?Yu Yu Save?
?From wanem ol man blong narafala kantri oli kam ol ami blong King Deved?
KING Deved i gat sam ami we oli no blong Isrel, mo sam long olgeta hemia, Jelek we i blong Amon, Uria we i wan laen blong Het, mo Itma we i blong Moab. a (1 Kron. 11:39, 41, 46) Deved i gat ol ami tu we oli “ol man Keret, ol Peletaet, mo ol man Gat.” (2 Saml. 15:18) I luk olsem se ol man Keret mo ol Peletaet oli famle wetem ol man Filistia. (Esik. 25:16) Be ol man Gat, oli blong taon ya Gat long Filistia.—Jos. 13:2, 3; 1 Saml. 6:17, 18.
?From wanem Deved i tekem ol man ya oli kam ol ami blong hem? Hem i sua gud se ol man ya bambae oli stap tru long hem, be antap moa long Jehova. Eksampol, The New Interpreter’s Dictionary of the Bible i tokbaot ol man Keret mo ol Peletaet, i se: “Olgeta oli stap tru long Deved long olgeta hadtaem we hem i fesem long taem ya we hem i stap rul.” ?Oli soemaot olsem wanem se oli stap tru long hem? Taem “olgeta man Isrel” oli lego King Deved blong go folem “wan man blong mekem trabol we nem blong hem Seba,” ol man Keret mo ol Peletaet oli stap long saed blong Deved mo oli halpem hem blong traem stopem rabis plan ya blong Seba. (2 Saml. 20:1, 2, 7) Long wan narafala taem, taem Adonaejah, boe blong King Deved i wantem kam king long ples blong Solomon, ol man Keret mo ol Peletaet oli stap tru long Deved mo oli givhan long hem blong mekem Solomon i kam king, from hem nao we Jehova i jusumaot hem blong i kam king.—1 King 1:24-27, 38, 39.
Wan narafala man we i no blong Isrel be i fasgud oltaem long Deved, hemia Itae we i blong Gat. Itae mo ol 600 ami blong hem oli sapotem King Deved, taem boe blong hem Absalom i rebel mo i pulum hat blong ol man Isrel blong oli agensem king. Long taem ya, Deved i talem long Itae se hem i no nid blong faet from hem, from we hem i wan man blong narafala kantri. Be Itae i talem se: “!Long nem blong Jehova we i laef i stap mo long nem blong yu we yu laef i stap, mi mi talem long yu se long weples we masta mo king blong mi i go long hem, nating se hem i ded no i laef, be oltaem bambae mi stap wetem hem!”—2 Saml. 15:6, 18-21.
Itae i sapotem Deved oltaem from i save se Jehova i makemaot hem blong i king
Nating se ol man Keret, ol Peletaet, mo ol man Gat oli no ol man Isrel, be oli luksave se Jehova i tru God mo se Deved nao we Jehova i makemaot hem. !I sua se Deved i glad tumas blong gat ol man olsem, we oli stap sapotem hem oltaem!
a Loa blong God we i stap long Dutronome 23:3-6, i putum tabu long ol man Amon, mo Moab blong oli no go insaed long kongregesen blong ol man Isrel. Be i luk olsem se loa ya i blokem olgeta blong oli no kasem ol raet olsem ol memba blong nesen blong Isrel, be i no blokem olgeta wanwan blong kam joen o laef wetem ol man blong God. Yu luk Insight on the Scriptures, Volium 1, pej 95.
