1. ?Olgeta man blong God oli wantem mekem wanem, mo from wanem? (Yu luk pija long fran pej.)

JISAS KRAES i talem long ol man blong hem se: “Yufala i mas go long ol man blong olgeta neson, yufala i pulum olgeta oli kam disaepol blong mi.” (Mat. 28:19) Ol gudfala man blong God oli wantem save olsem wanem blong “finisim gud” wok ya we Jisas i givim long olgeta. (2 Tim. 4:5) Wok ya i moa impoten i bitim eni narafala wok we yumi stap mekem long laef. Taswe, maet yumi harem se yumi no gat plante taem blong mekem wok ya.

2. ?Wanem ol problem we samfala oli fesem taem oli mekem wok blong prij?

² I gat sam narafala impoten wok tu we oli kakae taem mo paoa blong yumi. Maet yumi mas wok fuldei blong lukaot long yumi wan mo famle blong yumi. Maet i gat sam narafala samting tu olsem sik, taed tumas, o bodi i no moa strong from we yumi stap kam olfala. ?Olsem wanem blong finisim gud wok blong prij, nating se yumi stap fesem ol hadtaem ya?

3. ?Olsem wanem Matiu 13:23 i givhan long yumi?

³ Be sipos sam samting i blokem yumi, nao yumi no save mekem moa long wok blong Kingdom, tingting blong yumi i no mas foldaon. Jisas i kasem save se yumi evriwan i no save karem sem frut long wok blong Kingdom. (Ridim Matiu 13:23.) Jehova i tinghae long olgeta wok we yumi mekem wetem fulhat blong yumi. (Hib. 6:10-12) Nating se i olsem, maet samfala oli save mekem moa long wok blong Kingdom. Taswe long stadi ya, bambae yumi tokbaot olsem wanem yumi save putum wok blong prij i stap fasples, gat wan laef we i no fasfas, mo kamgud moa long fasin blong yumi blong prij mo tij. Be fastaem bambae  yumi tokbaot se ?i minim wanem blong finisim gud minista wok blong yumi?

4. ?I minim wanem blong finisim gud minista wok blong yumi?

⁴ Blong finisim gud minista wok blong yumi, i min se yumi mekem bes blong yumi long wok blong prij mo tij. Be i gat wan samting we i moa impoten i bitim taem we yumi spenem long wok ya. Hemia lav we yumi gat long Jehova mo ol man raonabaot. Samting ya nao i pusum yumi blong mekem wok blong prij. * (Mak 12:30, 31; Kol. 3:23) Mo taem yumi mekem wok blong Jehova long olgeta hat blong yumi, yumi glad blong yusum taem, paoa mo gudhan blong yumi blong kasem plante moa man.

5-6. ?Olsem wanem blong putum minista wok i stap fasples long laef blong yu, nating se yu no save mekem moa? Talem wan eksampol.

⁵ Traem tingbaot wan yangfala boe we i laekem tumas blong plei gita. Hem i tekem evri janis we hem i gat blong plei miusik. Evri wiken hem i stap plei long wan restoron. Be, mane we hem i kasem i no naf blong pem ol samting we hem i nidim. Ale long mande kasem fraede, hem i wok long wan stoa blong kasem i naf mane. Nating se hem i spenem plante taem blong wok long stoa, be oltaem hem i stap tingbaot blong plei miusik. Hem i wantem tumas blong kam gud moa long miusik mo blong wok fultaem olsem wan man blong plei miusik. Taswe, hem i tekem evri janis we hem i gat blong plei.

⁶ Long sem fasin, maet yu no save mekem moa long wok blong prij, nating se hemia nao samting we yu wantem tumas blong mekem. Ating yu traehad mekem gud nius i kasem hat blong ol man. Be from we yu gat plante samting blong mekem, maet yu stap tingbaot olsem wanem blong putum minista wok i stap fasples long laef blong yu.

7-8. ?Olsem wanem yumi save folem eksampol blong Jisas long wok blong prij?

⁷ Jisas i soem wan gudfala eksampol taem hem i prij. Samting we i moa impoten long laef blong hem, hemia blong tokbaot Kingdom  blong God. (Jon 4:34, 35) Hem i wokbaot plante handred kilometa blong i save prij long plante man. Hem i tekem evri janis blong toktok long ol man long ol pablik ples, mo long ol haos blong olgeta. Jisas i putum wok blong prij i stap fasples long laef blong hem.

⁸ Yumi save folem eksampol blong Jisas taem yumi tekem janis blong talemaot gud nius long enitaem mo long eniples we yumi faenem ol man. Yumi rere blong lego ol samting we yumi nomo i wantem, blong mekem moa long wok blong prij. (Mak 6:31-34; 1 Pita 2:21) Sam brata mo sista oli naf blong mekem wok blong spesel paenia, fultaem paenia, o haftaem paenia. Samfala oli lanem wan narafala lanwis o oli muv i go long wan narafala ples we i nidim moa man blong prij. Be ol pablisa we oli mekem bes blong olgeta long wok blong prij, olgeta nao oli mekem bighaf blong wok ya. Nating se i olsem, Jehova i no fosem yumi blong mekem moa long wanem we yumi naf blong mekem. Hem i wantem se yumi evriwan i harem gud taem yumi talemaot ‘nambawan gud nius blong God ya we i hapi.’—1 Tim. 1:11; Dut. 30:11.

9. (1) Nating se Pol i wok blong winim mane, ?olsem wanem hem i putum wok blong prij i stap fasples? (2) ?Olsem wanem Ol Wok 28:16, 30, 31 i soemaot tingting we Pol i gat long wok blong prij?

⁹ Aposol Pol i soem gudfala eksampol blong putum wok blong prij fasples long laef blong hem. Long nambatu misinari trip blong hem long taon ya Korin, hem i sot smol long mane, taswe hem i mekem wok ya blong somap haos tapolen. Pol i no luk se wok ya i moa impoten. Be hem i mekem blong i save gohed blong talemaot gud nius long ol man Korin we oli no “pem” hem from. (2 Kor. 11:7) Nating se Pol i mekem smol wok blong winim mane, hem i gohed nomo blong putum wok blong prij i stap fasples, mo long evri Sabat dei hem i stap prij. Afta we hem i kasem inaf mane, naoia hem i save putum tingting blong hem i stap moa long wok blong prij. Pol i gohed blong mekem smol wok blong winim mane, be yet hem i “prij oltaem. Hem i stap talemaot tok blong God long ol man Jiu blong pruvum se Jisas hem i Kraes.” (Wok 18:3-5; 2 Kor. 11:9) Sam taem biaen, taem Pol i stap kalabus long wan haos long Rom blong tu yia, hem i prij long ol man we oli kam visitim hem mo hem i raetem ol leta. (Ridim Ol Wok 28:16, 30, 31.) Pol i no letem eni samting i stopem hem blong i no putum Kingdom i stap fasples long laef blong hem. Hem i raetem se: “Mifala i no save lego from we God i . . . givim wok ya long mifala.” (2 Kor. 4:1) Olsem Pol, nating sipos yumi mas spenem plante taem long wok blong winim mane, be yet, yumi save putum wok blong Kingdom i kam fasples long laef blong yumi.

10-11. ?Olsem wanem yumi save finisim gud minista wok blong yumi nating se yumi gat problem blong helt?

¹⁰ Sipos yumi no naf blong mekem wok blong prij long ol haos wanwan from we yumi olfala o yumi sik, yumi save harem gud blong prij long ol narafala rod. Ol fas Kristin oli prij long eni ples we oli faenem ol man. Oli tekem evri janis blong talemaot trutok long ol haos wanwan o long ol pablik ples mo long eni ples we oli ‘mitim ol man.’ (Wok 17:17; 20:20) Sipos yu no save wokbaot longtaem, yu save go sidaon long wan pablik ples mo prij long ol man we oli pas. O yu save prij long ol man tru long leta o long telefon. Plante pablisa we oli no save mekem wok blong prij long ol haos wanwan from we oli gat problem blong helt, oli save kasem bigfala glad tru long ol narafala rod blong prij.

¹¹ Nating se yu gat sam problem blong helt, be yu tu yu save finisim gud minista wok blong yu. Traem tingbaot bakegen eksampol blong aposol Pol. Hem i talem se: “Mi mi gat paoa  blong fesem olgeta samting from God ya we i givim paoa long mi.” (Fil. 4:13) Taem Pol i stap long wan long ol misinari trip blong hem, hem i nidim paoa from we hem i sik tumas. Hem i talem long ol man Galesia se: “Taem mi kam stap wetem yufala from we mi sik, mi gat janis blong talemaot gud nius ya long yufala.” (Gal. 4:13) Long sem fasin, ol problem blong helt blong yu oli save givim janis blong yu talemaot gud nius long ol narafala, olsem ol dokta, ol nes, mo long ol man we oli lukaot long yu taem yu sik. Bighaf blong ol man ya oli wok, taem ol pablisa oli go prij long haos blong olgeta.

12. ?I minim wanem blong mekem “ae blong yu i fas long wan samting nomo”?

¹² Jisas i talem se: “Ae blong man, hem i laet blong bodi blong hem. Nao sipos ae blong yu i fas long wan samting nomo [o “no fasfas,” futnot], bambae ful bodi blong yu i fulap long laet.” (Mat. 6:22) ?Jisas i wantem minim wanem? Hem i wantem minim se yumi no mas mekem laef blong yumi i fasfas, o yumi mas putum tingting blong yumi i stap nomo long wan samting, mo no letem eni samting i pulum tingting blong yumi. Jisas i soem wan gud eksampol taem hem i yusum laef blong hem blong mekem wok blong prij nomo. Mo tu, hem i talem long ol disaepol blong hem blong oli putum tingting blong olgeta i stap strong long wok blong Jehova mo Kingdom blong hem. Yumi folem eksampol blong Jisas taem yumi putum wok blong prij i stap fasples long laef blong yumi, mo yumi “lukaot Kingdom mo stret fasin blong [God] fastaem.”—Mat. 6:33.

13. ?Wanem i save givhan blong yumi putum tingting blong yumi i stap nomo long wok blong prij?

 ¹³ Wan rod blong putum tingting i stap nomo long wok blong prij, hemia blong gat wan laef we i no fasfas, olsem nao bambae yumi gat moa taem blong halpem ol man blong oli save Jehova. * Eksampol, ?yumi save jenisim program blong yumi blong spenem moa taem long wok blong prij long medel wik? ?Yumi save lego sam samting blong spel mo pleplei we oli kakae tumas taem?

14. ?Wan kapol i mekem wanem blong spenem moa taem long wok blong prij?

¹⁴ Hemia samting we Elias we i wan elda, mo waef blong hem oli mekem. Hem i talem se: “Mitufala i no save stat blong mekem wok blong paenia wantaem nomo, be mitufala i save mekem sam smol jenis blong spenem moa taem long wok blong prij. Eksampol, mitufala i traem blong no spenem tumas mane. Mitufala i makem tu se mitufala i mas lego sam samting blong spel mo pleplei we oli kakae tumas taem. Mo, mitufala i askem long ol bos blong mitufala blong oli jenisim program blong mitufala blong wok, blong mitufala i save gat moa taem blong prij. Long rod ya, mitufala i naf blong mekem wok blong prij long ol aftenun, mekem sam Baebol stadi, mo tutaem evri manis, mitufala i save joen long wok blong prij long medel wik. !Hemia i mekem mitufala i harem gud tumas!”

15-16. Folem 1 Timoti 4:13, 15, ?olsem wanem yumi save gohed blong kamgud moa long wok blong prij? (Yu luk bokis ya, “ Ol Mak Blong Halpem Mi Blong Finisim Gud Minista Wok Blong Mi.”)

¹⁵ Wan narafala rod blong finisim gud minista wok blong yumi, hemia blong traem kamgud  moa long fasin blong yumi blong prij. Sam man we oli mekem wan kaen wok, oli mas gohed blong kasem sam trening blong oli save kamgud moa long samting we oli bin lanem. Hemia i sem mak long yumi we yumi stap mekem wok blong prij. Yumi mas gohed blong lanem olsem wanem blong kam gud moa long fasin blong yumi blong prij.—Prov. 1:5, NW; ridim 1 Timoti 4:13, 15.

¹⁶ ?Olsem wanem blong gohed blong kamgud moa long wok blong prij? Hemia taem yumi folem gud ol save we yumi stap kasem long miting blong Kristin Wok Mo Laef. Miting ya i stap givim ol nambawan trening we oli halpem yumi blong kam gud moa long wok blong prij. Taswe, taem brata we i mekem jeaman long taem blong miting i stap givim advaes long ol pablisa we oli gat wan haf, yumi tu yumi save lanem sam gudfala samting we oli save halpem yumi blong kam gud moa long wok blong prij. Olsem nao, yumi save yusum ol save ya taem yumi talemaot gud nius long wan man. Yu save askem help blong brata we i lukaot long wok blong prij, o yu save prij wetem hem o wetem wan narafala pablisa we i gat ekspiriens, olsem wan paenia, o eria elda. Taem yu save gud olsem wanem blong yusum ol tul we oli stap long Ol Tul Blong Tijim Man, bambae yu laekem moa blong mekem wok blong prij mo tij.

17. ?Wanem filing we bambae yu kasem taem yu finisim gud minista wok blong yu?

¹⁷ !I wan blesing we Jehova i letem yumi blong “joen wetem [hem] blong mekem wok” ya! (1 Kor. 3:9) Taem yumi “faenemaot ol samting we oli moa impoten” mo yumi putum tingting blong yumi long wok blong prij nomo, bambae “yumi glad” blong mekem wok blong Jehova. (Fil. 1:10; Sam. 100:2) Mo tu, yu save sua fulwan se God bambae i givim paoa ya we yu nidim blong finisim gud minista wok blong yu, nomata wanem traem o trabol we yu gat. (2 Kor. 4:1, 7; 6:4) Nating se yu save mekem smol o moa long wok blong prij, be yu “save glad” from we yu mekem wok ya wetem fulhat blong yu. (Gal. 6:4) Taem yu finisim gud minista wok blong yu, yu stap soemaot lav we yu gat long Jehova mo long ol man. Mo “sipos yu mekem olsem, bambae yu sevem yu, wetem olgeta we oli lesin long yu.”—1 Tim. 4:16.