STADI 7
SINGSING 15 !Yumi Presem Fasbon Blong God!
?Olsem Wanem Fasin Blong Jehova Blong Fogivim Man i Mekem i Gud Long Yu?
“Yu yu stap fogivim ol man we yu no giaman.”—SAM 130:4.
BIGFALA TINGTING
Bambae yumi tokbaot sam pijatok long Baebol we i tokbaot fasin blong Jehova blong fogivim man. Stadi ya bambae i halpem yumi blong tinghae moa long fasin ya blong Jehova.
1. ?From wanem i had blong save se man i minim wanem taem hem i talem se hem i fogivim yu?
“MI FOGIVIM YU.” I sua se ol tok ya oli mekem yu harem gud, speseli sipos yu save se yu talem o mekem wan samting we i mekem narafala i harem nogud. ?Be tok ya “mi fogivim yu” i minim wanem? ?Man we i mekem yu harem nogud, i talem tok ya blong minim se yutufala i fren gud bakegen, o i minim se hem i no moa wantem tokbaot bakegen samting we i bin hapen? Yumi ol man, yumi save minim plante samting taem yumi talem se yumi fogivim narafala.
2. ?Olsem wanem Baebol i tokbaot fasin blong Jehova blong fogivim man? (Mo tu, yu luk futnot.)
2 Fasin blong Jehova blong fogivim yumi ol sinman, i defren olgeta long fasin blong yumi blong fogivim narafala. Jehova i fogivim ol man long wan fasin we i spesel. Man blong raetem sam i tokbaot Jehova se: “Yu yu stap fogivim ol man we yu no giaman, olsem nao, ol man oli save respektem yu bigwan.” a (Sam 130:4) Yes, Jehova i ‘fogivim ol man we i no giaman.’ Mo hem nao i soemaot se i rili minim wanem blong fogivim narafala. Samtaem, ol man blong raetem Baebol oli yusum wan Hibru tok blong tokbaot fasin blong Jehova blong fogivim man, be oli neva yusum blong tokbaot fasin blong man blong fogivim narafala.
3. ?Olsem wanem fasin blong Jehova blong fogivim man, i defren long fasin blong yumi? (Aesea 55:6, 7)
3 Taem Jehova i fogivim wan man, hem i waepemaot fulwan sin blong hem. Mo hemia i mekem se man ya i fren gud bakegen wetem Jehova. Yumi harem gud se Jehova i glad nomo blong fogivim yumi, mo i fogivim yumi fulwan.—Ridim Aesea 55:6, 7.
4. ?Olsem wanem Jehova i givhan long yumi blong kasemsave se i rili minim wanem blong fogivim narafala?
4 Sipos fasin blong Jehova blong fogivim man i defren long fasin blong yumi, ?olsem wanem yumi naf blong kasemsave stret mining blong fogif? Jehova i yusum sam gudfala pijatok blong givhan long yumi blong kasemsave fasin blong hem blong fogivim man. Taswe long stadi ya, bambae yumi tokbaot sam long ol pijatok ya we bambae i halpem yumi blong luk olsem wanem Jehova i tekemaot sin, mo long semtaem i mekem se yumi save fren gud bakegen wetem hem. Mo tu, ol pijatok ya bambae oli halpem yumi blong tinghae moa long Papa blong yumi we i gat lav, i kaen, i gat sore, mo i fogivim yumi long plante defren rod.
JEHOVA I TEKEMAOT SIN
5. ?Wanem i hapen taem Jehova i fogivim ol sin blong yumi?
5 Baebol i tokbaot sin se i olsem ol hevi baden. King Deved i tokbaot ol sin blong hem se: “Ol mastik blong mi oli hivap i go bitim hed blong mi, oli olsem wan hevi baden, we i bigwan tumas blong mi karem.” (Sam 38:4) Be Jehova i fogivim sin blong ol man we oli tanem tingting blong olgeta. (Sam 25:18; 32:5) Hibru tok we oli tanem i kam “fogivim,” i minim “leftemap” o “karem.” Yumi save tingbaot Jehova olsem wan strong man we i leftemap ol sin blong yumi we oli olsem ol hevi baden long solda blong yumi, mo i karem i gowe long yumi.
‘Fogif’ (Sam 32:5)
6. ?Jehova i karem ol sin blong yumi i go longwe olsem wanem?
6 I gat wan narafala pijatok we i soemaot olsem wanem Jehova i karem ol sin blong yumi i go longwe long yumi. Ol Sam 103:12 talem se: “Hem i putum ol sin blong yumi oli stap longwe we longwe long yumi, olsem we is i stap longwe we longwe long wes.” Is i stap longwe we longwe long wes, mo tufala i neva mit. Hemia i min se Jehova i tekem ol sin blong yumi i go longwe we longwe long wan ples we yumi no save tingbaot. !I gud tumas blong save se Jehova i naf blong fogivim yumi fulwan!
“Olsem we is i stap longwe we longwe long wes” (Sam 103:12)
7. ?Baebol i talem se Jehova i stap mekem wanem long ol sin blong yumi? (Maeka 7:18, 19)
7 Nating se Jehova i karem ol sin blong yumi i go longwe long yumi, ?be hemia i min se hem i holemtaet i stap? Nogat. King Hesekia i tokbaot Jehova se: “Yu sakem ol sin blong mi i go biaen long baksaed blong yu.” O olsem we futnot i talem, “yu tekemaot ol sin blong mi long fes blong yu.” (Aes. 38:9, 17; fut.) Pijatok ya i soemaot se Jehova i tekem ol sin blong olgeta we oli tanem tingting blong olgeta, mo i sakemaot i gowe long fes blong hem. Yumi save talem tok ya tu olsem se: “Yu luk [ol sin blong mi] olsem se oli neva hapen.” Baebol i makem klia poen ya bakegen long wan narafala pijatok we i stap long Maeka 7:18, 19. (Ridim.) Long vas ya, Jehova i talem se hem i sakem ol sin blong yumi i go insaed long dip solwota. Long taem bifo, taem oli sakem wan samting i go insaed long dip solwota, bambae ol man oli no moa save karembak.
“Yu sakem ol sin blong mi i go biaen long baksaed blong yu” (Aes. 38:17)
“Bambae yu sakem evri sin blong olgeta i go insaed long dip solwota” (Maeka 7:19)
8. ?Yumi lanem wanem kam kasem naoia?
8 Tru long ol pijatok ya, yumi lanem se taem Jehova i fogivim yumi, i olsem we hem i tekemaot fulwan ol sin blong yumi we oli olsem ol hevi baden. Olsem we Deved i talem, “olgeta we God i fogivim ol rabis fasin we oli mekem, mo i kavremap ol sin blong olgeta, oli glad. Mo man we Jehova bambae i no tingbaot sin blong hem, hem i glad.” (Rom 4:7, 8) !Yes, hemia nao fasin fogif we i no giaman!
JEHOVA I WAEPEMAOT SIN
9. ?Wanem pijatok we Jehova i yusum blong eksplenem fasin blong hem blong fogivim man?
9 Jehova i yusum ol narafala pijatok blong givhan long yumi blong kasemsave olsem wanem hem i yusum ransom sakrefaes blong waepemaot sin blong ol man we oli tanem tingting blong olgeta. Long wan long ol pijatok ya, Jehova i talem se hem i stap wasem mo i rinsimaot ol sin. Mo hemia i mekem se man we i mekem sin i kam klin. (Sam 51:7; Aes. 4:4; Jer. 33:8) Mo Jehova hem wan i tokbaot gudfala samting we i kamaot from, i se: “Nating se ol sin blong yufala oli olsem kala we i laet red, be bambae oli kam waet olsem sno. Mo nating se oli red olsem kaliko we i dak red, be bambae oli kam olsem wul we i waet we i waet.” (Aes. 1:18) I had blong tekemaot wan mak we i laet red o i dak red long wan kaliko. Be long pijatok ya, Jehova i mekem yumi sua se hem i save wasemaot ol sin blong yumi we yumi no moa save luk olgeta.
“Nating se ol sin blong yufala oli olsem kala we i laet red, be bambae oli kam waet olsem sno” (Aes. 1:18)
10. ?Wanem narafala pijatok we Jehova i yusum blong tokbaot nambawan fasin blong hem blong fogif?
10 Olsem yumi bin tokbaot long las stadi, sin i olsem ol “kaon” tu. (Mat. 6:12; Luk 11:4) Taswe, evri taem we yumi mekem sin agensem Jehova, i olsem we yumi mekem plante kaon. !Nao kaon blong yumi i kam bigwan moa! Be taem Jehova i fogivim yumi, hemia i olsem we hem i kanselem ol kaon we hem i sud jajem yumi from. Mo hem i no askem yumi blong pembak hem from ol sin we hem i fogivim finis. !Pijatok ya i makem gud filing we yumi gat taem Jehova i fogivim yumi, sem mak olsem we wan man i harem gud taem oli kanselem kaon blong hem!
“Yu fogivim ol kaon blong mifala” (Mat. 6:12)
11. ?Baebol i minim wanem taem hem i talem se Jehova i “tekemaot” ol sin blong yumi? (Ol Wok 3:19)
11 Jehova i no kanselem nomo ol kaon o ol sin blong yumi, be hem i tekemaot tu. (Ridim Ol Wok 3:19.) Taem wan man i kanselem wan kaon, maet yumi pijarem se hem i putum wan bigfala X long amaon blong mane we man i mas pembak. Be yumi save luk yet amaon blong mane ya aninit long X ya. Be taem man i tekemaot wan samting, hemia i defren. Blong kasemsave long pijatok ya, yumi mas tingbaot se long taem bifo, ink we oli yusum i isi nomo blong waepemaot. Wan man i save yusum wan wetwet sponj mo i waepemaot wan raeting. Taswe, taem wan man i “tekemaot” wan kaon, hem i waepemaot fulwan. Hemia i min se yumi no moa save luk mak blong raeting ya we i stap bifo. I olsem we kaon ya i neva stap. !Yumi glad tumas blong save se Jehova i no kanselem nomo ol sin blong yumi, be hem i waepemaot fulwan tu!—Sam 51:9.
“Blong Jehova i tekemaot sin blong yufala” (Wok 3:19)
12. ?Yumi lanem wanem long pijatok ya blong tik klaod?
12 Jehova i yusum sem kaen pijatok olsem blong tokbaot olsem wanem hem i waepemaot ol sin. Hem i talem se: “Bambae mi waepemaot ol rong blong yu olsem se klaod i kavremap, mo mi waepemaot ol sin blong yu olsem se wan tik klaod i kavremap.” (Aes. 44:22) Taem Jehova i fogivim yumi, i olsem we hem i yusum wan tik klaod blong haedem ol sin blong yumi, nao hem mo yumi tu, yumi no moa save luk ol sin ya bakegen.
“Bambae mi waepemaot ol rong blong yu olsem se klaod i kavremap” (Aes. 44:22)
13. ?Yumi harem olsem wanem taem Jehova i fogivim ol sin blong yumi?
13 ?Ol pijatok ya oli tijim yumi long wanem? Taem Jehova i fogivim ol sin blong yumi, yumi no mas gohed blong gilti from sin ya long ful laef blong yumi. From we tru long blad blong Jisas Kraes, Jehova i kanselem fulwan ol kaon blong yumi. Taem hem i fogivim yumi, hemia i olsem we yumi neva mekem sin. Hemia nao olsem wanem Jehova i fogivim yumi long fasin we i no giaman, taem yumi rili tanem tingting from ol sin blong yumi.
JEHOVA I MEKEM SE YUMI FREN GUD BAKEGEN WETEM HEM
Taem Jehova i fogivim yumi, hemia i mekem se yumi save fren gud bakegen wetem hem (Haf 14)
14. ?From wanem yumi trastem se Jehova bambae i fogivim yumi fulwan? (Mo tu, yu luk ol pija.)
14 Taem Jehova i fogivim yumi long fasin we i no giaman, hemia i mekem se yumi save fren gud wetem hem bakegen. Mo hemia i blokem yumi blong no moa gohed blong gilti bitim mak. Yumi no mas gat tingting ya se Jehova i kros long yumi yet from sin blong yumi, mo i stap lukaot rod blong panisim yumi from. Bambae hem i neva mekem olsem. ?From wanem yumi trastem Jehova taem hem i talem se hem i fogivim yumi? Jehova i talem long Profet Jeremaea se: “Bambae mi fogivim ol rong blong olgeta, mo bambae mi no moa tingbaot sin blong olgeta.” (Jer. 31:34) Aposol Pol tu i talem ol tok ya bakegen, taem i se: “Bambae mi no moa tingbaot sin blong olgeta.” (Hib. 8:12) ?Be tok ya i tijim yumi long wanem?
“Bambae mi no moa tingbaot sin blong olgeta” (Jer. 31:34)
15. ?I minim wanem se Jehova i no moa tingbaot ol sin blong yumi?
15 Long Baebol, tok ya “tingbaot” i no minim oltaem se wan man i tingbaot bakegen wan samting we hem i mekem o i tingting long hem. Be i save minim tu se wan man i stap mekem wan samting. Kriminol ya we i hang klosap long Jisas, i talem se: “Jisas, taem yu go long Kingdom blong yu, yu tingbaot mi.” (Luk 23:42, 43) Hem i no talem long Jisas blong i tingbaot hem nomo long taem ya. Mo ansa blong Jisas tu i soemaot se bambae hem i mekem kriminol ya i laef bakegen. Taswe, taem Jehova i talem se hem i no moa tingbaot ol sin blong yumi, hemia i min se bambae hem i no mekem eni samting blong agensem yumi. Bambae hem i neva panisim yumi long fiuja from ol sin blong yumi we hem i fogivim finis.
16. ?Baebol i tokbaot yumi se yumi olsem wanem?
16 Baebol i yusum wan narafala pijatok we i givhan long yumi blong kasemsave olsem wanem yumi kam fri, taem Jehova i fogivim yumi long fasin we i no giaman. From we yumi sinman mo yumi no stret gud olgeta, i olsem we yumi “slef blong sin.” Be taem Jehova i fogivim yumi, i olsem we yumi “kam fri long sin.” (Rom 6:17, 18; Rev. 1:5) Yes, yumi glad tumas blong save se taem Jehova i fogivim yumi, naoia yumi no moa slef, be yumi kam ol friman.
“Yufala i kam fri long sin” (Rom 6:18)
17. ?Olsem wanem fasin blong fogif i mekem yumi kam gud bakegen? (Aesea 53:5)
17 Ridim Aesea 53:5. Laswan pijatok we bambae yumi tokbaot, i talem se yumi olsem ol man we oli kasem wan sik we i blong ded nomo. Be tru long ransom sakrefaes blong Jisas we Jehova i givim, yumi save kam gud bakegen. (1 Pita 2:24) Taem yumi mekem sin, yumi spolem frensip blong yumi wetem Jehova, be ransom i mekem se yumi save fren gud bakegen wetem hem. Taem wan man i kam gud long sik blong hem, hem i glad tumas. Long sem fasin, taem yumi save se yumi save fren gud wetem Jehova bakegen mo se hem i save glad long yumi, yumi harem gud tumas.
“From ol kil we hem i kasem, yumi kam gud bakegen” (Aes. 53:5)
?FASIN BLONG JEHOVA BLONG FOGIVIM MAN I MEKEM I GUD LONG YU OLSEM WANEM?
18. ?Yumi lanem wanem long ol pijatok long Baebol we oli tokbaot fasin blong Jehova blong fogif? (Mo tu, yu luk bokis ya “?Olsem Wanem Jehova i Fogivim Yumi?”)
18 ?Yumi lanem wanem long ol pijatok long Baebol we oli tokbaot fasin blong Jehova blong fogif? Taem Jehova i fogivim man, hem i fogif fulwan mo blong olwe. Hemia i mekem se yumi save fren gud bakegen wetem Papa blong yumi long heven. Be yumi save se fasin blong Jehova blong fogivim man, i wan presen we yumi kasem from we hem i gat lav mo i kaen, be i no from we yumi nao yumi wantem kasem.—Rom 3:24.
19. (1) ?Yumi mas glad from wanem samting? (Rom 4:8) (2) ?Bambae yumi tokbaot wanem long nekis stadi?
19 Ridim Rom 4:8. !Yumi glad tumas se Jehova i God ya we i ‘fogivim ol man we i no giaman’! (Sam 130:4) Be blong Jehova i fogivim yumi, yumi mas mekem wan impoten samting. Jisas i talem se: “Sipos yufala i no fogivim ol man from ol rong blong olgeta, Papa blong yufala tu bambae i no fogivim yufala from rong blong yufala.” (Mat. 6:14, 15) Taswe, i impoten tumas we yumi folem fasin blong Jehova blong fogivim ol man. Long nekis stadi, bambae yumi tokbaot olsem wanem yumi save mekem samting ya.
SINGSING 46 Jehova, Mi Mi Tangkiu Long Yu
a Nating se tok ya fogif i save minim plante defren samting, be Hibru tok we oli yusum blong talem “fogif,” i minim nomo fasin blong fogif we i no giaman. Plante translesen blong Baebol oli mestem impoten tingting ya, be Baebol Long Niu Wol Translesen i no mekem mastik ya, hem i putum tingting ya i klia long Ol Sam 130:4.
