1-2. ?From wanem tingting blong Jisas i trabol tumas?

LONG laswan dei blong Jisas long wol ya, tingting blong hem i trabol tumas. I no longtaem bambae hem i safa mo i ded long han blong ol man nogud. Hem i no wari nomo se bambae hem i ded. Be hem i lavem tumas Papa blong hem, mo i wantem mekem hem i glad. Jisas i save se sipos hem i gohed blong holemstrong long hadtaem ya, bambae hem i leftemap nem blong Jehova. Mo tu, Jisas i lavem ol man, mo hem i save se ded blong hem bambae i openem rod blong yumi kasem laef we i no save finis.

² Nating se tingting blong Jisas i trabol tumas, be hem i gat pis. Hem i talem long ol aposol blong hem se: “Mi givim pis blong mi long yufala.” (Jon 14:27) Hem i gat “pis ya blong God” we wan man i save gat, taem hem i frengud wetem Jehova. Pis ya i mekem se tingting mo hat blong Jisas i kwaet.—Fil. 4:6, 7.

3. ?Bambae yumi tokbaot wanem long stadi ya?

³ I tru se bambae yumi neva kasem semfala trabol ya we Jisas i gotru long hem, be ol man we oli folem Jisas bambae oli kasem ol trabol. (Mat. 16:24, 25; Jon 15:20) Mo olsem Jisas, maet samtaem tingting blong yumi i save foldaon. ?Olsem wanem yumi save blokem ol wari we oli save mekem se yumi no moa gat pis long tingting? Bambae yumi tokbaot tri samting we Jisas i mekem long minista wok blong hem long wol ya, mo olsem wanem yumi save folem eksampol blong hem.

4. Folem 1 Tesalonaeka 5:17, talem sam eksampol we oli soemaot se Jisas i prea oltaem bifo we hem i ded.

⁴ Ridim 1 Tesalonaeka 5:17. Long laswan dei blong Jisas long wol, oltaem hem i prea. Taem hem i tijim ol disaepol blong oli tingbaot ded blong hem, mo hem i prea from bred mo waen. (1 Kor. 11:23-25) Bifo we oli aot long ples we oli mekem Lafet Blong Pasova, hem i prea wetem ol disaepol. (Jon 17:1-26) Taem oli kamtru long Hil Blong Ol Oliftri, Jisas i prea bakegen mo bakegen. (Mat. 26:36-39, 42, 44) Mo laswan toktok we Jisas i talem, hem i wan prea. (Luk 23:46) Long taem ya, Jisas i talemaot evri trabol blong hem long Jehova.

5. ?From wanem ol aposol oli fraet mo oli ronwe?

⁵ Jisas i naf blong stanap strong from we hem i prea oltaem long Papa blong hem. Be long naet ya, ol aposol oli no moa gohed blong prea. Taswe taem ol ami oli kam holem Jisas, ol aposol oli fraet mo oli ronwe. (Mat. 26:40, 41, 43, 45, 56) Taem yumi folem eksampol blong Jisas mo yumi “prea oltaem,” bambae yumi naf blong stanap strong taem yumi kasem trabol. ?Yumi save prea from wanem samting?

6. ?Olsem wanem bilif i givhan long yumi blong holemtaet pis?

⁶ Yumi save prea mo askem Jehova blong i “mekem bilif blong [yumi] i kam strong moa.” (Luk 17:5; Jon 14:1) Yumi nidim bilif from we Setan bambae i traem ol man we oli folem Jisas. (Luk 22:31) ?Olsem wanem bilif i save givhan long yumi blong holemtaet pis nating se yumi kasem plante trabol? Taem yumi mekem evri samting we yumi naf blong mekem blong winim wan traem,  bilif bambae i pusum yumi blong lego trabol ya long han blong Jehova. From we yumi trastem se Jehova bambae givhan long yumi, hemia i mekem se yumi gat pis long tingting mo hat blong yumi.—1 Pita 5:6, 7.

7. ?Yu yu lanem wanem long stori blong Robert?

⁷ Prea i givhan long yumi blong gat pis, nomata wanem trabol yumi kasem. Traem tingbaot Robert. Hem i wan elda we i gat samwe long 80 yia. Hem i talem se: “Advaes we i stap long Filipae 4:6, 7 i givhan long mi blong winim ol trabol blong mi. Mi gat problem long saed blong mane. Mo blong smoltaem, mi no moa mekem wok blong elda.” ?Wanem i halpem Robert blong i holemtaet pis? Hem i talem se: “Taem mi stat blong wari, kwiktaem nomo mi prea. Mi mi bilif strong se moa we mi prea, moa we mi gat pis long tingting blong mi.”

8. Folem Jon 8:29, ?wanem i mekem se Jisas i gat pis long tingting?

⁸ Ridim Jon 8:29. Taem ol man oli agensem Jisas, hem i gat pis long tingting from we hem i save se hem i mekem Jehova i glad. Hem i gohed blong obei, nating se samtaem i had. Hem i lavem Jehova mo i mekem wok blong hem long ful laef blong hem. Bifo we hem i kam long wol, hem i “nambawan man blong wok blong [God].” (Prov. 8:30) Mo taem hem i stap long wol, hem i wok strong blong tijim ol man long saed blong Jehova. (Mat. 6:9; Jon 5:17) Wok ya i givim bigfala glad long Jisas.—Jon 4:34-36.

9. ?Olsem wanem wok blong prij i givhan long yumi blong gat pis long tingting?

 ⁹ Yumi save folem eksampol blong Jisas taem yumi obei long Jehova mo yumi mekem moa “long wok blong Masta.” (1 Kor. 15:58) Taem yumi “prij oltaem,” hemia i givhan long yumi blong no tingbaot tumas ol problem blong yumi. (Wok 18:5) Eksampol, ol man we yumi mitim olgeta long wok blong prij, maet oli gat ol problem we oli bigwan moa i bitim blong yumi. Be taem oli lanem blong lavem Jehova mo folem ol advaes blong hem, laef blong olgeta i kam moa gud mo oli glad. Evri taem we yumi luk samting olsem i hapen, tingting blong yumi i kam moa strong se Jehova bambae i lukaot gud long yumi. Mo hemia i halpem yumi blong yumi gohed blong gat pis long tingting. Wan sista we plante taem tingting blong hem i foldaon bigwan mo i stap ting nating long hem wan, i luksave se samting ya i tru. Hem i talem se: “Taem mi bisi long wok blong prij, hemia i givhan blong mi gat stret tingting long saed blong mi wan mo i mekem mi mi glad. From we taem mi prij, mi harem se mi kam klosap moa long Jehova.”

10. ?Yu yu lanem wanem long stori blong Brenda?

¹⁰ Traem tingbaot eksampol blong Brenda. Hem mo gel blong hem oli stap safa from wan rabis sik. Brenda i no save wokbaot, taswe hem i stap long wan wiljea mo hem i nogat tumas paoa. Taem hem i naf, hem i go prij long ol haos wanwan, be plante taem hem raetem ol leta blong prij long ol man. Hem i talem se: “Taem mi kasemsave se sik blong mi bambae i no save kam gud, hemia i mekem se tingting blong mi i stap strong long wok blong prij. Wok ya i givhan long mi blong mi no moa tingbaot ol wari blong mi, be blong mi tingbaot moa blong halpem ol man long teritori. Mo tu, wok blong prij i mekem mi tingbaot hop ya we bambae mi kasem long fiuja.”

11-13. (1) ?Olsem wanem ol aposol mo ol narafala oli soemaot se oli ol trufala fren blong Jisas? (2) ?Olsem wanem ol fren blong Jisas oli mekem hem i harem gud?

¹¹ Long olgeta taem we Jisas i stap prij, ol aposol oli ol trufala fren blong hem. Oli olsem ol trufala fren we Baebol i tokbaot se: “Samfala oli save mekem i gud moa long yu, i winim ol brata blong yu.” (Prov. 18:24) Jisas i tinghae long ol fren olsem. Taem hem i stap mekem wok blong prij, i nogat wan long ol brata blong hem we i bilif long hem. (Jon 7:3-5) Wan taem ol famle blong hem oli ting se hem i lusum hed. (Mak 3:21) Taswe, long naet bifo we Jisas i ded, hem i talem long ol aposol blong hem se: “Yufala ya nao yufala i stap oltaem wetem mi long olgeta trabol blong mi.”—Luk 22:28.

¹² Samtaem ol aposol oli mekem Jisas i harem nogud, be hem i no tingbaot ol mastik blong olgeta. Defren olgeta, hem i luksave we oli bilif long hem. (Mat. 26:40; Mak 10:13, 14; Jon 6:66-69) Long laswan naet bifo we oli kilim Jisas i ded, hem i talem long ol man blong hem se: “Mi singaotem yufala se ol fren, from we mi mi talemaot long yufala evri samting we mi harem long Papa blong mi.” (Jon 15:15) I sua se ol fren blong Jisas oli rili leftemap tingting blong hem. Taem oli halpem Jisas long wok blong prij, hemia i mekem hem i glad bitim mak.—Luk 10:17, 21.

¹³ Jisas i gat sam narafala fren tu, we sam oli man mo woman, we oli halpem hem long wok blong prij mo long plante narafala rod bakegen. Samfala oli tekem hem i kam long haos blong i slip mo i kakae wetem olgeta. (Luk 10:38-42; Jon 12:1, 2) Mo sam narafala oli travel wetem hem mo oli yusum olting blong olgeta blong givhan long hem. (Luk 8:3) Jisas i gat ol gudfala fren we oli wantem halpem hem,  from we oli save se bambae hem i halpem olgeta tu. Hem i mekem plante gudfala samting blong olgeta, mo hem i no tingbaot se oli mas mekem moa long wanem we oli naf blong mekem. Nating se Jisas i stret gud olgeta, be hem i glad nomo se ol fren blong hem oli halpem hem. Mo hemia nao i mekem se hem i gohed blong gat pis long tingting.

14-15. ?Olsem wanem blong gat ol gudfala fren, mo olsem wanem oli save halpem yumi?

¹⁴ Ol gudfala fren oli halpem yumi blong stap tru long Jehova. Mo beswan rod blong gat ol gudfala fren, hemia blong yu stap olsem wan gudfala fren long olgeta. (Mat. 7:12) Eksampol, Baebol i leftemap tingting blong yumi blong yusum taem mo paoa blong yumi blong halpem ol narafala, speseli olgeta we oli “gat nid.” (Efes. 4:28) ?Olsem wanem? ?I gat wan long kongregesen blong yu we yu save halpem hem? ?Yu save go long stoa blong pem ol samting blong wan pablisa we i olfala o i sik? ?Yu yu naf blong givim kakae long wan famle we i sot long mane? Sipos yu yu save olsem wanem blong yusum jw.org^® mo JW Library^® app, ?yu yu halpem ol narafala long kongregesen blong yusum ol samting ya? Moa we yumi yusum taem blong yumi blong halpem ol narafala, moa we bambae yumi kasem glad.—Wok 20:35.

¹⁵ Ol fren blong yumi bambae oli sapotem yumi taem yumi kasem trabol, mo bambae oli halpem yumi blong holemtaet pis long tingting blong yumi. Olsem we Elihu i lesin gud taem Job i stap tokbaot ol trabol blong hem, ol fren blong yumi oli halpem yumi taem oli lesin gud long ol tingting blong  yumi. (Job 32:4) Yumi no mas ting se ol fren blong yumi bambae oli talem samting we yumi mas mekem. Defren olgeta, yumi soemaot se yumi waes taem yumi lesin gud long ol advaes blong olgeta we i stanap long Baebol. (Prov. 15:22) Mo olsem King Deved we i gat tingting daon mo i akseptem help blong ol fren blong hem, yumi no mas kam flas taem wan fren i wantem halpem yumi. (2 Saml. 17:27-29) Ol gudfala fren olsem, oli wan presen we i kam long Jehova.—Jem. 1:17.

16. Folem Filipae 4:6, 7, ?olsem wanem yumi save gat pis? Yu eksplenem.

¹⁶ Ridim Filipae 4:6, 7. ?From wanem Jehova i talem se yumi save kasem pis ya “tru long Kraes Jisas?” From we taem yumi kasem save mo yumi bilif long ol samting we Jisas i mekem blong stamba tingting blong God i kamtru, yumi save gat pis long tingting mo hat blong yumi blong olwe. Eksampol, from ransom sakrefaes blong Jisas, Jehova i fogivim ol sin blong yumi. (1 Jon 2:12) !Taem yumi tingbaot samting ya, hemia i mekem yumi harem gud tumas! Jisas we i King long Kingdom blong God, bambae i finisim olgeta trabol we Setan i mekem mo ol rabis wok blong hem. (Aes. 65:17; 1 Jon 3:8; Rev. 21:3, 4) !Hemia wan samting we yumi wantem tumas blong luk i kamtru long fiuja! Mo nating we Jisas i givim wan bigfala wok long yumi blong mekem, be hem i stap wetem yumi, i stap sapotem yumi long ol lasdei ya. (Mat. 28:19, 20) !Hemia i rili mekem yumi gat strong tingting! Help, hop mo strong tingting, hemia ol impoten samting we yumi nidim blong yumi save gohed blong gat pis.

17. (1) ?Olsem wanem wan Kristin i save gohed blong gat pis long tingting? (2) Folem Jon 16:33, ?bambae yumi naf blong mekem wanem?

¹⁷ ?Be olsem wanem yu save gohed blong gat pis long tingting nating se yu kasem plante traem? Yu save gat pis taem yu folem ol samting we Jisas i mekem. Faswan samting, yu prea, mo yu gohed blong prea nomata wanem samting i hapen. Seken samting, yu obei long Jehova mo yu gohed blong prij nating se samtaem i had. Mo namba tri samting, yu letem ol gudfala fren oli halpem yu taem yu kasem trabol. Nao pis ya blong God bambae i lukaot gud long tingting mo hat blong yu. Mo olsem Jisas, bambae yu naf blong winim eni trabol.—Ridim Jon 16:33.