1. Tokbaot samting we i hapen taem Jisas i mekem faswan merikel blong hem.

 TRAEM tingbaot samting we i hapen long en blong yia 29 K.T., taem Jisas i statem minista wok blong hem. Jisas mo mama blong hem, Meri, mo sam disaepol blong hem oli go long wan lafet blong mared long Kena, hemia long wan vilej long not blong taon ya Nasaret, we i taon blong Jisas. Meri i fren gud wetem famle ya, mo i luk olsem se hem nao i stap givhan blong lukaot gud long ol gest. Be long taem blong lafet, wan samting i hapen we i save mekem famle ya mo niufala kapol ya i sem, hemia se waen blong olgeta i finis. b Maet i gat plante moa gest i bitim wanem we oli ekspektem. Nao Meri i go luk boe blong hem mo i talem se: “Waen blong olgeta i finis.” (Jon 2:1-3) ?Jisas i mekem wanem? Hem i mekem wan samting blong sapraes. Hem i jenisim wota i kam ‘beswan waen.’—Jon 2:9, 10.

2-3. (1) ?Jisas i mekem wanem kaen merikel? (2) ?Yumi save lanem wanem long ol merikel blong Jisas?

² Jisas i mekem plante narafala merikel taem hem i stap mekem minista wok blong hem. c Hem i yusum paoa blong hem blong mekem merikel blong halpem plante taosen man. Eksampol, tu long ol merikel blong hem, hem i fidim 5,000 man mo biaen 4,000 man, we maet ful namba blong ol man ya i bitim 27,000 sipos yumi kaontem ol woman mo ol pikinini tu we oli stap long taem ya. (Mat. 14:15-21; 15:32-38) Mo tu, long tufala taem ya Jisas i hilim plante sikman. (Mat. 14:14;  15:30, 31) !Traem tingbaot, ating ol man ya oli sapraes long merikel we Jisas i mekem blong hilim mo fidim olgeta!

³ Tede yumi save lanem plante samting long ol merikel blong Jisas. Long stadi ya, bambae yumi tokbaot sam gudfala lesen we yumi save lanem long ol merikel ya. Biaen, bambae yumi tokbaot olsem wanem yumi save folem eksampol blong Jisas blong gat tingting daon mo sore, tru long ol merikel we hem i mekem.

4. ?Yumi lanem plante lesen long saed blong hu, tru long ol merikel blong Jisas?

⁴ Ol merikel blong Jisas oli tijim yumi plante lesen long saed blong hem, be tu long saed blong papa blong hem. Hemia from we Jehova nao i stamba blong paoa ya we Jisas i yusum blong mekem ol merikel. Ol Wok 10:38 i talem se: “God i makemaot hem long tabu spirit mo paoa, mo hem i stap go long evri ples, i stap mekem ol gudfala wok mo i stap hilim ol man we Devel i stap spolem olgeta, from we God i stap wetem hem.” Mo tu tingbaot se, olgeta samting we Jisas i talem mo i mekem inkludum ol merikel blong hem, oli soemaot gud ol tingting mo filing blong papa blong hem. (Jon 14:9) Naoia bambae yumi tokbaot tri lesen we yumi save lanem long ol merikel blong Jisas.

5. ?Wanem i pulum Jisas blong mekem ol merikel? (Matiu 20:30-34)

⁵ Faswan, Jisas mo papa blong hem i lavem yumi tumas. Taem Jisas i stap long wol, hem i soemaot se hem i lavem ol man tumas taem hem i yusum paoa blong mekem merikel blong halpem olgeta we oli stap safa. Wan taem, tu blaen man oli krae long hem blong i halpem tufala. (Ridim Matiu 20:30-34.) Makem se Jisas i “sore tumas” long tufala nao i hilim tufala. Grik tok we oli tanem i kam “sore tumas,” i soemaot dip filing we Jisas i gat taem hem i luk ol man oli safa. Dip filing ya blong sore we i joen wetem lav, i pulum Jisas tu blong fidim ol man we oli hanggri mo i mekem wan man we i gat leprosi i kam gud bakegen. (Mat. 15:32; Mak 1:41) Yumi save sua se Jehova God ya we i gat “bigfala sore,” mo boe blong hem we i lavem yumi tumas, tufala i stap harem nogud wetem yumi taem yumi safa. (Luk 1:78; 1 Pita 5:7) !Tufala i wantem tumas blong tekemaot ol problem we i stap afektem ol man!

6. ?God i givim paoa long Jisas blong mekem wanem?

⁶ Sekenwan, God i givim paoa long Jisas blong i stretem ol problem blong ol man. Taem Jisas i stap mekem ol merikel, hem i pruvum se hem i save stretem olgeta problem we ol man oli no save stretem olgeta wan. Eksampol, hem i gat paoa blong mekem yumi kam fri long stamba samting we i stap mekem problem long ol man, hemia sin mo evri samting we i kamaot from sin, inkludum sik mo ded. (Mat. 9:1-6; Rom 5:12, 18, 19) Ol merikel blong Jisas oli pruvum se hem i save hilim “ol defdefren” sik, mo mekem man i laef bakegen. (Mat. 4:23; Jon 11:43, 44) Mo tu, hem i gat paoa blong kontrolem ol strong win mo mekem man i kam fri long ol rabis spirit. (Mak 4:37-39; Luk 8:2) !I gud tumas blong save se Jehova i givim paoa long Boe blong hem blong mekem ol samting ya!

7-8. (1) ?Ol merikel blong Jisas oli mekem yumi sua long wanem? (2) ?Wanem ol merikel we yu yu wantem tumas blong luk i kamtru long niufala wol?

⁷ Nambatri, yumi sua fulwan se ol fiuja blesing we bambae yumi kasem aninit long Kingdom blong God, bambae oli kamtru. Ol merikel we Jisas i mekem taem hem i stap long wol, oli tijim yumi se bambae hem i mekem plante moa samting long wol, from we hem i  King long Kingdom blong God long heven. Traem tingbaot ol samting we i no longtaem bambae yumi ekspiriensem taem Kraes i rulum wol. Bambae yumi gat gudfala helt, from we Jisas bambae i finisim olgeta kaen sik, mo handikap we i mekem ol man oli safa. (Aes. 33:24; 35:5, 6; Rev. 21:3, 4) Bambae yumi neva hanggri o safa from ol trabol we i kamaot from disasta. (Aes. 25:6; Mak 4:41) Bambae yumi glad tumas blong welkamem ol famle blong yumi taem oli kamaot long “ol memoriol tomb.” (Jon 5:28, 29) ?Wanem merikel we yu yu wantem tumas blong luk i kamtru long niufala wol?

⁸ Taem Jisas i mekem ol merikel, hem i soemaot se hem i gat tingting daon mo sore. Hemia ol fasin we yumi tu yumi sud gat. I gud yumi tokbaot tu eksampol, bambae yumi stat wetem stori ya we i tokbaot lafet blong mared long Kena.

9. ?Jisas i mekem wanem long lafet blong mared? (Jon 2:6-10)

⁹ Ridim Jon 2:6-10. Taem i no moa gat naf waen long lafet blong mared, ?Jisas i mas mekem wan samting? Nogat. I no gat wan profet tok we i talem se Mesaea bambae i mekem merikel blong givim waen. Be traem tingbaot se bambae yu yu harem olsem wanem sipos i no moa gat naf dring long lafet mared blong yu. Maet Jisas i sore long famle ya, speseli long man mo woman we i mared mo i no wantem se oli sem. Taswe olsem we yumi tokbaot finis,  hem i mekem wan merikel. Hem i jenisim samwe 390 lita blong wota i kam beswan waen. Maet hem i givim plante lita blong waen olsem blong mekem se long fiuja oli save yusum haf we i stap, o maet oli save salem blong winim sam mane blong givhan long niufala kapol ya. !Yumi sua se niufala kapol ya i glad tumas!

10. ?Wanem sam smosmol save long stori ya we i stap long Jon japta 2? (Yu luk pija tu.)

¹⁰ Traem luk sam smosmol save long stori ya we i stap long Jon japta 2. ?Yu yu makem se i no Jisas we i fulumap wota long botel ya we oli wokem long ston? Hem i no wantem pulum ol man blong oli lukluk hem, taswe hem i talem long ol man blong wok blong oli fulumap wota long ol botel ya. (Vas 6, 7) Mo afta we hem i mekem wota i kam waen, hem i no tekem sam long ol waen ya mo i go givim long bos blong lafet. Be hem i talem long ol man blong wok blong oli go givim long hem. (Vas 8) Mo tu, Jisas i no tekem wan kap waen i holem long fored blong ol gest mo i tok flas se: ‘!Yufala i go testem waen ya we mi jes mekem!’

11. ?Yumi save lanem wanem long merikel blong Jisas?

¹¹ ?Yumi save lanem wanem long merikel ya blong Jisas blong mekem wota i kam waen? Yumi lanem wan lesen blong gat tingting daon. Jisas i no flas from merikel ya, mo hem i neva tok flas from ol samting we hem i mekem. Defren olgeta, hem i gat tingting daon mo oltaem hem i givim glori mo ona i go long Papa blong hem. (Jon 5:19, 30; 8:28) Sipos yumi folem fasin blong Jisas blong holemtaet tingting daon oltaem, bambae yumi no tok flas from ol samting we yumi mekem. Nomata wanem wok yumi mekem long wok blong Jehova, i nogud yumi tok flas blong leftemap yumi wan nomo, be yumi mas tok flas blong leftemap God ya we yumi wosipim. (Jer. 9:23, 24) I gud yumi givim ona i go long Hem nomo, from we yumi no save mekem eni gudfala samting sipos hem i no givhan long yumi.—1 Kor. 1:26-31.

12. ?Wanem wan narafala rod blong gat tingting daon olsem Jisas? Talem wan eksampol.

¹² Traem tingbaot wan narafala rod we yumi save folem fasin blong Jisas blong gat tingting daon. Tingbaot eksampol ya: Wan elda i spenem plante taem blong halpem wan yangfala brata we i man blong givhan, blong rerem faswan pablik tok blong hem. From samting ya, yangfala brata ya i givim wan naesfala tok we evriwan long kongregesen i harem gud long hem. Afta long miting, wan i kam luk elda ya mo i talem se: ‘Brata ya i givim wan naesfala tok.’ ?Yu ting se i stret we elda ya i talem se: ‘Yes, be mi nao mi spenem plante taem blong givhan long hem’? ?O hem i sud gat tingting daon mo talem se: ‘Yes, i tru. Mi mi glad long hem’? Taem yumi gat tingting daon, yumi no leftemap yumi from ol gudfala samting we yumi mekem blong givhan long ol narafala. Be yumi glad se Jehova i luk mo i tinghae long samting we yumi mekem. (Skelem wetem Matiu 6:2-4; Hib. 13:16) I tru, taem yumi folem fasin blong Jisas blong gat tingting daon Jehova i glad tumas.—1 Pita 5:6.

13. ?Jisas i luk wanem klosap long taon ya Naen, mo hem i mekem wanem? (Luk 7:11-15)

¹³ Ridim Luk 7:11-15. Traem tingbaot samting we i hapen samwe long ol haf blong ol yia we Jisas i stap mekem minista wok blong hem long wol. Hem i travel i go long Naen, wan taon blong Galili we i no stap longwe long Sunem, we hemia nao ples we profet Elisa i bin mekem boe blong wan woman i laef bakegen. (2 King 4:32-37) Taem Jisas i stap go klosap long get, hem i luk we oli stap karem wan dedbodi i stap aot long taon. Hemia i wan taem blong harem nogud from we wan wido i lusum  wan pikinini nomo we hem i gat. Be mama ya we i harem nogud i no stap hem wan, i gat wan bigfala hip blong ol man long taon ya oli stap wetem hem. Ale, Jisas i stopem olgeta mo i mekem wan samting blong sapraes blong givhan long mama ya we i harem nogud, hem i mekem boe blong hem i laef bakegen. Hemia i faswan long ol trifala merikel blong Jisas blong mekem man i laef bakegen, we oli raetemdaon long buk blong ol Gospel.

14. ?Wanem sam smosmol save long stori ya we i stap long Luk japta 7? (Yu luk pija tu.)

¹⁴ Traem luk sam smosmol save long stori ya we i stap long Luk japta 7. ?Yu yu makem se Jisas “i luk mama ya” we i harem nogud nao “hem i sore tumas long hem”? (Vas 13) So, ?Jisas i luk wanem? Maet Jisas i luk we mama ya i stap krae, taem i stap wokbaot klosap long bodi blong boe blong hem, mo hem i sore tumas long hem. Jisas i no jes sore nomo long mama ya, be hem i soemaot se hem i sore long hem. Maet hem i toktok long hem long wan voes we i mekem hem i harem gud, taem i se: “Yu no krae.” Biaen hem i mekem samting blong halpem hem. Hem i mekem boe ya i laef bakegen mo “i givim hem long mama blong hem.”—Vas 14, 15.

15. ?Yumi lanem wanem long merikel blong Jisas?

¹⁵ ?Yumi save lanem wanem long merikel ya blong Jisas we i mekem boe blong wido ya i laef bakegen? Yumi lanem se yumi mas gat sore long olgeta we oli harem nogud. I tru yumi no save mekem man i laef bakegen. Be olsem Jisas yumi save lukluk ol man we oli harem nogud mo gat sore long olgeta. Yumi save tekem faswan step blong soemaot se yumi gat sore tru long ol toktok mo long samting we yumi mekem blong halpem olgeta mo leftemap tingting blong olgeta. d (Prov. 17:17; 2 Kor. 1:3, 4; 1 Pita 3:8) Ol smol toktok o aksen blong yumi nomo i save mekem olgeta oli harem gud bigwan.

16. Olsem we pija i soem, ?yu lanem wanem long ekspiriens blong wan mama we i lusum gel blong hem long ded?

¹⁶ Tingbaot wan ekspiriens. Sam yia bifo  long taem blong singsing long wan miting blong kongregesen, wan sista i luk wan mama we i stap stanap klosap long hem i stap krae. Singsing ya i tokbaot laef bakegen, mo i no longtaem i pas mama ya i lusum yang gel blong hem long ded. Ale kwiktaem nomo sista ya i go stanap klosap long mama ya, i putum han blong hem i goraon long hem, mo i singsing wetem hem long laswan haf blong singsing ya. Samtaem biaen mama ya i talem se: “Mi mi lavem tumas ol brata mo sista.” Mama ya i glad tumas se hem i go long miting long taem ya. Hem i gohed se: “Haos Kingdom nao hem i ples we yumi save kasem help long hem.” Yumi sua se Jehova i luk mo i tinghae long evri smol samting we yumi mekem blong soemaot se yumi sore long olgeta we “tingting blong olgeta i foldaon.”—Sam 34:18.

17. ?Yumi lanem wanem long stadi ya?

¹⁷ Ol stori blong ol merikel we Jisas i mekem oli save leftemap tingting blong yumi bigwan. Oli tijim yumi se Jehova mo Jisas i lavem yumi tumas, mo se Jisas i gat paoa blong finisim olgeta problem blong ol man mo se yumi save trastem fulwan ol promes blong fiuja we Kingdom blong God bambae i mekem i kamtru. Taem yumi stadi long ol stori ya yumi save tingbaot olsem wanem blong folem ol fasin ya blong Jisas. I gud we long prapa stadi projek o long famle wosip, yumi tokbaot ol narafala merikel blong Jisas. Traem luk ol lesen we yu save lanem mo biaen tokbaot ol samting ya wetem ol narafala. !Ol storian olsem oli save leftemap tingting blong ol narafala!—Rom 1:11, 12.

18. ?Bambae yumi tokbaot wanem long nekis stadi?

¹⁸ Klosap long en blong minista wok blong Jisas, hem i mekem namba tri merikel ya blong mekem man i laef bakegen. Be hemia i defren, from hem i mekem wan gudfala fren blong hem i laef bakegen, mo hem i mekem samting ya long wan taem we ol man oli ting se bambae i no save hapen. ?Yumi lanem wanem lesen long merikel ya? ?Mo olsem wanem yumi save bilif strong long hop ya blong laef bakegen? Nekis stadi bambae i tokbaot ol kwestin ya.