1-2. ?I posibol blong yumi folem ol trak blong leg blong Jisas? Talem wan eksampol.

TINGBAOT se yu wetem wan grup blong ol fren, yufala i stap wokbaot long sanbij long naet, long wan ples we yufala i neva go long hem. Be wan man we i savegud ples ya, i stap lidim yufala. Mo hem i stap wokbaot long fored i go. !Nao wantaem nomo, yufala i no moa luk hem, from ples i tudak tumas mo hem i go fastaem finis! Be yufala i no wari from se yufala i luk ol trak blong leg blong hem long sanbij, !ale yufala i folemgud ol trak ya!

² Yumi ol tru Kristin, yumi tu yumi stap wokbaot long wan wol we i tudak. Be yumi laki, from we Jehova i givim Pikinini blong hem blong halpem yumi. Jisas Kraes i wan gaed we i stap wokbaot fored blong lidim yumi, mo yumi stap folemgud ol trak blong leg blong hem. (1 Pita 2:21) ?Ol trak blong leg blong hem oli wanem? ?From wanem mo olsem wanem blong folemgud ol trak ya?

3. ?I minim wanem blong folem ol trak blong leg blong wan man?

³ ?I minim wanem blong folem ol trak blong leg blong wan man? Samtaem Baebol i yusum tok ya “wokbaot” mo “leg” blong minim fasin blong laef blong wan man. (Jen. 6:9; Prov. 4:26) So eksampol we wan man i soemaot, hem i olsem ol trak blong leg blong hem long sanbij. Taswe, taem yumi folem ol trak blong leg blong wan man, hemia i min se yumi folem eksampol blong hem.

4. ?I minim wanem blong folem ol trak blong leg blong Jisas?

⁴ ?Taswe, blong folem ol trak blong leg blong Jisas i  minim wanem? Hem i jes minim se yumi folem eksampol blong hem. Long stamba vas blong stadi ya, Pita i stap tokbaot gudfala eksampol blong Jisas blong stanap strong. Be yumi save folem fasin blong Jisas long plante narafala samting tu. (1 Pita 2:18-25) Long evri samting we Jisas i talem mo mekem, yumi save folem.

5. Eksplenem olsem wanem yumi ol sinman yumi save folem eksampol blong Jisas.

⁵ ?Be yumi ol sinman, yumi naf blong folem eksampol blong Jisas? Yes, yumi naf. Pita i talem se yumi mas “folemgud trak blong leg blong [Jisas],” be hem i no talem se yumi mas folem long fasin we i stretgud olgeta. Sipos yumi traem bes blong yumi blong folemgud ol trak blong leg blong Jisas, yumi stap obei long ol tok blong Jon, we i se: “Gohed blong mekem sem samting olsem we Jisas i mekem.”—1 Jon 2:6.

6-7. ?From wanem yumi kam klosap long Jehova taem yumi folem ol trak blong leg blong Jisas?

⁶ Hemia i mekem yumi kam klosap moa long Jehova. ?From wanem yumi talem olsem? Faswan risen se, fasin blong laef blong Jisas i mekem God i glad, mo hemia wan nambawan eksampol long yumi. (Jon 8:29) So sipos yumi folem ol trak blong leg blong Jisas, Jehova bambae i glad long yumi. Mo yumi sua se Papa blong yumi long heven bambae i kam klosap long olgeta ya we oli traehad blong kam fren blong hem.—Jem. 4:8.

⁷ Seken risen se, Jisas i folemgud fasin blong Papa blong hem. Taswe hem i save talem se: “Man we i luk mi, hem i luk Papa tu.” (Jon 14:9) Jisas i gat ol gudfala fasin, olsem i sore long man we i gat leprosi, i kasemsave long filing blong wan woman we i sik bigwan, mo i sore  long ol man we oli lusum wan famle. Sipos yumi folem ol gudfala fasin ya, yumi stap folem fasin blong Jehova tu. (Mak 1:40, 41; 5:25-34; Jon 11:33-35) Moa we yumi folem fasin blong Jehova, moa we yumi kam klosap long hem.

8. Sipos yumi folem ol trak blong leg blong Jisas, ?hemia bambae i givhan long yumi olsem wanem?

⁸ Hemia i halpem yumi blong no letem rabis wol ya i pulum yumi. Long laswan naet blong Jisas long wol, hem i talem se: “Mi mi winim wol ya finis.” (Jon 16:33) Hem i stap minim se hem i no wantem letem ol tingting blong wol, ol mak blong wol, mo ol aksen blong wol, oli pulum hem. Jisas i kam long wol from wan risen nomo, hemia blong leftemap nem blong Jehova. Mo hem i no letem wan samting i pulum hem i gowe long wok ya. ?Be olsem wanem long yumi? I gat plante samting long wol ya we i save pulum tingting blong yumi. Be sipos yumi fokas nomo long wil blong Jehova, yumi tu yumi save “winim” wol ya.—1 Jon 5:5.

9. ?Yumi mas mekem wanem blong kasem laef we i no save finis?

⁹ Hemia i lidim yumi i go long laef we i no save finis. Wan yang man we i rij, i askem se hem i mas mekem wanem blong i kasem laef we i no save finis. Ale Jisas i se: “Yu kam, yu biaen long mi.” (Mat. 19:16-21) Sam man Jiu oli no bilif se Jisas i Kraes, ale Jisas i talem long olgeta se: “Ol sipsip blong mi . . . oli folem mi. Mi mi givim laef we i no save finis long olgeta.” (Jon 10:24-29) Mo Jisas i talem long Nikodimas se olgeta we oli “soemaot se oli bilif long hem,” bambae “oli kasem laef we i no save finis.” (Jon 3:16) Taswe, yumi soemaot se yumi bilif long Jisas taem yumi folem ol tijing mo eksampol blong hem. Sipos yumi mekem olsem, bambae yumi stap long rod blong kasem laef we i no save finis.—Mat. 7:14.

10. ?Yumi mas mekem wanem blong “kasemsave” long Jisas? (Jon 17:3)

¹⁰ Bifo we yumi folemgud ol trak blong leg blong Jisas, yumi mas “gohed blong kasemsave” long hem. (Ridim Jon 17:3, futnot.) Yumi mas gohed blong lanem ol gudfala fasin, ol tingting, mo ol rul blong hem, blong kasemsave gud long hem. Hemia i min se nating we yumi stap longtaem long trutok, be yumi mas gohed yet blong “kasemsave long” Jehova mo Pikinini blong hem.

11. ?Wanem i stap long ol fofala Gospel?

¹¹ Jehova i putum ol fofala Gospel long Baebol, blong halpem yumi blong kasemsave long Pikinini blong hem. Long ol Gospel ya, i gat stori blong laef mo minista  wok blong Jisas. Ol stori ya oli soemaot ol samting we Jisas i talem mo mekem, mo ol filing blong hem. Ol fofala buk ya oli halpem yumi blong “tingting gud” long eksampol blong Jisas. (Hib. 12:3) I olsem se ol trak blong leg blong Jisas oli stap insaed long ol buk ya. Taswe taem yumi stadi long ol Gospel, i olsem we yumi stap kasemsave moa long Jisas. Nao yumi save folemgud ol trak blong leg blong hem.

12. ?Yumi mas mekem wanem blong ol Gospel oli halpem yumi?

¹² Blong ol Gospel ya oli halpem yumi, i no naf blong ridim nomo, be yumi mas tekem taem tu blong stadigud mo tingting dip long olgeta. (Skelem Josua 1:8, futnot.) Naoia bambae yumi tokbaot tu rod we i save halpem yumi blong tingting dip mo folem ol lesen we yumi lanem long ol Gospel.

13. ?Yu save mekem wanem blong stori blong Gospel i kam laef?

¹³ Fastaem, mekem stori blong Gospel i kam laef. Yusum ae blong tingting blong yu blong luk, harem, mo filim samting we i stap hapen. Blong mekem olsem, yu mekem risej long ol buk we oganaesesen blong Jehova i givim. Mo yu jekem konteks blong stori ya. Lukaotem moa infomesen we i eksplenem bakgraon blong stori ya. Yu jekem sem stori ya long narafala Gospel, from we samtaem wan Gospel i tokbaot wan impoten save we wan nara Gospel i no tokbaot.

14-15. ?Olsem wanem yumi save mekem stori blong Gospel ya i wok long laef blong yumi?

¹⁴ Biaen, mekem stori ya i wok long laef blong yu. (Jon 13:17) Afta we yu stadigud long wan stori, askem yu wan se: ‘?I gat wan lesen long stori ya we mi save folem? ?Olsem wanem mi save yusum stori ya blong givhan long narafala?’ Traem tingbaot wan man we yu wantem tumas blong givhan long hem, nao long stret taem blong hem, yu tokbaot lesen we yu lanem.

 ¹⁵ Naoia bambae yumi luk olsem wanem blong folem tufala rod ya. Bambae yumi luk stori blong pua wido we Jisas i luk long tempol.

16. Diskraebem samting we Mak 12:41 i tokbaot.

¹⁶ Mekem stori ya i kam laef. (Ridim Mak 12:41.) Pijarem samting we i hapen ya. Hemia 11 Nisan, long yia 33 K.T., sam dei bifo we Jisas i ded. Jisas i stap tij long tempol, be ol lida blong skul oli agensem hem. Sam long olgeta oli kwestinim otoriti blong hem. Sam narafala oli askem ol strong kwestin long hem, blong traem trikim hem. (Mak 11:27-33; 12:13-34) Nao Jisas i aot long ples ya, i go long wan nara ples long tempol. Ating hem i stap long wan ples we oli kolem Yad Blong Ol Woman, mo long ples ya, hem i save luk ol bokis blong presen mane. Hem i sidaon mo i stap wajem ol man we oli kam putum kontribusen blong olgeta long ol bokis ya. Hem i luk ol rijman oli kam putum plante mane. Maet hem i save harem noes blong ol koin ya tu we oli folfoldaon i godaon.

17. ?Pua wido ya we Mak 12:42 i tokbaot i mekem wanem?

¹⁷ Ridim Mak 12:42. Smoltaem afta, Jisas i luk “wan wido woman we i pua.” (Luk 21:2) Laef blong hem i had, i klia se i no isi blong hem i kasem ol samting we hem i nidim. Be nating se i olsem, woman ya i go long wan long ol bokis ya, mo i putum tu smol koin insaed, maet tufala koin ya i no mekem noes taem li foldaon i godaon. Be Jisas i save se hem i putum tu lepta, hemia tu smol koin we i smol moa long ol narafala koin long taem ya. Mane ya i no naf nating blong pem wan smol pijin we ol man oli stap salem we i jip nomo.

18. Folem Mak 12:43, 44, ?Jisas i talem wanem from kontribusen blong wido ya?

¹⁸ Ridim Mak 12:43, 44. Jisas i sapraes bigwan long wido ya. Ale hem i singaot ol disaepol blong hem oli kam, mo i talem blong oli luk wido ya, i se: “Samting we wido ya i givim, i moa long ol mane we ol narafala ya oli putum.” Biaen hem i eksplenem se: “Olgeta ya [hemia ol rijman] oli stap putum mane blong olgeta we i stap nating nomo, be wido ya i tekem evri mane blong hem we hem i nidim, mo i kam putum.” Yes, taem wido woman ya i kam givim ol laswan mane blong hem long dei ya, hem i stap putum laef blong hem long han blong Jehova.—Sam 26:3.

19. ?Wanem impoten lesen we yumi save lanem long ol tok blong Jisas?

¹⁹ Mekem stori ya i wok long laef blong yu. Askem yu wan se: ‘?Wanem lesen mi save lanem long ol tok ya blong Jisas?’ Tingbaot wido ya. I sua se hem i wantem givim plante moa samting long Jehova. Be hem i mekem samting we hem i naf blong mekem, hem i givim bes blong hem long Jehova. Mo Jisas i save se kontribusen blong hem i sas long ae blong Papa blong hem. Taswe, impoten lesen blong yumi, hemia se Jehova i glad taem yumi givim bes blong yumi long wok blong hem, hemia taem yumi wok wetem ful laef mo fulhat blong yumi. (Mat. 22:37; Kol. 3:23) !Jehova i glad taem yumi mekem evri samting we yumi naf blong mekem! Hemia i minim taem mo paoa tu we yumi yusum blong wosipim hem long wok blong prij mo long ol miting.

20. ?Yu save mekem lesen we yu lanem long stori blong wido i wok olsem wanem? Talem wan eksampol.

 ²⁰ ?Olsem wanem yu save mekem lesen ya i wok long laef blong yu? Traem tingbaot sam man we maet oli nidim blong save se Jehova i glad long traehad blong olgeta. Eksampol, ?yu yu save wan olfala sista we i stap harem nogud, from we hem i stap siksik o i no moa strong blong prij plante olsem bifo? ?O yu tingbaot wan brata we tingting blong hem i foldaon, from we hem i stap siksik nao i no moa save go long evri miting? I gud yu givhan long ol brata sista olsem taem yu talem ol tok “we i save mekem ol man oli kam strong moa.” (Efes. 4:29) Yu tokbaot ol gudfala lesen we yumi lanem long stori blong pua wido ya. Ol gudfala toktok blong yu, oli bambae mekem oli save se Jehova i glad taem yumi givim bes blong yumi long hem. (Prov. 15:23; 1 Tes. 5:11) Taem yu talem gudfala toktok long ol narafala from we oli givim bes blong olgeta long Jehova, nomata se i smol o i bigwan, yu stap folemgud ol trak blong leg blong Jisas.

21. ?Yu gat strong tingting blong mekem wanem?

²¹ Long stori blong ol Gospel, i gat plante save long laef blong Jisas. !Hemia i mekem yumi glad tumas, from we yumi save folemgud trak blong leg blong hem! I gud yumi stadi long ol Gospel long pesnel stadi blong yumi o long Famle Wosip. I gud yumi tingbaot se blong stadi olsem i givhan long yumi, yumi mas mekem ol stori ya oli kam laef, mo yumi mekem i wok long laef blong yumi. I tru se yumi folem samting we Jisas i mekem, be tu yumi mas lesin long ol samting we hem i talem. Long nekis stadi, bambae yumi tokbaot lesen we yumi save lanem long ol laswan tok blong Jisas long wol ya.