1-3. (1) ?From wanem yumi save kam fren blong Jehova? (2) ?Bambae yumi tokbaot ol stori blong hu long stadi ya?

BAEBOL i talem tri taem se Ebraham i fren blong God. (2 Kronikel 20:7; Aesea 41:8; Jemes 2:23) Hem nomo we Baebol i tokbaot hem se, fren blong God. ?Hemia i min se yumi no save kam fren blong God? Nogat. Baebol i soemaot se yumi evriwan i save gat janis ya blong kam ol fren blong God.

² I gat plante stori long Baebol we oli tokbaot ol man mo woman we oli fraetgud long Jehova, oli bilif long hem, mo oli fren wetem hem. (Ridim Ol Sam 25:14.) Aposol Pol i tokbaot olgeta ya se ‘oli ol witnes blong Jehova we oli plante we oli plante.’ Olgeta ya oli ol fren blong God.—Hibrus 12:1.

³ I gud yumi tokbaot tri fren blong Jehova we Baebol i tokbaot olgeta. Faswan, hemia Rut wan wido blong Moab. Sekenwan, Hesekia wan gudfala king blong Juda. Mo nambatri, hemia Meri we i mama blong Jisas. Bambae yumi luk fasin blong olgeta blong fren gud wetem God, mo olsem wanem yumi save folem fasin blong olgeta.

4, 5. ?Wanem impoten desisen we Rut i mas mekem? ?From wanem i no isi long hem blong mekem desisen ya? (Yu luk pija long stat blong stadi.)

⁴ Naomi, Rut mo Opa, oli aot long Moab mo oli stap go long Isrel. Taem oli stap go, Opa i tanemraon mo i gobak long Moab. Be Naomi i gat strong tingting blong gobak long ples blong hem long Isrel. ?Be olsem wanem long Rut? Hem i mas mekem wan impoten desisen. ?Olsem wanem? ?Bambae hem i gobak long ol famle blong hem long Moab? ?No, bambae hem i folem Naomi i go long Betlehem?—Rut1:1-8, 14.

⁵ Ol famle blong Rut oli stap long Moab. Mo oli save lukaot gud long hem sipos hem i gobak. Hem i save finis lanwis blong olgeta mo fasin blong laef blong olgeta. Naomi i no save talemaot stret long Rut se laef long Betlehem bambae i olsem wanem. Mo hem i wari se bambae hem i no save faenem wan hasban blong Rut. Taswe, Naomi i talem long Rut blong i gobak long Moab. Olsem we yumi luk, Opa i stap ‘gobak long ol man ples blong hem, mo long ol god blong hem.’ (Rut 1:9-15) Be Rut, hem i jusum blong no gobak long ol man ples blong hem mo wosipim ol giaman god blong olgeta.

6. (1) ?Rut i mekem wanem waes desisen? (2) ?From wanem Boas i glad tumas long Rut?

⁶ Maet Naomi no boe blong hem we i man blong Rut, tufala nao i tokbaot Jehova long Rut. Hem i kasemsave se Jehova i no olsem ol god blong Moab. Hem i wosipim Jehova from we hem i lavem Hem. Taswe, Rut i mekem wan desisen we i waes. Hem i talem long Naomi se: “Ol man ples blong yu bambae oli man ples blong mi, mo God blong yu bambae i God blong mi.” (Rut 1:16) Fasin blong Rut blong lavem Naomi i gud tumas. Be samting we i spesel, hemia se Rut i lavem Jehova. Mo Boas i glad tumas long samting ya, nao i talem long Rut se ‘yu stap luk long Jehova, blong i lukaot gud long yu.’ (Ridim Rut 2:12.) Ol toktok we Boas i talem, i mekem yumi tingbaot wan pikinini blong faol we i go haed aninit long wing blong mama blong hem taem i gat denja. (Ol Sam 36:7; 91:1-4) Long sem fasin, Jehova i lukaot gud long Rut mo i blesem hem from bilif blong hem. Rut i glad tumas long desisen we hem i mekem.

7. ?Wanem i save givhan long olgeta we oli fraet blong givim laef blong olgeta long Jehova?

⁷ Plante man oli save trutok, be oli no wantem we Jehova i lukaot gud long olgeta. Oli fraet blong givim laef blong olgeta i go long hem mo tekem baptaes. Sipos yu gat sem tingting olsem, i gud yu save risen from wanem yu fraet blong tekem baptaes. Mo yu mas tingbaot se evri man oli mas jusum wan god we oli wantem wosipim. (Josua 24:15) Be i waes blong wosipim trufala God nomo. Taem yu givim laef blong yu i go long Jehova, yu soemaot se yu bilif strong se hem bambae i lukaot gud long yu. Mo hem bambae i givhan long yu blong mekem wok blong hem, nating se yu kasem trabol. Hemia nao samting we God i mekem long Rut.

8. ?Laef blong Hesekia i olsem wanem? Yu tokbaot.

⁸ Laef blong Hesekia i defren olgeta long laef blong Rut. Hem i blong Isrel, wan neson we i blong God. Be i no evri man Isrel we oli mekem samting we Jehova i wantem. King Ahas, we hem i papa blong Hesekia, hem i wan rabis king. Hem i spolem  ol samting long haos prea blong God mo hem i pulum ol man Juda blong oli mekem wosip long ol giaman god. Mo tu, Ahas i bonem sam brata blong Hesekia long faea blong mekem sakrefaes long ol giaman god. Hesekia i gat wan rabis laef taem hem i smol.—2 King 16:2-4, 10-17; 2 Kronikel 28:1-3.

9, 10. (1) ?From wanem i isi nomo blong Hesekia i agensem Jehova? (2) ?From wanem yumi no mas agensem God? (3) ?From wanem i no stret blong talem se laef blong famle blong yumi nao i mekem se yumi save kam wan gudfala man no wan rabis man?

⁹ Rabis eksampol blong Ahas i save pulum Hesekia blong gat ol rabis fasin mo agensem Jehova. Tede, sam man oli talem se Jehova “i stap spolem olgeta,” nating se trabol we oli kasem i no olsem blong Hesekia. Mo tu oli tok agensem ogenaesesen blong Jehova. (Ol Proveb 19:3) Maet samfala oli ting se ol nogud fasin blong famle blong olgeta, i save pulum olgeta blong oli gat ol nogud fasin. (Esikel 18:2, 3) ?Olsem wanem? ?Ol tingting ya oli tru?

¹⁰ Stori blong Hesekia i soemaot se ol tingting ya, oli no tru. I no gat wan risen nating blong yumi tok agensem Jehova. Hem i no save spolem man. (Job 34:10) I tru, ol papa mo mama nao oli save tijim ol pikinini blong olgeta blong mekem samting we i gud mo samting we i nogud. (Ol Proveb 22:6; Kolosi 3:21) Be hemia i no min se laef blong famle nao i mekem se yumi kam wan gudfala man no wan rabis man. ?From wanem? From we Jehova i givim presen ya we yumi fri blong jusum samting, we i min se yumi save jusum blong mekem samting we i gud no samting we i nogud. (Dutronome 30:19) ?Olsem wanem Hesekia i yusum nambawan presen ya?

11. ?Wanem i mekem se Hesekia i kam wan long ol nambawan king blong Juda?

¹¹ Hesekia i kam wan long ol nambawan king blong Juda, nating se papa blong hem i wan long ol rabis king blong Juda. (Ridim 2 King 18:5, 6.) Hem i jusum blong no folem rabis eksampol blong papa blong hem. Hem i lesin gud long ol profet blong Jehova, olsem Aesea, Maeka, mo Hosea. Hem i tingting gud long ol advaes we oli givim long hem mo i mekem samting we oli talem. Samting ya i pulum hem blong i stretem ol nogud samting we papa blong hem i mekem. Hem i stanemap trufala wosip bakegen, hem i askem God blong i  fogivim sin blong ol man, mo hem i brebrekem ol aedol long ol ples we hem i rul long hem. (2 Kronikel 29:1-11, 18-24; 31:1) Hesekia i soemaot se hem i no fraet mo i bilif strong long Jehova, taem king Senakerib blong Asiria i kam blong mekem faet long olgeta. Hesekia i trastem Jehova blong i lukaot gud long olgeta mo hem i leftemap tingting blong ol man blong hem. (2 Kronikel 32:7, 8) I gat wan taem we Hesekia i kam praod tumas, be taem Jehova i stretem hem, hem i tanem tingting blong hem. (2 Kronikel 32:24-26) Hesekia i soemaot wan nambawan eksampol blong yumi folem. Hem i no letem laef blong famle blong hem i spolem hem. Be hem i soemaot se hem i fren blong Jehova.

12. ?Plante man tede oli soemaot olsem wanem se oli fren blong Jehova olsem Hesekia?

¹² Tede long wol, ol man oli no kea long narafala mo oli no moa lavem narafala. Mo plante pikinini oli gruap long ol famle we papa mo mama blong olgeta i no lavem olgeta mo kea gud long olgeta. (2 Timoti 3:1-5) Plante Kristin oli gat wan laef olsem, be oli jusum blong kam fren blong Jehova. Taem oli mekem olsem, oli soemaot se oli no letem laef blong famle blong olgeta i gat paoa long fasin we bambae oli gat long fiuja, olsem Hesekia. Jehova i givim presen ya we yumi fri blong jusum samting, mo yumi save jusum blong mekem wok blong hem mo blong ona long hem, olsem we Hesekia i mekem.

13, 14. ?Wanem sam samting we maet Meri i wari long hem? ?Hem i talem wanem afta we Gabriel i toktok long hem?

¹³ Meri i wan yang gel we i gat tingting daon mo i fren gud wetem Jehova. Hem i laef plante yia afta long rul blong Hesekia. Meri i kasem wan spesel wok, hemia blong bonem Pikinini we i blong God mo blong lukaotgud long hem. Jehova i lavem mo i trastem Meri, taswe hem i givim nambawan blesing ya long hem. ?Meri i mekem wanem taem Jehova i givim wok ya long hem?

¹⁴ Plante taem yumi stap tokbaot blesing ya we Meri i kasem. ?Be wanem sam samting we maet Meri i wari long hem? Yu traem tingbaot. Taem enjel Gabriel i talem long Meri se bambae hem i gat bel we hem i no slip wetem man, hem i no tokbaot samting ya long ol famle mo ol man raonabaot long hem. Sipos Meri i gat bel, ?bambae ol man ya oli gat wanem tingting? ?Olsem wanem Meri bambae i eksplenem samting ya long Josef? Mo tu, hem i gat bigfala wok blong lukaot long pikinini blong God. Yumi no save evri samting we oli mekem Meri i wari long taem ya. Be yumi save samting we Meri i mekem afta we Gabriel i toktok long hem. Meri i talem  se: “Mi mi gel blong wok nomo blong [Jehova]. Mi wantem blong i kamtru long mi olsem we yu yu talem.”—Luk 1:26-38.

15. ?From wanem Meri i gat strong bilif?

¹⁵ Meri i gat strong bilif. Hem i olsem wan slef gel, we i rere nomo blong mekem eni samting we hem i mas mekem. Hem i trastem Jehova se bambae i lukaotgud long hem. Yumi evriwan i no bon wetem fasin ya blong bilif. Be yumi save gat bilif sipos yumi askem God blong i givhan long yumi. ?Meri i mekem wanem blong gat strong bilif? (Galesia 5:22; Efesas 2:8) Hem i wok had blong mekem bilif blong hem i kam strong moa. ?Olsem wanem yumi save samting ya? I gud yumi tokbaot fasin blong Meri blong lesin gud mo blong toktok.

16. ?Wanem i soemaot se Meri i lesin gud?

¹⁶ Meri i lesin gud. Baebol i talem se yumi ‘mas rere oltaem blong lesin, be yumi no mas hareap blong toktok.’ (Jemes 1:19) Meri i gat gudfala fasin blong lesin gud. Baebol i talem se Meri i lesin gud long ol samting we hem i harem, speseli ol save we oli kamaot long Jehova. Hem i tekem taem blong tingting dip long ol impoten save ya. Wan eksampol, taem Jisas i bon, ol man blong lukaot sipsip oli kam luk hem mo oli talem mesej we wan enjel i talemaot long olgeta. Mo long taem ya Meri i lesin gud long mesej ya. Biaen, taem Jisas i gat 12 yia, hem i talem wan tok we i mekem Meri i sapraes tumas. Long ol taem ya, Meri i lesin gud, mo i stap tingting dip long ol samting we hem i harem.—Ridim Luk 2:16-19, 49, 51.

17. ?Yumi lanem wanem long fasin blong Meri blong toktok?

¹⁷ Samting we Meri i tokbaot. Baebol i no tokbaot plante samting we Meri i talem. Sam long ol toktok we hem i talem, oli stap long Luk 1:46-55. Ol toktok ya oli soemaot se Meri i save gud Hibru haf blong Baebol. ?Olsem wanem yumi save samting ya? Ol toktok blong hem oli sem mak long sam toktok we oli stap long prea blong Hana, mama blong Samuel. (1 Samuel 2:1-10) I luk olsem se Meri i yusum ol Tok blong Baebol klosap 20 taem long toktok blong hem. Hemia i soemaot se Meri i wantem tumas blong tokbaot long ol narafala, ol save we hem i lanem long gudfala Fren blong hem, Jehova.

18. ?Yumi save folem eksampol blong Meri olsem wanem?

¹⁸ Samtaem Jehova i givim sam wok long yumi we maet yumi harem se i had tumas blong mekem, olsem Meri. Be, i gud we yumi folem eksampol blong Meri blong gat tingting daon mo yumi glad blong mekem eni wok we Jehova i givim long yumi, mo yumi trastem hem blong i givhan long yumi. Mo tu yumi save folem eksampol blong Meri blong gat strong bilif, taem yumi lesin gud mo tingting dip long ol samting we yumi lanem long Jehova. Nao bambae yumi glad tumas blong talemaot long ol narafala ol samting we yumi lanem.—Ol Sam 77:11, 12; Luk 8:18; Rom 10:15.

19. ?Bambae yumi kasem wanem blesing sipos yumi folem gudfala eksampol blong ol man blong God bifo we oli gat strong bilif?

¹⁹ I klia nomo se Rut, Hesekia mo Meri oli ol fren blong Jehova, sem mak olsem Ebraham. Olgeta oli joen long grup blong ‘ol witnes we oli plante we oli plante,’ we olgeta tu oli gat janis ya blong kam ol fren blong God. I gud yumi gohed blong folem gudfala eksampol blong ol man blong God bifo, we oli gat strong bilif. (Hibrus 6:11, 12) Sipos yumi mekem olsem, bambae yumi kasem nambawan blesing ya blong fren gud wetem Jehova blong olwe.