1. Olsem we Efesas 6:10-13 i eksplenem ?Jehova i mekem wanem blong soem se hem i kea long yumi? Yu eksplenem.

WAN rod we i soem se Jehova i kea long yumi, hemia taem hem i halpem yumi blong stanap strong agensem ol enemi blong yumi, hemia Setan mo ol rabis enjel. Jehova i wonem yumi long saed blong ol enemi ya, mo hem i givim ol samting we yumi nidim blong stanap strong agensem olgeta. (Ridim Efesas 6:10-13.) Taem yumi letem Jehova i halpem yumi mo yumi dipen fulwan long hem, bambae yumi naf blong agensem ol rabis spirit. Olsem aposol Pol, yumi save sua fulwan se: “Sipos God i stap wetem yumi, ?hu bambae i agensem yumi?”—Rom 8:31.

2. ?Bambae yumi tokbaot wanem long stadi ya?

² Olsem ol tru Kristin, yumi no wantem putum tingting blong yumi i stap strong long Setan mo ol rabis spirit. Defren olgeta, yumi wantem putum tingting blong yumi i stap strong long Jehova mo blong mekem wok blong hem. (Sam. 25:5) Be blong mekem olsem, yumi mas save ol samting we Setan i stap mekem. ?From wanem? Blong bambae yumi no letem hem i winim yumi. (2 Kor. 2:11; futnot.) Long stadi ya, bambae yumi tokbaot wan long ol samting we Setan mo ol rabis spirit oli yusum blong trikim ol man. Mo tu, bambae yumi tokbaot olsem wanem yumi save stanap strong agensem olgeta.

3-4. (1) ?Wanem ya wok blong ol rabis spirit? (2) ?Bilif blong ol man long wok blong ol rabis spirit, i bigwan olsem wanem?

³ Wan rod we Setan mo ol rabis enjel oli yusum blong trikim ol man, hemia wok blong ol rabis spirit. Ol man we oli stap wok  wetem ol rabis spirit, oli talem se oli save mekem sam samting we i no posibol blong ol man oli mekem. Eksampol, samfala oli lukluk ol sta blong talemaot fiuja. Sam narafala oli mekem sam samting blong toktok wetem ol dedman. Mo samfala oli mekem majik blong spolem ol narafala man. *

⁴ ?Bilif blong ol man long wok blong ol rabis spirit, i bigwan olsem wanem? Wan stadi we oli mekem long 18 kantri long Latin Amerika mo long ol aelan blong Karabien, i faenemaot se long evri tri man, wan long olgeta i bilif long majik, wok blong kleva, mo klosap evri man oli bilif se i posibol blong yumi toktok wetem ol spirit. Mo tu, oli bin mekem wan stadi long 18 defren kantri long Afrika, mo oli faenemaot se plante man oli bilif long wok blong majik. Taswe, nomata weples yumi laef, yumi mas stap longwe long ol samting we oli joen wetem wok blong ol rabis spirit. Hemia from we Setan i wantem trikim “olgeta man long wol.”—Rev. 12:9.

5. ?Wanem tingting blong Jehova long saed blong wok blong ol rabis spirit?

⁵ Jehova i “God blong trutok.” (Sam. 31:5) Taswe, ?yu ting se hem i harem olsem wanem long wok blong ol rabis spirit? !Hem i no laekem nating! Jehova i talem long ol man Isrel se: “Bambae yufala i no mas bonem ol pikinini blong yufala long olta, olsem we olgeta oli stap mekem blong mekem sakrefaes. Mo yufala i mas lukaot gud blong yufala i no folem fasin blong olgeta blong go luk ol kleva, mo blong makemgud ol smosmol saen we oli luk, mo blong mekem singsing long man, mo blong wokem ol bisnes blong masing mo posen, mo blong singaot long ol devel blong dedman blong oli givhan long olgeta. Ol fasin ya i nogud we i nogud, [Jehova] i no laekem nating ol man we oli stap mekem olsem.” (Dut. 18:10-12) Tede, ol Kristin oli no moa stap aninit long Loa ya we Jehova i givim long ol man Isrel. Nating se i olsem, yumi save se tingting blong hem long saed blong wok blong ol rabis spirit i no jenis.—Mal. 3:6.

6. (1) ?Olsem wanem Setan i yusum wok blong rabis spirit blong spolem ol man? (2) Folem Prija 9:5, ?wanem trutok long saed blong ol dedman?

⁶ Jehova i wonem yumi long saed blong wok blong ol rabis spirit, from we hem i save se Setan i yusum samting ya blong spolem ol man. Mo tu, hem i yusum wok blong ol rabis spirit blong talem ol giaman tok, olsem tijing ya se taem man i ded hem i go laef samples. (Ridim Prija 9:5.) Hem i yusum rod ya tu blong mekem ol man oli fraet mo blong oli stap longwe long Jehova. Mak blong hem, hemia blong pulum ol man we oli stap mekem wok blong majik, posen o kleva blong oli trastem ol rabis spirit be i no Jehova.

7. ?Olsem wanem Jehova i halpem yumi?

⁷ Olsem we yumi bin tokbaot, Jehova i halpem yumi blong save samting we yumi mas mekem, blong Setan mo ol rabis enjel oli no trikim yumi. Naoia bambae yumi tokbaot olsem wanem yumi save faet agensem Setan mo ol rabis enjel.

8. (1) ?Wanem beswan rod blong yumi blokem ol rabis spirit? (2) ?Olsem wanem Ol Sam 146:4 i soemaot klia giaman tok blong Setan long saed blong ded?

⁸ Ridim Tok blong God mo tingting dip long hem. Hemia beswan rod blong yumi blokem ol  giaman tok blong ol rabis spirit. Tok blong God i olsem wan naef we i sap gud, mo i save katemaot ol giaman tok blong Setan. (Efes. 6:17) Eksampol, Baebol i soemaot klia se ol dedman oli no save toktok wetem yumi. (Ridim Ol Sam 146:4.) Mo tu, Baebol i soemaot se Jehova nomo i save talemaot fiuja. (Aes. 45:21; 46:10) Sipos yumi ridim Tok blong God mo yumi tingting dip long hem evri dei, bambae yumi no laekem mo yumi sakemaot ol giaman tok blong Setan we hem i wantem blong yumi bilivim.

9. ?Wanem ol samting we yumi mas stap longwe long olgeta?

⁹ No mekem eni samting we i joen wetem wok blong rabis spirit. Olsem ol tru Kristin, yumi neva wantem mekem eni samting we i joen wetem wok blong ol rabis spirit. Eksampol, yumi no wantem go luk wan kleva o traem eni samting blong toktok wetem ol dedman. Long las stadi, yumi tokbaot se yumi mas stap longwe long ol kastom blong berem dedman, we oli joen wetem bilif ya se ol dedman oli stap laef samples. Mo tu, yumi no traem blong lukluk ol sta blong save fiuja. (Aes. 8:19) Yumi save se ol samting ya oli denja, from we oli wan rod blong toktok long Setan mo ol rabis enjel blong hem.

10-11. (1) ?Sam man Efesas oli mekem wanem taem oli lanem trutok? (2) Folem 1 Korin 10:21, ?from wanem yumi mas folem eksampol blong ol fas Kristin, mo olsem wanem blong mekem?

¹⁰ Sakemaot ol samting we i joen wetem wok blong mekem majik. Long taem blong ol fas Kristin long taon ya Efesas, bighaf blong ol man oli stap wok wetem ol rabis spirit. Be taem oli lanem trutok, oli mekem bigfala jenis. “Plante long olgeta we oli stap mekem majik, oli karem ol buk blong olgeta i kam wanples, nao oli bonem long fes blong olgeta man.” (Wok 19:19) Ol man ya oli tekem strong aksen blong sakemaot ol samting we i joen wetem ol rabis spirit. Praes blong ol buk blong majik ya, i sas we i sas. Nating se i olsem, oli no givimaot o salemaot ol buk ya, be oli bonem.  ?From wanem? From we oli wantem moa blong mekem Jehova i glad, i bitim we oli wari from praes blong ol buk ya.

¹¹ ?Olsem wanem yumi save folem eksampol blong ol Kristin long Efesas? Sipos yumi waes, bambae yumi sakemaot eni samting we i joen wetem wok blong ol rabis spirit. Hemia i save minim tu ol samting olsem, ol jen o ol ston we man i werem o i kipim blong protektem hem from ol rabis spirit.—Ridim 1 Korin 10:21.

12. ?Wanem ol kwestin we yumi mas askem taem yumi wantem spel mo pleplei?

¹² Skelem gud samting we yu jusum blong spel mo pleplei. I gud yu askem yu wan se: ‘?Mi mi stap ridim ol buk, magasin, o ol haf long Intenet we oli tokbaot wok blong ol rabis spirit? ?Olsem wanem long ol miusik we mi stap lesin long olgeta, ol muvi mo ol program long TV we mi stap wajem, o ol video gem we mi stap plei long olgeta? ?Ol samting we mi stap mekem blong spel mo pleplei oli joen wetem wok blong rabis spirit? ?I gat ol samting olsem ol vampaea, ol sombi, o ol gos? ?Oli givim tingting se majik mo fasin blong singaot trabol i kam long man i oraet nomo?’ I tru se i no evri stori we yumi ridim o wajem we oli joen wetem wok blong rabis spirit. Taswe, yu mas skelem gud ol samting we yu jusum blong spel mo pleplei, blong yu stap longwe long eni samting we Jehova i no laekem nating. Yumi wantem traehad oltaem blong ‘mekem tingting blong yumi i stap klin’ long fored blong Jehova God.—Wok 24:16. *

13. ?Yumi mas lukaot blong no talem ol wanem kaen stori?

¹³ No talem ol stori long saed blong ol devel. Yumi wantem folem eksampol blong Jisas.  (1 Pita 2:21) Bifo we hem i kamdaon long wol, hem i laef long heven mo hem i save plante samting long saed blong Setan mo ol rabis enjel. Nating se i olsem, Jisas i no stap tokbaot ol stori we oli leftemap wok blong ol rabis spirit. Hem i wantem tijim ol man long saed blong Jehova, be i no Setan. Yumi save folem eksampol blong Jisas taem yumi no tokbaot ol stori long saed blong ol rabis spirit o devel. Defren olgeta, yumi wantem soemaot long ol toktok blong yumi se “tingting blong [yumi] i fulap long ol gudgudfala tok,” we i minim, trutok.—Sam. 45:1.

14-15. (1) ?From wanem yumi no nid blong fraet long ol rabis spirit? (2) ?Wanem i pruvum se Jehova i stap protektem ol man blong hem tede?

¹⁴ Yu no mas fraet long ol rabis spirit. Long rabis wol ya, plante nogud samting oli save hapen long yumi. I gat ol aksiden, ol defren kaen sik, o ded i save kamtru we yumi no tingbaot nating. Be yumi no mas ting se ol rabis spirit nao oli stamba blong ol samting ya. Baebol i talem se ol ‘samting we yumi no tingbaot oli save kasem yumi enitaem nomo.’ (Pri. 9:11, NW) Nating se i olsem, Jehova i soemaot se hem i gat moa paoa i bitim ol rabis enjel. Eksampol, God i no letem Setan i kilim Job. (Job 2:6) Long taem blong Moses, Jehova i soemaot se hem i gat moa paoa i bitim ol kleva blong King Fero. (Eks. 8:18; 9:11) Biaen, Jehova i givim bigfala paoa long Jisas antap long heven, blong i sakemaot Setan wetem ol rabis enjel oli kamdaon long wol. Mo long fiuja, Jisas bambae i sakem olgeta i go long wan bigfala hol, blong oli no spolem eni man.—Rev. 12:9; 20:2, 3.

¹⁵ Tede i gat plante pruf we oli soemaot se Jehova i stap protektem ol man blong hem. Traem tingbaot: Yumi stap prij mo tijim trutok long olgeta ples long wol. (Mat. 28:19, 20) Long rod ya, yumi stap soemaot klia ol rabis wok blong Setan. Ating sipos Setan i gat bigfala paoa, bambae hem i stopem olgeta wok ya we yumi stap mekem. Be sori tumas, hem i no naf blong mekem samting ya. Taswe, yumi no nid blong fraet long ol rabis spirit. Yumi save se “[Jehova] i stap luklukgud long olgeta samting long wol ya, blong i save givim paoa long ol man we oli ona long hem long olgeta tingting blong olgeta.” (2 Kron. 16:9) Sipos yumi gohed blong holemstrong long Jehova, bambae  Setan mo ol rabis enjel oli no save spolem yumi.

16-17. Talem wan stori we i soemaot strong tingting blong agensem ol rabis spirit.

¹⁶ Yumi nidim strong tingting blong stanap strong agensem ol rabis spirit, antap moa taem ol fren o famle oli agensem yumi. From we Jehova bambae i blesem olgeta we oli stanap strong. Traem tingbaot Erika we i laef long Ghana. Taem hem i gat 21 yia, hem i stat blong stadi Baebol. From we hem i gel blong wan pris we i stap mekem majik, ol famle oli ting se hem i mas folem kastom ya we i joen wetem wok blong ol rabis spirit, mo hem i mas kakae mit we oli yusum blong mekem sakrefaes i go long ol god blong papa blong hem. Taem Erika i no wantem folem kastom ya, famle blong hem i talem se hem tok nogud long ol god, mo se bambae ol god oli panisim olgeta wetem ol strong sik.

¹⁷ Famle blong Erika i fosem hem blong folem kastom ya, be hem i stanap strong nating se hem i mas aot long haos. Sam Witnes oli letem hem i stap wetem olgeta. Long rod ya, Jehova i blesem Erika wetem wan niufala famle, hem i gat ol brata mo sista we oli gat sem bilif olsem hem. (Mak 10:29, 30) Nating se ol stret famle blong hem oli no moa wantem joen wetem hem mo oli bonem ol samting blong hem, be Erika i holem strong long Jehova, i tekem baptaes, mo naoia hem i wan fultaem paenia. Hem i no fraet nating long ol rabis spirit. Erika i talem se: “Evri dei mi prea se bambae famle blong mi i luksave blesing ya blong save Jehova mo blong kasem trufala fasin fri, taem oli mekem wok blong God ya we i lavem yumi.”

18. ?Yumi kasem wanem blesing taem yumi trastem Jehova?

¹⁸ I tru, ol samting we bambae oli traem bilif blong yumi oli no sem mak. Nating se i olsem, yumi evriwan i nidim blong trastem Jehova mo stanap strong agensem ol rabis spirit. Sipos yumi mekem olsem, bambae yumi kasem blesing, mo bambae yumi no letem Setan i trikim yumi. Mo tu, bambae yumi no fraet bitim mak long ol rabis spirit. Antap moa, fasin fren blong yumi wetem Jehova bambae i kam strong moa. Disaepol Jemes i raetem se: “Yufala i mas putum yufala i stap aninit long God, . . . yufala i mas agensem Setan, mo hem bambae i ronwe long yufala. Yufala i mas kam klosap long God, nao hem bambae i kam klosap long yufala.”—Jem. 4:7, 8.