Mi mi bon long 1955, mo mi mi yang moa long tu narafala brata blong mi. Mi gruap klosap long saot blong Finlan, long wan eria we naoia hem i taon blong Vantaa.

Sam yia bifo we mi bon, mama i baptaes blong kam wan Witnes blong Jehova. Be papa i agensem trutok mo i no letem mama blong i stadi wetem mifala ol pikinini, o tekem mifala i go long ol miting blong kongregesen. Taswe, taem papa i no stap, hem i stap tijim mifala long ol stamba trutok blong Baebol.

Taem mi stap gruap, oltaem mi wantem obei long Jehova. Eksampol, taem mi gat seven yia, tija blong mi i kros tumas from mi no wantem kakae verilättyjä (Hemia wan smol kek blong Finlan we oli wokem long blad). Ale, hem i yusum wansaed han blong hem blong skwisim jiks blong mi blong mekem maot blong mi i open, mo hem i yusum narafala han blong hem blong traem pusum wan pis kek ya i go long maot blong mi. Be mi kilimaot han blong hem.

Taem mi gat 12 yia, papa blong mi i ded. Taswe mi naf blong go long olgeta miting. Ol brata mo sista long kongregesen oli intres bigwan long mi, mo hemia i pulum mi blong gohed gud long saed blong spirit. Mi stat blong ridim Baebol evri dei, mo stadi gud long ol buk blong yumi. Taswe mi baptaes long 8 Ogis 1969, taem mi gat 14 yia.

 Smoltaem afta we mi finisim skul, mi statem wok blong fultaem paenia. Mo blong sam wik nomo mi muv i go long ples we i gat moa nid, hemia long Pielavesi, we i stap klosap long medel blong Finlan.

Long Pielavesi, mi mitim wan gel we nem blong hem Sirkka, we biaen i kam waef blong mi. Mi rili laekem hem from we hem i gat tingting daon mo i lavem Jehova tumas. Hem i no traem blong kasem haenem o wantem ol sas samting. Mitufala i wantem tumas blong mekem bes blong mitufala long wok blong Jehova. Mo mitufala i rere blong mekem eni samting we hem i askem. Mitufala i mared long 23 Maj 1974. Stret afta we mitufala i mared, mitufala i no go samples blong spenem taem tugeta, be mitufala i go stret long Karttula, from we i nidim plante moa man blong prij long ples ya.

Stat long dei we mitufala i mared, Jehova i soemaot se bambae hem i lukaot gud long mitufala mo i givim samting we mitufala i nidim, sipos mitufala i putum Kingdom fasples. (Mat. 6:33) Eksampol, long Karttula, mitufala i no gat wan trak. Fastaem, mitufala i stap ron long baskel nomo. Be long ples ya, long taem blong kolkol, ples i kolkol we i kolkol. Mo blong prij long ol bigfala teritori, mifala i nidim wan trak. Be mitufala i no gat mane blong pem wan.

Biaen wan samting blong sapraes i hapen. Bigfala brata blong mi i kam visitim mitufala, mo hem i givim trak blong hem long mitufala. Hem i pem insurens finis, mo mitufala i nidim nomo blong pem bensin. Naoia, mitufala i gat trak we mitufala i nidim.

Jehova i soemaot long mitufala se hem i save holem promes blong hem blong givim samting we yumi nidim. Be yumi mas putum Kingdom fasples.

Taem mitufala i joenem Skul Blong Paenia long 1978, Raimo Kuokkanen a we i wan long ol tija blong mifala, i leftemap tingting blong mitufala blong fulumap pepa blong go long Skul Blong Gilead. So mitufala i stat blong lanem Inglis blong mitufala i naf blong go long skul ya. Be long 1980, bifo we mitufala i fulumap pepa blong go long skul ya, oli askem mitufala blong go wok long branj ofis blong Finlan. Long  taem ya, ol Betelaet oli no save go long Skul Blong Gilead. Be mitufala i wantem blong mekem wok blong Jehova long ples we hem i jusum, i no long ples we mitufala i wantem. Taswe, mitufala i go long branj ofis blong Finlan. Nating se i olsem, mitufala i gohed blong lanem Inglis, from mitufala i gat tingting ya se maet wan dei mitufala i save gat janis blong go long Gilead.

Sam yia biaen, Hed Kampani i talem se ol Betelaet oli save fulumap pepa blong go long Skul Blong Gilead. Ale, kwiktaem nomo mitufala i fulumap pepa ya. Hemia i no from we mitufala i no glad blong stap long Betel, be from we mitufala i wantem oli save se mitufala i rere nomo blong go long eni ples we i gat moa nid. Biaen oli akseptem mitufala mo mitufala i graduet long namba 79 klas blong Gilead long Septemba 1985. Mo oli sanem mitufala i go long Kolombia.

Taem mitufala i go long Kolombia, fastaem mitufala i wok long branj ofis. Mi traehad blong mekem bes blong mi long wok blong mi, be afta long wan yia, mi harem se mi wantem mekem wan narafala wok. Hemia faswan taem long laef blong mi we mi askem blong mekem wan defren wok. Taswe, oli sanem mitufala olsem ol misinari i go long taon blong Neiva, we i stap long rijen blong Huila.

Oltaem mi laekem wok blong prij. Mo taem mi stap paenia mi wan yet long Finlan, samtaem mi stat prij long eli moning go kasem let long sapa. Mo afta we mi mo Sirkka i mared, mitufala i gohed blong prij fuldei. Taem mitufala i prij long ol ples we i longwe, samtaem mitufala i slip nomo long trak. Hemia i mekem se long nekis dei, mitufala i save stat blong prij eli i bitim we mitufala i ron plante aoa blong go long teritori.

Naoia we mitufala i misinari, mitufala i gat strong tingting sem mak olsem bifo. Kongregesen blong mifala i gru, mo ol brata mo sista long Kolombia oli glad, oli lavlavem olgeta mo oli respektem olgeta.

Klosap long Neiva, i gat ol taon we i no gat ol Witnes long hem. Mi mi stap tingbaot se olsem wanem gud nius i save kasem ol ples ya. From we i gat faet, ol eria ya oli no sef nating long ol man we oli no blong ol taon ya. Taswe, mi prea se wan man blong ol taon bambae i kam wan Witnes. Mi stap tingting se man ya i mas laef long Neiva blong i lanem trutok. Taswe, mi prea tu se afta we hem i baptaes bambae hem i kam wan brata we i strong long saed blong spirit, mo i gobak long taon blong hem blong prij. Be mi sud save se Jehova i gat ol gudfala tingting moa i bitim mi.

Smoltaem afta, mi statem wan Baebol stadi wetem wan yang man we nem blong hem Fernando González. Hem i laef long Algeciras, hemia wan long ol taon ya we i no gat ol Witnes long hem. Fernando i stap travel bitim 50 kilometa blong kam long Neiva blong wok. Hem i rerem gud ol stadi blong hem, mo kwiktaem nomo hem i stat blong kam long ol miting. Stat long faswan wik we Fernando i stadi Baebol, hem i singaot ol narafala long taon blong hem mo i tokbaot long olgeta ol samting we hem i lanem.

Fernando i baptaes long Jenuware 1990, hemia sikis manis afta we hem i stat blong stadi Baebol. Smoltaem afta, hem i kam wan fultaem paenia. Naoia from we i gat wan man Algeciras  we i kam wan Witnes, i sef moa blong branj ofis i sanem ol spesel paenia i go long eria ya. Mo long Februari 1992, i gat wan kongregesen long taon ya.

?Olsem wanem? ?Fernando i prij nomo long taon blong hem? !Nogat! Afta we hem i mared, hem mo waef blong hem i muv i go long San Vicente del Caguán, wan narafala taon we i no gat ol Witnes long hem. Long ples ya, oli givhan blong stanemap wan Kongregesen. Mo long 2002, oli putumap Fernando blong i mekem wok blong eria elda, mo hem wetem waef blong hem Olga, tufala i gohed long wok ya kam kasem tede.

Long ekspiriens ya, mi lanem se taem yumi prea long Jehova mo tokbaot ol samting we i joen wetem ol tiokratik wok, yumi mas talem stret samting we yumi wantem. Hemia from we Jehova i save mekem samting we yumi no naf blong mekem. Antap moa, ol kakae we yumi havestem i blong hem, be i no blong yumi.—Mat. 9:38.

Long 1990, oli askem mitufala blong mekem wok blong eria elda. Mo faswan ples we oli sanem mitufala i go long hem, hemia taon ya Bogotá. Mitufala i fraet se bambae mitufala i no naf blong mekem wok ya, from we mi mo waef blong mi i no gat gudhan long eni samting. Mo tu, mitufala i no lan blong laef long wan taon we i bisi tumas. Be Jehova i holem promes blong hem we i stap long Filipae 2:​13, we i se: “God . . . nao i mekem se yufala i wantem wok mo i givim paoa long yufala blong mekem olgeta samting we hem i laekem.”

Biaen, oli sanem mitufala i go long eria blong Medellín, hemia taon ya we mi bin tokbaot long stat. I tru se i gat plante faet long ples ya, be ol man oli lan long hem finis, taswe oli no moa fraet. Wan taem, mi stap insaed long wan haos, mi stap mekem wan Baebol stadi, mo mi harem we ol man oli stap sut long masket aotsaed. Mi mi rere blong go daon long floa, be Baebol stadi blong mi i gohed nomo blong rid we i no fraet nating. Afta we hem rid finis, hem i talem long mi se bambae hem i go aotsaed. Smoltaem afta, hem i kambak wetem tu pikinini mo i se: “Sore be mi mas go tekem ol pikinini blong mi.”

I gat sam narafala taem tu we mifala i stap long denja. Wan taem, taem mifala i stap prij long ol haos wanwan, waef blong mi i ron i kam long mi we i fraet we i fraet, mo i talem se wan man i sutum hem. Hemia i mekem mi tu mi fraet tumas. Be samtaem biaen, mifala i faenemaot se man ya i no minim blong sutum Sirkka, be hem i stap sutum wan man we i stap pas klosap long hem.

Sloslo mitufala i no moa fraet. Taem mitufala i luk se ol Witnes long ples ya oli stanap strong long ol sem situesen olsem mitufala o we i had moa, hemia i leftemap tingting blong mitufala. Mitufala i stap tingbaot se sipos Jehova i halpem olgeta, bambae hem i halpem mitufala tu. Oltaem mitufala i folem advaes blong ol elda long ples ya, mitufala i lukaot gud mo lego evri samting long han blong Jehova.

I tru, sam situesen oli no denja olsem we mitufala i tingbaot. Wan taem, taem mi stap insaed  long haos blong wan man we mi go visitim hem, mi harem olsem se i gat tu woman i stap rao aotsaed. Mi mi no wantem luk tufala, be man blong haos i talem long mi blong kam stanap long vranda. Nao, mi sek se noes we mi harem, hem i noes blong tu parot we tufala i stap aktem voes blong ol neba.

Long 1997, oli putumap mi mi kam wan tija blong Ministeriol Trening Skul. b Oltaem mi glad blong joen long ol tiokratik skul. Be, mi neva tingbaot se wan dei bambae mi kam wan tija.

Biaen, mi mekem wok blong distrik elda. Be taem oli talem se bambae i no moa gat distrik elda, mi mekem wok blong eria elda bakegen. Mi glad tumas blong wok olsem wan tija mo eria elda blong bitim 30 yia. Ol wok ya i mekem se mi kasem plante blesing. Be i no isi oltaem. Bambae mi tokbaot from wanem mi talem olsem.

Mi mi wan man we fasin blong mi i strong. Mo hemia i halpem mi taem mi fesem ol hadtaem. Be samtaem, mi strong tumas taem mi stap traehad blong stretem ol samting long kongregesen. Wan taem, mi fosem ol narafala blong oli mas soem lav mo no mekem i strong tumas long ol narafala. Be long taem ya, mi tu mi no soemaot tufala fasin ya.—Rom 7:​21-23.

Samtaem tingting blong mi i foldaon from ol slak fasin blong mi. (Rom 7:24) Wan taem, mi prea long Jehova mo mi talem long hem se i moa gud we mi no moa mekem wok blong misinari mo mi gobak long Finlan. Be long naet blong hem, mi go long miting. Mo mi harem wan tok we i leftemap tingting blong mi, mo i mekem mi gat strong tingting blong gohed long wok blong mi, mo wok had blong winim ol slak fasin blong mi. Kam kasem tede, taem mi tingbaot olsem wanem Jehova i bin ansarem prea blong mi, hemia i tajem hat blong mi. Mi glad tumas se Jehova i halpem mi blong winim ol slak fasin blong mi.

Mi mo Sirkka i talem bigfala tangkiu long Jehova from hem i mekem se mitufala i save yusum laef blong mitufala blong mekem wok blong hem fultaem. Mo tu, mi talem bigfala tangkiu long Jehova from hem i givim wan waef we i lavem mi, mo i wok strong wetem mi long olgeta yia ya.

I no longtaem bambae mi gat 70 yia, mo bambae mi no moa mekem wok blong eria elda. Nating se i olsem, mi no harem nogud. ?From wanem? From mi bilif strong se samting we i givim ona long Jehova, hemia se yumi gat stret tingting mo yumi presem hem from we yumi lavem hem tumas mo yumi wantem talem tangkiu long hem. (Maeka 6:8; Mak 12:​32-34) Blong givim ona long Jehova, i no nid blong yumi gat ol impoten wok.

Taem mi luklukbak long ol wok we mi bin mekem, mi luksave se mi no kasem ol wok ya from we mi gud moa i bitim ol narafala, o from mi gat save. Be defren olgeta, Jehova i givim ol wok ya long mi from hem i kaen tumas long mi. Mo mi kasem ol wok ya nating se mi gat ol slak fasin. Mi save se mi naf blong mekem gud ol wok ya, from we Jehova i halpem mi. Mo hemia nao from wanem mi talem se Jehova i halpem mi blong winim ol slak fasin blong mi.—2 Kor. 12:9.