1. ?Olsem wan boe i soemaot se hem i bilif strong long hop blong laef bakegen?

 WAN boe nem blong hem Matiu i gat wan rabis sik mo hem i nidim plante operesen. Taem hem i gat seven yia, hem mo famle blong hem oli stap wajem wan program blong JW ­Brodkasting^®. Long en blong program ya, oli luk wan miusik video we i soem ol man oli stap welkamem bak ol famle blong olgeta we oli laef bakegen. b Afta we program i finis, Matiu i kam luk perens blong hem, i holem han blong tufala mo i talem se: “?Papa mo mama yutufala i luk? Nating sipos mi ded, bambae mi laef bakegen. Mo yutufala i save wet long mi, evri samting bambae i oraet nomo.” I sua se perens ya i glad tumas, from we boe blong tufala i bilif strong long hop blong laef bakegen.

2-3. ?From wanem i gud we yumi lukluk bakegen long promes blong laef bakegen?

² Oltaem i gud yumi lukluk bakegen long ol promes blong Baebol long saed blong laef bakegen. (Jon 5:28, 29) ?From wanem? From we yumi neva save, maet yumi kasem wan rabis sik o yumi lusum wan we yumi lavem hem tumas long ded. (Pri. 9:11; Jem. 4:13, 14) Hop blong yumi long saed blong laef bakegen i save halpem yumi blong stanap strong long ol trabol olsem. (1 Tes. 4:13) Baebol i mekem yumi sua se Papa blong yumi long heven i save gud yumi mo i lavem yumi tumas. (Luk 12:7) Traem tingbaot, Jehova i mas save gud yumi blong mekem se yumi save laef bakegen wetem ol semfala fasin mo ol memori we yumi bin gat bifo. Jehova i lavem yumi tumas, taswe hem i mekem se i posibol blong yumi laef olwe, nating sipos yumi ded be bambae hem i mekem yumi laef bakegen.

³ Long stadi ya, fastaem bambae yumi tokbaot from wanem yumi mas bilif long promes blong laef bakegen. Biaen, bambae  yumi luk wan stori long Baebol we stamba vas blong stadi ya i kamaot long hem, we i se: “Brata blong yu bambae i laef bakegen.” (Jon 11:23) Mo laswan, bambae yumi luk olsem wanem yumi save mekem hop blong yumi long laef bakegen i kam strong moa.

4. Blong bilif long wan promes ?yumi mas trastem wanem? Talem wan eksampol.

⁴ Blong bilif long wan promes, yumi mas trastem se man we i mekem promes ya i wantem tumas mo i gat paoa blong mekem promes ya i kamtru. Hemia wan eksampol: Traem tingbaot se wan bigfala hariken i spolem gud haos blong yu. Nao wan fren i kam long yu mo i promes se: ‘Bambae mi halpem yu blong bildim bak haos blong yu.’ Hem i wan fren we i tok tru oltaem, taswe yu trastem se hem i wantem tumas blong halpem yu. Sipos hem i wan gudfala bilda mo i gat evri tul, yu save se hem i naf blong halpem yu, taswe yu bilivim promes blong hem. ?Be olsem wanem long promes blong God long saed blong laef bakegen? ?Yu ting se hem i wantem tumas mo i gat paoa blong mekem promes ya i kamtru?

5-6. ?From wanem yumi sua se Jehova i wantem tumas blong mekem ol ded man oli laef bakegen?

⁵ ?Yu ting se Jehova i wantem tumas blong mekem ol ded man oli laef bakegen? Yes, hem i wantem tumas. Hem i pulum plante man blong raetem long Baebol ol promes blong laef bakegen. (Aes. 26:19; Hos. 13:14; Rev. 20:11-13) Mo taem Jehova i mekem wan promes, oltaem hem i mekem i kamtru. (Jos. 23:14) Yes, Jehova i wantem tumas blong mekem ol dedman oli laef bakegen. ?From wanem yumi talem olsem?

⁶ Traem tingbaot samting we Job i talem. Hem i sua se nating sipos hem i ded, Jehova i wantem tumas blong luk hem i laef bakegen. (Job 14:14, 15, fut.) Mo hemia sem tingting we Jehova i gat long ol man blong hem we oli ded finis. Hem i wantem tumas blong mekem oli laef bakegen, wetem wan gudfala helt mo oli glad. ?Be olsem wanem long ol bilian man we oli ded we oli no gat janis blong lanem trutok long saed blong Jehova? God blong yumi we i gat lav i wantem mekem olgeta tu oli laef bakegen. (Wok 24:15) Hem i wantem se oli gat janis blong oli kam fren blong hem mo laef olwe long wol ya. (Jon 3:16) I klia se Jehova i wantem tumas blong mekem ol ded man oli laef bakegen.

7-8. ?From wanem yumi sua se Jehova i gat paoa blong mekem ol dedman oli laef bakegen?

⁷ ?Jehova i gat paoa tu blong mekem ol ded man oli laef bakegen? !Yes! Hem i “God Ya We i Gat Olgeta Paoa.” (Rev. 1:8) Taswe hem i gat paoa blong winim eni enemi, iven ded tu. (1 Kor. 15:26) Hemia i mekem yumi harem gud mo yumi gat paoa. Traem tingbaot ekspiriens blong sista Emma Arnold. Hem mo famle blong hem oli fesem plante traem long taem blong Wol Wo Tu. Gel blong Emma i lusum plante gudfala fren blong hem we hem i lavem tumas long rabis kalabus blong Nasi. Blong leftemap tingting blong hem, Emma i talem long hem se: “Sipos ol man we oli ded oli no save laef bakegen, hemia i min se enemi ya ded i strong moa long God, be hemia i no tru.” !I no gat wan samting we i strong moa i bitim Jehova! God ya we i gat olgeta paoa we hem nao i krietem laef, mo hem i naf blong givimbak laef ya long ol man we oli ded.

⁸ Wan narafala risen we i mekem yumi save se God i naf blong mekem ol ded man oli laef bakegen, hemia se memori blong hem i bigwan we i bigwan. Hem i singaotem wanwan sta long nem blong olgeta. (Aes. 40:26) Mo tu, hem i tingbaot ol man we oli bin ded. (Job 14:13; Luk 20:37, 38) I isi nomo blong hem tingbaot evri smosmol samting long saed blong ol man we bambae hem i mekem oli laef bakegen, inkludum ol fasin we oli bon wetem we i mekem se oli defren long ol narafala man, wetem ol  ekspiriens blong olgeta long laef, mo ol memori blong olgeta.

9. ?From wanem yu bilif long promes blong Jehova long saed blong laef bakegen?

⁹ I klia se yumi save bilivim ol promes blong Jehova long saed blong laef bakegen, from yumi save se hem i wantem tumas mo i gat paoa blong mekem promes ya i kamtru. Traem tingbaot wan narafala risen from wanem yumi bilif long promes blong God long saed blong laef bakegen: Jehova i bin mekem sam man we oli ded oli laef bakegen finis. Long taem bifo, hem i givim paoa long sam gudfala man blong hem inkludum Jisas, blong mekem dedman i laef bakegen. Naoia bambae yumi luk wan stori blong laef bakegen we Jisas i mekem we i stap long Jon japta 11.

10. ?Wanem i hapen taem Jisas i stap prij narasaed long Jodan, mo hem i mekem wanem? (Jon 11:1-3)

¹⁰ Ridim Jon 11:1-3. Traem tingbaot samting we i hapen long en blong yia 32 K.T. long Betani. Jisas i gat ol gudfala fren long vilej ya, hemia Lasaros mo tufala sista blong hem, Meri mo Mata. (Luk 10:38-42) Be Lasaros i sik tumas, mo tufala sista blong hem i wari from. Taswe oli sanem mesej i go long Jisas, we i stap narasaed long Jodan we bambae i tekem tu dei blong hem i wokbaot i kam long Betani. (Jon 10:40) Sore tumas, taem Jisas i kasem mesej ya Lasaros i ded finis. Nating se Jisas i save se fren blong hem i jes ded, be hem i stap tu moa dei, biaen hem i mekem trip blong go long Betani. Taem we Jisas i kamtru long Betani, Lasaros i ded fo dei finis. Be Jisas i plan blong mekem wan samting blong givhan long ol fren blong hem, mo i givim glori long God.—Jon 11:4, 6, 11, 17.

11. ?Wanem lesen long saed blong frensip we yumi lanem long stori ya?

¹¹ Long stori ya yumi wan lesen long saed blong frensip. Traem tingbaot: Taem Meri mo Mata i sanem mesej i go long Jisas, oli no askem hem blong i kam long Betani. Tufala i jes talem nomo se fren blong hem i sik. (Jon 11:3) Taem Lasaros i ded, Jisas i save stap longwe nomo mo i mekem hem i laef bakegen. Be yet, hem i jusum blong go long Betani blong stap wetem ol fren blong hem, Meri mo Mata. ?Yu yu gat wan fren we bambae i halpem yu nating sipos yu no askem? Sipos yes, yu save trastem se bambae hem i halpem yu long “taem blong trabol.” (Prov. 17:17) !Olsem Jisas, i gud we yumi kam ol gudfala fren blong ol narafala! Naoia i gud yumi tokbaot stori ya bakegen mo luk nekiswan samting we i hapen.

12. ?Jisas i mekem wanem promes long Mata, mo from wanem Mata i save bilivim promes ya? (Jon 11:23-26)

¹² Ridim Jon 11:23-26. Mata i harem se Jisas i stap klosap long Betani. Nao kwiktaem hem i resis i go blong mitim hem, mo i talem se: “Masta, sipos yu bin stap long ples ya, bambae brata blong mi i no save ded.” (Jon 11:21) I tru, Jisas i save hilim Lasaros. Be hem i plan blong mekem wan samting blong sapraes. Hem i promes se: “Brata blong yu bambae i laef bakegen.” Mo tu, hem i talem wan narafala risen blong Mata i bilif long promes ya, i se: “­Stamba blong laef bakegen, mi ya, mo stamba blong laef, mi ya.” Yes, God i givim paoa long Jisas blong mekem ol dedman oli laef bakegen. I no longtaem i pas,  hem i mekem wan yang gel we i jes ded, i laef bakegen. Mo tu hem i mekem wan yang man i laef bakegen, maet long sem dei nomo we hem i ded. (Luk 7:11-15; 8:49-55) ?Be hem i save mekem wan man we i ded fo dei finis, mo we bodi blong hem i stat blong sting, i laef bakegen?

13. Folem Jon 11:32-35, ?Jisas i mekem wanem taem hem i luk we Meri mo ol narafala oli stap krae? (Yu luk pija tu.)

¹³ Ridim Jon 11:32-35. Traem tingbaot nekiswan samting we i hapen. Meri we i narafala sista blong Lasaros, i go blong mitim Jisas. Taem hem i mitim Jisas, hem i talem bakegen samting we sista blong hem i talem, i se: “Masta, sipos yu bin stap long ples ya, bambae brata blong mi i no save ded.” Hem mo ol narafala oli harem nogud tumas. Taswe taem Jisas i luk mo i harem we oli stap krae, hem tu i harem nogud bigwan. Mo from we hem i sore long ol fren blong hem, hem i krae. Hem i kasemsave se taem wan i lusum famle blong hem long ded, hem i harem nogud tumas. !Taswe, i sua se hem i wantem tumas blong karemaot samting we i mekem oli krae!

14. ?Samting we Jisas i mekem taem i luk we Meri i stap krae i soemaot wanem long saed blong Jehova?

¹⁴ Samting we Jisas i mekem taem i luk Meri i krae, i tijim yumi se Jehova i wan God we i gat bigfala sore. ?From wanem yumi talem olsem? Olsem we yumi bin luk long laswan stadi, Jisas i soemaot gud ol tingting mo filing blong Papa blong hem. (Jon 12:45) Taem yumi ridim se Jisas i sore tumas long ol gudfala fren blong hem we oli stap harem nogud mo i krae, yumi save se Jehova tu i harem nogud taem i luk we yumi stap krae. (Sam 56:8) ?Yu no ting se hemia i pulum yu blong wantem kam klosap long God ya we i gat bigfala sore?

15. Folem Jon 11:41-44, ?wanem i hapen long tomb blong Lasaros? (Yu luk pija tu.)

¹⁵ Ridim Jon 11:41-44. Taem Jisas i kamtru long tomb blong Lasaros, hem i askem blong oli karemaot ston we i blokem tomb ya. Be Mata i no wantem, from hem i talem se bodi blong Lasaros i sting finis. Be Jisas i talem se: “?Olsem wanem? ?Yu yu fogetem we mi talem long yu se sipos yu bilif long mi, bambae yu save luk glori blong God?” (Jon 11:39, 40) Biaen Jisas i lukluk i go antap mo i prea. Hem i wantem se ol man oli givim ona i go long  Jehova from nekiswan samting we bambae i hapen. Biaen Jisas i singaot se: “!Lasaros, yu kamaot!” !Mo Lasaros i wokbaot i kamaot long tomb blong hem! Yes, Jisas i mekem wan samting we plante man oli ting se i no posibol.

16. ?Olsem wanem stori ya long Jon japta 11, i mekem yumi bilif strong long hop blong laef bakegen?

¹⁶ Stori we i stap long Jon japta 11 i mekem bilif blong yumi i strong long saed blong hop blong laef bakegen. ?From wanem yumi talem olsem? Tingbaot promes we Jisas i talem long Mata se: “Brata blong yu bambae i laef bakegen.” (Jon 11:23) Olsem Jehova, Jisas i wantem tumas mo i gat paoa blong mekem promes ya i kamtru. Taem Jisas i krae hemia i soemaot se hem i wantem tumas blong mekem ol dedman oli laef bakegen, mo karemaot fulwan harem nogud we man i gat, taem wan i ded. Mo taem Lasaros i wokbaot i kamaot long tomb, hemia i pruvum tu se Jisas i gat paoa blong mekem man i laef bakegen. Mo tu, tingbaot tok we Jisas i talem long Mata se: “?Olsem wanem? ?Yu yu fogetem we mi talem long yu se sipos yu bilif long mi, bambae yu save luk glori blong God?” (Jon 11:40) Yumi gat plante gudfala risen blong bilivim se God bambae i mekem promes ya blong laef bakegen i kamtru. ?Yumi save mekem wanem blong bilif strong moa long hop blong laef bakegen?

17. ?Yumi mas tingbaot wanem taem yumi ridim ol stori blong laef bakegen long Baebol?

¹⁷ Ridim mo tingting dip long ol stori we i tokbaot laef bakegen. Baebol i tokbaot eit stori blong ol man we oli laef bakegen long wol ya. c I gud yu stadi gud long ol stori ya wanwan. Taem yu mekem olsem, tingbaot se ol man ya oli ol trufala man, woman, mo ol pikinini. Traem faenem ol lesen we yu save lanem long ol stori ya. Mo tingbaot olsem wanem ol stori ya wanwan oli soemaot se Jehova  i wantem tumas, mo i gat paoa blong mekem man i laef bakegen. Mo ­antap long hemia, i gud yu tingting gud long laef bakegen blong Jisas. Tingbaot se i gat plante man we oli luk Jisas i laef bakegen, mo hemia nao stamba samting we i mekem yumi bilif long laef bakegen.—1 Kor. 15:3-6, 20-22.

18. ?Olsem wanem blong yusum gud ol singsing we i tokbaot hop blong laef bakegen? (Yu luk futnot tu.)

¹⁸ Yusum gud ol “singsing blong wosip” we oli tokbaot hop blong laef bakegen. d (Efes. 5:19) Ol singsing ya oli mekem yumi bilif strong moa long nambawan hop ya blong laef bakegen. I gud yu lesin long olgeta, singsing long olgeta, mo tokbaot mining blong ol toktok blong singsing ya long famle wosip. Traem lanem baehat ol singsing ya mo tingting dip long ol toktok blong hem, blong i save tajem hat blong yu. Biaen, sipos yu fesem wan trabol we yu save lusum laef blong yu from, o yu lusum wan we yu lavem long ded, spirit blong Jehova bambae i halpem yu blong tingbaot singsing ya bakegen, we i mekem yu harem gud mo i mekem yu bilif strong long olgeta.

19. ?Yumi save pijarem wanem long saed blong laef bakegen? (Yu luk bokis ya “ ?Bambae Yu Askem Wanem Long Olgeta?”)

¹⁹ Traem pijarem samting. Jehova i mekem se yumi naf blong pijarem yumi wan long niufala wol. Wan sista i eksplenem olsem, i se: “Mi mi spenem plante taem blong pijarem mi wan long niufala wol, i olsem se mi save smelem ol flaoa ya ros, long paradaes.” Traem pijarem se yu mitim ol gudfala man mo woman blong bilif we Baebol i tokbaot. ?Yu yu wantem tumas blong luk hu? ?Wanem ol kwestin we bambae yu askem long hem? Mo tu, traem pijarem taem ya we bambae yu mitim bakegen ol famle blong yu we oli laef bakegen. Traem tingbaot ol faswan tok we bambae yu talem, olsem wanem bambae yu welkamem olgeta, mo bigfala glad we bambae yu kasem taem yu joen wetem olgeta bakegen.

20. ?Yumi gat strong tingting blong mekem wanem?

²⁰ !Yumi wantem talem bigfala tangkiu long Jehova from promes ya blong laef bakegen! Yumi sua se promes ya bambae i kamtru, from we Jehova i wantem tumas mo i gat paoa blong mekem i kamtru. I gud yumi gat strong tingting blong gohed blong mekem bilif blong yumi i kam strong moa long saed blong nambawan hop ya. Taem yumi mekem olsem, bambae yumi kam klosap moa long God ya we i mekem promes ya long yumi wanwan se, ‘!Bambae yu luk olgeta we yu lavem tumas oli laef bakegen!’