1. ?Jehova i wantem se yumi kam olsem wanem?

 BESWAN taem long laef blong wan hasban mo waef, hemia taem tufala i gat wan bebi. Nating se tufala i lavem hem, be tufala i no wantem se hem i stap olsem bebi olwe. Sipos pikinini ya i no kam bigwan, bambae tufala i wari. Long sem fasin, Jehova i glad taem yumi tekem faswan step blong folem Jisas, be Hem i no wantem se yumi stap olsem wan bebi nomo long saed blong spirit. (1 Kor. 3:1) Defren olgeta, hem i wantem se yumi kam ol Kristin we oli “bigman” long spirit.—1 Kor. 14:20.

2. ?Bambae yumi tokbaot wanem long stadi ya?

² ?I minim wanem blong kam wan Kristin we i bigman long spirit? ?Olsem wanem yumi save kam bigman long spirit? ?Olsem wanem strong kakae long saed blong spirit i save givhan long yumi blong kam bigman long spirit? ?Mo from wanem yumi no mas trastem yumi wan bitim mak? Long stadi ya, bambae yumi tokbaot ansa blong ol kwestin ya.

?I MINIM WANEM BLONG KAM WAN KRISTIN WE I BIGMAN LONG SPIRIT?

3. ?I minim wanem se wan Kristin i kam bigman long spirit?

³ Long Baebol, Grik tok we oli tanem i kam “bigman,” i save minim tu wan man we i “bigman long Kristin fasin.” a (Efes. 4:13) Wan bebi i gohed blong gru gogo kasem we hem i kam bigman. Long sem fasin, yumi tu yumi mas gohed blong fren gud wetem Jehova. Olsem nao, yumi save kam bigman long spirit. Nating se yumi kam bigman finis long spirit, be yumi no mas stop blong ples ya. (1 Tim. 4:15) Yumi evriwan, hemia i minim tu ol yangfala, yumi save kam bigman long spirit. ?Be wanem i soemaot se wan Kristin i kam bigman long spirit?

4. ?Wan man we i bigman long spirit hem i olsem wanem?

 ⁴ Wan man we i bigman long spirit, hem i mekem laef blong hem i laenap wetem tingting blong God, be i no mekem samting folem prapa tingting blong hem. Mo from we hem i sinman, bambae hem i mekem sam mastik. Be bambae hem i soemaot long laef blong hem evri dei se ol tingting mo aksen blong hem oli laenap wetem tingting blong God. Hem i putum niufala fasin mo i traehad oltaem blong gat sem tingting olsem God. (Efes. 4:​22-24) Hem i trenem hem wan blong mekem ol waes desisen folem ol loa mo ol stamba trutok blong Baebol. Taswe, hem i no nidim plante rul blong talem samting we hem i mas mekem. Mo taem hem i mekem wan desisen, hem i traehad blong wok folem.—1 Kor. 9:​26, 27.

5. ?Wanem i save hapen long wan man we i no bigman long spirit? (Efesas 4:​14, 15)

⁵ Wan man we i no bigman long spirit, i isi nomo blong hem i bilivim ol giaman nius, ol stori long intenet, mo maet i isi blong ol man blong apostasi oli trikim hem. b (Ridim Efesas 4:​14, 15.) Mo tu, maet hem i save jalus, kros long ol narafala, mo i isi blong hem i harem nogud. Mo plante taem sipos i gat wan samting i traem hem, i isi nomo blong hem i mekem samting we i no stret.—1 Kor. 3:3.

6. ?From wanem Baebol i talem se fasin blong kam bigman long spirit i olsem wan pikinini we i stap kam bigwan? (Mo tu, yu luk pija.)

⁶ Baebol i tokbaot fasin ya blong kam bigman long spirit se i sem mak olsem wan pikinini we i stap kam bigwan. Wan pikinini i no naf blong luksave samting, taswe hem i nidim wan bigman blong i lidim hem mo protektem hem. Eksampol, wan mama i save askem long smol gel blong hem blong i holem han blong hem taem tufala i stap krosem rod. Be taem smol gel ya i kam bigwan moa, mama ya i save letem hem blong i krosem rod hem wan, be bambae hem i gohed blong talem long hem se hem i mas jekem ol trak bifo we i krosem rod. Mo taem gel ya i kam bigman, naoia hem i save samting we hem i mas mekem blong blokem ol denja. Ol Kristin we oli no bigman long spirit, oli olsem smol gel ya. Plante taem oli nidim wan Kristin we i bigman long spirit blong i halpem olgeta blong blokem ol samting we i save spolem frensip blong olgeta wetem Jehova, mo halpem olgeta blong mekem ol waes desisen. Be wan Kristin we i bigman long spirit,  taem hem i wantem mekem wan desisen, hem i tingbaot ol rul blong Baebol blong faenemaot tingting blong Jehova fastaem, mo biaen i folem blong mekem wan desisen we i stret.

7. ?Wan Kristin we i bigman long spirit i save askem help blong ol narafala?

⁷ ?Hemia i min se wan Kristin we i bigman long spirit, i no nidim we narafala i givhan long hem? No, samtaem oli nidim help blong narafala. Wan Kristin we i no bigman, hem i nidim oltaem we narafala i talem long hem samting we hem i mas mekem, o mekem wan desisen long bihaf blong hem. Be wan Kristin we i bigman long spirit hem i defren, bambae hem i askem help long olgeta we oli gat moa waes mo ekspiriens, be hem i kasem save se yumi wanwan i gat ‘prapa basket blong yumi blong karem.’—Gal. 6:5.

8. ?Olsem wanem ol Kristin we oli bigman long spirit, oli no sem mak?

⁸ Evri man we oli bigman oli no sem mak. Long sem fasin, ol Kristin we oli bigman long spirit oli gat ol defdefren fasin. Samfala oli waes, oli gat strong tingting, oli glad blong givim samting, mo oli kaen. Mo tu, taem tu Kristin i fesem sem kaen traem, maet tufala i mekem defren desisen be i laenap wetem ol rul blong Baebol. Mo tufala i mekem olsem folem tingting we tufala i trenem folem Baebol. From samting ya, tufala wanwan i no jajem narawan from desisen we hem i mekem. Be tufala i traehad blong joen gud wanples.—Rom 14:10; 1 Kor. 1:10.

?OLSEM WANEM YUMI SAVE KAM BIGMAN LONG SPIRIT?

9. ?Blong kam wan bigman long spirit, hemia i hapen olsem nomo? Yu eksplenem.

⁹ Taem ol yia oli stap pas, wan pikinini i stap gru sloslo blong i kam wan bigman, be blong kam wan bigman long spirit yumi mas traehad. Eksampol, ol brata mo sista long Korin oli harem gud nius, oli baptaes, oli kasem tabu spirit, mo oli lanem plante samting from ol tijing blong aposol Pol. (Wok 18:​8-11) Be sam yia afta we oli baptaes, plante long olgeta oli no traehad blong kam bigman long spirit. (1 Kor. 3:2) ?Yumi save mekem wanem blong yumi no kam olsem olgeta?

10. ?Yumi mas mekem wanem blong kam bigman long spirit? (Jud 20)

¹⁰ Blong kam bigman long spirit, fastaem yumi mas wantem blong kam bigman long spirit. Olgeta we oli “no gat ekspiriens,” we oli wantem gohed blong stap olsem ol pikinini long saed blong spirit, bambae oli no mekem eni traehad. (Prov. 1:22) Yumi no wantem kam olsem ol man we oli bigman finis, be oli gohed yet blong dipen long ol perens blong olgeta blong mekem desisen blong olgeta. Defren olgeta, yumi wantem gohed blong kam bigman long spirit. (Ridim Jud 20.) Sipos yu stap traehad yet blong kam bigman long spirit, i gud yu prea long Jehova mo askem hem blong i mekem se yu “wantem wok mo i givim paoa long yufala blong mekem olgeta samting we hem i laekem.”—Fil. 2:13.

11. ?Jehova i givim wanem blong halpem yumi blong kam bigman long spirit? (Efesas 4:​11-13)

¹¹ Blong kam bigman long spirit, yumi nidim help blong ol narafala tu. Jehova i givim ol man blong lukaot long sipsip mo ol tija long kongregesen we oli rere blong halpem yumi, blong yumi ‘no moa stap olsem ol pikinini be yumi kam olsem Kraes we i bigman finis.’ (Ridim Efesas 4:​11-13.) Mo tu, Jehova i givim tabu spirit blong halpem yumi blong gat “tingting blong Kraes.” (1 Kor. 2:​14-16) Antap long hemia, God i givim ol fo Gospel long Baebol we i soemaot klia ol tingting, toktok, mo fasin blong Jisas taem hem i stap prij long wol. Sipos yumi traehad blong gat sem tingting mo fasin olsem Jisas, bambae yumi naf blong kasem mak ya blong kam bigman long spirit.

 ?OLSEM WANEM STRONG KAKAE LONG SAED BLONG SPIRIT I SAVE GIVHAN LONG YUMI?

12. ?Wanem ol “stamba tijing we oli tokbaot Kraes”?

¹² Blong kam bigman long spirit, yumi mas “livim . . . ol stamba tijing we oli tokbaot Kraes,” we hemia i minim ol faswan tijing we yumi lanem long saed blong Kraes. Eksampol, sam long ol tijing ya hemia, fasin blong tanem tingting from ol wok we oli blong ded, bilif long God, tijing ya we i tokbaot baptaes, mo laef bakegen long ded. (Hib. 6:​1, 2) Sam long ol tijing ya, evri Kristin oli bilif long hem. From samting ya, aposol Pita i tokbaot ol tijing ya taem hem i prij long ol man long Pentekos. (Wok 2:​32-35, 38) Yumi mas akseptem ol tijing ya blong yumi save kam ol disaepol blong Kraes. Eksampol, Pol i talem se sipos yumi no bilif long laef bakegen, yumi no save kam disaepol blong Kraes. (1 Kor. 15:​12-14) Taswe, i no naf nomo we yumi bilif long ol stamba tijing blong Baebol.

13. ?Yumi mas mekem wanem blong ol strong kakae ya we Hibru 5:14 i tokbaot, i save givhan long yumi? (Mo tu, yu luk pija.)

¹³ Ol strong kakae long saed blong spirit oli defren long ol stamba tijing blong Baebol. Ol strong kakae long saed blong spirit, hemia i minim ol rul mo ol stamba trutok we oli halpem yumi blong kasemsave long ol tingting blong Jehova. Blong ol kakae ya oli givhan long yumi, yumi mas stadi, tingting dip, mo folemgud ol samting we yumi lanem long Baebol. Sipos yumi mekem olsem, yumi stap trenem yumi blong mekem ol waes desisen we i mekem Jehova i glad. c—Ridim Hibru 5:14.

14. ?Olsem wanem Pol i halpem ol Kristin long Korin blong oli kam bigman long spirit?

¹⁴ Ol Kristin we oli no bigman long spirit, plante taem oli faenem i had blong mekem wan gudfala desisen long wan samting we Baebol i no givim wan stret rul blong hem. Long taem olsem, maet samfala oli ting se oli save mekem eni samting we oli wantem. Sam narafala maet oli askem blong putum rul long wan samting, nating se i no nidim wan rul. Eksampol, i luk olsem se ol Kristin long Korin oli askem Pol blong i putum wan rul long ol kakae we oli givim finis i go long ol aedol. Be Pol i no talem wan rul, from hem i luksave se wanwan man i “fri blong jusum” samting we hem i wantem, we i folem  tingting blong hem we i save stikim hem. Taswe, hem i tokbaot sam rul we i save givhan long olgeta blong mekem wan gudfala desisen we tingting blong olgeta i no stikim olgeta from, mo i no mekem narafala i stambol. (1 Kor. 8:​4, 7-9) Yes, Pol i givhan long ol Kristin long Korin blong oli kam bigman long spirit, nao oli naf blong yusum prapa tingting blong olgeta, i bitim we oli dipen nomo long ol rul, o long ol narafala blong talem samting we oli mas mekem.

15. ?Olsem wanem Pol i halpem ol Kristin long Hibru blong oli gohed blong kam bigman long spirit?

¹⁵ Yumi lanem wan impoten lesen long ol tok ya we Pol i raetem i go long ol Hibru Kristin. Sam long olgeta oli no gohed blong kam bigman long spirit, be oli ‘gobak, oli stap dring melek, mo oli no kakae strong kakae’ long saed blong spirit. (Hib. 5:12) Oli no gohed blong lanem ol niufala trutok we Jehova i stap tijim olgeta long hem tru long kongregesen. (Prov. 4:18) Eksampol, plante man Jiu we oli bilif, oli gohed blong folem Loa Blong Moses nating se sakrefaes blong Kraes i finisim loa ya 30 yia i pas finis. (Rom 10:4; Taetas 1:10) !Mo long ol 30 yia ya, ol Kristin ya oli gat plante taem blong kasemsave se oli no moa nid blong folem Loa Blong Moses! I sua se olgeta we oli ridim leta ya blong Pol, oli trastem se hemia ol strong kakae long saed blong spirit. Mo hemia nao samting we ol Kristin oli nidim, we i halpem olgeta blong luksave se niufala fasin blong wosip we Jehova i stanemap tru long Jisas hem i beswan, mo hemia i leftemap tingting blong olgeta blong oli gohed blong prij nating se ol man Jiu oli agensem olgeta.—Hib. 10:​19-23.

BLOKEM FASIN YA BLONG TRASTEM YU WAN BITIM MAK

16. Nating se yumi kam bigman finis long spirit, ?be yumi mas gohed blong mekem wanem?

¹⁶ Yumi mas traehad blong kam bigman long spirit, be i no hemia nomo, yumi mas gohed blong traehad blong stap oltaem olsem bigman long spirit. Mo hemia i min se yumi mas blokem fasin ya blong trastem yumi wan bitim mak. (1 Kor. 10:12) Taswe, yumi mas “gohed blong jekem” yumi wan blong meksua se oltaem yumi stap olsem wan bigman long spirit.—2 Kor. 13:5.

17. ?Pol i talem wanem blong soemaot se ol Kristin long Kolosi oli mas gohed blong stap olsem ol bigman long spirit?

¹⁷ Long leta we Pol i raetem i go long ol Kristin long Kolosi, hem i makem gud bakegen se yumi mas gohed blong stap olsem ol bigman  long spirit. Nating se ol Kristin ya oli bigman finis long spirit, be Pol i wonem olgeta bakegen se oli mas lukaot gud blong oli no letem ol tingting blong wol i trikim olgeta. (Kol. 2:​6-10) Mo Epafras we i save gud olgeta long kongregesen, i prea from olgeta oltaem blong oli save “stanap strong olsem ol bigman.” (Kol. 4:12) ?Hemia i tijim yumi long wanem? Yumi lanem se Pol mo Epafras i kasemsave se blong stap olsem wan bigman long spirit, yumi nidim help blong God. Be yumi tu yumi mas gohed blong mekem frensip blong yumi wetem God i kam strong moa. Tufala i wantem se ol Kristin long Kolosi oli gohed blong stap olsem ol bigman long spirit, nating se oli fesem ol hadtaem.

18. ?Wanem i save hapen long wan Kristin we i bigman long spirit? (Mo tu, yu luk pija.)

¹⁸ Pol i wonem ol Kristin long Hibru se sipos wan Kristin we i bigman long spirit i no lukaot gud, hem i save mekem se God bambae i no glad long hem olwe. Hat blong hem i save kam strong bitim mak, nao bambae hem i no wantem tanem tingting blong hem from sin blong hem, mo God tu bambae i no save fogivim hem. Yumi glad se ol Kristin long Hibru oli no mekem olsem. (Hib. 6:​4-9) ?Be olsem wanem long olgeta we naoia oli no moa joen wetem kongregesen o oli disfelosip, be biaen oli tanem tingting blong olgeta? Fasin blong olgeta i soemaot se oli no olsem ol man ya we Pol i tokbaot. Nating se i olsem, taem oli kambak long Jehova, oli nidim yet blong hem i givhan long olgeta. (Esik. 34:​15, 16) Taswe, ol elda oli save askem wan Kristin we i bigman long spirit, blong halpem olgeta blong oli fren gud bakegen wetem Jehova.

19. ?Wanem mak we yumi mas gat?

¹⁹ !Sipos yu stap traehad blong kam bigman long spirit, yu save kasem mak ya! I gud yu gohed blong kakae ol strong kakae long saed blong spirit, mo traehad blong gat sem tingting olsem Jehova. Mo sipos yu kam wan Kristin we i bigman finis long spirit, i gud yu gohed blong mekem bes blong yu blong yu save stap oltaem olsem wan Kristin we i bigman long spirit.