1. Sipos wan man i wantem go luk king blong Pesia, ?hem i mas mekem wanem fastaem?

TRAEM tingbaot sipos yu yu laef 2,500 yia bifo, long kantri blong Pesia. Yu go long taon ya Susa we king i stap long hem, from we yu wantem tokbaot wan samting wetem hem. Be bifo we yu go luk hem, yu mas askem fastaem. !Sipos yu no askem, yu save ded!—Esta 4:11.

2. ?Yumi mas fraet blong toktok long Jehova? Eksplenem.

² !Yumi glad tumas se Jehova i no olsem king blong Pesia! Nating se Jehova i hae moa long olgeta king blong wol, be hem i glad we yumi toktok long hem enitaem. Hem i wantem se yumi no fraet blong toktok wetem hem. Taswe, nating se Jehova i wokem evri samting, i gat olgeta paoa, mo i Hae King mo Masta blong yumi, be hem i askem long yumi blong yumi singaot hem se “Papa.” (Mat. 6:9) !Yumi harem gud blong save se Jehova i wantem we yumi kam klosap long hem olsem!

3. ?From wanem i stret we yumi singaot Jehova se “Papa”? ?Bambae yumi tokbaot wanem long stadi ya?

³ I stret nomo we yumi singaot Jehova se “Papa,” from we hem i Stamba blong laef blong yumi. (Sam 36:9) Mo from we hem i Papa blong yumi, i stret we yumi obei long hem. Taem yumi mekem samting we hem i askem, yumi kasem ol nambawan blesing. (Hib. 12:9) Wan long ol blesing ya, hemia laef we i no save finis, long heven o long wol. Tede tu yumi kasem plante blesing. Stadi ya bambae i tokbaot ol samting we Jehova i mekem naoia olsem Papa we i lavem yumi, mo from wanem yumi sua se bambae hem i neva lego yumi long fiuja. Be fastaem, bambae yumi tokbaot from wanem yumi save se Papa blong yumi long heven i kea long yumi mo i lavem yumi.

4. ?From wanem i had blong samfala oli tingbaot Jehova olsem Papa blong olgeta?

⁴ ?Olsem wanem? ?I had blong yu tingbaot God olsem Papa blong yu? Samfala oli ting se yumi smol tumas taem yumi skelem yumi wetem Jehova. Oli no ting se God ya we i gat Olgeta Paoa i save tingbaot yumi wanwan. Be Papa Jehova we i lavem yumi, i no wantem se yumi harem olsem. Hem i givim laef long yumi mo i wantem se yumi fren gud wetem hem. Aposol Pol i tokbaot samting ya long ol man Atens, mo biaen, hem i talem se Jehova “i no stap longwe nating long yumi evriwan.” (Wok 17:24-29) God i wantem se yumi evriwan i toktok long hem, olsem pikinini we i toktok oltaem long gudfala papa blong hem.

5. ?Stori blong wan sista i tijim yumi long wanem?

⁵ I had blong samfala oli tingbaot Jehova olsem Papa blong olgeta, from we stret papa blong olgeta long wol i no toktok kaen mo soemaot lav long olgeta. Wan sista i talem se: “Papa blong mi i raf tumas. Taem mi stat blong stadi Baebol, i had blong mi tingbaot Jehova olsem wan Papa mo lavem hem. Be taem mi save gud hem, samting ya i jenis.” ?Olsem wanem? ?Yu tu yu gat tingting olsem? Sipos yes, yu no mas harem nogud. Sloslo yu tu yu save lavem Jehova olsem wan gudfala Papa.

6. Folem Matiu 11:27, ?wanem wan rod we Jehova i yusum blong givhan long yumi blong tingbaot hem olsem Papa we i lavem yumi?

⁶ Wan rod we Jehova i yusum blong givhan long yumi blong tingbaot hem olsem wan Papa we i lavem yumi, hemia ol tok mo wok blong Jisas we ol man oli raetemdaon long Baebol. (Ridim Matiu 11:27.) Jisas i soemaot gud fasin blong Papa blong hem, taswe hem i save talem se: “Man we i luk mi, hem i luk Papa tu.” (Jon 14:9) Plante taem Jisas i tokbaot wok we Jehova i mekem olsem wan Papa. Long fofala Gospel, Jisas i yusum tok ya “Papa” bitim 165 taem blong tokbaot Jehova. ?From wanem Jisas i singaot Jehova oltaem se Papa? Wan risen i blong tijim yumi se Jehova i Papa blong yumi we i lavem yumi.—Jon 17:25, 26.

7. ?Yumi lanem wanem long saed blong Jehova, from fasin we hem i mekem long Pikinini blong hem?

⁷ Tingbaot samting we yumi lanem long saed blong Jehova, from fasin we hem i mekem long Pikinini blong hem Jisas. Oltaem Jehova i lesin long prea blong Jisas. Be hem i no lesin nomo, hem i ansa tu. (Jon 11:41, 42) Nomata wanem trabol we Jisas i fesem, oltaem hem i harem se Papa blong hem i lavem hem mo i stap givhan long hem.—Luk 22:42, 43.

8. ?Olsem wanem Jehova i lukaot gud long Jisas?

⁸ Jisas i save se Papa blong hem i Stamba blong laef blong hem, mo i stap lukaot gud long hem. Taswe hem i talem se: “Mi stap kasem laef long Papa.” (Jon 6:57) Jisas i trastem Papa blong hem fulwan, mo Jehova i givim evri samting we hem i nidim blong stap laef. Antap long hemia, Jehova i givhan long Jisas blong i holemstrong long hem.—Mat. 4:4.

9. ?Olsem wanem Jehova i wan Papa we i kea long Jisas mo i lavem hem?

⁹ From we Jehova i Papa blong Jisas mo i lavem hem, hem i meksua se Jisas i save se hem i stap givhan long hem. (Mat. 26:53; Jon 8:16) I tru se Jehova i no blokem ol samting we oli traem Jisas, be hem i givhan long hem blong i stanap strong. Jisas i save se eni samting we i mekem hem i harem nogud, i blong smoltaem nomo. (Hib. 12:2) Jehova i soemaot se hem i kea long Jisas taem hem i lesin long hem, i givim evri samting we hem i nidim, i trenem  hem, mo i givhan long hem. (Jon 5:20; 8:28) Naoia bambae yumi tokbaot olsem wanem Papa blong yumi long heven i kea long yumi long sem fasin.

10. Folem Ol Sam 66:19, 20, ?wanem i soemaot se Jehova i lavem yumi?

¹⁰ Jehova i lesin long ol prea blong yumi. (Ridim Ol Sam 66:19, 20.) Hem i wantem se yumi prea oltaem mo yumi talemaot evri samting long hem. (1 Tes. 5:17) Yumi save prea long God enitaem, nomata se yumi stap wea. Hem i no bisi tumas, be hem i rere oltaem blong lesin. Taem yumi luksave se Jehova i lesin long ol prea blong yumi, yumi lavem hem moa. Wan man blong raetem Ol Sam i talem se: “Mi mi lavem Hae God tumas from we oltaem hem i stap lesin long mi.”—Sam 116:1.

11. ?Jehova i mekem wanem, taem yumi prea long hem?

¹¹ Papa Jehova i no lesin nomo long ol prea blong yumi, be hem i ansa long olgeta tu. Aposol Jon i talem se: “Nomata wanem samting yumi askem long hem, mo sipos i laenap wetem samting we hem i wantem, hem i harem yumi.” (1 Jon 5:14, 15) I tru, maet Jehova i no ansa olsem yumi wantem. Hem i save wanem i moa gud long yumi, taswe samtaem hem i no givim samting we yumi askem, o i wantem se yumi wet fastaem.—2 Kor. 12:7-9.

12-13. ?Olsem wanem Papa blong yumi long heven i givim evri samting we yumi nidim?

¹² Jehova i givim evri samting we yumi nidim. Hem i mekem sem samting we hem i askem long ol narafala papa blong mekem. (1 Tim. 5:8) Hem i givim evri samting we ol pikinini blong hem oli nidim. Hem i no wantem se yumi wari long kakae, klos, o ples blong slip. (Mat. 6:32, 33; 7:11) From we Jehova i wan Papa we i lavem yumi, hem i mekem plan se long fiuja tu, bambae yumi gat evri samting we yumi nidim.

¹³ Samting we i moa impoten, se Jehova i givim evri samting we yumi nidim blong fren gud wetem hem. Long Baebol, hem i talem se hem i hu, wanem stamba tingting blong hem, from wanem yumi laef, mo wanem bambae i hapen long fiuja. Hem i soemaot se hem i kea long yumi wanwan, taem hem i yusum papa o mama blong yumi o wan narafala man, blong givhan long yumi blong save hem. Mo oltaem ol elda mo ol brata mo sista oli givhan long yumi. Mo tu, long ol miting, yumi joen olsem wan famle nomo blong Jehova i tijim yumi. Long ol fasin ya mo long plante narafala fasin bakegen, Jehova i soemaot se hem i wan Papa we i kea gud long yumi.—Sam 32:8.

14. ?Taem Jehova i stretem yumi, hem i soemaot wanem, mo hem i mekem olsem wanem?

¹⁴ Jehova i trenem yumi. Yumi no stret gud olsem Jisas. Taswe, samtaem Papa blong yumi long heven i stretem yumi blong trenem yumi. Tok blong hem i talem se: “Jehova i stap stretem olgeta we hem i lavem olgeta.” (Hib. 12:6, 7) Jehova i yusum plante defren rod blong stretem yumi. Maet wan samting we yumi ridim long Tok blong hem o harem long miting, i stretem yumi. Maet ol elda oli givhan long yumi, olsem we yumi nidim. Nating se Jehova i yusum wanem rod blong stretem yumi, be oltaem hem i mekem from we i lavem yumi.—Jer. 30:11.

15. ?Olsem wanem Jehova i protektem yumi?

¹⁵ Taem wan samting i traem yumi, Jehova i givhan. Wan gudfala papa i givhan long ol pikinini blong hem taem oli kasem trabol. Long sem fasin, Papa blong yumi long heven i givhan long yumi taem wan samting i traem yumi. Hem i givim tabu spirit blong protektem yumi long eni samting we i save mekem se  yumi no moa fren wetem hem. (Luk 11:13) Mo tu, Jehova i givhan long yumi taem tingting i foldaon. Hem i givim wan nambawan hop blong fiuja. Hop ya i givhan long yumi blong yumi stanap strong taem yumi kasem trabol. Tingbaot: Nomata wanem nogud samting i hapen, Papa blong yumi bambae i mekem i kam gud fulwan long fiuja. Ol trabol we yumi kasem oli blong smoltaem nomo, be ol blesing we Jehova bambae i givim oli no save finis.—2 Kor. 4:16-18.

16. ?Wanem i hapen taem Adam i no moa obei long Papa blong hem long heven?

¹⁶ Sipos yumi tingbaot samting we Jehova i mekem taem Adam i no moa obei long hem, yumi luksave se hem i lavem yumi. Long taem ya, Adam i no moa joen long famle blong Jehova, mo ol pikinini we oli kamaot biaen long hem tu, oli no moa joen. (Rom 5:12; 7:14) Be Jehova i mekem wan samting blong givhan long ol pikinini blong Adam.

17. Afta we Adam i rebel, ?kwiktaem nomo Jehova i mekem wanem?

¹⁷ Jehova i panisim Adam, be hem i givim hop long ol pikinini blong Adam we oli no bon yet. Kwiktaem nomo, hem i promes se ol man we oli obei long hem bambae oli kambak insaed long famle blong hem. (Jen. 3:15; Rom 8:20, 21) Jehova i mekem samting ya i kamtru from ransom sakrefaes blong Pikinini blong hem Jisas. Taem Jehova i givim Pikinini blong hem blong pemaot yumi, hem i soemaot se hem i lavem yumi tumas.—Jon 3:16.

18. ?From wanem yumi save sua se Jehova i wantem yumi olsem ol pikinini blong hem, nating sipos yumi gowe long hem?

¹⁸ Nating se yumi sinman, Jehova i wantem we yumi stap long famle blong hem. Hem i no ting se yumi wan baden long hem. Samtaem maet yumi mekem hem i harem nogud o yumi  gowe long hem blong smoltaem, be hem i hop se bambae yumi kambak. Jisas i talem parabol blong boe we i lusum rod, blong soemaot olsem wanem Jehova i lavem ol pikinini blong hem. (Luk 15:11-32) Papa blong boe ya i tingbaot hem oltaem mo i hop se bambae hem i kambak. Mo taem hem i kamhom, papa blong hem i welkamem hem. Sipos yumi gowe long Jehova be biaen yumi tanem tingting, yumi save sua se Papa Jehova we i lavem yumi, bambae i glad blong tekembak yumi.

19. ?Olsem wanem Jehova bambae i fiksimap ol trabol we Adam i mekem?

¹⁹ Papa Jehova bambae i fiksimap olgeta trabol we Adam i mekem long yumi. Afta we Adam i rebel, Jehova i mekem desisen blong adoptem 144,000 man long wol, blong oli mekem wok blong king mo pris wetem Pikinini blong hem Jisas long heven. Long niufala wol, Jisas mo olgeta we oli rul wetem hem, bambae oli halpem ol man we oli obei, blong oli kam stret gud olgeta. Afta we Setan i traem olgeta laswan, bambae God i givim laef we i no save finis long olgeta we oli holemstrong long hem. Papa Jehova bambae i glad tumas blong luk se wol ya i fulap long ol pikinini blong hem we oli stret gud olgeta. !Hemia bambae i wan nambawan taem!

20. ?Olsem wanem Jehova i soemaot se hem i lavem yumi tumas? ?Bambae yumi tokbaot wanem long nekis stadi?

²⁰ Jehova i soemaot se hem i lavem yumi tumas. Hem i wan nambawan Papa. Hem i harem ol prea blong yumi, mo i givim ol samting we yumi nidim blong laef mo blong fren gud wetem hem. Hem i trenem yumi mo i givhan long yumi. Mo tu, bambae hem i givim ol nambawan blesing long fiuja. !Yumi harem gud tumas blong save se Papa Jehova i kea mo i lavem yumi! Nekis stadi bambae i tokbaot olsem wanem yumi save soemaot se yumi glad long lav blong hem.