1-2. Folem Matiu 5:11, ?yumi mas gat wanem tingting long ol trabol?

JISAS i promes long ol man blong hem se bambae oli kasem tru glad. Mo tu, hem i givim woning long olgeta we oli lavem hem, se bambae oli fesem ol trabol. (Mat. 10:22, 23; Luk 6:20-23) Yumi glad blong kam disaepol blong Kraes. Be taem yumi tingbaot se ol famle, gavman, mo ol fren long wok mo skul, oli save agensem yumi, o fosem yumi blong mekem samting we i rong, ?yumi filim olsem wanem? I sua se yumi wari.

² Ol man oli no tingbaot trabol se i wan samting blong glad. Be hemia nao samting we Baebol i talem se yumi mas mekem. Eksampol, disaepol Jemes i raetem se yumi no mas wari bitim mak, be yumi mas glad taem yumi fesem ol trabol. (Jem. 1:2, 12) Mo Jisas i talem se yumi mas glad, nating se ol narafala oli stap ronem mo kilim yumi. (Ridim Matiu 5:11.) ?Olsem wanem yumi save stap glad nomata se yumi kasem ol trabol olsem? Yumi save lanem plante samting taem yumi tokbaot sam tingting long leta blong Jemes we i go long ol fas Kristin. Fastaem, bambae yumi tokbaot ol jalens we ol Kristin ya oli fesem.

3. ?Wanem i hapen smoltaem afta we Jemes i kam disaepol?

³ Smoltaem afta we Jemes, haf brata blong Jisas, i kam disaepol, ol man oli agensem bigwan ol Kristin long Jerusalem. (Wok 1:14; 5:17, 18) Mo taem oli kilim i ded disaepol Steven, plante Kristin oli ronwe mo oli “go stap olbaot long  Judia mo Sameria,” biaen oli go kasem Saepras mo Antiok tu. (Wok 7:58–8:1; 11:19) I sua se ol disaepol oli gotru long plante hadtaem. Be yet, oli glad blong talemaot gud nius long eniples we oli go long hem, mo oli stanemap ol kongregesen long olgeta ples we Rom i rul long hem. (1 Pita 1:1) Be i gat plante moa trabol i stap long fored blong ol fas Kristin.

4. ?Wanem ol nara trabol we ol fas Kristin oli kasem?

⁴ Ol fas Kristin oli mas stanap strong long plante trabol. Eksampol, samwe long yia 50 K.T., Empera Claudius blong Rom i givim oda se olgeta man Jiu oli mas aot long Rom. So ol Kristin man Jiu oli mas lego hom blong olgeta, mo go laef long defren ples. (Wok 18:1-3) Samwe long 61 K.T., aposol Pol i raetem se ol man oli bin mekem i nogud long ol Kristin long fes blong ol man, oli putum olgeta long kalabus, mo stilim olting blong olgeta. (Hib. 10:32-34) Mo ol Kristin oli kam pua mo oli stap sik olsem ol narafala man.—Rom 15:26; Fil. 2:25-27.

5. ?Bambae yumi ansa long wanem kwestin?

⁵ Taem Jemes i raetem leta blong hem bifo long yia 62 K.T., hem i savegud ol trabol we ol brata sista oli stap kasem. Jehova i pulum Jemes blong i raet i go long ol Kristin ya, blong givim gudfala advaes blong halpem olgeta blong stap glad, nating se oli kasem trabol. I gud yumi stadi long leta blong Jemes mo ansa long ol kwestin ya: ?Wanem glad ya we Jemes i tokbaot? ?Wanem i save tekemaot glad ya long wan Kristin? ?Mo olsem wanem waes, bilif, mo strong tingting, i save givhan long yumi blong stap glad, nomata se yumi kasem ol trabol?

6. Folem Luk 6:22, 23, ?from wanem wan Kristin i glad taem i kasem trabol?

⁶ Maet ol man oli ting se oli save glad sipos oli helti, oli rij, mo oli gat pis long famle. Be glad ya we Jemes i tokbaot, hem i wan frut blong tabu spirit blong God, mo hem i no dipen long situesen blong wanwan man. (Gal. 5:22) Wan Kristin i kasem glad, o i harem gud bigwan, taem hem i folem eksampol blong Jisas mo i kasemsave se Jehova i glad long hem. (Ridim Luk 6:22, 23; Kol. 1:10, 11) Olsem wan faea we i laet insaed long glas blong wan hariken laet, glad ya i stap bon insaed long hat blong wan Kristin. Glad ya i no save jenis, nating se hem i gat problem blong helt o blong mane. Mo glad ya i no ded taem famle o ol narafala oli jikim hem o ronem mo kilim hem. Glad ya i no ded, be hem i laet strong moa evritaem we ol enemi oli traem blong kilim i ded. Ol trabol we yumi kasem from bilif blong yumi, oli pruvum se yumi tru disaepol blong Kraes. (Mat. 10:22; 24:9; Jon 15:20) Taswe, i stret nomo we Jemes i talem se: “Ol brata blong mi, taem ol defdefren samting oli kam traem yufala, yufala i mas tingbaot olgeta olsem samting blong harem gud.”—Jem. 1:2.

7-8. ?Olsem wanem ol trabol we yumi kasem, oli givhan long bilif blong yumi?

⁷ Jemes i tokbaot from wanem ol Kristin oli rere blong fesem ol bigfala trabol tu. Hem i se: “Taem ol samting oli traem bilif blong yufala olsem, hemia i givhan long yufala blong yufala i stanap strong.” (Jem. 1:3) Ol trabol oli olsem faea we oli yusum blong wokem ol aean naef. Taem aean we oli bonem i kam kolkol, aean ya i kam strong moa. Long sem fasin, trabol we yumi fesem i mekem bilif blong yumi i strong moa. Taswe Jemes i raetem se: “Taem yufala i stanap strong oltaem, bambae yufala i trenem gud yufala, nao yufala i save kam stret gud mo yufala i save mekem evri samting.” (Jem. 1:4) Taem yumi luk se ol trabol oli mekem bilif blong yumi i strong moa, yumi glad blong stanap strong longtaem moa.

⁸ Long leta blong Jemes, hem i tokbaot sam samting tu we oli save mekem se yumi lusum glad. ?Wanem ol jalens ya, mo olsem wanem yumi save winim olgeta?

9. ?From wanem yumi nidim waes?

⁹ Jalens: No save wanem blong mekem. Taem yumi fesem wan trabol, yumi wantem dipen long Jehova, blong mekem ol gudfala desisen we hem i glad long  hem, i save givhan long ol brata sista, mo i save halpem yumi blong holemstrong long God. (Jer. 10:23) Yumi mas waes blong save wanem blong mekem, mo wanem blong talem long ol man we oli agensem yumi. Sipos no, maet tingting blong yumi i foldaon, mo glad blong yumi bambae i lus kwiktaem nomo.

10. Blong kasem waes, ?Jemes 1:5 i talem se yumi mas mekem wanem?

¹⁰ Rod blong winim: Askem waes long Jehova. Sipos yumi wantem stanap strong wetem glad, fastaem yumi mas askem Jehova blong i givim waes we yumi nidim blong mekem ol gudfala desisen. (Ridim Jemes 1:5.) Sipos Jehova i no ansa kwiktaem long yumi, ?yumi mas mekem wanem? Jemes i se yumi mas “gohed blong askem long God.” Jehova i no kros taem yumi gohed blong askem waes. Bambae hem i no tok long yumi. Papa blong yumi “i glad blong givim,” sipos yumi prea from waes blong stanap strong. (Sam 25:12, 13) Hem i luk ol trabol blong yumi, i harem nogud taem yumi safa, mo i wantem tumas blong givhan long yumi. !Hemia nao samting we i mekem yumi glad! ?Be olsem wanem Jehova i givim waes?

11. ?Yumi mas mekem wanem moa blong kasem waes?

¹¹ Jehova i yusum Baebol blong givim waes long yumi. (Prov. 2:6) Blong kasem waes ya, yumi mas stadi long Baebol mo ol buk we oli tokbaot Baebol. Be yumi no mas stadi blong kasem save nomo. Yumi mas mekem waes ya i wok long laef blong yumi tu. Jemes i raetem se: “Yufala i mas mekem samting we tok ya i talem, be yufala i no mas lesin nomo.” (Jem. 1:22) Taem yumi folem advaes ya, yumi kam man blong pis, yumi gat stret tingting, mo yumi gat sore. (Jem. 3:17) Ol gudfala  fasin ya oli halpem yumi blong stanap strong wetem glad.

12. ?From wanem i impoten tumas blong savegud Baebol?

¹² Tok blong God i olsem wan mira, hem i halpem yumi blong faenem ol samting we i nidim blong stretem, mo stretem olgeta. (Jem. 1:23-25) Eksampol, afta we yumi stadi long Baebol, maet yumi luksave se yumi mas kontrolem kros blong yumi. Wetem help blong Jehova, yumi lanem blong stap kwaet taem yumi dil wetem ol man o ol problem we oli save mekem yumi kros. From we yumi gat kwaet fasin, yumi save fesem ol presa blong laef. Yumi save gat klia tingting mo mekem ol gudfala desisen. (Jem. 3:13) !Yes i tru, i impoten tumas blong savegud Baebol!

13. ?From wanem yumi mas stadi long eksampol blong ol man long Baebol?

¹³ Samtaem yumi lanem lesen afta we yumi mekem mastik. Be hemia i no isi wei blong lanem lesen. Wan gudfala wei blong kasem waes, hemia blong lanem lesen long ol gudfala frut mo ol mastik blong ol narafala. Hemia nao from wanem Jemes i pulum yumi blong lukluk long eksampol blong ol man long Baebol, olsem Ebraham, Rehab, Job, mo Elaejah. (Jem. 2:21-26; 5:10, 11, 17, 18) Ol gudfala man ya oli fesem ol trabol we i save tekemaot glad blong olgeta, be oli naf blong stanap strong. Eksampol blong olgeta i soem se wetem help blong Jehova, yumi tu yumi save stanap strong.

14-15. Sipos yumi gat tu tingting, ?from wanem yumi mas stretem?

¹⁴ Jalens: Gat tu tingting. Samtaem, maet i had blong yumi kasemsave long wan samting long Baebol. O maet Jehova i no ansa long prea blong yumi olsem we yumi wantem. Hemia i save givim tu tingting long yumi. Sipos yumi no stretem samting ya, bambae bilif blong yumi i kam slak mo yumi no moa frengud wetem Jehova. (Jem. 1:7, 8) Ale yumi save lusum hop tu.

¹⁵ Pol i tokbaot hop blong yumi se i olsem wan angka. (Hib. 6:19) Wan angka i mekem se wan sip i stap wanples nomo long taem blong hariken, mo i no drif i go long ol rif. Be wan angka i wok gud nomo sipos jen we i fasem hem long sip, i no brok. Sem mak olsem we rosta i kakae jen mo i mekem i slak, tu tingting i save slakem bilif blong yumi. Taem ol man oli agensem wan man we i gat tu tingting, bambae hem i no moa bilif long ol promes blong Jehova. Sipos yumi lusum bilif, yumi lusum hop tu. Olsem Jemes i talem, man we i gat tu tingting “i olsem wef blong solwota we win i blu long hem, i mekem i go olbaot.” (Jem. 1:6) !Wan man olsem i neva glad!

16. ?Yumi mas mekem wanem sipos yumi gat tu tingting?

¹⁶ Rod blong winim: Stretem tu tingting, mo mekem bilif i strong. Tekem aksen kwiktaem. Long taem blong Elaejah, ol man blong Jehova oli slo blong tekem aksen. Ale, Elaejah i talem long olgeta se: “?Bambae yufala i jamjam long tu defren tingting gogo kasem wetaem? !Sipos Jehova i tru God, yufala i folem hem, be sipos Bal nao i tru God, yufala i folem hem!” (1Ki 18:21) Tede i sem mak. Yumi mas mekem risej blong pruvum long yumi se Jehova i God, se Baebol i Tok blong hem, mo se ol Witnes Blong Jehova oli ol man blong hem. (1 Tes. 5:21) Taem yumi mekem olsem, yumi stap stretem tu tingting blong yumi, mo yumi stap mekem bilif blong yumi i strong. Sipos yumi nidim  help, yumi save askem long ol elda. !Yumi mas tekem aksen kwiktaem, sipos yumi wantem stap glad long wok blong Jehova!

17. ?Wanem bambae i hapen sipos yumi lusum strong tingting?

¹⁷ Jalens: Tingting i foldaon. Baebol i talem se: “Sipos tingting blong yu i foldaon long dei we yu harem nogud, bambae yu no gat naf paoa.” (Prov. 24:10) Hibru tok we oli tanem i kam “tingting blong yu i foldaon” i save minim “lusum strong tingting blong yu.” Sipos yu lusum strong tingting, kwiktaem nomo yu save lusum glad tu.

18. ?Stanap strong i minim wanem?

¹⁸ Rod blong winim: Dipen long Jehova blong i givim strong tingting blong stanap strong. Yumi nidim strong tingting, sipos yumi wantem stanap strong. (Jem. 5:11) Tok we Jemes i yusum blong talem “stanap strong,” i givim tingting se man i no muvaot long ples blong hem. Yumi save tingbaot wan soldia we i gat strong tingting blong no muvaot taem i fesem enemi, hem i no wantem stepbak o ronwe, nating se faet i strong.

19. ?Yumi lanem wanem long eksampol blong Pol?

¹⁹ Pol i soem nambawan eksampol blong gat strong tingting mo stanap strong. Samtaem hem i no gat paoa. Be hem i naf blong stanap strong, from hem i dipen long Jehova blong i givim paoa long hem. (2 Kor. 12:8-10; Fil. 4:13) Yumi save gat sem paoa ya mo strong tingting sipos yumi luksave se yumi nidim help blong Jehova.—Jem. 4:10.

20-21. ?Yumi save sua long wanem samting?

²⁰ Yumi save sua se ol trabol blong yumi, oli no panis we Jehova i givim. Jemes i talem long yumi se: “Taem wan samting i traem yumi, yumi no mas talem se: ‘God ya i stap traem mi,’ from we ol samting nogud oli no save traem God, mo tu God i no save yusum ol samting nogud blong traem ol man.” (Jem. 1:13) Taem yumi bilif strong long trutok ya, yumi kam klosap moa long Papa blong yumi we i gat lav.—Jem. 4:8.

²¹ Jehova “i no save jenis.” (Jem. 1:17) Hem i sapotem ol fas Kristin long ol trabol blong olgeta, mo tede tu bambae hem i halpem yumi wanwan. I gud yu askem strong long Jehova blong i givim waes, bilif, mo strong tingting long yu. Bambae hem i ansa long ol prea blong yu. !Nao yu save sua se bambae hem i halpem yu blong stap glad taem yu fesem ol trabol!