LONG Isrel bifo, taem wan boe mo wan gel i plan blong mared, famle blong boe o boe ya i mas pem gel ya, taem ol famle blong tufala oli agri blong tufala i mared. Oli save givim ol sas samting, ol animol, o mane blong pem gel ya. Mo samtaem, boe ya i save wok blong famle blong gel ya olsem pei blong hem. Hemia nao samting we Jekob i mekem, taem hem i agri blong mekem wok blong papa blong Rejel seven yia, blong hem i save maredem Rejel. (Jen. 29:17, 18, 20) ?From wanem oli mas pem woman?

Baebol skola ya Carol Meyers i talem se: “Maet risen blong pem wan woman long famle blong hem, hemia from we bambae hem i no moa stap wetem olgeta blong mekem ol wok, mo hemia i wan impoten samting long ol famle we oli laef nomo long [agrikalja].” Mo tu, maet fasin ya blong pem woman i wan rod blong mekem se famle blong man mo woman ya oli save joen gud, mo oli save givgivhan long olgeta taem oli fesem hadtaem. Be tu, hemia i olsem wan pruf se oli blokem woman ya finis, mo se naoia hem i stap aninit long kea mo proteksen blong hasban blong hem, be i no papa blong hem.

Fasin blong pem woman i no min se woman ya i olsem wan samting we yu save pem o salem. Buk ya Ancient Israel—Its Life and Institutions i talem se: “Loa ya se man i mas givim mane, o eni samting we i gat sem praes, i go long famle blong gel, i mekem mared blong ol man Isrel i luk olsem wan samting we man i go pem long stoa nomo. Be [fasin blong pem woman] i no rili minim praes blong wan woman, be hemia mane we oli givim long famle ya from ol had wok we woman ya i no moa save mekem.”

Long sam kantri tede, ol man oli gohed yet blong folem kastom ya blong pem woman. Taem ol Kristin perens oli putum praes blong pem gel blong olgeta, oli no mas “mekem i strong tumas long ol narafala” taem oli putum wan praes we i hae tumas. (Fil. 4:5; 1 Kor. 10:32, 33) Olsem nao, oli soemaot se oli no “laekem mane tumas,” o griri. (2 Tim. 3:2) Antap moa, taem ol Kristin perens oli putum wan praes we i stret nomo, fiuja hasban ya bambae i no nid blong muvum dei blong mared, blong hem i save wok kasem we hem i gat naf mane blong pem gel ya. O bambae i no nid blong fiuja hasban ya i lego wok blong paenia, blong hem i save wok fultaem mo winim naf mane blong pem gel ya.

Long sam kantri, i gat loa long saed blong praes blong pem woman. Long ol ples olsem, ol Kristin perens oli mas obei long ol loa ya. ?From wanem? Hemia from we Baebol i talem se ol Kristin oli mas “putum olgeta oli stap aninit long ol haeman we oli stap rul,” mo obei long ol loa we i no agensem ol loa blong God.—Rom 13:1; Wok 5:29.