STADI 19
Bilif Strong Moa Long Promes Blong Jehova Long Saed Blong Niufala Wol
“Taem [Jehova] i talem wan samting, ?yu ting se hem i no save mekem samting ya?”—NAM. 23:19.
SINGSING 142 Holem Strong Long Ol Promes Blong God
BIGFALA TINGTING a
1-2. ?Yumi mas mekem wanem taem yumi stap wet blong niufala wol i kamtru?
YUMI tinghae long promes ya blong Jehova blong jenisim sistem blong wol ya, i kam wan niufala wol we i fulap long stret fasin. (2 Pita 3:13) Nating se yumi no save stret taem we niufala wol ya bambae i kamtru, be ol samting we oli stap hapen, oli soemaot se bambae yumi no wet longtaem.—Mat. 24:32-34, 36; Wok 1:7.
2 Nomata hamas yia yumi stap long trutok, yumi evriwan i mas mekem bilif blong yumi long promes ya i kam strong moa. ?From wanem? Nating se bilif blong yumi i strong, be i save kam slak. Aposol Pol i talem se, man we bilif blong hem i slak ‘sin ya tu i save blokem hem isi nomo.’ (Hib. 12:1) Taswe blong mekem se bilif blong yumi i no kam slak, yumi mas gohed oltaem blong stadi long ol samting we i pruvum se niufala wol bambae i kamtru i no longtaem.—Hib. 11:1.
3. ?Bambae yumi tokbaot wanem long stadi ya?
3 Long stadi ya, bambae yumi tokbaot tri samting, we yumi save mekem blong bilif strong moa long promes blong Jehova long saed blong niufala wol: (1) Taem yumi tingting dip long ransom, (2) taem yumi tingbaot paoa blong Jehova, mo (3) taem yumi mekem ol samting we i pulum yumi blong kam klosap long Jehova. Biaen, bambae yumi tokbaot olsem wanem tok we Jehova i talem long Habakuk i save mekem bilif blong yumi i strong tede. Be fastaem, bambae yumi tokbaot sam situesen we maet yumi fesem tede, we yumi nidim blong gat strong bilif long promes ya blong niufala wol.
OL SITUESEN WE I NIDIM STRONG BILIF
4. ?Yumi nidim strong bilif blong mekem wanem desisen?
4 Evri dei, yumi nidim strong bilif blong mekem ol desisen. Eksampol, yumi mekem ol desisen long saed blong ol fren, ol samting we yumi mekem blong spel mo pleplei, edukesen, mared, pikinini, mo wok. Taswe, i gud yumi askem se: ‘?Ol desisen blong mi oli soemaot se mi mi bilif se i no longtaem, God bambae i jenisim rabis wol ya i kam wan niufala wol? ?O mi mi mekem ol desisen folem tingting blong ol man we oli bilif se ded i en blong evri samting?’ (Mat. 6:19, 20; Luk 12:16-21) Sipos yumi bilif strong se niufala wol i klosap tumas, bambae yumi mekem ol waes desisen.
5-6. ?From wanem yumi nidim strong bilif taem yumi fesem wan trabol? Talem wan pijatok.
5 Yumi stap fesem ol trabol tu we i nidim strong bilif. Maet ol man oli agensem yumi, o yumi kasem wan strong sik o ol narafala samting we i mekem tingting blong yumi i foldaon. Long stat, maet yumi harem se yumi naf blong stanap strong long ol trabol ya. Be sipos ol trabol ya oli gohed olsem blong longtaem, yumi nidim strong bilif blong yumi save stanap strong, mo gohed blong mekem wok blong Jehova we yumi glad.—Rom 12:12; 1 Pita 1:6, 7.
6 Taem yumi fesem wan problem, maet yumi save harem olsem se promes blong Jehova long saed blong niufala wol bambae i neva kamtru. ?Be, hemia i min se bilif blong yumi i slak? Nogat. Traem tingbaot wan eksampol. Sipos i gat ren blong plante wik, maet yu save ting se bambae i no gat san. Be biaen san i kamaot. Long sem fasin, taem yumi harem nogud tumas, maet yumi save gat tingting ya se, niufala wol bambae i neva kamtru. Be sipos bilif blong yumi i strong, yumi save se ol promes blong hem bambae oli kamtru. (Sam 94:3, 14, 15; Hib. 6:17-19) Strong bilif olsem, i mekem se yumi save gohed blong putum wosip blong Jehova fasples long laef blong yumi.
7. ?Yumi mas blokem wanem kaen tingting?
7 Yumi nidim strong bilif tu blong yumi save prij. Plante man we yumi prij long olgeta, oli harem se “gud nius” long saed blong niufala wol we yumi stap talemaot, i no tru. (Mat. 24:14; Esik. 33:32) Yumi mas lukaotgud se yumi nogat tu tingting long ol samting we Jehova i tijim yumi long hem. Blong blokem samting ya, yumi mas gohed blong mekem bilif blong yumi i strong. Naoia, bambae yumi tokbaot tri samting we yumi save mekem.
TINGTING DIP LONG RANSOM
8-9. Taem yumi tingting long ransom, ?olsem wanem hemia i mekem bilif blong yumi strong?
8 Wan rod blong mekem bilif blong yumi i strong hemia blong tingting dip long ransom. Ransom i olsem wan garanti se ol promes blong God bambae oli kamtru. Taem yumi tingbaot from wanem Jehova i givim ransom, mo samting we Jehova i lego, yumi save bilif strong se promes ya blong Jehova blong man i laef olwe long wan gudfala wol bambae i kamtru. ?From wanem yumi talem olsem?
9 ?Wanem i mekem se ransom i spesel? Jehova i sanem fasbon Boe blong hem we hem i lavem tumas, i kamdaon long wol, mo i bon olsem wan man we i stret gud olgeta. Taem Jisas i stap long wol, hem i stanap strong long plante defren hadtaem. Biaen hem i safa mo i ded long wan fasin we i nogud olgeta. !Jehova i givim wan praes we i hae tumas! God blong yumi we i lavem yumi, bambae i neva letem Boe blong hem i safa mo i ded jes blong yumi gat wan gudfala laef blong sot taem nomo. (Jon 3:16; 1 Pita 1:18, 19) From we Jehova i givim Boe blong hem we hem i lavem tumas blong i halpem yumi, bambae hem i meksua se yumi kasem laef blong olwe long niufala wol.
TINGBAOT PAOA BLONG JEHOVA
10. Folem Efesas 3:20, ?Jehova i naf blong mekem wanem?
10 Seken rod blong mekem bilif blong yumi i strong, hemia blong tingbaot paoa blong Jehova. Hem i gat paoa blong mekem evri promes blong hem oli kamtru. I tru, promes ya blong Jehova blong mekem man i laef olwe long wan niufala wol, maet long yumi, yumi luk olsem se i no posibol. Be Jehova i mekem ol promes we man i no save mekem i kamtru, mo hem i save mekem i kamtru from we hem i God Ya We i Gat Olgeta Paoa. (Job 42:2; Mak 10:27) Taswe, yumi no mas sapraes taem hem i mekem ol nambawan promes long yumi.—Ridim Efesas 3:20.
11. Talem wan eksampol blong ol promes blong God we i luk olsem se i no posibol blong i kamtru. (Yu luk bokis ya “ Sam Nambawan Promes We Oli Bin Kamtru.”)
11 Traem tingbaot sam long ol promes we Jehova i talem long ol man blong hem we i luk olsem se i no posibol blong i kamtru. Hem i talem long Ebraham mo Sera se bambae tufala i gat wan boe taem tufala i olfala. (Jen. 17:15-17) Mo tu, hem i talem long Ebraham se bambae hem i givim kantri ya Kenan, long ol pikinini we bambae oli kamaot biaen long hem. Long olgeta yia ya we ol pikinini blong Ebraham, hemia ol man Isrel, oli slef long Ijip, i luk olsem se promes ya blong Jehova bambae i neva kamtru. Be i no olsem. Biaen, Jehova i talemaot long olfala Elisabet se bambae hem i bonem wan pikinini. Mo tu hem i talem long Meri, wan yang gel we i no save man yet, se bambae hem i bonem wan boe. Hemia bambae i mekem promes ya we Jehova i talemaot plante taosen yia bifo long garen blong Iden i kamtru.—Jen. 3:15.
12. ?Josua 23:14 mo Aesea 55:10, 11 i mekem yumi sua long wanem?
12 Taem yumi tingbaot ol promes we Jehova i mekem, mo olsem wanem hem i mekem oli kamtru, bambae yumi bilif strong se hem i gat paoa blong mekem promes ya blong niufala wol i kamtru. (Ridim Josua 23:14; Aesea 55:10, 11.) Mo hemia bambae i givhan long yumi blong rere gud mo halpem ol narafala blong olgeta tu oli bilif se promes ya blong niufala wol, i no wan drim o wan kastom stori. Jehova hem wan i mekem promes ya long saed blong niufala heven mo niufala wol, mo hem i talem se: “Ol tok ya . . . oli tru mo ol man oli save trastem.”—Rev. 21:1, 5.
MEKEM OL SAMTING WE I PULUM YU BLONG KAM KLOSAP LONG JEHOVA
OL MITING
?Olsem wanem hemia i mekem bilif blong yu i strong? (Haf 13)
13. ?Olsem wanem ol miting oli mekem bilif blong yumi i strong? Yu eksplenem.
13 Nambatri rod we i save mekem bilif blong yumi i strong, hemia taem yumi spenem taem blong mekem ol wok long saed blong spirit. Eksampol, tingbaot gudfala frut we i kamaot taem yumi joen long ol kristin miting. Anna, b we i spenem plante yia blong mekem wok blong Jehova fultaem, i talem se: “Ol miting oli halpem mi blong mekem bilif blong mi i strong. Nating sipos brata we i givim tok i no wan gudfala tija, o i no talem wan niufala save, be oltaem bambae mi harem wan samting we i halpem mi blong kasemsave gud long wan trutok blong Baebol, mo hemia i mekem bilif blong mi i strong.” Mo tu, bilif blong yumi i save kam strong taem yumi lesin long ol ansa blong ol brata mo sista long ol miting.—Rom 1:11, 12; 10:17.
WOK BLONG PRIJ
?Olsem wanem hemia i mekem bilif blong yu i strong? (Haf 14)
14. ?Olsem wanem wok blong prij i mekem bilif blong yumi i strong?
14 Yumi mekem bilif blong yumi i strong tu taem yumi joen long wok blong prij. (Hib. 10:23) Barbara, we i mekem wok blong Jehova blong bitim 70 yia, i talem se: “Oltaem mi luk se wok blong prij i mekem bilif blong mi i strong, from we taem mi tokbaot ol nambawan promes blong Jehova long ol narafala, bilif blong mi i kam strong moa.”
PESNEL STADI
?Olsem wanem hemia i mekem bilif blong yu i strong? (Haf 15)
15. ?Olsem wanem pesnel stadi i mekem bilif blong yumi i strong? (Yu luk ol pija tu.)
15 I gat wan narafala samting tu we i save mekem bilif blong yumi i strong, hemia pesnel stadi. Susan i talem se, samting we i halpem hem , hemia taem hem i mekem wan program blong stadi. Hem i talem se: “Long Sande, mi stadi long Wajtaoa blong nekis wik. Long Mande mo Tusde, mi rerem ol haf blong miting blong medel wik. Mo long ol narafala dei, mi wok long wan pesnel stadi projek.” From we Susan i folem gud program blong hem blong stadi, bilif blong hem i gohed blong kam strong. Irene we wok plante yia long wol hedkwota, i talem se taem hem i stadi long ol profet tok blong Baebol bilif blong hem i kam strong, hem i se: “Mi glad tumas blong luk se Jehova i mekem ol profet tok blong hem oli kamtru stret olsem we hem i talem.” c
‘BAMBAE HEM I MAS KAMTRU’
16. ?From wanem ol tok we Jehova i talem long Habakuk oli stret yet long yumi tede? (Hibru 10:36, 37)
16 Sam man blong Jehova oli stap wet longtaem finis blong Jehova i finisim rabis wol ya. Long tingting blong ol man, i luk olsem se promes ya i slo tumas blong i kamtru. Jehova i kasemsave long filing blong ol man blong hem, taswe hem i talem long profet Habakuk se: “Vison ya i stap wet long stret taem blong hem, mo i stap muv kwik i go from en blong hem, mo bambae i no giaman. !Nating sipos hem i tektaem, be yu mas gohed blong wet long hem! From we bambae hem i mas kamtru. !Bambae hem i no let!” (Hab. 2:3) ?Olsem wanem? ?God i talem ol tok ya blong givhan long Habakuk nomo? ?O ol tok ya oli stret yet long yumi tede? Jehova i pulum aposol Pol blong talem ol tok ya long ol Kristin we oli wantem tumas blong niufala wol i kam. (Ridim Hibru 10:36, 37.) Yes, yumi save sua se nating sipos long lukluk blong yumi promes ya i slo tumas blong kamtru, be “bambae hem i mas kamtru. !Bambae hem i no let!”
17. ?Wan sista i mekem wanem blong folem advaes we Jehova i givim long Habakuk?
17 Plante man blong Jehova oli folem advaes ya blong “gohed blong wet,” nating se blong plante yia. Eksampol, Louise i stat blong wosipim Jehova long 1939. Hem i talem se: “Long taem ya, mi ting se Amagedon bambae i kam bifo we mi finisim hae skul, be i no hapen olsem. Blong plante yia, samting we i halpem mi hemia taem mi ridim stori blong ol man olsem Noa, Ebraham, Josef, mo ol narafala we oli wet longtaem bifo we Jehova i blesem olgeta. Oltaem, taem mi bilivim se ol promes blong Jehova bambae oli kamtru, hemia i halpem mi mo ol narafala blong sua fulwan se niufala wol i klosap nomo.” !Plante narafala man blong Jehova tu oli agri long samting ya!
18. Taem yu lukluk kriesen, ?olsem wanem hemia i mekem yu bilif strong long niufala wol?
18 I tru niufala wol i no kamtru yet. Be traem tingbaot ol samting we yu save luk olsem ol sta, ol tri, ol animol, mo ol narafala man. I no gat wan man we i save gat tingting ya se ol samting ya oli no stap, nating se longtaem bifo i tru we oli no stap. Be naoia oli stap from we Jehova nao i krietem olgeta. (Jen. 1:1, 26, 27) Mo tu, God i promes se bambae hem i mekem wan niufala wol, mo bambae hem i mekem promes ya i kamtru. Long niufala wol, ol man bambae oli laef olwe mo oli gat gudfala helt. Long stret taem we Jehova i makemaot bambae hem i mekem niufala wol i kamtru. Mo long taem ya, bambae yu luk niufala wol olsem yunives tede.—Aes. 65:17; Rev. 21:3, 4.
19. ?Olsem wanem blong mekem bilif blong yu i kam strong moa?
19 Go kasem taem ya, i gud yu yusum gud evri janis we yu gat blong mekem bilif blong yu i kam strong. I gud we oltaem yu tinghae long ransom. Yu tingbaot paoa blong Jehova, mo mekem ol samting we i pulum yu blong kam klosap long Jehova. Taem yu mekem olsem, yu save stap wetem olgeta ya “we oli kasem ol samting we God i promes blong givim, from we oli bilif mo oli gat longfala tingting.”—Hib. 6:11, 12; Rom 5:5.
SINGSING 139 Yu Tingbaot Laef Long Niufala Wol
a Plante man tede oli no bilif long promes ya blong Baebol long saed blong wan niufala wol. Oli ting se hemia i wan drim nomo o wan kastom stori. Be yumi sua se olgeta promes blong Jehova bambae oli kamtru. Taswe, yumi mas gohed blong wok had, blong mekem se bilif blong yumi i stap strong oltaem. ?Olsem wanem blong mekem samting ya? Stadi ya bambae i eksplenem.
b Mifala i jenisim sam nem.
c Plante atikol we oli tokbaot ol profet tok blong Baebol, oli stap long Watch Tower Publications Index long topik ya “Prophecy”. Eksampol, yu luk haf ya “What Jehovah Foretells Comes to Be” long Wajtaoa blong 1 Jenuware 2008, long Inglis.
