SAMTAEM, ol man we oli raetem Baebol oli talem sem tok bakegen mo bakegen. Hemia tri risen from wanem oli mekem olsem:

Taem we oli raetem. Long Isrel bifo, plante man oli no gat ol kopi blong Loa. Plante taem oli harem ol man oli ridim Loa ya taem oli go joen wanples long tabenakel. (Dut. 31:​10-12) Samtaem, i gat sam samting i mekem se oli no lesin gud, mo oli stanap blong plante aoa long medel blong plante man. (Neh. 8:​2, 3, 7) Long ol taem olsem, taem oli ripitim ol toktok plante taem, i isi blong ol man oli rimemba ol vas mo folem. Taem oli ripitim sam toktok, hemia i halpem ol man blong tingbaot gud sam impoten samting, olsem ol rul mo ol desisen we oli mas folem.—Lev. 18:​4-22; Dut. 5:1.

Stael blong raetem. Klosap 10 pesen blong Baebol, oli raetem folem stael blong ol singsing. Sam eksampol, hemia ol buk blong Ol Sam, Sing Blong Solomon, mo Ol Krae. Samtaem, long ol singsing ya, oli ripitim sam toktok mo hemia i halpem ol man we oli lesin blong oli lanem baehat ol toktok blong hem. Eksampol, makem ol tok ya long Ol Sam 115:​9-11, we i se: “O Isrel, yu trastem Jehova, Hem nao i stap givhan long olgeta, mo hem i sil blong olgeta. Yufala long haos blong Eron, Yufala long haos blong Eron, yufala i trastem Jehova, Hem nao i stap givhan long olgeta, mo hem i sil blong olgeta. Yufala we i fraet long Jehova, yufala i trastem Jehova, Hem nao i stap halpem olgeta, mo i sil blong olgeta.” Taem oli ripitim ol toktok ya plante taem, ol man blong singsing bambae oli naf blong holemtaet ol sas trutok ya long tingting mo hat blong olgeta.

Blong makem ol impoten poen. Samtaem ol man we oli raetem Baebol oli ripitim sam impoten toktok. Eksampol, taem Jehova i talem long ol man Isrel se oli no mas kakae blad, hem i mekem Moses i talemaot plante taem risen from wanem oli no mas kakae blad. God i wantem makem gud long olgeta se laef blong olgeta samting i stap insaed long blad, hemia i min se, blad hem i laef. (Lev. 17:​11, 14) Sam taem biaen, taem ol aposol mo ol elda long Jerusalem oli tokbaot ol impoten samting we ol Kristin oli mas sakemaot blong mekem God i glad, oli makem gud poen ya bakegen se ol Kristin oli no mas kakae blad.—Wok 15:​20, 29.

Nating se Baebol i ripitim hem wan plante taem, be hemia i no min se Jehova i wantem we yumi ripitim ol tok blong Baebol plante taem. Jisas i talem se: “Taem yu prea, yu no mas talem sem toktok bakegen mo bakegen.” (Mat. 6:7) Be hem i tokbaot ol samting we yumi save talem long ol prea blong yumi, we oli laenap wetem tingting blong God. (Mat. 6:​9-13) Nating se yumi no save ripitim ol semfala tok bakegen mo bakegen, be yumi save tokbaot ol semfala topik bakegen mo bakegen long ol prea blong yumi.—Mat. 7:​7-11.

Yes, i gat gudfala risen from wanem Tok blong God i ripitim sam wod o sam toktok. Hemia wan long ol rod we Bigfala Tija blong yumi Jehova i folem blong tijim yumi blong mekem i gud long yumi.—Aes. 48:​17, 18.