1, 2. (1) ?Olsem wanem yumi save se ol man oli save kam fren blong God? (2) ?Bambae yumi tokbaot wanem long stadi ya?

STAT long taem we yumi bon kasem taem we yumi ded, yumi nidim we narafala i lavem yumi. Yumi evriwan i nidim lav. I no jes lav ya we wan boe i gat long wan gel, be hem i lav we i pulum yumi blong fren gud wetem narafala. Be yumi nidim we Jehova i lavem yumi, hemia nao samting we i moa impoten. Plante man oli ting se yumi no save kam klosap long God mo fren gud wetem hem, from we hem i hae tumas mo yumi no save luk hem. Be hemia i no tru.

² Baebol i tokbaot ol man we oli fren gud wetem God. I gud yumi folem eksampol blong olgeta. ?From wanem? From we fasin blong fren gud wetem God hem i impoten samting long laef blong yumi. Taswe, i gud yumi luk eksampol blong Ebraham. (Ridim Jemes 2:23.) ?Olsem wanem Ebraham i kam fren blong God? Fasin blong hem blong fren gud wetem God i stanap long bilif, mo ol man oli stap singaot hem se ‘stamba  [“papa”, NW] blong olgeta we oli bilif long God.’ (Rom 4:11) Taem yu luk eksampol blong hem, i gud yu tingbaot ol kwestin ya se, ‘?Olsem wanem mi save folem bilif blong Ebraham? ?Olsem wanem mi save mekem fasin blong mi blong fren gud wetem Jehova i kam strong moa?’

3, 4. (1) Yu tokbaot bigfala samting we i traem bilif blong Ebraham. (2) ?From wanem Ebraham i rere nomo blong kilim Aesak?

³ Yu traem tingbaot. Ebraham i gat samwe long 125 yia mo i stap wokbaot sloslo i go antap long wan hil. ^[1] (Yu luk ol not, pej 8.) Pikinini blong hem Aesak i gat samwe long 25 yia, i stap wokbaot biaen long hem mo i karem ol faea wud. Mo Ebraham i karem wan naef mo ol samting blong statem faea. I had long hem blong wokbaot long taem ya. Hemia i no min se hem i no save wokbaot. Hem i strong yet mo i gat paoa. Be hem i faenem i had from we Jehova i askem hem blong i kilim mo givim pikinini blong hem olsem wan sakrefaes.—Jenesis 22:1-8.

⁴ Hemia wan bigfala samting we i traem bilif blong Ebraham. Sam man oli talem se God i mekem i strong tumas long Ebraham, taem hem i askem long Ebraham blong i kilim pikinini blong hem. Mo sam narafala oli talem se Ebraham i mekem olsem, from we hem i no laekem boe blong hem. Ol man oli talem olsem from we oli no bilif long God, mo oli no save se trufala bilif i olsem wanem. (1 Korin 2:14-16) Ebraham i no mekem samting olbaot. Hem i obei long God, from we hem i gat bilif we i tru. Hem i save se Jehova bambae i neva askem hem blong mekem wan samting we i save mekem hem i harem nogud blong olwe. Ebraham i save se sipos hem i obei, Jehova bambae i blesem hem mo boe blong hem. ?Wanem i mekem se Ebraham i gat strong bilif olsem? Samting we i givhan long hem hemia, save we hem i gat long God, mo ol samting we oli hapen long laef blong hem.

5. ?Olsem wanem Ebraham i save Jehova? ?Save ya i givhan long hem olsem wanem?

⁵ Save we hem i gat long God. Ebraham i gruap long taon ya Uru. Ol man long ples ya oli wosipim ol giaman god, mo papa blong hem tu i wosipim ol god ya.  (Josua 24:2) Taswe, ?olsem wanem Ebraham i save Jehova? Baebol i talem se Sem we i pikinini blong Noa, hem i wan famle blong Ebraham. Mo hem i laef kasem we Ebraham i gat 150 yia. Sem i wan man we i gat strong bilif, mo maet hem i tokbaot Jehova long ol famle blong hem. Long rod ya nao maet Ebraham i kasemsave long Jehova. Samting we Ebraham i lanem i mekem hem i lavem Jehova, mo save ya i mekem bilif blong hem i strong.

6, 7. ?Olsem wanem ol samting we oli hapen long laef blong Ebraham oli mekem bilif blong hem i strong?

⁶ Ol samting we oli hapen long laef blong hem. Sam man oli talem se, samting we man i stap tingbaot i save pulum man blong gat filing, mo filing i pulum man blong tekem aksen. Hemia nao samting we i hapen long Ebraham, we i mekem hem i gat strong bilif. Save we Ebraham i gat, i pulum hem blong i ona gud long “Hae God we i hae we i hae, we i mekem skae mo graon.” (Jenesis 14:22) Long Baebol, fasin ya blong ona gud long God, hem i fasin ya we man i ‘fraetgud long God’. (Hibrus 5:7, NW) Taswe, taem yumi fraetgud long God, yumi save fren gud wetem hem. (Ol Sam 25:14) Fasin ya nao i pulum Ebraham blong i obei long Jehova.

⁷ God i talem long Ebraham mo Sera blong tufala i aot long Uru mo go stap long wan narafala kantri. Long taem ya, tufala i olfala finis mo tufala i mas wokem haos tapolen mo stap long hem, long ful laef blong tufala. Nating se Ebraham i save se bambae oli fesem ol denja, be hem i gat strong tingting blong obei long Jehova. From we hem i obei, God i blesem hem mo i lukaotgud long hem. Wan eksampol, hemia taem ol man oli kam tekemaot Sera, Ebraham i fraet se bambae oli kilim hem tu. Be plante taem, Jehova i mekem wan merikel blong lukaotgud long tufala. (Jenesis 12:10-20; 20:2-7, 10-12, 17, 18) Ol samting we Jehova i mekem long taem ya, oli mekem bilif blong Ebraham i kam strong moa.

8. ?Ol save mo ol samting we God i mekem long ol man blong hem oli stap wea? ?Olsem wanem ol save ya oli mekem bilif blong yumi i strong?

⁸ ?Olsem wanem? ?Yumi save kam fren blong Jehova? !Yes, yumi save kam fren blong hem! Be, yumi mas savegud Jehova, olsem Ebraham. Nao bambae yumi gat moa save long God mo luk olsem wanem hem i stap lukaotgud long yumi. Tede, yumi gat plante long ol save ya i bitim wanem we Ebraham i gat bifo. (Daniel 12:4; Rom 11:33) Baebol i tokbaot plante save blong ‘God ya we i mekem skae mo graon.’ Ol save we yumi lanem oli pulum yumi blong lavem Jehova mo ona gud long hem. Fasin blong yumi blong lavem mo ona long God, i pulum yumi blong obei long hem.  Taem yumi mekem olsem, bambae yumi luk we hem i lukaotgud long yumi mo i blesem yumi mo hemia i mekem bilif blong yumi i strong. Taem yumi mekem wok blong Jehova long ful laef blong yumi, yumi save harem gud bigwan mo yumi gat pis. (Ol Sam 34:8; Ol Proveb 10:22) Taem yumi kasemsave moa long Jehova mo yumi luk olsem wanem hem i stap blesem yumi, hemia bambae i mekem fasin blong yumi blong fren gud wetem hem i kam strong moa.

9, 10. (1) ?Yumi mas mekem wanem blong fasin blong yumi blong fren gud wetem narafala i kam strong? (2) ?Ebraham i soemaot olsem wanem se hem i lukaotgud long fasin blong hem blong fren gud wetem Jehova?

⁹ Fasin ya we man i fren gud wetem narafala, i olsem wan sas presen. (Ridim Ol Proveb 17:17.) Hem i no olsem wan sas botel blong putum flaoa, we oli yusum nomo blong flasem ples. Be, hem i olsem wan naesfala flaoa we man i mas wotarem mo lukaotgud long hem. Ebraham i lukaotgud long fasin blong hem blong fren gud wetem Jehova. ?Hem i mekem samting ya olsem wanem?

¹⁰ Oltaem Ebraham i fraetgud long God mo i obei long hem. Taem hem i aot i go long Kenan wetem famle mo ol wokman blong hem, oltaem hem i letem Jehova i givhan long hem long ol desisen blong hem. Taem we Ebraham i gat 99 yia, hemia wan yia bifo we Aesak i bon, Jehova i askem hem blong mekem sakomsaes long olgeta man we oli stap wetem hem. ?Olsem wanem? ?Ebraham i traem lukaot rod blong no obei long Jehova? Nogat. Hem i trastem Jehova mo “long sem dei ya nomo,” hem i mekem samting we Jehova i talem long hem—Jenesis 17:10-14, 23.

11. ?From wanem Ebraham i wari tumas long ol man long taon blong Sodom mo Gomora? ?Jehova i givhan long hem olsem wanem?

¹¹ Fasin blong Ebraham blong fren gud wetem Jehova, i kam strong moa from we oltaem hem i obei long Jehova. Hem i no fraet blong tokbaot eni samting long Jehova, mo tu hem i no fraet blong askem eni kwestin. Eksampol, taem Jehova i talemaot se bambae hem i spolem taon blong Sodom mo Gomora, Ebraham i wari tumas. ?From wanem? From we hem i fraet se bambae ol gudfala man oli ded wetem ol rabis man. Hem i wari from pikinini blong brata blong hem Lot mo ol famle blong hem we oli stap long Sodom. Taswe, hem i tokbaot ol wari blong hem long Jehova, from we hem i trastem Jehova we i bigfala ‘man blong jajem olgeta man blong wol.’ Jehova i gat longfala tingting long fren blong hem mo i soemaot long hem se, Hem i gat sore. Jehova i talem long hem se oltaem hem i sevem ol gudfala man bifo we hem i tekem aksen blong panisim ol rabis man.—Jenesis 18:22-33.

12, 13. (1) ?Olsem wanem ol save mo ol samting we oli hapen long laef blong Ebraham oli givhan long hem? (2) ?Ebraham i soemaot olsem wanem se hem i bilif strong long Jehova?

¹² I klia nomo se ol save blong God we  Ebraham i kasem mo ol samting we oli hapen long laef blong hem, oli givhan long hem blong i fren gud wetem Jehova. Taswe, taem Jehova i askem long Ebraham blong i kilim boe blong hem mo givim olsem wan sakrefaes, Ebraham i tingbaot ol gudfala fasin blong Jehova. Hem i trastem Jehova, mo hem i save se Jehova i gat longfala tingting, i gat sore, mo i lukaot gud long man. Ebraham i sua fulwan se Jehova i no save mekem wan nogud samting. ?From wanem yumi talem olsem?

¹³ Bifo we Ebraham i lego tufala wokman blong hem, hem i talem se: “Yutufala i stap wet long ples ya fastaem, wetem dongki ya. Mi wetem Aesak, bambae mitufala i go long ples ya longwe, blong mekem wosip. Nao biaen, bambae mitufala i kambak long yutufala bakegen.” (Jenesis 22:5) ?Ebraham i minim wanem taem hem i talem tok ya? ?Hem i stap giaman nomo se bambae hem i kambak wetem Aesak? Nogat. Baebol i talem se Ebraham i save se Jehova i naf blong mekem Aesak i laef bakegen. (Ridim Hibrus 11:19.) Mo tu, Ebraham i save se Jehova i givim paoa long hem blong gat wan pikinini boe, nating se hem mo Sera tufala i olfala finis. (Hibrus 11:11, 12, 18) Hem i luksave se Jehova i naf blong mekem eni samting. Ebraham i no save se wanem samting bambae i hapen long dei ya. Be hem i bilif se Jehova bambae i mekem boe blong hem i laef bakegen, blong mekem olgeta promes blong Jehova oli kamtru. Hemia nao from wanem ol man oli singaot Ebraham, se ‘stamba [“papa”, NW] blong olgeta we oli bilif long God.’

14. ?Wanem i mekem se samtaem yu faenem i had blong prij? ?Olsem wanem eksampol blong Ebraham i save givhan long yu?

¹⁴ Tede, Jehova i no askem yumi blong kilim pikinini blong yumi mo givim i go long hem olsem wan sakrefaes, be hem i wantem se yumi obei long hem. Samtaem yumi no kasemsave from wanem Jehova i givim ol loa, no maet yumi harem se i had tumas blong folem. ?Yu yu gat tingting olsem? Samfala maet oli faenem i had blong prij from we oli sem blong toktok long ol man we oli no save. Sam narafala oli fraet se ol fren blong olgeta long wok no long skul bambae oli jikim olgeta. (Eksodas 23:2; 1 Tesalonaeka 2:2) Sipos yu mas mekem wan samting we maet i had tumas blong mekem, i gud yu tingbaot eksampol blong Ebraham. Hem i bilif strong long Jehova mo i no fraet blong obei long hem. Taem yumi tingting dip long eksampol blong ol gudfala man we oli gat strong bilif, samting ya bambae i pulum yumi blong folem fasin blong olgeta, nao yumi save kam klosap moa long Fren blong yumi, Jehova.—Hibrus 12:1, 2.

15. ?From wanem Ebraham i no harem nogud blong obei long Jehova?

¹⁵ ?Olsem wanem? ?Ebraham i harem nogud samtaem from we hem i stap obei long Jehova? Nogat. Baebol i talem se Ebraham i “gat gudfala laef, mo taem hem  i ded, hem i olfala we i olfala.” (Jenesis 25:8) Taem Ebraham i gat 175 yia, hem i tingbaot we hem i gat wan gudfala laef. ?From wanem? From we fasin blong hem blong fren gud wetem Jehova i impoten long laef blong hem. Nating se Ebraham i gat wan gudfala laef, be bambae hem i laef bakegen long fiuja.

16. ?Bambae Ebraham i harem gud long wanem samting long Paradaes?

¹⁶ Baebol i talem se Ebraham “i stap wet blong go long wan taon we fandesen blong hem i save stap oltaem nomo. Taon ya, God i mekem ol plan blong hem, mo i wokem finis i stap.” (Hibrus 11:10) Ebraham i bilif se wan dei bambae hem i luk taon ya, hemia Kingdom blong God, we bambae i rulum fulwol. Hem bambae i luk samting ya i kamtru. Yu traem tingbaot. Ebraham bambae i harem gud tumas blong laef long paradaes mo bambae hem i gohed blong fren gud wetem Jehova. Bambae hem i glad blong save se bilif blong hem, i givhan long ol man blong Jehova. Long Paradaes bambae hem i kasemsave se sakrefaes we hem i mekem long Hil blong Moria, i pija blong wan impoten samting. (Hibrus 11:19) Ebraham i harem nogud bigwan blong kilim boe blong hem olsem wan sakrefaes. Be long taem ya, hem bambae i kasemsave se filing ya we hem gat, i givhan long plante man blong oli kasemsave filing we Jehova i gat, taem hem i givim pikinini blong hem, Jisas Kraes, blong sevem ol man. (Jon 3:16) Eksampol blong Ebraham i givhan long yumi blong tinghae long sakrefaes blong Jisas, we i soemaot bigfala lav we Jehova i gat long yumi.

17. ?Yu yu gat strong tingting blong mekem wanem? ?Bambae yumi tokbaot wanem long nekis stadi?

¹⁷ I gud yumi gat strong tingting blong folem bilif blong Ebraham. Blong mekem olsem, yumi mas savegud Jehova mo tingbaot ol gudfala samting we hem i mekem long laef blong yumi. Taem yumi gohed blong save gud Jehova mo obei long hem, bambae yumi luk we hem i blesem yumi mo i lukaotgud long yumi. (Ridim Hibrus 6:10-12.) !Yumi wantem fren gud wetem Jehova blong olwe! Long nekis stadi, bambae yumi tokbaot tri eksampol blong ol man bifo we oli fren gud wetem God.