1. ?Wanem sam kwestin we wan singel sista i sud askem, sipos i tingbaot wan man blong mared wetem?

OLGETA Kristin oli stap aninit long otoriti blong Jisas Kraes we i stret gud olgeta. Be taem wan woman i mared, hem i kam aninit long otoriti blong wan man we i no stret gud olgeta. Hemia i save kam wan jalens. Taswe, taem hem i stap tingting blong maredem wan brata, i gud hem i askem ol kwestin olsem: ‘?Wanem i soem se brata ya bambae i kam wan gudfala hed blong famle? ?Hem i putum wok blong Jehova long fasples? Sipos nogat, ?from wanem mi ting se bae hem i kam wan gudfala hed blong famle afta we mitufala i mared?’ I tru se wan sista tu i mas askem hem wan se: ‘?Wanem gudfala fasin we mi mas gat, blong mared blong mi i gud? ?Mi mi gat longfala tingting mo mi kaen? ?Mi mi frengud wetem Jehova?’ (Pri. 4:9, 12) Sipos wan woman i mekem gudfala desisen bifo we i mared, bambae hem i haremgud long mared blong hem.

2. ?Bambae yumi tokbaot wanem long stadi ya?

² Plante milian sista oli soem nambawan eksampol blong stap aninit long hasban blong olgeta. !Yumi talem tangkiu long olgeta! !Mo yumi glad tumas blong mekem wok blong Jehova wetem ol gudfala woman ya! Long stadi ya, bambae yumi tokbaot tri kwestin: (1) ?Wanem sam jalens we ol waef oli fesem? (2) ?From wanem wan waef i jusum blong stap aninit long hasban blong hem? (3) ?Ol hasban mo waef, oli save lanem wanem long eksampol blong Jisas, Abigel, mo Meri we i waef blong Josef mo i mama blong Jisas?

3. ?From wanem i no gat wan mared we i stret gud olgeta?

³ Mared i wan presen we i stret gud mo i kam long God, be ol man oli no stret gud olgeta. (1 Jon 1:8) From samting ya, Baebol i givim woning long ol kapol se bambae oli  fesem sam jalens we hem i kolem se ol “trabol long bodi.” (1 Kor. 7:28) Makem sam jalens we waef i save fesem.

4. ?Wanem i save blokem wan waef blong i no stap aninit long hasban?

⁴ Bakgraon blong wan waef i save blokem hem blong i no stap aninit long hasban blong hem, from we maet i filim se hemia i daonem hem. Marisol blong Yunaeted Stet i talem se:“Long ples blong mi, oltaem i gat toktok we i go long ol woman se oli mas sem mak long ol man long evri samting. Mi save se Jehova i givim otoriti long hasban, mo i askem long waef blong i obei long hem, mo se waef i mas kasem respek tu. Be i had long mi blong gat stret tingting long saed ya.”

5. ?Wanem rong tingting we samfala oli gat long saed blong ol woman?

⁵ Mo tu, maet wan woman i maredem wan man we i ting se ol woman oli no impoten. Sista Ivon long Saot Amerika, i talem se: “Long ples blong mi, ol man oli mas kakae fastaem, mo ol woman afta. Ol smol gel oli mas kuk mo klinim haos, be ol smol boe, mama mo sista blong olgeta i mas fidim olgeta. Long rod ya, ol smol boe ya oli stap lanem se oli ‘king blong haos.’” Sista Yingling long Esia, i talem se: “Long lanwis blong mi, i gat wan toktok we i minim se ol woman oli no nid blong skulgud, o gat gudhan long eni samting. Olgeta oli blong stap long haos nomo mo wok, be oli no mas talemaot tingting blong olgeta long hasban.” Ol tingting olsem oli no soem lav mo oli no laenap wetem Baebol. Wan hasban we i folem ol tingting ya, hem i mekem laef i had long waef blong hem, i no folem eksampol blong Jisas, mo Jehova i no glad long hem.—Efes. 5:28, 29; 1 Pita 3:7.

6. ?Waef i mas mekem wanem blong i fren wetem Jehova oltaem?

⁶ Laswan stadi i tokbaot se Jehova i wantem se hasban i givim samting we famle i nidim long spirit, filing, mo bodi. (1 Tim. 5:8) Ol mared sista oli bisi, be oli mas tekem taem evri dei blong ridim Baebol, tingting dip long hem, mo prea long Jehova. Hemia i wan jalens. Ol waef oli bisi, taswe oli harem se oli no gat taem o paoa blong mekem ol samting ya. Be i impoten tumas we oli tekem taem blong mekem. ?From wanem? From we Jehova i wantem se yumi evriwan i kam fren blong hem, mo gohed blong fren wetem hem.—Wok 17:27.

7. ?Wanem i save mekem i isi blong waef i mekemgud wok blong hem?

⁷ I tru se waef i mas wok had blong stap aninit long hasban blong hem we i no stret gud olgeta. Be sipos hem i kasemsave mo i akseptem ol risen we Baebol i givim, bambae i moa isi long hem blong mekem samting we Jehova i askem.

8. Folem Efesas 5:22-24, ?from wanem waef i jusum blong stap aninit long hasban?

⁸ Waef i jusum blong stap aninit long hasban blong hem, from we Jehova i askem hem blong mekem olsem. (Ridim Efesas 5:22-24.) Hem i trastem Papa blong hem long heven, from i save se samting we Papa blong hem i askem, i kamaot from lav mo i blong mekem i gud long hem.—Dut. 6:24; 1 Jon 5:3.

9. ?Wanem i hapen taem waef i respektem otoriti blong hasban?

⁹ Wol i enkarejem ol woman blong oli no tingbaot ol rul blong Jehova, mo blong luk fasin ya blong stap aninit long  hasban, se i daonem olgeta. I tru se olgeta we oli promotem ol tingting olsem, oli no save God blong yumi we i gat lav. Jehova i neva save givim wan loa we bambae i daonem ol gudfala dota blong hem. Wan sista we i wok had blong mekem wok ya we Jehova i givim long hem, hem i promotem pis long hom blong hem. (Sam 119:165) Samting ya i givhan long hasban blong hem, i givhan long hem wan, mo long ol pikinini blong hem.

10. ?Wanem lesen we yumi save lanem long toktok blong Carol?

¹⁰ Waef we i stap aninit long hasban blong hem we i no stret gud olgeta, i pruvum se hem i lavem mo respektem Jehova we i stanemap hed blong famle. Carol long Saot Amerika i talem se: “Mi save se hasban blong mi bambae i mekem ol mastik, mo mi save se riaksen blong mi long ol mastik ya, i soemaot sipos mi frengud wetem Jehova o nogat. Taswe mi traem blong stap aninit long hasban, from we mi wantem mekem Papa blong mi long heven i glad.”

11. ?Wanem i halpem Sista Anes blong fogivim hasban blong hem? ?Mo yumi save lanem wanem long toktok blong hem?

¹¹ Bambae i had blong waef i respektem mo stap aninit long hasban, sipos hem i luk se hasban ya i no stap tingbaot filing mo wari blong hem. Be makem samting we Sista Anes i mekem, taem samting ya i hapen. Hem i se: “Mi traem blong no kros. Mi tingbaot se yumi evriwan i save mekem mastik. Mak blong mi i blong fogivim hem, olsem Jehova i mekem. Taem mi fogivim hem, mi kasembak pis long tingting.” (Sam 86:5) Waef we i stap fogivim narafala, bambae i faenem i isi blong stap aninit long hasban.

12. ?Wanem ol eksampol we i stap long Baebol?

¹² Sam man oli ting se man we i stap aninit long narafala, hem i wan man we i no strong. Be tingting ya i longwe long trutok. I gat plante eksampol long Baebol blong ol strong man mo woman, we oli putum olgeta aninit long narafala. Tingbaot  lesen we yumi save lanem long Jisas, Abigel, mo Meri.

13. ?From wanem Jisas i stap aninit long Jehova? Eksplenem.

¹³ Jisas i putum hem aninit long Jehova, be i no from we hem i no gat hed o i no gat gudhan. Man we i save tijim ol narafala long fasin we i isi mo i klia, olsem Jisas i mekem, hem i gat hed. (Jon 7:45, 46) Jehova i save se Jisas i gat gudhan, nao i letem hem blong wok klosap long Hem, taem Hem i stap krietem yunives. (Prov. 8:30; Hib. 1:2-4) Mo stat long taem we Jisas i laef bakegen, Jehova i givim “paoa long [hem] long olgeta samting long heven mo long wol.” (Mat. 28:18) Nating se Jisas i gat gudhan, be yet, hem i lukluk i go long Jehova blong i lidim hem. ?From wanem? From i lavem Papa blong hem.—Jon 14:31.

14. ?Hasban i save lanem wanem long (1) tingting blong Jehova? (2) long ol tingting we i stap long Ol Proveb 31?

¹⁴ ?Hasban i save lanem wanem? Jehova i mekem waef blong stap aninit long hasban, be i no from we Hem i luk woman se i daon moa long man. Jehova hem wan i soemaot klia samting ya taem hem i jusum ol man mo ol woman tu, blong oli rul wetem Jisas. (Gal. 3:26-29) Jehova i soem se hem i trastem Pikinini blong hem, taem i givim otoriti long hem. Long sem fasin, hasban we i waes bambae i givim sam otoriti long waef blong hem. Baebol i tokbaot wok blong wan gudfala waef, se hem i save lukaot long wan hom, pem mo manejem propeti, mo mekem bisnes. (Ridim Ol Proveb 31:15, 16, 18.) Hem i no wan slef we i no gat raet blong talemaot tingting blong hem. Be hasban blong hem i trastem hem mo i lesin long ol tingting blong hem. (Ridim Ol Proveb 31:11, 26, 27.) Taem hasban i respektem waef olsem, bambae waef ya i glad blong stap aninit long hem.

15. ?Waef i save lanem wanem long eksampol blong Jisas?

¹⁵ ?Waef i save lanem wanem? Nating se Jisas i mekem ol bigfala wok ya, be taem hem i stap aninit long Jehova, hem i no harem se samting ya i daonem hem. (1 Kor. 15:28; Fil. 2:5, 6) Long sem fasin, wan gudfala woman we i folem eksampol blong Jisas bambae i no harem se i daonem hem, taem hem i stap aninit long hasban blong hem. Bambae hem i sapotem hasban ya from i lavem hem, be antap moa, from i lavem mo respektem Jehova tu.

16. Folem 1 Samuel 25:3, 23-28, ?wanem ol jalens we Abigel i fesem? (Yu luk pija long fran pej.)

¹⁶ Hasban blong Abigel, hemia Nabal. Man ya i selfis, i praod, mo i no gat tangkiu. Nating se i olsem, Abigel i no lukaot rod blong lego hem. Sipos hem i wantem, hem i save stap kwaet nomo mo letem Deved mo ol man blong hem, oli kilim i ded hasban blong hem. Be nogat, hem i tekem aksen blong protektem Nabal wetem evriwan long haos blong hem. Traem tingbaot strong tingting we Abigel i gat blong go klosap long 400 man blong faet, mo toktok long Deved wetem respek. Hem i rere tu blong karem blem from aksen blong hasban blong hem. (Ridim 1 Samuel 25:3, 23-28.) Deved i luksave se Jehova i yusum strong woman ya blong givim advaes we hem i nidim, blong i no mekem wan bigfala mastik.

17. ?Hasban i save lanem wanem long stori blong Deved mo Abigel?

¹⁷ ?Hasban i save lanem wanem? Abigel i waes. Mo Deved tu i waes blong lesin long advaes blong hem. Taswe hem i no gat fol  from blad blong narafala man. Long sem fasin, hasban we i waes bambae i lesin long tingting blong waef blong hem, taem i gat sam impoten desisen blong mekem. Maet tingting blong waef i save halpem hem blong no mekem rong desisen.

18. ?Waef i save lanem wanem long eksampol blong Abigel?

¹⁸ ?Waef i save lanem wanem? Waef we i lavem mo respektem Jehova, i save mekem i gud long famle blong hem, nating se hasban blong hem i no wosipim o obei long ol rul blong Jehova. Bambae hem i no brekem rul blong Baebol, blong lego man blong hem. Defren olgeta, bambae hem i respektem mo stap aninit long hasban blong hem, blong pulum hem blong i lanem moa long saed blong Jehova. (1 Pita 3:1, 2) Be sipos hasban ya i no mekem wan samting from gudfala eksampol blong hem, Jehova i glad tumas long fasin blong waef ya blong holemstrong long Hem.

19. ?Wetaem waef i no save obei long hasban?

¹⁹ Be waef i no save obei long hasban, sipos hem i askem blong hem i brekem ol loa mo rul blong Baebol. Eksampol, maet hasban we i no bilif, i talem long sista blong i giaman, stil, o i mekem samting we i agensem Baebol. Olgeta Kristin, wetem ol mared sista tu, oli mas obei fastaem long Jehova God. Taswe, sipos hasban i askem long sista blong i brekem ol rul blong Baebol, sista i mas talem no, hem i mas tok stret mo eksplenem long kaen fasin se from wanem hem i no save mekem samting we hem i askem.—Wok 5:29.

20. ?Olsem wanem yumi save se Meri frengud wetem Jehova?

²⁰ Meri i frengud wetem Jehova. I klia se hem i savegud Baebol. Taem Meri i stap storian wetem Elisabet we i mama blong Jon Baptaes, hem i talem bitim 20 toktok we oli kamaot long Hibru Haf Blong Baebol. (Luk 1:46-55) Mo makem samting ya tu: Nating se Meri i promes blong mared long Josef, be enjel blong Jehova i no kamtru fastaem long Josef. Enjel ya i toktok stret long Meri fastaem, mo i talemaot se bambae hem i bonem  Pikinini blong God. (Luk 1:26-33) Jehova i savegud Meri, mo i trastem se Meri bambae i lavem Pikinini blong hem mo i keagud long hem. Mo i sua se afta we Jisas i ded mo i go long heven, Meri i gohed blong frengud wetem Jehova.—Wok 1:14.

21. ?Hasban i save lanem wanem long stori blong Meri long Baebol?

²¹ ?Hasban i save lanem wanem? Hasban we i waes, i glad taem waef blong hem i savegud Baebol. Hem i no mas harem nogud mo ting se waef ya i wantem kam hed blong famle. Hem i luksave se wan sista we i savegud Baebol mo ol rul blong Baebol, i save givhan long famle blong hem. I tru, sipos waef i skulgud bitim hasban blong hem, be i responsabiliti blong hasban blong lidim famle wosip mo ol narafala tiokratik wok.—Efes. 6:4.

22. ?Waef i save lanem wanem long eksampol blong Meri?

²² ?Waef i save lanem wanem? Waef i mas stap aninit long hasban blong hem, be i responsabilti blong hem wan blong mekem se hem i stap strong long spirit. (Gal. 6:5) Taswe, waef i mas tekem taem blong mekem prapa stadi blong hem mo tingting dip. Hemia bambae i givhan long hem blong gohed blong lavem mo respektem Jehova, mo haremgud blong stap aninit long hasban blong hem.

23. ?Waef we i stap aninit long hasban, hem i givhan olsem wanem long hem wan, famle, mo kongregesen?

²³ Waef we i stap aninit long hasban from i lavem Jehova, bambae hem i glad mo haremgud moa, bitim waef we i no wantem obei long rod ya we Jehova i stanemap. Mo waef olsem i soem wan gudfala eksampol long ol yangfala man mo woman. Mo hem i givhan blong mekem se i gat lav long famle, mo long kongregesen tu. (Taet. 2:3-5) Olgeta we oli stap mekem wok blong Jehova tede, bighaf blong olgeta oli ol woman. (Sam 68:11) Yumi evriwan, nating se yumi man o woman, yumi gat wan impoten wok blong mekem long kongregesen. Nekis stadi bambae i tokbaot olsem wanem yumi wanwan i save mekem wok ya.