MI MI bon long yia 1926 long Crooksville, Ohio, long Amerika. Mifala eit long famle. Papa mo mama blong mi tufala i no intres long ol skul, be oltaem tufala i talem long mifala blong go long jos. Mi stap go long Metodis Jos. Taem mi gat 14 yia, pasta i givim wan presen long mi from we mi go long jos evri Sande blong wan ful yia.

Long taem ya, i gat wan woman we i slip klosap long mifala, nem blong Margaret Walker. Hem i wan Witnes blong Jehova, mo hem i stat blong tokbaot Baebol long mama blong mi. Wan dei, mi wantem joen wetem tufala, be mama blong mi i no wantem se mi spolem stadi blong tufala. Ale, hem i talem long mi blong go afsaed long haos. Be mi gohed nomo blong lesin long storian blong tufala. Nao wan taem Margaret i askem long mi se, “?Yu save wanem nem blong God?” Mi girap mi talem long hem se, “Evri man oli save se nem blong hem, God.” Afta hem i talem long mi se, “Yu karem Baebol blong yu mo yu ridim Ol Sam 83:18.” Taem mi ridim, mi faenemaot se nem blong God hem i Jehova, mi glad tumas, nao mi spid i go long ol fren blong mi mo mi talem long olgeta se, “Taem yufala i gobak long haos, yufala i ridim Ol Sam 83:18, blong luk nem blong God.” Ating bambae yu talem se long taem ya mi stat blong prij finis.

Biaen, mi stadi Baebol mo mi baptaes long yia 1941. I no longtaem i pas, ol brata oli askem long mi blong mi lidim buk stadi blong kongregesen. Long taem ya, mi askem long mama mo ol brata mo sista blong mi blong oli kam joen long buk stadi, mo afta oli kam. Be, papa blong mi i no intres nating.

Mi kasem plante wok long kongregesen mo mi karem plante buk we ol Witnes oli wokem i kam long haos. Wan dei, papa i kros long mi mo i talem long mi se: “?Yu luk ol buk blong yu ya? Mi wantem se yu karemaot long haos ya, mo yu tu yu aot long ples ya.” Long taem ya, mi aot long haos mo mi go stap klosap long Zanesville, Ohio. Be sam samtaem mi kambak long haos blong leftemap tingting blong famle blong mi.

Oltaem papa i traem blokem mama blong i no go long ol miting. Samtaem taem mama i stap wokbaot i go, be papa i resis i go mo i pulum hem i kambak long haos. Be mama i pas long wan narafala doa, mo i go  long miting. Mi talem long mama se: “Yu no wari. Wan dei bambae hem i taed ya.” Papa i mekem olsem gogo hem i taed, mo hem i letem nomo mama i go long ol miting.

Long yia 1943 taem Tiokratik Skul i stat, mi stat blong givim ol tok long skul long kongregesen blong mi. Ol advaes we mi kasem long skul ya, oli givhan long mi blong kam gud moa long fasin blong mi blong givim ol tok.

Long taem blong Wol Wo Tu, long yia 1944, gavman i talem se mi mas joen long ami. Ale, mi go long Fort Hayes, long Columbus, Ohio, blong oli jekemap helt blong mi mo blong fulumap ol pepa blong joenem Ami. Mi talem long ol ofisa long ples ya tu se mi no wantem kam wan Ami. Ale, oli letem mi gobak long haos. Be afta we sam dei i pas, wan polis i kam long haos mo i talem se hem i kam blong arestem mi.

Tu wik biaen, oli karem mi i go long kot mo jaj i talem se: “Sipos mi wan mi jajem yu, bambae mi putum yu long kalabus long ful laef blong yu. ?Yu gat wan samting blong talem?” Mi talem long hem se “Jaj, mi wan man blong prij. Mi stap talemaot gud nius blong Kingdom long ol man, stret long doa blong olgeta.” Ale, jaj i talem long juri * se: “Yufala i no kam blong talemaot se yangfala man ya i wan man blong prij, no i no wan man blong prij. Be yufala i kam blong talemaot se bambae hem i joenem Ami, no i no joenem ami.” Kwiktaem nomo, juri i talem se mi brekem loa. Ale, jaj i talemaot se bambae mi stap blong faef yia long kalabus long Ashland, Kentucky.

Mi spenem tu wik long kalabus long Columbus, Ohio, mo long fas dei oli sarem mi insaed long wan rum. Mi prea long Jehova se: “Mi no wantem stap insaed long rum ya blong faef yia. Mi no save se bambae mi mekem wanem.”

Long nekis dei, ol gad oli letem mi mi kamaot. Mi wokbaot i go luk wan bigfala man we hem tu i wan presina, mo mitufala i stap lukluk i go afsaed long windo. Hem i askem long mi se “?From wanem yu kam long kalabus?” Mi talem se, “Mi wan Witnes blong Jehova.” Mo hem i se, “?Yu tru ya? ?Be from wanem yu stap long ples ya?” Mi ansa se, “Ol Witnes blong Jehova oli no faet mo kilim man.” Nao hem i talem se, “Oli putum yu long kalabus from yu no kilim man. Be oli putum ol narafala man long kalabus from we oli kilim man i ded. ?Olsem wanem? ?Yu ting se hemia i stret ya?” Mi talem se, “Nogat, hemia i no stret nating.”

Afta hem i talem se: “Long ol 15 yia we oli pas, mi stap long wan narafala kalabus mo mi ridim sam long ol buk blong yufala.” Taem mi harem tok ya, wantaem nomo mi prea se: “Jehova, plis, yu givhan long mi  blong mi fren gud wetem man ya.” Stret long taem ya, man ya we nem blong hem Pol i talem se: “Sipos wan long ol man ya i wantem faetem yu, yu singaot mi. Bambae mi kam faetem olgeta.” Ale, mi no gat wan problem nating wetem ol 50 man we oli stap wetem mi long kalabus.

Taem oli muvum mi i go long kalabus long Ashland, mi mitim sam brata we oli stap finis long kalabus ya. Oli givhan long mi mo ol narafala blong holemstrong oltaem long Jehova. Evri wik mifala i mekem Baebol riding, mo mifala i rerem ol kwestin mo ansa blong tokbaot long ol miting blong mifala we ol brata oli lidim. Mifala i stap long wan bigfala rum we i gat ol bed long saed blong wol. Mo i gat wan brata we i stap seremaot teritori long mifala. Hem i talem long mi se: “Robison, bambae yu lukaot long ol man we oli slip long bed ya mo bed ya, mo yu mas prij long olgeta bifo we oli aot.” Hemia nao plan we mifala i folem.

Wol Wo Tu i finis long yia 1945, be mi stap yet long kalabus. Mi wari long famle blong mi from we papa blong mi i bin talem long mi se “Sipos mi save ronemaot yu, bambae i isi nomo blong mi stopem ol narafala.” Afta we mi aot long kalabus, mi sek long wan nambawan samting. I gat seven man long famle blong mi we oli stap go long ol miting, mo wan sista blong mi i baptaes, nating se papa i agensem olgeta.

Long yia 1950, taem faet long Koria i stat, gavman i talem long mi blong mi joen long ami bakegen, ale oli talem se mi mas go long Fort Hayes. Oli jekemap helt blong mi mo oli askem sam samting long mi blong mi mekem blong luk sipos mi naf blong go joenem ami. Afta long ol tes ya, wan ofisa i talem long mi se, “Yu yu gat wan gudfala ripot.” Mi talem se, “I stret nomo, be bambae mi no save joenem ami.” Mo mi talem tok we i stap long 2 Timoti 2:3 se, “Mi mi wan soldia blong Kraes finis.” Nao ofisa ya i stap kwaet, i no toktok. Biaen, hem i letem mi mi go.

I no longtaem i pas, mi go long wan miting blong Betel long wan asembli long Cincinnati, Ohio. Brata Milton Henschel i talem se oli nidim plante moa brata blong go wok long Betel blong givhan long wok blong Kingdom. Mi raetem wan leta blong go wok long Betel mo oli akseptem. Mi stat wok long Brooklyn long Ogis 1954, mo mi stap long Betel kam kasem naoia.

Oltaem mi gat plante wok blong mekem long Betel. Blong plante yia, mi wok blong lukaot long ol masin ya blong mekem hot wota we oli stap long ples blong printim ol buk mo ol ofis. Mi wan mekanik mo mi fiksimap ol lok. Mo tu mi lukaot long Haos Asembli long Niu Yok.

Mi mi laekem ol program blong Betel, olsem moning wosip, Wajtaoa Stadi, mo mi laekem tu blong prij wetem ol brata mo sista long kongregesen. Hemia ol samting we olgeta famle we oli Witnes blong Jehova oli  mas mekem oltaem. Taem papa mo mama oli ridim vas blong dei wetem ol pikinini, oli joen blong mekem Famle Wosip evri wik, oli go long miting oltaem, mo oli wok strong blong prij, hemia i save mekem se evriwan long famle oli save holemstrong long Jehova oltaem.

Mi mi gat plante fren long Betel mo long kongregesen. Sam long olgeta oli ol tabu brata mo sam oli stap finis long heven, be ol narafala oli no ol tabu brata. Olgeta man blong Jehova, wetem ol brata mo sista long Betel tu, evriwan oli ol sinman. Sipos mi gat wan problem wetem wan brata, oltaem mi traehad blong mekem pis. Mi tingbaot advaes we i stap long Matiu 5:23, 24, mo olsem wanem yumi save folem blong stretem ol problem blong yumi. I no isi blong talem “sore,” be hemia nao rod blong mekem pis wetem narafala.

Naoia mi mi kam olfala mo i had blong mi prij long ol haos wanwan, be mi gohed. Mi lanem smol blong toktok Mandarin, we i wan lanwis blong ol man Jaena, mo mi prij long ol Jaenis man long rod. Long moning, samtaem mi seremaot 30 no 40 magasin long ol man we oli intres.

Mo tu, mi gat wan visit long Jaena. Wan dei, wan naesfala gel i smael long mi mo i givim pepa blong soemaot ol frut we oli salem long wan maket. Mi smael mo mi givim Wajtaoa mo Wekap! long hem long Jaenis. Hem i tekem mo i talem se nem blong hem Katie. Afta long taem ya, taem Katie i luk mi hem i kam toktok long mi. Mi mi tijim hem olsem wanem blong talem long Inglis, nem blong ol frut mo ol kakae blong maket. Mo tu, mi eksplenem ol vas blong Baebol long hem mo hem i glad blong tekem buk ya Baebol Tijim. Afta sam wik i pas, mi no moa luk hem.

Afta sam manis i pas, mi givim sam magasin long wan narafala gel we i stap seremaot pepa blong ol frut. Nekis wik, hem i givim mobaelfon blong hem long mi mo i talem se, “Yu tok, Jaena.” Mi talem long hem se, “Mi no save wan man long Jaena.” Be hem i fosem mi blong toktok long man ya, ale mi karem mobaelfon mo mi talem se, “Halo, hemia Robison ya.” Mo afta man ya i ansa se, “Ei Robby, mi ya Katie. Mi stap finis long Jaena.” Mi sek mo mi se, “?Jaena?” Katie i talem se, “Yes. Robby, ?yu save gel ya we i givim mobaelfon long yu? Hem i sista blong mi ya. Yu tijim mi long plante gudfala samting, plis mi wantem se yu tijim hem tu long ol samting ya.” Afta mi talem se, “Katie, bambae mi traem mekem bes blong mi blong tijim hem. Tangkiu blong talemaot ples we yu stap long hem.” I no longtaem biaen, mi toktok bakegen long sista blong Katie mo mi no moa luk hem. Mi hop se tufala gel ya i gohed blong save moa long Jehova long ples we tufala i stap long hem.

Mi mekem wok blong Jehova blong 73 yia, mo mi glad we hem i givhan long mi blong no joen long faet mo blong holemstrong long hem taem mi stap long kalabus. Mo tu, ol brata mo sista blong mi oli talem se fasin blong mi blong stanap strong taem papa i agensem mi, i leftemap tingting blong olgeta. Naoia, mama mo sikis long ol brata mo sista blong mi oli baptaes. Mo tu, papa i no moa mekem i strong tumas long mifala, mo hem i stap go samtaem long ol miting bifo we hem i ded.

Sipos hem i wil blong God, bambae ol famle mo ol fren blong mi oli laef bakegen long niufala wol. Yu traem tingbaot, se long taem ya bambae yumi evriwan i harem gud blong wosipim Jehova gogo i no save finis. *