LONG Wenesde 18 Jenuware 2023, wan spesel anaonsmen i kamaot long jw.org, we i talemaot se Hed Kampani i putumap Brata Gage Fleegle mo Jeffrey Winder blong wok olsem ol memba blong Hed Kampani Blong Ol Witnes Blong Jehova. Tufala brata ya i mekem wok blong Jehova blong plante yia.

Brata Fleegle i gruap long wes Pennsylvania, U.S.A., mo perens blong hem i tijim gud hem long trutok. Taem hem i yangfala, famle blong hem i muv i go long wan smol taon we i nidim moa man blong prij. Smoltaem afta, hem i tekem baptaes long 20 Novemba 1988.

Oltaem perens blong brata Fleegle i leftemap tingting blong hem blong mekem wok blong Jehova fultaem. Plante taem tufala i stap invaetem ol eria elda mo ol Betelaet i kam long haos, mo Brata Fleegle i luksave se ol brata mo sista ya oli glad tumas. Taswe, smoltaem afta we hem i baptaes, hem i stat blong mekem wok blong fultaem paenia long 1 Septemba 1989. Tu yia afta, hem i kasem mak ya we hem i bin putum taem hem i gat 12 yia, hemia blong wok long Betel. Hem i stat blong wok long Betel long Brooklyn long Oktoba 1991.

Long Betel, Brata Fleegle i wok long ples blong wokem ol buk mo hem i mekem wok ya blong eit yia. Biaen, oli muvum hem i go wok long Sevis Dipatmen. Long taem ya, blong sam yia hem i stap givhan long wan kongregesen we i toktok lanwis Rasia. Long 2006, hem i maredem Nadia, we biaen i joenem hem blong wok long Betel. Tufala i givhan blong prij long ol teritori we ol man oli toktok lanwis Potugal, mo bitim ten yia, tufala i prij long ol teritori we ol man oli toktok lanwis blong Spen. Afta we brata Fleegle i wok long Sevis Dipatmen blong plante yia, oli muvum hem i go wok long Ofis Blong Tijing Komiti, mo biaen long Ofis Blong Sevis Komiti. Mo long Maj 2022, oli putumap hem olsem wan helpa blong Sevis Komiti Blong Hed Kampani.

 Brata Winder i gruap long Murrieta, California, U.S.A. Hem i gruap long trutok mo i baptaes long 29 Maj 1986. Long nekis manis blong hem, hem i mekem desisen blong mekem haftaem paenia. Hem i laekem tumas wok blong paenia, taswe hem i wantem gohed nomo. Sam manis afta, long 1 Oktoba 1986, hem i statem wok blong fultaem paenia.

Taem Brata Winder i yangfala, hem i go visitim tufala bigfala brata blong hem we oli wok long Betel long taem ya. Visit ya i mekem hem i tingbaot se taem hem i kam bigwan, bambae hem i aplae blong go wok long Betel. Mo long Mei 1990, oli invaetem hem blong go wok long Betel long Wallkill.

Long Betel, Brata Winder i wok long plante defren dipatmen olsem, Dipatmen Blong Klinap, Dipatmen Blong Fam, mo Ofis Blong Betel. Long 1997, hem i maredem Angela mo tufala i wok long Betel kam kasem tede. Long 2014, tufala i muv i go long Warwick, blong Brata Winder i save givhan long wok blong konstraksen, blong wokem ol bilding blong wol hedkwota. Long 2016, tufala i muv i go long Wajtaoa Edukesen Senta long Patterson. Mo long ples ya, Brata Winder i wok long Odio/Video Sevis. Fo yia afta, tufala i muv i gobak long Warwick mo Brata Winder i wok long Ofis Blong Pesnel Komiti. Long Maj 2022, oli putumap hem olsem wan helpa blong Pesnel Komiti Blong Hed Kampani.

Yumi prea se Jehova bambae i blesem bigwan ‘ol man we hem givim i go olsem presen,’ taem oli gohed blong wok had blong sapotem wok blong Kingdom.—Efes. 4:8.