1. ?Yumi sua long wanem?

 YUMI ol man blong Jehova, yumi save se hem i lavem yumi mo hem i wantem we yumi gat wan gudfala laef. (Rom 8:35-39) Mo tu, yumi sua se ol rul blong Baebol oltaem oli save givhan long yumi sipos yumi folem olgeta. (Aes. 48:17, 18) ?Be bambae yumi mekem wanem sipos yumi fesem wan problem we yumi no ekspektem?

2. ?Wanem sam long ol problem we maet yumi fesem, mo ol problem ya oli save mekem yumi gat wanem tingting?

² Ol man blong Jehova oli fesem ol problem. Eksampol, maet wan memba blong famle i mekem wan samting we i mekem yumi harem nogud from. Maet yumi kasem wan bigfala sik we i mekem se yumi no moa save mekem moa long wok blong Jehova, yumi fesem trabol from wan naturol disasta, o maet oli mekem nogud long yumi from bilif blong yumi. Taem yumi fesem ol problem olsem, maet yumi stap tingting se: ‘?From wanem samting ya i hapen long mi? ?Mi mi mekem wan samting we i rong? ?Hemia i min se Jehova i no moa blesem mi?’ ?Yu yu harem olsem samtaem? Sipos yes, yu no mas harem nogud. Plante gudfala man blong Jehova tu oli gat ol semfala filing olsem.—Sam 22:1,2; Hab. 1:2, 3.

3. ?Yumi lanem wanem long Ol Sam 34:19?

³ Ridim Ol Sam 34:19. Makem tu impoten poen long sam ya: (1) Ol stret man oli fesem ol problem. (2) Jehova i tekemaot yumi long ol problem blong yumi. ?Olsem wanem hem i mekem  samting ya? Wan rod hemia taem hem i halpem yumi blong gat stret tingting long laef blong sistem blong wol ya. Taem Jehova i promes se bambae yumi kasem glad taem yumi mekem wok blong hem, hem i no minim se bambae yumi no fesem ol problem naoia. (Aes. 66:14) Hem i enkarejem yumi blong tingbaot laef ya long fiuja, we hem i wantem se yumi harem gud blong olwe. (2 Kor. 4:16-18) Be go kasem taem ya, hem i stap halpem yumi evri dei blong gohed blong mekem wok blong hem.—Krae. 3:22-24.

4. ?Bambae yumi tokbaot wanem long stadi ya?

⁴ Naoia i gud yumi tokbaot samting we yumi save lanem long eksampol blong ol gudfala man blong Jehova long taem bifo, mo long taem blong yumi. Olsem we bambae yumi luk, maet bambae yumi fesem plante problem we yumi no ekspektem. Be taem yumi dipen long Jehova, oltaem bambae hem i halpem yumi. (Sam 55:22) Taem yumi tokbaot ol eksampol ya, i gud yu askem yu wan se: ‘?Bambae mi mi mekem wanem sipos mi fesem sem samting olsem? ?Olsem wanem ol eksampol ya oli mekem mi trastem Jehova moa? ?Wanem ol lesen we mi save folem long laef blong mi?’

5. ?Wanem ol problem we Laban i mekem long Jekob? (Yu luk pija long fran pej.)

⁵ Ol man blong Jehova long taem bifo oli fesem ol problem we oli no ekspektem. Traem tingbaot Jekob. Papa blong hem i talem long hem blong i go long haos blong Laban, wan famle blong olgeta we i bilif mo i tekem wan long ol gel blong hem blong i kam waef blong hem, mo hem i talem se bambae Jehova i blesem hem bigwan. (Jen. 28:1-4) So hemia nao samting we Jekob i mekem. Hem i aot long kantri blong Kenan mo i go long haos blong Laban. Laban i gat tu gel, hemia Lea mo Rejel. Jekob i laekem tumas yangfala gel blong Laban, hemia Rejel, mo hem i agri blong wok seven yia blong papa blong hem bifo we hem i maredem hem. (Jen. 29:18) Be hemia i no samting we i hapen. Laban i trikim hem nao hem i maredem fasbon gel blong hem, Lea. Biaen Laban i talem long Jekob se afta long wan wik hem i save maredem Rejel, be nomo se hem i mas wok blong hem seven yia bakegen. (Jen. 29:25-27) !Mo tu long ol 20 yia we Jekob i wok blong Laban, hem i mekem plante samting we i no stret long Jekob!—Jen. 31:41, 42.

6. ?Wanem ol narafala problem we Jekob i fesem?

⁶ Jekob i stanap strong long plante narafala trabol. Hem i gat wan bigfala famle, be ol boe blong hem oli no save joen gud tugeta. Wan taem oli salem stret brata blong olgeta Josef olsem wan slef. Mo, tu narafala boe blong Jekob hemia, Simeon mo Livae, tufala i sakem doti long nem blong famle blong olgeta mo long nem blong Jehova tu. Mo antap long hemia, waef blong Jekob, hemia Rejel i ded taem hem i bonem seken pikinini blong tufala. Mo from we i gat hadtaem blong kasem kakae, Jekob i mas muv i go long Ijip long taem ya we hem i olfala.—Jen. 34:30; 35:16-19; 37:28; 45:9-11, 28.

7. ?Olsem wanem Jehova i soemaot long Jekob se Hem i glad long hem?

⁷ Nating se Jekob i fesem ol problem ya, be hem i neva stop blong bilif long Jehova mo long ol promes blong Hem. Mo Jehova i soemaot se hem i glad long Jekob. Eksampol, nating se Laban i tritim nogud Jekob, be Jehova i givim plante samting long hem long saed blong bodi. !Mo tu, Jekob i talem bigfala tangkiu long Jehova taem hem i luk bakegen boe blong hem Josef, we hem i ting se hem ded longtaem finis! Jekob i fren gud wetem Jehova, taswe hem i naf blong stanap strong  long ol trabol ya. (Jen. 30:43; 32:9, 10; 46:28-30) Taem yumi fren gud wetem Jehova, yumi tu yumi save stanap strong tru long eni trabol we yumi no ekspektem.

8. ?King Deved i wantem mekem wanem?

⁸ King Deved i no mekem evri samting we hem i wantem mekem long wok blong Jehova. Eksampol, Deved i wantem tumas blong bildim wan tempol blong Jehova, nao hem i go talemaot samting ya long profet Natan. Ale, Natan i talem long hem se: “Yu mekem samting we i stap long hat blong yu, from we tru God i stap wetem yu.” (1 Kron. 17:1, 2) Ating ol tok ya oli mekem Deved i harem gud tumas. Maet stret long taem ya, hem i stat blong mekem ol plan blong bigfala projek ya.

9. Taem Deved i harem rabis nius ya we Natan i talem, ?hem i mekem wanem?

⁹ I no longtaem afta, profet blong Jehova i kambak wetem wan rabis nius. “Long sem naet ya,” Jehova i talem long Natan se i no Deved we bambae i bildim tempol, be wan long ol boe blong hem nao bambae i bildim. (1 Kron. 17:3, 4, 11, 12) ?Deved i mekem wanem taem hem i harem mesej ya? Hem i jenisim tingting blong hem. Naoia hem i tingbaot moa blong rerem mane, mo ol samting we boe blong hem Solomon bambae i nidim blong projek ya.—1 Kron. 29:1-5.

10. ?Olsem wanem Jehova i blesem Deved?

¹⁰ Stret afta long taem ya we Deved i save se i no hem we bambae i bildim tempol, Jehova i mekem wan kontrak wetem hem. Jehova i promes se wan long ol pikinini we bambae i kamaot biaen long hem bambae i rul blong olwe. (2 Saml. 7:16) Traem tingbaot, long niufala wol long Wan Taosen Yia Rul Blong Kraes, !Deved bambae i haremgud tumas blong save se King Jisas, i wan long ol pikinini we i kamaot biaen long hem! Stori ya i halpem yumi blong luksave se, nating sipos yumi no save mekem evri samting we yumi wantem mekem long wok blong Jehova, be God blong yumi bambae i givim plante narafala gudfala samting long yumi we yumi no ekspektem.

11. ?Olsem wanem Jehova i blesem wok blong ol Kristin long faswan handred yia, nating se Kingdom i no kamtru olsem we oli tingbaot? (Ol Wok 6:7)

¹¹ Ol Kristin long faswan handred yia oli fesem plante hadtaem we oli no ekspektem. Eksampol, oli wantem tumas se Kingdom blong God i kam, be oli no save wetaem bambae i kamtru. (Wok 1:6, 7) So, ?oli mekem wanem? Oli gohed blong stap bisi long wok blong prij. Taem gud nius i stap kasem plante moa ples, oli luk olsem wanem Jehova i stap blesem wok blong olgeta.—Ridim Ol Wok 6:7.

12. ?Ol fas Kristin oli mekem wanem taem i gat hadtaem blong kasem kakae?

¹² I gat wan taem we kakae i sot “long olgeta ples long wol.” (Wok 11:28) Mo trabol ya i afektem tu ol kristin long faswan handred yia. Traem tingbaot, oli mas safa ya from drae taem ya. I sua se ol hed blong famle oli wari se bambae famle blong olgeta i kakae wanem. ?Mo olsem wanem long ol yang man we oli plan blong mekem moa long wok blong prij? Maet oli gat tingting se oli mas wet fastaem kasem we drae taem i finis. Nating se i olsem, ol Kristin ya oli mekem sam jenis folem situesen we oli stap long hem. Oli gohed blong mekem bes blong olgeta long wok blong prij, mo oli glad blong serem ol ting blong olgeta wetem ol brata mo sista long Judia.—Wok 11:29, 30.

13. ?Wanem ol blesing we ol Kristin ya oli kasem long taem ya we kakae i sot?

¹³ ?Wanem ol blesing we ol Kristin ya oli kasem long taem ya? Olgeta we oli kasem help long taem ya oli luksave se Jehova i stap halpem olgeta. (Mat. 6:31-33) Mo oli harem se oli kam klosap moa long ol brata mo sista we oli halpem olgeta. Mo olgeta we oli givim samting  o oli joen long rilif wok, oli harem gud from oli gat fasin ya we oli glad blong givim samting. (Wok 20:35) Jehova i blesem olgeta from oli traehad blong mekem ol jenis folem situesen blong olgeta.

14. ?Wanem i hapen long Banabas mo Aposol Pol, mo wanem i kamaot from? (Ol Wok 14:21, 22)

¹⁴ Plante taem ol man oli mekem i nogud long ol fas Kristin, samtaem long ol taem we oli no tingbaot. Traem tingbaot samting we i hapen long Banabas mo aposol Pol, taem tufala i stap prij long eria blong Listra. Fastaem, ol man oli welkamem gud tufala mo oli glad blong lesin long tufala. Be biaen, ol man blong agens oli “kam toktok blong pulum” tingting blong ol man ya, mo sam long olgeta oli stonem Pol mo oli lego hem i stap blong i ded. (Wok 14:19) Be Banabas mo Pol i gohed nomo blong prij. ?Wanem i kamaot from? Tufala i pulum “plante man lelebet oli kam disaepol,” mo ol toktok mo eksampol blong tufala i mekem ol narafala i kam strong. (Ridim Ol Wok 14:21, 22.) From we Pol mo Banabas i no stop blong prij nating se ol man oli agensem tufala, hemia i mekem i gud long plante Kristin. Sipos yumi no givap long wok we Jehova i askem yumi blong mekem, bambae hem i blesem yumi.

15. ?Yu yu lanem wanem long eksampol blong Brata A. H. Macmillan?

¹⁵ Bifo long yia 1914, ol man blong Jehova oli ekspektem sam samting blong i hapen. Tingbaot eksampol blong Brata A. H. Macmillan. Olsem plante Kristin long taem ya, Brata Macmillan i ting se bambae hem i go long heven i no longtaem. Long wan tok we hem i givim long Septemba 1914, hem i talem se: “Ating hemia i wan long ol laswan pablik tok blong mi.” I tru hemia i no laswan pablik tok blong hem. Samtaem biaen, Brata Macmillan i raetem se: “Sam long mifala oli bin kwik blong gat tingting ya se bambae oli go long heven long taem ya.” Hem i gohed se: “Samting we yumi mas mekem hemia blong gohed blong bisi long wok blong masta.” Brata Macmillan i gohed blong wok strong long wok blong prij. Mo hem i gat privilej ya blong enkarejem plante brata we oli stap long kalabus, from we oli no wantem joen long ami. Mo hem i gohed blong joen long ol miting blong kongregesen nating se hem i olfala. ?Wanem gudfala samting i kamaot from we Brata Macmillan i yusum gud taem blong hem, blong bisi long wok blong Jehova? Bifo we hem i ded long yia 1966, hem i raetem se: “Tede bilif blong mi i kam strong moa i bitim bifo.” Hemia wan nambawan fasin we yumi save folem, speseli sipos yumi fesem wan trabol we yumi no ekspektem mo we i stap longtaem.—Hib. 13:7.

16. ?Brata Herbert Jennings mo waef blong hem i fesem wanem problem we tufala i no ekspektem? (Jemes 4:14)

¹⁶ Plante man blong Jehova oli kasem wan strong sik we oli no ekspektem. Eksampol, Brata Herbert Jennings b i tokbaot long stori blong hem olsem wanem hem mo waef blong hem tufala i glad blong wok olsem misinari long Gana. Samtaem biaen hem i kasem wan bigfala sik, hemia mood disorder. Taem Brata Jennings i tingbaot ol tok long Jemes 4:14, hem i eksplenem niufala situesen blong hem se i olsem “wan ‘tumoro’ we mifala i no bin plan from.” (Ridim.) Hem i talem tu se: “Mitufala i plan blong lego Gana, mo olgeta gudfala fren blong mitufala mo gobak long Kanada blong kasem tritmen.” Jehova i halpem Brata Jennings mo waef blong hem blong gohed blong mekem wok blong hem nating se tufala i fesem hadtaem.

17. ?Olsem wanem eksampol blong Brata Jennings i givhan long ol narafala?

 ¹⁷ Laef stori blong Brata Jennings i halpem plante narafala. Wan sista i raetem se: “Taem mi ridim stori blong Brother Jennings, hemia i rili tajem hat blong mi, from mi luk olsem wanem hem i gohed blong mekem wok blong Jehova nating se hem i sik, mo i halpem mi blong mi gat stret tingting long situesen blong mi.” Wan brata i talem sem samting olsem i se: “Mi mi mekem wok blong elda blong ten yia, be biaen mi mas stop from mi kasem wan sik long tingting. Mi rili harem nogud mo mi ting nating long mi wan, mo i mekem se mi no wantem ridim ol laef stori. . . . Be laef stori blong Brata Jennings i enkarejem mi bigwan.” Hemia i rimaenem yumi se taem yumi stanap strong tru long ol problem we yumi no ekspektem, hemia i save enkarejem ol narafala. Mo nating sipos laef blong yumi i no go gud olsem we yumi wantem, be fasin blong yumi blong bilif mo stanap strong, i save stap olsem wan gudfala eksampol blong ol narafala oli folem.—1 Pita 5:9.

18. Folem pija, ?yu lanem wanem long eksampol blong wido long Naejeria?

¹⁸ Ol disasta olsem COVID-19 pandemik i afektem plante man blong Jehova. Eksampol, wan wido long Naejeria hem i gat smol kakae nomo mo mane i stap. Long wan moning, gel blong hem i askem long hem se bambae oli kakae wanem afta we oli kukum laswan raes we i stap. Biaen sista blong yumi i talem long gel blong hem se oli no gat i naf mane mo kakae i stap, be oli sud folem fasin blong wido blong Jarefat blong rerem laswan kakae blong olgeta mo trastem Jehova fulwan. (1 King 17:8-16) Long dei ya, bifo we oli stat blong tingbaot se bambae oli kakae wanem long lanj, sam brata mo sista oli kam mo givim sam kakae long olgeta. Ol kakae ya we oli givim i naf blong tu wik. Sista ya i talem se hem i no rili tingbaot se Jehova i stap klosap mo i stap lesin long wanem we hem i talem long gel blong  hem. I tru, taem yumi dipen long Jehova, ol problem long laef we yumi no ekspektem i save pulum yumi i kam klosap moa long hem.—1 Pita 5:6, 7.

19. ?Aleksey Yershov i stanap strong long wanem kaen trabol?

¹⁹ Long ol yia we i pas, plante brata mo sista blong yumi oli stanap strong tru long ol fasin agens we oli no ekspektem. Traem tingbaot Brata Aleksey Yershov, we i stap long Rasia. Taem Brata Yershov i baptaes long yia 1994, ol man blong Jehova long eria ya oli fri blong mekem eni samting we i joen wetem wosip blong olgeta. Sam yia afta, situesen long Rasia i jenis. Long 2020, ol polis oli kam insaed long haos blong Brata Yershov mo oli tekemaot plante samting blong hem. Mo sam manis afta, gavman blong Rasia i jajem hem se hem i wan kriminol. Antap long hemia, oli jajem hem folem wan video we wan man i bin rikodem. Blong wan yia man ya i bin giaman se hem i intres blong stadi long Baebol. !Hemia i wan samting we i no stret nating blong mekem!

20. ?Brata Yershov i mekem wanem blong fren gud moa wetem Jehova?

²⁰ ?I gat gudfala samting i kamaot from trabol we Brata Yershov i fesem? Yes. Frensip blong hem wetem Jehova i kam strong moa. Hem i talem se: “Mi mo waef blong mi i prea tugeta plante taem. Mi luksave se mi no naf blong fesem situesen ya sipos Jehova i no halpem mi. Prapa stadi i halpem mi blong dil wetem tingting we i foldaon. Mi tingting dip long eksampol blong ol gudfala man blong Jehova bifo. I gat plante stori long Baebol we i soemaot se i impoten blong stap kwaet mo trastem Jehova.”

21. ?Yumi lanem wanem long stadi ya?

²¹ ?Yumi lanem wanem long stadi ya? Long laef blong sistem blong wol ya, samtaem yumi save fesem sam problem we yumi no ekspektem. Nating se i olsem, oltaem Jehova i halpem ol man blong hem we oli dipen long hem. Stamba vas blong stadi blong yumi i se: “Plante hadtaem i stap kasem stret man, be Jehova i stap tekemaot hem long olgeta hadtaem ya.” (Sam 34:19) I gud yumi gohed blong tingbaot se, Jehova i save halpem yumi i bitim we yumi tingbaot nomo ol trabol blong yumi. Olsem nao yumi save talem olsem Aposol Pol we i se: “Mi mi gat paoa blong fesem olgeta samting from God ya we i givim paoa long mi.”—Fil. 4:13.