?Bifo we Jisas i ded, from wanem hem i talem ol tok blong Deved we i stap long Ol Sam 22:1?

▪ Wan long ol las toktok we Jisas i talem bifo we hem i ded, hemia toktok we i stap long Matiu 27:46, we i se: “God blong mi, God blong mi, ?from wanem yu lego mi?” Taem Jisas i talem tok ya, hem i mekem tok we Deved i talem long Ol Sam 22:1 i kamtru. (Mak 15:34) Yumi rong sipos yumi ting se Jisas i talem ol tok ya from we hem i no glad, o from we hem i no bilif long smoltaem ya. Jisas i kasemsave fulwan risen from wanem hem i mas ded, mo hem i rere blong ded. (Mat. 16:21; 20:28) Hem i save tu se long taem blong ded blong hem, Jehova bambae i tekemaot “fenis” we i “protektem hem.” (Job 1:10) Olsemia Jehova i letem Jisas i pruvum fulwan se hem i save holemstrong long Jehova, nomata se hem i safa bigwan.—Mak 14:35, 36.

?So from wanem Jisas i talem ol tok ya blong Sam? Nating se yumi no sua fulwan, i gud yumi tingbaot sam risen. *

?Jisas i stap makem se Jehova bambae i blokem hem blong i no ded? Jisas i no nidim we Jehova i halpem hem blong pem ransom ya. Hem i man nomo, mo hem i mas “ded long bihaf blong evri man.”—Hib. 2:9.

?Jisas i stap pulum tingting blong ol man i go long ful japta blong Sam ya? Long taem blong ol man Jiu, ol man oli stap lanem baehat ol tok blong ol Sam. Taem oli  harem wan vas blong wan Sam, kwiktaem oli tingbaot ol toktok blong ful vas long Sam ya. Sipos hemia nao samting we Jisas i stap tingbaot, i sua se hem i wantem givhan long ol man blong hem blong oli tingbaot plante profet tok long saed blong ded blong hem, we oli stap long Sam ya. (Sam 22:7, 8, 15, 16, 18, 24) Mo tu, long en blong Sam ya, hem i tokbaot se rul blong Jehova bambae i kasem olgeta ples long wol.—Sam 22:27-31.

?Jisas i talem tok ya blong soemaot se hem i no mekem wan rong? Bifo we hem i ded, oli jajem hem se hem i tok nogud long God. (Mat. 26:65, 66) Oli jajem hem kwiktaem long naet, mo samting we oli mekem i no laenap wetem ol loa blong kot. (Mat. 26:59; Mak 14:56-59) Taem Jisas i askem kwestin ya, maet hem i wantem soemaot se oli kilim hem blong nating nomo.

Taem Jisas i talem tok ya blong Deved, ?hem i wantem soem se Deved tu i safa, be Jehova i gohed blong lavem hem? Kwestin blong Deved i no soem se hem i no bilif long God. Afta we i askem kwestin ya, hem i gohed blong trastem se Jehova bambae i sevem hem, mo Jehova i gohed blong blesem hem. (Sam 22:23, 24, 27) Sem mak, nating se Jisas, “Pikinini ya blong Deved,” i safa long pos, hemia i no min se Jehova i no moa lavem hem.—Mat. 21:9.

?Jisas i talem tok ya blong soem se hem i harem nogud from Jehova i tekemaot proteksen blong Hem? Long stat, Jehova i no gat tingting ya blong Pikinini blong hem i safa mo ded. Tingting ya i kamaot nomo afta we faswan man i rebel. Jisas i no mekem wan samting we i rong, be hem i mas safa mo ded, blong ansarem ol kwestin we Setan i stanemap, mo blong givim ransom blong pembak samting we man i lusum. (Mak 8:31; 1 Pita 2:21-24) Samting ya i save hapen nomo sipos Jehova i tekemaot proteksen blong hem blong smoltaem. Hemia faswan taem long laef blong Jisas we Jehova i mekem olsem.

?Jisas i wantem halpem ol man blong hem blong oli tingbaot risen from wanem Jehova i letem hem i ded long fasin ya? * Jisas i save se taem hem i ded olsem wan kriminol long pos, samting ya bambae i mekem plante man oli stambol. (1 Kor. 1:23) Taswe sipos ol man blong hem oli tingbaot stret risen blong ded blong hem, bambae oli kasemsave trufala mining blong hem. (Gal. 3:13, 14) Nao bambae oli tingbaot hem olsem wan Sevia, be i no wan kriminol.

Nomata wanem risen we Jisas i talem ol tok ya, hem i kasemsave se ekspiriens we hem i gotru long hem, i wan rod blong mekem wil blong Jehova. Sot taem afta we hem i talem ol tok ya blong Sam, Jisas i talem se: “!Olgeta samting i finis nao!” (Jon 19:30; Luk 22:37) Yes, smoltaem ya we Jehova i tekemaot proteksen blong hem, hemia i letem Jisas blong i mekem evri samting we God i sanem hem long wol blong mekem. Mo tu, hemia i givim janis long hem blong mekem evri samting “long Loa blong Moses, mo long Ol Profet, mo long Ol Sam,” oli kamtru.—Luk 24:44.