Mi mi bon long Quebec Siti, long provins blong Quebec long Kanada, we ol man oli toktok Franis. Papa mo mama blong mi, Lewis mo Selia, tufala i lavem mi mo lukaotgud long mi. Papa blong mi i wan man blong sem mo i laekem blong ridim ol buk. Mi mi laekem blong raetem ol stori, mo mi wantem kam wan man blong raetem niuspepa.

Taem mi gat 12 yia, Rodolf Susi we i wok wetem papa blong mi, mo wan fren blong hem, tufala i kam long haos. Tufala i Witnes blong Jehova. Mi no save plante samting long saed blong ol Witnes, mo mi no intres long skul ya. Be mi laekem olsem wanem oli yusum Baebol blong ansarem ol kwestin. Papa mo mama blong mi tu i laekem, taswe mifala i stat blong stadi Baebol.

Long taem ya, mi mi skul long wan Katolik skul. Samtaem mi tokbaot samting we mi lanem long Baebol stadi, wetem ol yangfala long skul. Be ol tija we oli pris, oli faenemaot. !Oli no yusum Baebol blong pruvum se mi rong, be wan long olgeta i tok nogud long mi long fored blong ful klas, i talem se mi mi wan rebel! Mi harem nogud, be i gat gudfala frut i kamaot, from we mi mi luksave se ol tijing blong skul ya oli no laenap wetem Baebol. Mi no moa wantem skul long ples ya, ale Papa mo Mama i letem mi mi go long wan narafala skul.

Mi stadi Baebol, be mi no gohed gud from we mi fraet blong prij. Katolik Jos i gat paoa mo i agensem wok blong prij. Moris Duplesis,  lida blong politik long Quebec, i joen long jos ya. Hem i sapotem ol grup we oli agensem mo kilim ol Witnes. Taswe ol brata mo sista oli mas gat strong tingting blong gohed blong prij.

Wan brata we i givhan long mi blong mi winim fraet, hemia Jon Rei, we i bin joen long namba naen klas blong Gilead. Jon i stap plante yia long trutok, mo hem i wan kwaet man we i isi blong toktok long hem. Hem i no stretem mi plante, be mi lanem fulap samting long gudfala eksampol blong hem. I had blong Jon i toktok Franis, taswe mi folem hem oltaem long wok blong prij, mo mi givhan long hem blong i toktok Franis. Taem ya we mi spenem wetem Jon, i givhan long mi blong mi mekem desisen blong kam wan Witnes blong Jehova. Long 26 Mei 1951, mi mi baptaes, hemia ten yia afta we mi mitim ol Witnes.

I gat fulap paenia long smol kongregesen blong mifala long Quebec Siti. Gudfala eksampol blong olgeta i pulum mi blong mi joen long wok blong paenia. Long taem ya, mifala i yusum Baebol nomo long wok blong prij. Taswe mi lanem plante vas we oli save halpem mi blong eksplenem trutok. Be plante man oli no wantem ridim wan Baebol we Katolik Jos i no yusum.

Long 1952, mi maredem Simon Patri, wan gudfala sista blong Quebec. Mitufala i muv i go long Montreal, mo bifo we wan yia i pas, mitufala i gat wan smol gel, nem blong hem Lis. Mi lego wok blong paenia jes bifo we mitufala i mared, be mitufala i traehad blong no mekem laef i fasfas. Olsem nao, famle i save joen fulwan long ol wok blong kongregesen.

Ten yia i pas we mi no moa tinghevi long wok blong paenia. Nao long 1962, taem mi stap long Kingdom Ministri Skul blong ol elda long Betel long Kanada, mi serem rum wetem Brata Kamil Wulet. Mi laekem tumas strong tingting we Kamil i gat long wok blong prij, nating se hem i mared mo i gat pikinini. Long taem ya, i no gat ol brata mo sista long Quebec we oli paenia taem oli lukaot long ol pikinini blong olgeta, be hemia nao samting we Kamil i wantem mekem. Hem i pulum mi tu blong mi tingbaot wok ya. Mo afta we sam manis i  pas, mi luksave se mi mi naf blong mekem wok blong fultaem paenia bakegen. Samfala oli ting se mi no mekem wan waes desisen, be mi gohed nomo blong trastem Jehova se bambae hem i blesem mi, sipos mi traehad blong mekem moa long wok blong prij.

Long 1964, oli askem long mi mo Simon blong mekem wok blong spesel paenia long stret ples blong mitufala, Quebec Siti, mo mitufala i gohed sam yia long ples ya. I isi moa blong prij, be samfala oli agensem mifala yet.

Wan dei, long Sarede aftenun, ol polis oli arestem mi long taon ya Sainte-Marie, wan smol taon klosap long Quebec Siti. Oli tekem mi mi go long kalabus, from we mi no gat wan pepa we i givim raet long mi blong prij. Biaen mi fesem wan jaj we ol man oli fraet long hem, nem blong hem Baiyason. Hem i wantem save hu ya loea blong mi. Taem mi talem nem blong Glen Hao, * wan Witnes we i givhan long plante brata blong oli winim kot kes blong olgeta, jaj ya i fraet mo i talem se: “!O, no! !Hem bakegen!” I no longtaem, kot i talem se oli no moa putum poen agensem mi.

From fasin agens long Quebec, i had blong rentem wan ples blong mekem miting. Smol kongregesen blong mifala i faenem nomo wan olfala haos blong putum trak, we i kolkol bitim mak. Long koltaem, ol brata oli yusum wan smol masin blong mekem rum i wom, mo mifala i sidaon raon long hem bifo long miting, blong tokbaot ol gudfala stori blong prij.

I gud tumas blong luk olsem wanem wok blong prij i kam antap long ol yia we oli pas. Long 1960, i gat sam smol kongregesen nomo long Quebec Siti, Côte-Nord, mo Gaspé Poen. Tede i gat plante kongregesen long ples ya, mo ol brata oli mekem miting long ol naesfala Haos Kingdom.

Long 1970, oli askem long mi blong mi mekem wok blong eria elda. Long 1973, mi mekem wok blong distrik elda. Long ol yia ya, mi lanem plante samting long ol gudfala brata olsem Lorie Somur * mo Deved Splen, * we tufala i mekem sem wok. Long en blong ol asembli, Deved i givim advaes long mi mo mi givim advaes long hem, olsem wanem blong kam gud moa long fasin blong tij. Wan taem Deved i talem se: “Leons, mi laekem las tok blong yu. !Hem i gud, be ol save blong hem i naf blong mekem tri tok!” Mi mi stap putum tumas save long ol tok blong mi, mo mi mas lanem blong no talem tumas samting.

Wok blong ol distrik elda i blong leftemap tingting blong ol eria elda. Be from we plante pablisa long Quebec oli save gud mi, oli wantem prij wetem mi taem mi visitim ol defren  eria. Mi laekem tumas blong prij wetem olgeta, be i mekem se mi spenem smol taem nomo wetem eria elda. Wan eria elda i talem long kaen fasin se: “I gud tumas we yu spenem taem wetem ol brata, be yu no mas fogetem se hemia wik blong mi. !Mi tu mi nidim yu blong leftemap tingting blong mi!” Advaes ya i stretem tingting blong mi.

Long 1976, wan samting i hapen we i mekem mi mi harem nogud tumas. Gudfala waef blong mi Simon, i ded from wan bigfala sik. Hem i wan nambawan fren long mi, from we hem i lavem Jehova, mo oltaem i rere blong lego samting we hem nomo i wantem. Wok blong prij i halpem mi blong stanap strong, mo mi talem tangkiu long Jehova we i givhan long mi long hadtaem ya. Biaen, mi maredem Karolin Eliot, wan paenia we i toktok Inglis, mo i muv i kam long Quebec from we i nidim moa man blong prij long ples ya. Karolin i wan sista we i isi blong toktok wetem hem mo i tingbaot ol narafala, antap moa, olgeta we oli sem o oli stap olgeta nomo. I wan bigfala blesing we hem i joenem mi long wok blong visitim ol kongregesen.

Long Jenuware 1978, Skul blong Paenia i stat long Quebec, mo oli askem long mi blong mi tijim klas ya. Mi fraet we mi fraet from we mi neva joen long skul ya, mo mi neva ridim buk blong hem tu. Be mi glad se long klas ya, i gat plante brata mo sista we oli paenia longtaem finis. !Nating se mi tija, be mi lanem plante samting long ol studen!

Long 1978, i gat wan intenasnal asembli long Olimpik Stadium long Montreal, we stamba tok blong hem se, “Bilif i Win.” Bitim 80,000 man oli kam, mo i no gat wan asembli bifo long Quebec we i bigwan olsem. Wok blong mi i blong toktok wetem ol man blong nius. Mi toktok wetem plante long olgeta, mo  mi glad blong luk ol gudfala stori we oli putum long niuspepa mo televisen. Oli tokbaot asembli blong 20 aoa long televisen mo radio, mo oli printim plante handred stori long ol niuspepa. !Oli givim wan bigfala witnes!

Long 1996, i gat wan bigfala jenis long laef blong mi. Stat long taem we mi baptaes, mi stap long eria blong Quebec we oli toktok Franis, be naoia oli askem long mi blong mi mekem wok blong distrik elda long Toronto, wan ples we oli toktok Inglis. Mi harem se mi fraet mo mi no naf blong givim ol tok long Inglis. Mi mas prea plante, mo trastem Jehova fulwan.

Bifo mi fraet, be naoia mi save talem se mi laekem tumas tufala yia we mitufala i stap long Toronto. Karolin i halpem mi blong mi harem gud moa blong toktok Inglis, mo ol brata mo sista tu oli givhan mo leftemap tingting blong mi. Kwiktaem nomo, mitufala i gat plante niufala fren.

Antap long ol wok we mi mas mekem blong rerem asembli blong tu dei, plante taem mi spenem wan aoa blong prij Fraede long sapa. Maet samfala oli ting se, ‘?From wanem yu wantem go prij jes bifo long bisi wiken ya blong asembli?’ Be mi luk se taem mi storian wetem ol man long wok blong prij, mi harem gud. Mo tede tu, mi harem gud yet blong prij.

Long 1998, oli askem long mi mo Karolin blong go mekem wok blong spesel paenia bakegen long Montreal. Plante yia mi lukaot long wok blong prij long pablik ples, mo mi toktok wetem ol man blong nius blong stretem ol rong tingting we plante man oli gat long ol Witnes blong Jehova. Naoia mi mo Karolin i glad blong prij long ol man blong narafala kantri we oli muv i kam long Kanada, mo oli wantem lanem moa long saed blong Baebol.

Taem mi tingtingbak long ol 68 yia we mi baptaes, mi luksave se mi kasem plante blesing. Mi glad tumas se mi lanem blong laekem wok blong prij, mo mi givhan long plante narafala blong oli save trutok. Gel blong mi Lis mo hasban blong hem, tufala i mekem wok blong fultaem paenia taem ol pikinini blong tufala i kam bigwan. Mi harem gud tumas taem mi luk se hem i gohed strong olsem long wok blong prij. Mo mi talem bigfala tangkiu long ol brata mo sista we oli soemaot gudfala eksampol mo givim waes advaes blong halpem mi, blong mi fren gud wetem Jehova mo mekem ol defdefren wok blong hem. Mi luksave se yumi mas dipen nomo long bigfala paoa blong tabu spirit, blong yumi save stanap strong long wok we Jehova i givim. (Sam 51:11) !Mi gohed nomo blong talem tangkiu long Jehova from nambawan blesing ya blong presem nem blong hem!—Sam 54:6.