save kasem fasin fri ya. (Jenesis 39:20-23) Sista Nancy Yuen mo Brata Harold King, tufala i stap plante yia long kalabus from bilif blong tufala, be tufala i gat fasin fri ya we God i givim. Yu save luk video blong tufala long JW Brodkasting. (Yu luk OL INTAVIU MO EKSPIRIENS > STANAP STRONG NATING SE I GAT TRABOL.) Naoia bambae yumi tokbaot tufala kwestin ya: ?Olsem wanem yumi soemaot se fasin fri ya i sas tumas long yumi? ?Mo olsem wanem blong yusum gud fasin fri ya?

6. ?Wanem i soemaot se ol man Isrel oli no glad we Jehova i mekem olgeta oli fri?

⁶ Taem yumi kasem wan sas presen, yumi glad mo yumi talem tangkiu. Be ol man Isrel oli no glad se Jehova i mekem olgeta oli fri. Sam manis nomo afta we Jehova i tekemaot olgeta long Ijip, oli wantem ol kakae mo dring blong Ijip. Oli komplen from kakae ya mana we  Jehova i givim long olgeta. !Mo tu, oli wantem gobak long Ijip! Long tingting blong olgeta, ‘ol fis, kukamba, melen, solat, anian, mo lae’ blong Ijip, oli moa impoten i bitim we oli kam fri blong wosipim Jehova. Yumi no sapraes se Jehova i kros tumas long olgeta. (Namba 11:5, 6, 10; 14:3, 4) Stori ya i tijim yumi long wan impoten samting.

7. ?Olsem wanem Pol i folem advaes we hem wan i givim long 2 Korin 6:1? ?Mo olsem wanem yumi save mekem sem mak?

⁷ Pol i givim woning long ol Kristin se oli no mas ting nating long fasin fri we God i givim tru long Jisas. (Ridim 2 Korin 6:1.) Pol i wan sinman, mo hem i harem nogud tumas from we hem i slef blong sin mo ded. Nating se i olsem, hem i talem se: “!Mi mi talem tangkiu long God from we bambae hem i yusum Masta blong yumi Jisas Kraes blong sevem mi!” ?From wanem Pol i talem olsem? Hem i eksplenem long ol Kristin se: “Loa blong spirit ya we i givim laef tru long Kraes Jisas, i mekem yu yu fri long loa blong sin mo blong ded.” (Rom 7:24, 25; 8:2) Olsem Pol, yumi no mas fogetem se Jehova i mekem yumi fri, we yumi no moa slef blong sin mo ded. Jisas i ded blong pemaot yumi, nao yumi save mekem wok blong God we tingting blong yumi i no stikim yumi. !Hemia i givim bigfala glad!—Ol Sam 40:8.

8, 9. (1) ?Aposol Pita i givim wanem woning? (2) ?Olsem wanem yumi save yusum fasin fri long rod we i no stret?

⁸ I no naf we yumi talem tangkiu nomo long Jehova, be yumi mas yusum gud fasin fri ya tu. Aposol Pita i givim woning se yumi no mas yusum fasin fri olsem wan eskius blong mekem ol nogud samting. (Ridim 1 Pita 2:16.) Woning ya i mekem yumi tingbaot samting we i hapen long ol man Isrel long draeples. Ating tede yumi nidim woning ya moa i bitim ol man long taem  bifo. Setan i stap yusum plante samting blong wol ya blong pulum yumi, olsem klos, kakae, dring, mo pleplei. Ol bisnesman oli yusum ol naesfala man mo woman blong mekem plante toktok blong salem ol samting ya. Nao yumi ting se yumi mas pem olgeta, nating se yumi no nidim. Wol ya i save trikim yumi isi nomo, blong yusum fasin fri blong yumi long rod we i no stret.

⁹ Ol advaes blong Pita i stret tu long ol bigfala samting long laef, olsem edukesen mo wok we yumi jusum. Tede ol yangfala oli ting se oli mas go long yunivesiti. Plante man oli talem long olgeta se sipos oli go long yunivesiti, bambae oli kasem gudfala wok, plante mane, mo ol narafala bambae oli respektem olgeta. Maet oli traem pruvum long ol yangfala se ol man we oli go long yunivesiti oli winim moa mane i bitim olgeta we oli go long hae skul. Taswe, ol yangfala oli save ting se oli mas go long yunivesiti. ?Be ol yangfala ya wetem papa mo mama blong olgeta, oli mas tingbaot wanem?

10. ?Yumi mas tingbaot wanem, taem yumi jusum ol samting we yumi wantem?

¹⁰ Samfala oli talem se hemia bisnes blong olgeta nomo, mo oli fri blong jusum samting we oli wantem, sipos tingting blong olgeta i no stikim olgeta from. Maet oli tingbaot ol tok ya blong Pol se: “?Olsem wanem? ?Tingting blong [narafala] i save fasem mi, olsem we mi mi no moa friman?” (1 Korin 10:29, Baebol Long Bislama) I tru se yumi fri blong jusum skul mo wok blong yumi, be yumi mas tingbaot se yumi no fri olgeta, mo tu, evri desisen we yumi mekem i gat frut blong hem. Taswe Pol i talem se: “Yumi fri blong mekem evri samting, be i no evri samting we oli gud long yumi. Yumi fri blong mekem evri samting, be i no evri samting we oli mekem bilif blong yumi i kam strong.” (1 Korin 10:23) Taswe, nating se yumi fri blong jusum samting we yumi wantem, be samting we yumi wantem i no impoten tumas.

11. ?From wanem Jehova i mekem yumi fri?

¹¹ Taem Pita i givim woning se yumi no mas yusum fasin fri long rod we i no stret, hem i talem se yumi yusum gud fasin fri taem yumi “slef blong God.” Jehova i yusum Jisas blong mekem yumi fri long sin mo ded, from we hem i wantem se yumi yusum ful laef blong yumi blong mekem wok blong hem.

12. ?Noa mo famle blong hem oli soemaot wanem eksampol?

¹² Blong yusum gud fasin fri, yumi mas yusum taem mo paoa blong yumi, blong mekem wok blong Jehova fulwan. Hemia bambae i protektem yumi. Ol samting we wol i pulum yumi blong mekem, mo ol samting we yumi nomo i wantem, bambae oli no kam ol impoten samting long laef blong yumi. (Galesia 5:16) Traem tingbaot Noa mo famle blong hem. Long taem blong olgeta, wol i fulap long faet mo rabis fasin. Be oli no joen wetem ol narafala man blong ronem ol samting we olgeta nomo oli wantem. Oli stap bisi long wok we Jehova i givim long olgeta. Oli wokem sip ya, oli hivimap kakae blong olgeta mo ol anamol,  mo oli givim woning long ol narafala se Bigfala Wota bambae i kavremap wol. Baebol i talem se: “Noa i mekem olgeta samting ya olsem we God i talem.” (Jenesis 6:22) Taswe, Noa mo famle blong hem oli stap laef, taem God i spolem ol rabis man.—Hibrus 11:7.

13. ?Jehova i talem se yumi mas mekem wanem?

¹³ ?Jehova i talem se yumi mas mekem wanem tede? From we yumi ol disaepol blong Jisas, yumi save gud se Jehova i wantem we yumi prij. (Ridim Luk 4:18, 19.) Tede, Setan i satem tingting blong bighaf blong ol man, nao oli no luksave se oli slef blong ol giaman skul, ol sas samting, mo politik. (2 Korin 4:4) Yumi gat blesing ya blong tijim ol man blong oli save Jehova we i Stamba blong fasin fri, mo blong oli wosipim hem. (Matiu 28:19, 20) Wok blong prij i no isi. Long sam ples, ol man oli no wantem save God, mo samfala oli kam kros taem yumi prij long olgeta. Be Jehova i talem se yumi mas prij, taswe i gud yumi askem se: ‘?Mi save yusum fasin fri blong mi blong mekem moa long wok blong Jehova?’

14, 15. ?Plante man blong Jehova oli mekem wanem? (Yu luk pija long stat blong stadi.)

¹⁴ Plante man blong Jehova oli luksave se en blong rabis wol ya i klosap tumas, nao oli mekem se laef blong olgeta i no moa fasfas mo oli joen long wok blong paenia. !Hemia i gud tumas! (1 Korin 9:19, 23) Samfala oli paenia long ples blong olgeta, mo sam narafala oli muv i go long kongregesen we i nidim moa man blong prij. Long faef yia we i pas, bitim 250,000 brata mo sista oli joen long wok blong paenia, mekem se naoia i gat bitim 1,100,000 fultaem paenia. !Yumi glad tumas blong luk se plante brata mo sista oli yusum fasin fri blong olgeta blong mekem moa long wok blong Jehova!—Ol Sam 110:3.

¹⁵ ?Wanem i pulum olgeta blong oli yusum gud fasin fri we oli gat? Tingbaot Jon mo Judit, we tufala i mekem wok blong Jehova long plante kantri, long 30 yia we i pas. Tufala i talem se, Skul Blong Paenia we i stat long 1977, i pulum ol studen blong oli muv i go long ples we i gat moa nid. Taswe, tufala i mekem se laef blong tufala i no fasfas mo Jon i jenisim wok blong hem plante taem. Afta, tufala i muv i go long wan narafala kantri blong prij. ?Tufala i mekem wanem blong winim ol samting we i had, olsem lanem niufala lanwis, wan narafala kalja, mo weta we i defren? Tufala i prea long Jehova mo tufala i dipen long hem. ?Tufala i harem olsem wanem long wok ya blong Jehova? Jon i talem se: “Mi harem se mi joen fulwan long wan wok we i moa gud i bitim ol narafala wok we mi bin mekem. Naoia mi save gud Jehova olsem wan papa we i lavem mi. Mi kasem save moa long mining blong Jemes 4:8 we i talem se: ‘Kam klosap long God,  nao hem bambae i kam klosap long yu.’ Mi harem gud tumas long laef, from we mi faenem samting we mi stap lukaotem.”

16. ?Olsem wanem plante taosen brata mo sista oli yusum gud fasin fri blong olgeta?

¹⁶ Samfala oli gohed longtaem long wok blong paenia, olsem Jon mo Judit. Sam narafala oli save paenia blong smoltaem nomo, from sam samting we i hapen long laef blong olgeta. Nating se i olsem wanem, plante oli glad blong wok olsem volontia, blong givhan blong bildim ol haos wosip long ol defren ples long wol. Traem tingbaot: Samwe long 27,000 brata mo sista oli kam blong bildim niufala wol hedkwota long Warwick, New York. Samfala oli kam blong tu wik nomo, sam narafala oli kam blong sam manis, mo samfala bakegen oli stap wan yia o bitim wan yia. Bighaf blong olgeta oli lego plante samting blong kam wok long Warwick. !Oli nambawan eksampol blong ol man we oli yusum fasin fri blong olgeta blong ona long Jehova, Stamba blong fasin fri!

17. ?Bambae yumi kasem wanem blesing, sipos yumi yusum gud fasin fri blong yumi naoia?

¹⁷ Yumi glad tumas we yumi save Jehova, mo we yumi kamfri taem yumi wosipim hem. I gud ol jus blong yumi oli soemaot se fasin fri ya i sas tumas long yumi. Bambae yumi no yusum long rod we i no stret, be bambae yumi yusum blong mekem bes blong yumi long wok blong Jehova. Nao bambae yumi save harem gud long ol blesing we Jehova i promes blong givim, taem profet tok ya i kamtru, se: “Olgeta samting we hem i mekem bambae oli kam fri, oli no moa slef blong wan bodi we i save kam roten, mo oli kasem nambawan laef ya we oli fri olsem ol pikinini blong God.”—Rom 8:21.