1, 2. ?Wan brata i luksave wanem, mo hem i mekem wanem?

ROBET i baptaes taem hem i yangfala, be trutok i no bigfala samting long laef blong hem. Hem i talem se: “Mi no mekem wan samting we i rong, be samting we mi mekem i olsem wan kastom nomo, i no kamaot long hat blong mi. Ol narafala oli ting se mi strong from we mi stap go oltaem long miting, mo mi mekem haftaem paenia, sam manis evri yia. Be mi harem olsem se laef blong mi i no gat mining.”

² Afta we Robet i mared, hem i jes luksave se wan samting i rong. Samtaem hem mo woman blong hem i mekem wan pleplei, we tufala i askem kwestin long tufala long saed blong Baebol. Woman blong hem i save gud Baebol mo i ansa kwik nomo. Be plante taem Robet i no save ansa, mo i sem from. Hem i talem se: “Mi harem se mi wan sat hed stret. Mi stap tingting se, ‘Sipos mi wantem lidim gud woman blong mi, mi mas mekem wan samting.’” Hem i se: “Mi stadi we mi stadi we mi stadi, nao mi luksave olsem wanem ol save blong Baebol i joen. Evri samting i kam klia gud. Mo samting we i moa impoten se, mi kam klosap long Jehova.”

3. (1) ?Yumi lanem wanem long stori blong Robet? (2) ?Wanem trifala impoten kwestin we bambae yumi tokbaot?

 ³ Yumi lanem wan bigfala lesen long stori blong Robet. Maet yumi gat save long Baebol, yumi go oltaem long miting mo long wok blong prij, be hemia i no min se spirit blong God i stap lidim yumi. O maet yumi ting se yumi stap folem tingting blong God long laef blong yumi, be taem yumi jekem yumi, yumi luksave se yumi mas kam gud moa. (Filipae 3:16) Long stadi ya, bambae yumi tokbaot tri impoten kwestin: (1) ?Olsem wanem blong save sipos spirit blong God i stap lidim yumi? (2) ?Olsem wanem blong letem spirit ya i lidim yumi moa? (3) ?Olsem wanem spirit ya i save lidim yumi evri dei?

4. ?Advaes blong Efesas 4:23, 24 i go long hu?

⁴ Taem yu mekem wok blong God, yu mekem plante jenis long laef blong yu. Be yu no stop taem yu baptaes. Baebol i talem se: “Yufala i mas gohed blong mekem se paoa we i stap pusum tingting blong yufala, i kam niuwan.” (Efesas 4:23, 24) Yumi no stret gud olgeta, taswe yumi mas gohed nomo blong mekem sam jenis. Nating se yu mekem wok blong Jehova plante yia finis, be yu mas gohed blong fren gud wetem hem.—Filipae 3:12, 13.

5. ?Wanem ol kwestin we yu save askem blong jekem yu?

⁵ Yumi evriwan i mas jekem gud yumi, nating se yumi yangfala o yumi olfala. Yu save askem se: ‘?Mi mi stap folem moa tingting blong God? ?Mi stap tingting olsem Kraes? ?Samting we mi tingbaot mo fasin we mi mekem long ol miting, i soemaot wanem? ?Ol storian blong mi oli soemaot se mi wantem mekem wanem long laef blong mi? ?Mi stap stadi mi wan? ?Olsem wanem long klos mo hea blong mi? Taem mi kasem advaes blong stretem mi, ?mi lesin o nogat? ?Taem wan nogud fasin i pulum mi, mi mekem wanem? ?Mi mi bigman long ol Kristin fasin?’ (Efesas 4:13) Ansa blong ol kwestin ya bambae i soemaot sipos yumi stap kam gud moa blong letem spirit blong God i lidim yumi, o nogat.

6. ?Yumi nidim wanem blong jekem sipos tabu spirit i stap lidim yumi?

⁶ Samtaem yumi nidim narafala blong givhan long yumi, blong jekem sipos tabu spirit i stap lidim yumi. Aposol Pol i talem se man we i gat tingting blong man nomo, i no luksave se i stap mekem samting we God i no glad long hem. Be man we tabu spirit i lidim, i kasem save tingting blong God long evri samting. Hem i save se Jehova i no glad long man we i folem tingting blong man nomo. (1 Korin 2:14-16; 3:1-3) Ol elda we oli gat tingting blong Kraes oli luksave kwiktaem sipos  wan brata o sista i stat blong ronem fasin we tingting blong man nomo i wantem, mo oli traem givhan long hem. ?Sipos ol elda oli traem givhan long yu, bambae yu glad mo yu mekem ol jenis we yu mas mekem? Sipos yes, bambae yu soemaot se yu wantem tumas we tabu spirit i lidim yu.—Prija 7:5, 9.

7. ?From wanem i no naf blong gat save blong Baebol nomo?

⁷ Save blong Baebol nomo i no naf blong mekem se spirit blong God i lidim yu. King Solomon i gat fulap save long saed blong Jehova, mo sam waes tok blong Solomon oli stap long Baebol. Be afta we taem i pas, hem i no moa fren gud wetem Jehova, mo i no moa obei long hem. (1 King 4:29, 30; 11:4-6) Taswe, antap long ol save blong Baebol, ?yumi nidim wanem moa? Yumi nidim blong gohed blong mekem bilif i strong. (Kolosi 2:6, 7) ?Olsem wanem blong gat bilif olsem?

8, 9. (1) ?Wanem i save givhan blong mekem bilif blong yu i strong? (2) Taem yu stadi mo tingting dip, ?yu mas gat wanem tingting? (Yu luk pija long stat blong stadi.)

⁸ Pol i talem long ol Kristin bifo se oli mas ‘gohed blong kam bigman.’ (Hibrus 6:1) ?Olsem wanem blong folem advaes ya tede? Yu mas stadi long buk ya Stap Oltaem Long Laef We God i Lavem Yu. Hemia bambae i givhan long yu blong folem ol rul blong Baebol. Sipos yu stadi long buk ya finis, i gat sam narafala buk bakegen we yu save stadi long olgeta blong mekem bilif blong yu i strong. (Kolosi 1:23) Mo tu, yu mas tingting dip long ol samting we yu lanem, mo askem long Jehova blong i mekem yu yu folem ol save ya.

⁹ Taem yu stadi mo tingting dip, tingting blong yu i mas strong se yu wantem obei long Jehova mo mekem hem i glad. (Ol Sam 40:8; 119:97) Mo tu, yu mas sakemaot eni samting we i blokem spirit blong God blong i no lidim yu.—Taetas 2:11, 12.

10. ?Sam yangfala oli save mekem wanem blong spirit blong God i lidim olgeta moa?

¹⁰ Sipos yu yu wan yangfala, ?yu yu gat sam mak long wok blong God? Wan brata  we i wok long Betel i askem long ol yangfala we oli rere blong baptaes long asembli se: ‘?Wanem mak we yu yu wantem kasem long wok blong God?’ Hem i talem se plante oli tingting finis long samting we oli wantem mekem long wok blong Jehova long fiuja. Samfala oli wantem mekem wok blong Jehova fultaem, o muv i go long ples we i nidim moa man blong prij. Be sam yangfala oli no save ansa long kwestin ya. ?Hemia i min se oli no gat wan mak we oli wantem kasem? Maet i minim olsem. Sipos yu yu wan yangfala, i gud yu tingbaot se: ‘?Mi mi go long miting mo joen long wok blong prij from we papa mo mama i wantem? o ?mi wan mi fren gud wetem God?’ Nating se yumi yangfala o yumi olfala, be yumi evriwan i mas traehad blong kasem sam mak long wok blong God. Hemia bambae i mekem se spirit blong God i lidim yumi moa.—Prija 12:1, 13.

11. (1) ?Yu mas mekem wanem blong kam gud moa? (2) ?Yu save folem eksampol blong hu long Baebol?

¹¹ Sipos yu luk se yu mas kam gud moa, i gud yu stat blong mekem sam jenis. Laef blong yu i dipen long samting ya. (Rom 8:6-8) Jehova i save se yu no stret gud olgeta, mo hem i givim tabu spirit blong halpem yu. Be yu mas wok had tu. Brata John Barr, we i memba blong Hed Kampani bifo, i tokbaot Luk 13:24 i se: “Plante oli foldaon from we oli no traehad i naf blong kam strong moa.” Yu mas gat fasin olsem Jekob, we i gohed blong resling  wetem enjel gogo hem i kasem blesing. (Jenesis 32:26-28) Yu no mas ting se Baebol i olsem wan stori buk we yu ridim blong harem gud long hem nomo. Be yu mas wok had blong faenem ol nambawan trutok long Baebol, we bambae oli givhan long yu.

12, 13. (1) ?Wanem i save halpem yu blong folem Rom 15:5? (2) ?Olsem wanem eksampol mo advaes blong Pita i save givhan long yu? (3) ?Yu save mekem wanem blong letem spirit i lidim yu moa? (Yu luk bokis ya “ Yu Letem Spirit Blong God i Lidim Yu Moa”)

¹² Taem yu traehad moa blong letem spirit blong God i lidim yu, bambae spirit ya i givhan blong jenisim tingting blong yu. Sloslo, bambae yu lanem blong tingting olsem Kraes. (Rom 15:5) Tabu spirit i save givhan long yu, blong yu sakemaot ol nogud samting we yu wantem, mo wokem ol fasin we God i glad long olgeta. (Galesia 5:16, 22, 23) Sipos yu luksave se yu stap tingting tumas long mane mo olting o pleplei, yu no mas letem tingting i foldaon. Gohed blong askem tabu spirit blong Jehova, we i save givhan long yu blong yu tingting long ol gudfala samting. (Luk 11:13) Tingbaot aposol Pita. Samtaem hem i no gat tingting olsem Kraes. (Matiu 16:22, 23; Luk 22:34, 54-62; Galesia 2:11-14) Be hem i no lego. Hem i gohed nomo, mo Jehova i givhan long hem. Sloslo, Pita i gat tingting olsem Kraes. Sem samting i save hapen long yu.

¹³ Pita i tokbaot sam fasin we bambae oli givhan long yumi. (Ridim 2 Pita 1:5-8.) Yumi mas traehad blong bos long tingting blong yumi, stanap strong, lavem ol brata, mo plante narafala fasin. Evri dei, i gud yu askem se: ‘?Wanem fasin we mi save wok long hem tede, blong letem tabu spirit i lidim mi moa?’

14. Taem tabu spirit i lidim yu, ?bambae yu mekem wanem?

¹⁴ Sipos yu gat tingting olsem Kraes, bambae samting ya i lidim gud yu. Bambae yu mekem gudfala fasin long wok mo long skul, yu lukaot gud long toktok blong yu, mo yu mekem ol gudfala desisen evri dei we oli soemaot se yu stap traehad blong folem Kraes. Taem tabu spirit i lidim yu, yu no wantem se wan samting i spolem fasin blong yu blong fren gud wetem Jehova. Taem wan samting i pulum yu, bambae yu blokem. Taem yu mas mekem wan desisen, bambae yu tingbaot fastaem se: ‘?Wanem ol rul blong Baebol we oli save givhan long mi? Sipos Jisas i fesem sem samting, ?bambae hem i mekem wanem? ?Wanem bambae i mekem Jehova i glad?’ Yu mas trenem yu blong tingting olsem. Bambae yumi tokbaot sam desisen we maet yu fesem, mo rul blong Baebol we i save givhan long yu, blong yu mekem desisen we i waes.

15, 16. ?Olsem wanem tingting blong Kraes i save givhan long yu blong (1) yu jusum wan fren blong mared wetem? (2) yu jusum ol fren?

¹⁵ Jusum wan fren blong mared wetem. Rul blong Baebol i stap long 2 Korin 6:14, 15. (Ridim.) Pol i soemaot klia se man we tabu spirit i lidim hem, i no gat sem tingting olsem man we i gat tingting blong man nomo o i folem ol fasin we man nomo i wantem. ?Olsem wanem rul ya i save givhan long yu taem yu jusum wan fren blong mared wetem?

¹⁶ Jusum ol fren. Rul blong Baebol i stap long 1 Korin 15:33. (Ridim.) Man we tabu spirit i lidim, bambae i no fren wetem ol man we oli save mekem bilif  blong hem i kam slak. Traem tingbaot olsem wanem yu save folem rul ya. ?Olsem wanem rul ya i save givhan long yu blong yu yusum gud Intenet? ?Olsem wanem i save givhan long yu blong yu mekem desisen se, bambae yu plei ol gem long Intenet wetem ol strenja, o nogat?

17-19. ?Taem spirit blong God i lidim yu, hemia i givhan long yu olsem wanem blong (1) yu blokem ol wok we oli blong nating nomo? (2) kasem ol mak long wok blong God? (3) yu blokem ol rao?

¹⁷ Ol wok we oli mekem yumi kam slak. I gat wan impoten woning long Hibrus 6:1. (Ridim.) ?Wanem ya “ol wok we oli ded” we yumi mas blokem? Hemia ol wok we oli blong nating nomo, mo oli no givhan long yumi blong letem spirit blong God i lidim yumi. Woning ya long saed blong “ol wok we oli ded” i save givhan long yu blong yu ansa long ol kwestin olsem: ‘?Wok ya bambae i givhan long mi, o i blong nating nomo? ?I stret blong mi joen long bisnes ya? ?From wanem mi no mas joen long wan grup we i stap traehad blong stretem ol trabol long wol?’

¹⁸ Ol mak long wok blong God. Long toktok blong Jisas antap long hil, hem i givim gudfala advaes blong kasem ol mak long wok blong God. (Matiu 6:33) Man we spirit blong God i lidim, i putum Kingdom i moa impoten i bitim ol narafala samting long laef blong hem. Advaes ya bambae i givhan long yu blong yu ansa long ol kwestin ya: ‘?I stret blong mi go long yunivesiti blong skul moa? ?I stret blong mi tekem enikaen wok nomo?’

¹⁹ Ol rao. Advaes we Pol i givim long ol Kristin long Rom i save givhan long yu taem yu rao smol wetem narafala. (Rom 12:18) Taem yumi folem fasin blong Kraes, yumi traehad blong “gat pis wetem olgeta man.” ?Taem rao i kamaot, yu yu mekem wanem? ?I had blong yu agri wetem tingting blong narafala? o, ?ol narafala oli luksave se yu wan man blong mekem pis?—Jemes 3:18.

20. ?From wanem yu wantem gohed olsem wan man we spirit blong God i lidim?

²⁰ Ol samting we yumi tokbaot antap oli soemaot se yu mas yusum ol rul blong Baebol blong mekem ol gudfala desisen, mo soemaot se spirit blong God i stap lidim yu. Hemia bambae i mekem laef blong yu i hapi, mo bambae yu harem gud oltaem. Robet, we yumi tokbaot hem finis, i talem se: “Taem mi kam fren blong Jehova, mi mi kam gud moa olsem wan hasban mo papa. Mi harem gud long laef blong mi mo mi glad.” Sipos yu traehad blong gohed olsem wan man we spirit blong God i lidim, bambae yu kasem plante blesing. Bambae yu glad moa naoia, mo long fiuja bambae yu kasem “laef ya we i prapa wan.”—1 Timoti 6:19.