1. ?From wanem aposol Pol i talem long ol Hibru Kristin bifo se oli mas leftemap tingting blong olgeta “moa”?

APOSOL POL i givim advaes long ol Hibru Kristin se: ‘I gud yumi stap tingbaot yumi, blong yumi givgivhan long yumi, mo mekem ol gudfala wok. Yumi no mas les blong kam wanples long ol miting blong yumi. Oltaem yumi mas toktok gud blong leftemap tingting blong yumi. Mo yufala i mas mekem samting ya moa, taem yufala i luk we dei ya i stap kam klosap.’ (Hibrus 10:24, 25) Maet ol brata mo sista oli askem se: ‘?From wanem Pol i talem se yumi mas leftemap tingting blong yumi moa?’ Bifo we faef yia i pas, ansa blong kwestin ya i kam klia. Oli luk ol saen we oli soemaot se dei blong Jehova blong jajem Jerusalem, i klosap. Mo oli luksave se oli mas ronwe, olsem Jisas i talem. (Luk 21:20-22; Ol Wok 2:19, 20) Dei blong Jehova i kamtru long yia 70, taem ol ami blong Rom oli spolem Jerusalem.

2. ?From wanem yumi mas leftemap tingting blong yumi moa tede?

 ² Taem blong yumi i sem mak. ‘Bigfala dei blong Jehova we bambae ol man oli fraet long hem,’ i klosap tumas. (Joel 2:11) Ol tok blong profet Sefanaea tu oli stret long taem blong yumi, se: “Bigfala Dei ya blong Hae God i kam klosap finis. I no longtaem, bambae i kamtru.” (Sefanaea 1:14) From samting ya, yumi mas ‘tingbaot yumi, blong yumi givgivhan long yumi, mo mekem ol gudfala wok.’ (Hibrus 10:24) Taswe, yumi mas save gud ol brata mo sista, nao yumi save leftemap tingting blong olgeta taem oli nidim.

3. ?Aposol Pol i talem wanem long saed blong leftemap tingting? (Yu luk pija long stat blong stadi.)

³ ‘Taem man i stap wari, tingting blong hem i hevi, be gudfala tok i save leftemap tingting blong hem bakegen.’ (Ol Proveb 12:25) Sam samtaem yumi evriwan i nidim gudfala toktok blong leftemap tingting. Pol i soemaot klia se olgeta we oli leftemap tingting blong ol narafala, olgeta tu oli nidim gudfala toktok blong leftemap tingting blong olgeta. Hem i talem long ol Kristin long Rom se: “Mi mi wantem tumas blong luk yufala, . . . blong bilif blong yufala i save leftemap tingting blong mi, olsem we bilif blong mi i save leftemap tingting blong yufala.” (Rom 1:11, 12) Taswe, aposol Pol tu i nidim gudfala toktok blong leftemap tingting blong hem.—Ridim Rom 15:30-32.

4, 5. ?Yumi save leftemap tingting blong hu, mo from wanem?

⁴ Tede, yumi save leftemap tingting blong olgeta we oli mekem wok blong Jehova fultaem, olsem ol paenia we oli gohed blong wok strong. Plante long olgeta oli lego sam samting we oli save harem gud long hem, blong mekem wok blong paenia. I sem mak long ol misinari, olgeta we oli wok long Betel, ol eria elda mo waef blong olgeta, mo olgeta we oli wok long ol translesen ofis. Olgeta evriwan oli lego sam samting, blong spenem moa taem long wok blong Jehova. Taswe i stret we yumi leftemap tingting blong olgeta. I gat plante narafala we oli wantem gohed long wok blong Jehova fultaem, be oli no naf. Olgeta tu oli glad taem narafala i leftemap tingting blong olgeta.

⁵ ?Hu ol narafala we yumi save leftemap tingting blong olgeta? Hemia ol brata mo sista we oli no mared, from we oli no wantem mared long wan man blong wol, be oli wantem obei long tok blong Jehova se oli mas mared nomo long “wan man blong Masta.” (1 Korin 7:39) Ol waef tu oli harem gud taem hasban blong olgeta i talem se i lavem olgeta, mo i glad long ol gudfala wok we oli mekem. (Ol Proveb 31:28, 31) Mo tu, yumi mas leftemap tingting blong ol Kristin we oli stap stanap strong, nating se oli sik o sam narafala i agensem olgeta. (2 Tesalonaeka 1:3-5) Jehova mo Jisas i stap mekem olgeta evriwan ya we oli gohed strong, oli harem gud.—Ridim 2 Tesalonaeka 2:16, 17.

6. ?Wanem wok blong ol elda we Aesea 32:1, 2 i tokbaot?

⁶ Ridim Aesea 32:1, 2. Naoia, laef i had. Tingting blong yumi i save foldaon, mo yumi harem nogud. Jisas Kraes i yusum ol tabu brata mo “ol haeman” blong ol narafala sipsip, blong leftemap tingting  blong yumi. Ol elda ya oli no “stap bos” long bilif blong yumi, be oli ‘joen wetem yumi blong wok.’ Oli wantem givhan long yumi, blong yumi glad mo yumi stanap strong.—2 Korin 1:24.

7, 8. ?Olsem wanem ol elda oli save leftemap tingting blong ol brata mo sista?

⁷ Ol elda oli mas folem fasin blong aposol Pol, we i traehad oltaem blong leftemap tingting blong ol brata mo sista. Hem i raet i go long ol Kristin long Tesalonaeka we oli stap kasem plante trabol, i se: ‘Mifala i lavem yufala tumas, taswe mifala i glad blong talemaot gud nius blong God mo givim laef blong mifala, blong givhan long yufala. Mifala i mekem olsem from we yufala i besfren blong mifala.’—1 Tesalonaeka 2:8.

⁸ Be toktok nomo i no naf blong leftemap tingting. Pol i talem long ol elda long Efesas se: “Yufala i mas . . . givhan long olgeta we oli no strong. Mo yufala i mas stap tingbaot tok ya we Masta Jisas i talem, i se: ‘Man i harem gud moa taem hem i givim samting long narafala, i bitim we hem i kasem samting.’” (Ol Wok 20:35) Pol i rere blong ‘yusum olgeta samting we hem i gat mo givim paoa mo laef blong hem from’ ol brata mo sista. Hem i mekem bes blong hem blong halpem olgeta. (2 Korin 12:15) Long sem fasin, i no ol toktok blong ol elda nomo we i leftemap tingting, be samting we oli mekem tu. Hemia i soemaot se oli rili kea.—1 Korin 14:3.

9. ?Olsem wanem ol elda oli save givim advaes we i leftemap tingting?

⁹ Samtaem ol elda oli mas givim advaes, blong givhan long ol brata blong oli kam strong bakegen. Baebol i soemaot olsem wanem blong mekem samting ya long fasin we i leftemap tingting. Taem Jisas i laef bakegen, hem i soemaot nambawan eksampol blong givim advaes, taem i sanem mesej long ol kongregesen long Esia Maena. Hem i givim strong advaes long kongregesen blong Efesas, Pegamam, mo Tuatira. Be fastaem, hem i talem ol gudfala toktok from gudfala wok mo fasin we oli mekem. (Revelesen 2:1-5, 12, 13, 18, 19) Hem i talem long kongregesen blong Laodisia se: “Olgeta man we mi mi lavem olgeta, mi stap soemaot rong blong olgeta, mo mi stap stretem olgeta. From samting ya, yu mas wok strong mo yu mas tanem tingting blong yu.” (Revelesen 3:19) Ol elda oli traehad blong folem fasin ya blong Kraes blong givim advaes.

10. ?Olsem wanem yumi evriwan i save mekem narafala i strong?

¹⁰ I no wok blong ol elda nomo blong leftemap tingting blong ol narafala. Pol i talem long olgeta Kristin se oli mas ‘talem ol gudfala tok we i save mekem ol man i kam strong mo i save givhan.’ (Efesas 4:29) Yumi wanwan i mas luksave samting we narafala i nidim blong yumi save givhan long olgeta. Pol i talem long ol Hibru Kristin se: “Yufala i mas mekem han we i slak mo ni we i seksek, tufala i kam strong, mo yufala i mas gohed blong wokbaot long stret rod, blong mekem se haf blong bodi ya we i no strong, i no save kam mowas, be bambae i kam gud bakegen.” (Hibrus 12:12, 13) Yumi evriwan wetem ol yangfala tu, i save talem sam toktok blong leftemap tingting blong ol narafala mo mekem olgeta oli strong.

11. ?Wanem i givhan long Mata taem tingting blong hem i foldaon?

¹¹ Wan sista we nem blong hem Mata, i harem nogud mo tingting blong hem i  foldaon. * Hem i talem se: “Mi stap prea blong wan man i kam leftemap tingting blong mi, nao mi mitim wan olfala sista we i gat bigfala lav mo sore. Mi nidim samting ya tumas. Hem i tokbaot trabol we hem i bin kasem, we i klosap sem mak long trabol blong mi. Mi harem gud se hem i kasem save long filing blong mi.” !Ating sista ya i no save nating olsem wanem ol tok blong hem i givhan long Mata!

12, 13. ?Olsem wanem yumi save folem advaes long Filipae 2:1-4?

¹² Pol i talem long ol Kristin long Filipae se: ‘Sipos yufala i leftemap tingting blong ol narafala, mo mekem oli harem gud, tingbaot olgeta, lavem olgeta mo sore long olgeta, yufala i mekem mi mi glad fulwan. Yufala i no mas mekem samting blong rao no blong leftemap yufala nomo, be yufala i mas mekem tingting i stap daon mo luk ol narafala man se oli hae moa. Yufala i no mas tingbaot yufala nomo.’—Filipae 2:1-4.

¹³ Yumi evriwan i mas lukaot rod blong givhan long ol brata mo sista. Yumi save ‘mekem oli harem gud,’ ‘tingbaot olgeta,’ ‘lavem olgeta mo sore long olgeta.’ Olsem nao, bambae yumi leftemap tingting blong olgeta.

14. ?Yumi save mekem wanem blong leftemap tingting blong narafala?

¹⁴ Yumi glad tumas taem yumi harem se olgeta we yumi givhan long olgeta, oli stap gohed gud. Aposol Jon i talem se: “Taem mi harem se ol pikinini blong mi  oli stap gohed blong wokbaot long trutok, hemia i mekem mi mi glad.” (3 Jon 4) Plante paenia oli harem gud tumas blong save se wan we oli bin tijim hem long trutok, i stap gohed strong, mo maet hem i wan paenia. Taswe sipos tingting blong wan paenia i foldaon, yumi save mekem hem i tingbaot ol gudfala wok we hem i mekem finis blong halpem ol narafala.

15. ?Yumi save mekem wanem blong leftemap tingting blong olgeta we oli stap gohed strong long wok blong Jehova?

¹⁵ Plante eria elda mo waef blong olgeta oli talem se taem oli kasem wan smol leta we i kam long kongregesen blong talem tangkiu, hemia i leftemap tingting blong olgeta. I sem mak long olgeta we oli stap gohed strong long wok blong Jehova, olsem ol elda, ol misinari, ol paenia, mo olgeta we oli wok long Betel. Maet yumi no luksave, be taem yumi talem tangkiu long olgeta, yumi leftemap tingting bigwan.

16. ?Wanem isi samting we yu save mekem blong leftemap tingting blong narafala?

¹⁶ ?Olsem wanem sipos i had blong yu talemaot filing blong yu? Blong talem stret, yu no nid blong mekem wan bigfala samting blong leftemap tingting. Yu save smael nomo. Sipos hem i no smael, maet hem i gat wan problem mo i nidim blong toktok wetem wan man. Sipos yu lesin long hem nomo, hem i save harem gud.—Jemes 1:19.

17. ?Wanem i leftemap tingting blong wan yangfala brata?

¹⁷ Wan brata we nem blong hem Henri, i harem nogud taem papa blong hem we i  wan elda mo sam narafala famle tu, oli lego Jehova. Eria elda i luk se Henri i harem nogud, nao i singaot hem blong tufala i go dring kofe. Hem i lesin gud long Henri. Sloslo Henri i kasem save se hem i mas gohed strong, sipos hem i wantem givhan long famle blong hem blong oli kambak long trutok. Mo tu, hem i harem gud taem i ridim Ol Sam 46, Sefanaea 3:17, mo Mak 10:29, 30.

18. (1) ?King Solomon i tokbaot wanem we i save leftemap tingting? (2) ?Aposol Pol i talem se yumi save mekem wanem?

¹⁸ ?Stori blong Mata mo Henri i tijim yumi long wanem? Yumi evriwan i naf blong leftemap tingting blong wan brata o sista, mo mekem hem i harem gud. King Solomon i talem se, i gud tumas “sipos man i save givim gudfala tok long stret taem . . . Man we i smael i kam long yu i save mekem yu yu glad, mo gud nius i save leftemap tingting.” (Ol Proveb 15:23, 30) ?Yu save wan brata o sista we tingting blong hem i foldaon o i harem nogud? I gud yu mekem wan smol samting, olsem ridim Wajtaoa long hem, o soem wan samting long jw.org. Mo tu, Pol i talem se sipos yumi joen wanples blong singsing, yumi save harem gud, i se: ‘Yufala i mas gohed blong leftemap tingting blong yufala wetem ol sam, mo ol tok blong presem God, mo ol singsing blong presem hem, mo yufala i mas singsing i go long Jehova long fulhat blong yufala.’—Kolosi 3:16; Ol Wok 16:25.

19. ?Yumi mas mekem wanem, mo from wanem?

¹⁹ Moa we dei blong Jehova i kam klosap, moa we yumi mas leftemap tingting blong yumi. (Hibrus 10:25) Bambae yumi glad sipos yumi folem tok ya blong Pol se: “Yufala i mas gohed blong leftemap tingting blong yufala, mo yufala i mas givgivhan long yufala blong mekem yufala i strong, olsem we yufala i stap mekem naoia.”—1 Tesalonaeka 5:11.