Yangfala ?Yu Gat Plan Blong Mekem Moa Long Wok Blong Jehova?
“Sipos yu askem long Hae God blong i lukluk gud long ol plan blong yu, wok blong yu bambae i save gohed gud.”—OL PROVEB 16:3.
1-3. (1) ?Ol yangfala oli fesem wanem? Talem wan pijatok. (Yu luk pija long stat blong stadi.) (2) ?Wanem i save givhan long ol yangfala Kristin?
TINGBAOT se yu gat plan blong go long wan lafet we i longwe. Ale, yu go lukaot wan transpot, be yu luk se i gat fulap man i stap wet, mo ol defdefren transpot. Tingting blong yu i fasfas smol, be yu no jam long enikaen transpot nomo. From we yu save gud ples we yu wantem go long hem, yu jam long transpot we bambae i tekem yu yu go stret long ples ya.
2 Laef i olsem wan trip, mo yufala ol yangfala, yufala i stap wet blong tekem wan transpot. Samtaem tingting blong yufala i fasfas from we i gat plante defren jus we yufala i save mekem. Be sipos yu save gud wanem we yu wantem mekem long laef blong yu, bambae i isi moa blong mekem jus we i stret. ?Wanem jus i stret blong mekem?
3 Stadi ya bambae i ansa long kwestin ya, mo bambae i soemaot se i gud yu yusum laef blong yu blong mekem Jehova i glad. Hemia i min se yu mas folem advaes blong Jehova taem yu mekem ol desisen, olsem, hamas yia bambae yu skul, Ol Proveb 16:3.
bambae yu mekem wanem wok, bambae yu mared mo gat pikinini o nogat. Mo tu, yu mas gat wan plan long wok blong Jehova, mo yu traehad blong mekem plan ya i kamtru. Hemia bambae i mekem se yu kam klosap moa long Jehova. Sipos wok blong Jehova i bigfala samting long laef blong yu, yu save sua se bambae hem i blesem yu mo i mekem ol plan blong yu oli gohed gud.—Ridim?FROM WANEM YU MAS GAT PLAN?
4. Long stadi ya, ?bambae yumi tokbaot wanem?
4 I gud yu gat plan long wok blong God. ?From wanem? Bambae yumi tokbaot tri risen. Fas risen mo sekenwan i soemaot se taem yu traehad blong mekem ol plan blong yu i kamtru, yu fren moa wetem Jehova. Namba tri risen i soemaot from wanem i gud yu gat ol plan ya taem yu yangfala.
5. ?From wanem i impoten we yu gat plan blong mekem moa long wok blong Jehova?
5 ?From wanem i impoten we yu gat plan blong mekem moa long wok blong Jehova? Yu wantem talem tangkiu long Jehova from lav we hem i soemaot, mo from ol samting we hem i mekem long yu. Man we i raetem Sam 92 i talem se: ‘Hae God. I gud tumas blong talem tangkiu long yu. Ol bigfala wok blong yu oli stap mekem mi mi glad tumas. Oltaem mi harem gud from ol samting ya we yu yu mekem.’ (Ol Sam 92:1, 4) Traem tingbaot ol samting ya we Jehova i givim long yu: laef, bilif, Baebol, kongregesen, hop blong laef olwe long Paradaes. Taem yu gat plan blong mekem moa long wok blong Jehova, yu soemaot long hem se yu glad long ol samting we hem i givim, nao yu kam klosap moa long hem.
6. (1) ?Olsem wanem yu kam klosap moa long Jehova taem yu gat plan long wok blong hem? (2) ?Wanem sam plan we yu save mekem taem yu yangfala?
6 Namba tu risen blong gat plan long wok blong God, hemia se taem yu wok had blong mekem plan ya i kamtru, yu kam klosap moa long Jehova. Aposol Pol i promes se: “God i stap mekem i stret nomo. Mo hem i no save fogetem ol wok ya we yufala i mekem. Hem bambae i stap tingbaot we yufala i lavem nem blong hem.” (Hibrus 6:10) Yu save mekem plan taem yu smol nomo, olsem Kristina we i gat 10 yia taem i mekem plan blong ridim laef stori blong ol Witnes. Tobi i gat 12 yia taem i mekem plan blong ridim Baebol fulwan, bifo we hem i baptaes. Maksim i gat 11 yia, mo sista blong hem Nomi i gat 10 yia, taem tufala i baptaes. Nao tufala tugeta i mekem plan blong go wok long Betel. Blong tingbaot plan ya oltaem, tufala i hangem pepa blong askem wok long Betel, long wol blong haos. ?Olsem wanem long yu? ?Yu save mekem plan mo stat blong wok from?—Ridim Filipae 1:10, 11.
Sipos yu gat klia tingting long plan blong yu, bambae i isi moa blong mekem ol gudfala desisen
7, 8. (1) Sipos yu gat wan plan, ?from wanem i isi moa blong mekem desisen? (2) ?From wanem Damaris i no go long yunivesiti?
7 ?Wanem namba tri risen blong gat plan long wok blong God, taem yu yangfala nomo? Yu gat plante desisen blong mekem, olsem, hamas yia bambae yu skul, wanem wok bambae yu mekem, mo plante narafala samting. Ol desisen ya oli olsem ol krosrod long trip blong yu. Sipos yu save gud se yu stap go wea, i isi blong jusum rod we yu mas folem. Long sem fasin, sipos yu gat klia tingting long plan blong yu, bambae i isi moa blong mekem ol gudfala desisen. Ol Proveb i talem se: “Man we i mekem gudfala plan mo i stap wok strong long hem, hem i save kasem plante samting.” Sipos yu kwik blong mekem gudfala plan, bambae yu kwik blong kasem gudfala frut. Hemia samting we i hapen long wan sista we nem blong hem Damaris. Taem hem i yangfala, hem i mas mekem wan impoten desisen. 21:5
8 Damaris i kasem ol gudfala mak long hae skul, mekem se hem i save go long yunivesiti blong kam loea, we hem i no nid blong pem. Be hem i jusum wan narafala wok we i no impoten tumas. ?From wanem? From we taem hem i smol, hem i mekem plan blong kam wan paenia. Hem i talem se: “Blong paenia, mi nidim haftaem wok nomo. Sipos mi go long yunivesiti mo kam wan loea, mi save winim bigfala mane, be bambae i had blong faenem haftaem wok.” Damaris i mekem wok blong paenia 20 yia finis. ?Olsem wanem? ?Hem i harem se plan mo desisen we hem i mekem taem hem i yangfala, i stret? Yes. Long ples blong wok, hem i stap mitim ol loea, be plante long olgeta oli no glad nating. Damaris i luksave se hem i kasem bigfala glad i bitim olgeta, from we hem i jusum wok blong paenia.
9. ?From wanem yumi glad long ol yangfala blong yumi?
9 Yumi talem bigfala tangkiu long plante taosen yangfala long olgeta ples long wol, we oli stap gohed gud. Impoten samting long laef blong olgeta, hemia blong frengud wetem Jehova, mo blong folem ol plan we oli gat blong mekem moa long wok blong hem. Ol yangfala ya oli harem gud tumas, mo long semtaem, oli stap lanem blong letem Jehova i lidim olgeta long evri samting, olsem skul, wok, mo famle. Solomon i talem se: “Yu mas trastem Hae God long olgeta tingting blong yu.” Hem i gohed se: “Long olgeta samting we yu stap mekem, yu mas tingbaot hem oltaem, mo . . . hem bambae i soemaot stret rod long yu, blong yu yu folem.” (Ol Proveb 3:5, 6) !Yangfala, Jehova i lavem yu tumas! Yu yu sas tumas long tingting blong hem, mo bambae hem i protektem, lidim, mo blesem yu.
REREGUD BLONG TOKBAOT JEHOVA
10. (1) ?From wanem wok blong prij i mas impoten tumas long yumi? (2) ?Olsem wanem blong kamgud moa blong eksplenem bilif blong yu?
10 Sipos yu tingbaot oltaem blong mekem Jehova i glad, bambae yu wantem tokbaot hem. Jisas Kraes i talem se yumi “mas talemaot gud nius long olgeta neson bifo we en i kam.” (Mak 13:10) Taswe wok blong prij i mas impoten moa long yumi i bitim ol narafala wok. ?Olsem wanem? ?Yu save mekem plan blong prij moa? ?Yu save paenia? ?Be olsem wanem sipos yu no laekem tumas blong prij? ?Mo olsem wanem blong kamgud moa blong eksplenem bilif blong yu? I gat tu samting we oli save givhan: Rere gud, mo no lego wok ya blong tokbaot Jehova. Sipos yu mekem olsem, maet bambae yu sapraes se yu laekem tumas blong prij.
?Olsem wanem blong rere gud blong tokbaot Jehova? (Haf 11 mo 12)
11, 12. (1) ?Yu save mekem wanem blong rere gud blong tokbaot Jehova? (2) ?Olsem wanem wan yangfala brata i tekem janis blong tokbaot Jehova long skul?
OL YANGFALA, bambae yu faenem wan pepa blong fulumap we i askem se: “?From Wanem Mi Mi Bilif Long God?” Yu folem ol step long pepa ya blong rerem prapa ansa blong yu. Bambae yu luk tri vas blong Baebol we yu save yusum: Hibrus 3:4, Rom 1:20, mo Ol Sam 139:14. I gat plante moa kwestin tu we yu save rerem ansa blong olgeta.—Ridim 1 Pita 3:15.
11 Fastaem, yu save rerem ansa blong sam kwestin we maet ol yangfala long skul oli askem, olsem: “?From wanem yu bilif long God?” I gat ol haf long jw.org we oli save givhan long yu. Sipos yu luk long OL BAEBOL TIJING >12 Yu save talem long ol yangfala long skul blong oli lukluk jw.org. Hemia nao samting we Luka i mekem. Taem klas i stap tokbaot ol defdefren jos, Luka i luk sam giaman toktok long saed blong ol Witnes long wan buk blong skul. Nating se hem i fraet smol, be hem i askem long tija sipos hem i save eksplenem from wanem ol tok ya i no tru. Tija i letem hem i eksplenem bilif blong hem, mo Luka i soemaot jw.org long ful klas. Nao tija i talem long klas se homwok blong olgeta i blong wajem video ya Yu Save Winim Wan Stronghed. Yu traem tingbaot olsem wanem Luka i glad se hem i bin tokbaot Jehova long skul.
13. Sipos yu fesem hadtaem, ?from wanem yu no mas lego plan blong yu?
13 Sipos yu fesem hadtaem, yu no letem tingting i foldaon, be yu gohed nomo blong folem plan blong yu. (2 Timoti 4:2) Hemia nao samting we Katarina i mekem. Taem hem i gat 17 yia, hem i mekem plan se bambae hem i prij long evriwan we hem i wok wetem olgeta. Wan long olgeta i tok nogud long hem plante taem. Be Katarina i no lego plan blong hem. Wan narafala we nem blong hem Hans, i sapraes long gudfala fasin blong Katarina. Nao hem i stat blong ridim ol buk blong yumi, i stadi Baebol, mo i baptaes. Be Katarina i no save samting ya from we hem i muv i go long narafala ples. Totin yia biaen, taem Katarina mo famle blong hem i stap long wan miting, hem i sek se Hans nao i givim pablik tok. Hem i glad tumas se hem i gohed nomo blong folem plan blong hem blong prij long evriwan we hem i wok wetem olgeta.
NO LEGO OL PLAN BLONG YU
14, 15. (1) ?Yu mas tingbaot wanem taem ol narafala oli pulum yu blong folem olgeta? (2) ?Yu save mekem wanem blong stanap strong taem oli traem fosem yu?
14 Fashaf blong stadi ya i pulum yu blong yu tingbaot oltaem blong mekem Jehova i glad, mo blong yu gat plan blong mekem moa long wok blong hem. Be plante yangfala olsem yu oli wantem gat gud taem nomo. Mo bambae oli traem pulum yu tu blong folem olgeta. Taswe, yu mas soemaot long olgeta se i impoten tumas blong folem plan we yu gat long laef blong yu. Yu no mas letem olgeta oli pulum yu blong yu lego plan ya. Olsem yumi tokbaot long stat blong stadi, sipos yu stap wet long wan transpot blong go samples, ?bambae yu jam long eni transpot nomo from we ol man insaed oli stap gat gudtaem? !Nogat!
15 Taswe, ?yu save mekem wanem taem ol narafala oli traem fosem yu blong folem olgeta? Sipos i had blong talem ‘no,’ i moagud yu stap longwe long olgeta. (Ol Proveb 22:3) Tingbaot bigfala trabol we yu save kasem sipos yu joen wetem olgeta blong mekem ol nogud samting. (Galesia 6:7) Mo tu, i gud yu mekem tingting blong yu i stap daon mo askem advaes. Lesin long ol tok blong papa mo mama blong yu, mo ol brata mo sista long kongregesen we oli gat plante waes mo save.—Ridim 1 Pita 5:5, 6.
16. ?Olsem wanem stori blong Kristof i soemaot se i impoten blong gat tingting daon?
16 Kristof i mekem tingting blong hem i stap daon mo i lesin long advaes. Smoltaem afta we hem i baptaes, hem i stat blong go long wan ples blong mekem eksasaes. Long ples ya, sam yangfala oli askem long hem blong i joen long wan klab blong spot. Hem i storian wetem wan elda, mo elda i mekem hem i tingbaot sam denja, olsem fasin ya blong traem winim narafala. Nating se i olsem, Kristof i mekem desisen blong joen long klab ya. Be kwiktaem nomo, hem i luk se spot ya i raf tumas mo i denja. Ale, hem i storian bakegen wetem ol elda, mo oli soemaot ol gudfala advaes blong Baebol long hem. Kristof i talem se: “Jehova i sanem ol gudfala man ya blong givim advaes, mo mi lesin long Hem, nating se mi tektaem.” ?Olsem wanem? ?Yu yu gat tingting daon blong lesin long ol gudfala advaes?
17, 18. (1) ?Jehova i wantem se ol yangfala oli harem olsem wanem? (2) ?Olsem wanem blong blokem ol jus we oli save mekem yu yu harem nogud? Talem wan stori.
17 Baebol i talem se: “Ol yangfala, naoia we yufala i yangfala yet, i gud yufala i stap mekem ol fasin we yufala i save harem gud long hem.” (Prija 11:9) Jehova i wantem se yu harem gud long yangtaem blong yu. Stadi ya i soemaot se wan rod blong harem gud, i blong folem ol plan we yu gat blong mekem moa long wok blong Jehova, mo blong folem advaes blong Jehova long ol plan mo desisen. Sipos yu kwik blong mekem samting ya, bambae yu haremsave kwiktaem se Jehova i stap lidim, protektem, mo blesem yu. Yu mas tingbaot ol gudfala advaes we hem i givim long Baebol, mo yu folem ol tok ya se: ‘God i mekem yu, mo naoia we yu yangfala yet, oltaem yu mas tingbaot hem.’—Prija 12:1.
18 Ol yangfala oli kam bigwan hareap. Sore tumas, plante long olgeta oli harem nogud, from we oli no gat ol gudfala plan taem oli yangfala. Be sipos yu stap tingting oltaem long ol plan blong yu blong mekem moa long wok blong Jehova, taem yu kam bigwan, bambae yu glad long ol jus blong yu. Wan woman we nem blong hem Mijana, i harem gud olsem. Taem hem i yangfala, hem i laekem plei spot. Oli singaot hem blong i go plei long Winter Olimpik Gem. Be Mijana i jus blong mekem wok blong Jehova fultaem. Bitim 30 yia hem i stap gohed long wok blong Jehova fultaem, wetem man blong hem. Hem i talem se ol man we oli wantem haenem, ona, paoa, mo mane, oli no rili glad. Mo hem i talem tu se plan we i beswan, i blong mekem wok blong God mo givhan long ol narafala blong oli save God.
19. ?From wanem i gud se yangfala i gat plan blong mekem moa long wok blong Jehova?
19 Mifala i talem tangkiu long yufala ol yangfala, from we nating se yufala i fesem sam hadtaem, yufala i putum tingting blong yufala oltaem long wok blong Jehova. Yufala i gat ol plan blong mekem moa long wok blong Jehova, mo wok blong prij i impoten long yufala. Mo tu, yufala i no letem ol samting blong wol ya i pulum yufala blong yufala i lego ol plan ya. Yufala i save sua se hadwok blong yufala i no blong nating nomo. Ol brata mo sista oli lavem mo sapotem yufala. Taswe, yufala i mas ‘askem long Hae God blong i lukluk gud long ol plan blong yufala, nao wok blong yufala bambae i gohed gud.’